المقالات
السياسة
حرائق النخيل .. وما ادراك .. ما السدود !!
حرائق النخيل .. وما ادراك .. ما السدود !!
06-08-2014 03:34 PM

طبعا كل السودان سامع عن الحرائق البتحصل في منطقة كجبار ودال ، وللماعارف ، منطقة كجبار دي هي منطقة المحس ودي الحتة العايزة تعمل فيها الحكومة سد كجبار وهي منطقة ممتدة من وسط المحس لحدي الحدود الشمالية لدنقﻻ وطبعا كلها مرشحة للاغراق ، اما منطقة دال هي منطقة الشﻻل الثالث على نهر النيل وهي بتقع في الحدود الشمالية لمنطقة السكوت وهي بداية منطقة وادي حلفا ، ومقترح فيها اقامة سد دال ، وطبعا في حالة قيام سد دال كل منطقة السكوت حتغرق بما فيها منطقة شمال المحس لحدي سد كجبار ، وطبعا المسافة بين السدين ما كتيرة ، كلها ساعة بالسيارة يعني ما فايتة ليها 100كيلو ، ودا بيقودنا لي نتيجة خطيرة بتقول انو السدين الهدف منهم ما التنمية وﻻ الكهرباء ، ودا كﻻم مفروغ منو ، ﻻنو اساسا بعد المنطقة تغرق !! تنمية شنو ، الا تكون تنمية تحت الموية ، وفي زول ( كرزاي ) ممكن يجي ناطي ويقول ليك حيرحلوكم وحيبنوا ليكم بيوت سمحة وحيعوضوكم تعويضات مجزية ، والرد المناسب للكرزايات الزي ديل طوالي هو تحكي للجنبك الحصل للحلفاويبن والحصل للمناصير ، وقلت تحكي للجنبك لانو الكرزاي دا اساسا مقتنع جواه بعدم جدوى السد اقتصاديا لكن طبعا ﻻنو كوز بتحرك بي تعليمات من فوق ، طبعا ما نسيت اوريكم كرزاي يعني شنو ، الكرزاي دا لقب اطلق من قبل المناهضون للسدود على الناس المندسين بين الناس وبيعملو فتن والحاجة دي انتشرت بين الناس بدرجة كبيرة بسبب الكرزايات ديل ، وهو لقب منسوب لحامد كرزاي وكدا وضحت المسالة .. !!

* المهم .. نرجع لي موضوعنا ، عن جدوى السد ، قلنا انو السد ما هدفو تنموي ، وهو طبعا في المقام الاول عشان ياكلو القروض بتاعتو ، وثانيا عشان يعملو حماية للسد العالي البدا يتاثر بي تراكم الطمي وكدا ، يعني سدود لحماية شعب أخر ، على حساب اهل المنطقة وارض السودان ، وطبعا للمعلومية ، وزارة الري اعلنت وقالت انو سد مروي فشل في الايفاء بمتطلبات النهضة الزراعية ، وقالو انو فشل في سد النقص في الامداد الكهربائي ، حتى في اخبار مؤكدة بتقول انو حصلت فيهو شقوق ، غير النتائج السالبة في المنطقة شمال السد ، موية النيل بقت زي مياه البرك معفنة ولونها اخضر بي كترة الطحالب ، والمياه قلت ، غير كدا تسبب في تغيرات مناخية ضرت بالبيئة ، يعني حتى فشلو في ادارة سد بعد ما شبكونا الرد السد ويا اوكامبو يا كديس ما حنسلمك حتى فطيس ، المهم لي يوم الليلة ناس المناصير ما اخدوا التعويضات وكل المشاريع المصاحبة فشلت والناس هاجرت بعد فقدت الامل بالضبط زي الحصل في حلفا الجديدة ، بعد فشل مشروع خشم القربة وحلفا الجدية الناس هاجرت لي مناطق ام عشر والكﻻكﻻت جنوب الخرطوم وهاجروا للمنافي وقرى حلفا الجديدة الليلة خرابات ، ودا الحصل لي قرى المناصير ، اما وادي حلفا هناك في اقصى الشمال كانت عايشة على الميناء النهري ، وبعد افتتاح ميناء اشكيت البري خﻻص الا يرحلوا تاني ، مافي سبب يقعد الناس هناك ، ودا مقصود طبعا وهي خطة مرسومة بدت بي تمصير حﻻيب ، وبعدها اغراق منطقة السكوت والمحس بعدما تم افراغ وادي حلفا اجمل مدن افريقيا وقتها ، المهم كدا اتخيلي في حاجات وضحت .. !!

* نرجع لي عنوانا الفوق داك ، والبقول ، حرائق النخيل وما ادراك ما حرائق النخيل ، في البداية كنا بنقول السبب هو الاوساخ وعدم تنظيف الاشجار بطريقة دورية وكدا ، وبعداك قلنا دا الاهمال ، لكن اي شي لمن يتكرر بطريقة منظمة بتبفى ظاهرة ، ومسالة حرائق النخيل بقت ظاهرة وتحولت لي كارثة ، وطبعا اتاكدت انها بفعل فاعل ، وهي بتحدث فقط في مناطق السدين ، والحاجة دي ما حصلت لاﻻف السنين في المنطقة ، و المدهش في الموضوع ، ما بتحصل في المناطق الجنوبية ليها زي دنقﻻ وجنوب دنقﻻ والباوقا وكدا ، يعني نخيل المحس بس هو المستهدف ، وبطريقة منظمة وبتم يايادي مأجورة بتاخد قروش قصاد الحرائق دي ، وفي زول ممكن يسال ، السبب شنو ، لي الجماعة ديل بحرقوا نخيل النوبيين ، الاجابة طبعا ما صعبة ، نحن في البداية قلنا السد فيهو قروض والقروض دي قروش ، ومعظم تكاليف السد ما في السيخ والاسمنت بتاع هيكل السد ، ﻻ طبعا ، النصيب الاعظم من التكاليف بتمشي للتعويضات واعادة التوطين والتهجير وكدا ، لكن البحصل في السودان غير وهي تجربتين في وادي حلفا وفي مروي ، الحصل انو التعويضات ما بتصل كاملة وفي ناس ما بتصلهم ، والسبب هو السدود دي بتتعمل في ظل الانظمة العسكرية ونظام الحزب الواحد ، يعني مافي مساءلة ومافي قانون كل الموضوع نهب منظم ، اها نرجع لدوافع الحرائق ، السبب الاول طبعا هو تخفيض التعويضات ، ولحدي اللحظة اتحرقت ما يقارب المليون نخلة ، عارفين يعني شنو مليون ، يعني الف الف نخلة ، واذا ضربنا سعر النخلة الواحدة في التعويضات ما اقل من خمسة لي عشرة مليون ، طبعا ديل ممكن يعملوها خمسمية الف لي مليون ، وفي الحالتين هي مبالغ خرافية ، ودا كلو طبعا تخفيض للتكاليف ، ( شفتو الخسة والندالة وعدم الضمير وقلة الادب ) بالضبط ، خلو باقي الاسباب التانية وال منها يخلوا المنطقة طاردة للسكان ، ويكرهوا الناس في بلدهم عشان يقبلوا بالسد ، لكن مهما كانت الندالة والخسة ، موضوع السد دا ماحيقوم لسبب بسيط ، هو .. الاهالي ما عايزين ، يعني المسالة ما قوة ، وعمرها مافي تنمية بالقوة ، والحصل في كجبار من قتل بالرصاص للمحتجين ، موثق وقاعد كجريمة في مكاتب الامم المتحدة جنبا الي جنب مع جرائم الابادة الجماعية في المناطق التانية ، المهم حاولوا يهرشوا الناس عشان يوافقو .. قالوا ﻻ للسد ، حاولوا تزوير ارادة الناس ويقولوا الناس موافقة عبر الوالي والمعتمدين واذاعة دنقﻻ ، لكن فشلوا والناس قالت ﻻ للسد ، حتى المعتمد السابق لوادي حلفا الوالي الحالي دا رفدو من الشغل عشان قال ﻻ للسد وجاب واحد بدلو ما متعلم وما تامي حتى الابتدائي عشان ينفذ من خﻻلو الخطط السرية ومن ضمنها حرائق النخيل ، وخﻻل الاسبوعين الفاتو حصلت حرائق قضت على قريب العشرة الف نخلة ، ولسة طبعا.. !!

* لكن المريح في الموضوع الناس عرفت انها حرائق مفتعلة ، وبتحصل بايادي مأجورة ، بي مقابل مادي ، وتم اكتشاف بداية الخيط الحيكشف العصابة الاجرامية ، وهسي الموضوع دا ماشي كويس لانو عرفوا ناس متورطين وفي متابعة تامة ليهم عشان يقبضوهم متلبسين ، طبعا الحكومة حتخارجهم وماحتعاقبهم ، لكن يكفي انو نفضحهم والراي العام يعرف الحقيقة والامم المتحدة تعرف الحقيقة ، لانو قضية النوبيين قضية عادلة ما بتستحمل التسويف والاهمال ، اها دا جزء صغير من القصة ، ان شاء الله الناس الماكانت فاهمة فهمت ولو شوية ، والرسالة دي طبعا وصلت للجهات المسؤولة والمتورطة في الموضوع وحيعملوا رايحين ، لكن طبعا الغيظ قاتلهم من جوة ، والي لقاء قريب .. !!


تعليقات 6 | إهداء 0 | زيارات 1429

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1030497 [ظلال النخيل /فريد محمد مختار]
0.00/5 (0 صوت)

06-09-2014 07:04 PM
الأخ العزيز نورالدين نشكرك على تطرقك لهذا الموضوع أو نسميه ( الكارثة) ونتمنى من كل الهميمين تنوير اهلنا بخطورة ما يحصل في المنطقة والناحية الاعلامية هي سلاحنا القوي لمواجهة هذه الابادة التي تمارسها الحكومية وكلابها في المنطقة من حرق للاخضر واليابس وتهجير قسري بكل الوسائل للانسان النوبي ..
عليه اقترح الآتــــــــــــي :
1- نبدأ بأنفسنا وكل واحد مهاجر عن البلد ومتغرب عن المنطقة سواء كان في الخرطوم أو في أي مدينة أخرى بخلاف دنقلا او خارج السودان علينا أن نتخذ قرارا ملزما بالعودة للأرض لتعمير المنطقة مهما كلفنا ذلك وعلينا تحمل المعاناة .ومن تجبره الظروف بالابتعاد عليه أن يلزم نفسه بالسفر الى بلده وقضاء احدى اجازات العيد أو الاجازة الصيفية برفقة عائلته حتى ولو عشرة أيام في السنة المهم يوقد النار في بيته ويربط أولاده بموطنهم الاصلي . لأنو الجيل اللي اتربى خارج المنطقة أكيد ولاءه ما حيكون قوي....
علينا باعمار بيوتنا وبيوت آبائنا في المنطقة لا أن نتركها خاوية يسكنها البوم ..وقتها كلمتنا ستكون أقوى وسنفشل كل مخططات الحاقدين العروبيين والاخوان الارزقية.
2- علينا تتبع كلاب المؤتمر الوطني من بني جلدتنا ومراقبة تحركاتهم وعمل قائمة سوداء بأسمائهم في كل منطقة وقرية وهجر...ونحن على يقين بأنهم باعوا أهلهم وذويهم وأرضهم بثمن بخس ولن يحصدوا الا التراب وترابنا أغلى منهم ..فهم مصلحجية ينتمون لحزب المؤتمر اللاوطني من اجل مصالح مادية واجتماعية لا من قناعة تامة ...قاتهلم الله أنى يؤفكون

[ظلال النخيل /فريد محمد مختار]

#1029606 [عبدالله النوبي]
0.00/5 (0 صوت)

06-08-2014 11:32 PM
العمالة والخيانة بدأها ( مك ) السدود واقطاعي التعويضات أسامة عبدالله والبقية يكملها التوابع بالريموت كنترول حكيت أبعاد الجريمة محلياً غير أن سبب تراكم الطمي على السد العالي ليس حقيقي لاسباب عديدة منها ما ذكرته سد مروي حول المجري وعمل برك آسنة نتيجة تراكم الطمي في غير مجرى النهر ويوم ما بحول الله عز وجل سيأخذ النهر مجراه عنوة واقتدار وينهد السد الربوي القروض للجريمة أبعاد دولية وتفكير بعيد جداً تقوده دولة يهود لافراغ المنطقة حول النيل ونفس هذا يحدث للعراق لكن بتجفيف من قبل سدود تركية زعيمة الإخوان المجرمين .
وان كان للجريمة بعد محلي آخر اذا تذكرنا ابادة دارفور وفصل الجنوب ومشاكل الشرق يبقا فاضل تكوين قبلي محدد هو صاحب المصلحة في التهجير القسري لدول الجوار أو الهجرة وراء المحطات واعلنوها اكثر من مره من مك البلد لخاله الرئاسي واحد دغمسه والآخر رطانة

ولا تحسبن الله غافلا عما يعمل الظالمون إنما يؤخرهم ليوم تشخص فيه الأبصار

أفنجعل المسلمين كالمجرمين مالكم كيف تحكمون

[عبدالله النوبي]

#1029490 [ابو حمدي]
0.00/5 (0 صوت)

06-08-2014 08:38 PM
يديك العافية انشاء نهاية هذا العهد البقيض علي الابواب لان الظلم عم اركان البلد لم ينحوا منه احد

[ابو حمدي]

#1029477 [الحقيقة المرة]
0.00/5 (0 صوت)

06-08-2014 08:21 PM
استاذ نورالدين ..... بعد التحية
نداوم علي قراءة ما تكتب ...لدي ملاحظة صغيرة لماذا تفصل الكلمات أحياناً ... في هذا المقال تجد الكلمات التالية ( لدنقﻻ .... الشﻻل.....ودا كﻻم.... وغيرها كثير ) وهكذا .. ما السبب ؟؟؟

[الحقيقة المرة]

#1029398 [الهم الكاتل]
0.00/5 (0 صوت)

06-08-2014 06:14 PM
والله نحنا مصيبتنا في الطابور الخامس الذي لا يرى ابعد من قدمية وده اس البلاء لو ان الموطنين امسكوا بالفاعل وهو معلوم بالنسبه اليهم وحاكموه بما يرضي الله سيكون عظة وعبرة لغيره من ضعاف النفوس الارزقية الذين لا تهمهم نوبه او عروبه وما يفعلوه في ارض النوبة يمكن تطبيقة في اي بقعة من السودان وعلى الشعب السوداني ان يوقف هذا العبث بالرفض وان لا يترك الامر لاهل المنطقة فحسب يواجهوا مصيرهم مع هذا النظام الهمجي ..

[الهم الكاتل]

#1029337 [سيف الله عمر فرح]
0.00/5 (0 صوت)

06-08-2014 05:01 PM
أستاذ نورالدين عثمان ، ما قصرت ، الله يديك العافية .

لولا كلامك المنطقى ، أنا كنت قربت أقتنع بأن سبب حريق ملايين أشجار النخيل فى منطقة المحس والسكوت هو الأوساخ وعدم تنظيف الأشجار بطريقة دورية ، واستخدام انابيب الغاز فى المنازل بدلآ عن مخلفات النخيل !! ..

صحيح مثل حرائقنا لماذا لم تحصل فى مناطق الدناقلة والشوايقة والرباطاب والجعليين ؟؟؟؟؟؟؟؟؟؟ .. ما هم أيضآ بيعانوا من نفس مشاكلنا ! ..
حقآ انها بفعل فاعل مأجور دنىء خسيس ، انها مؤامرة . فلا عجب بعد أن عرفنا السبب ! .

الحكومتين المصرية والسودانية هى التى تتآمر ضد حقوق شعبنا شعب النوبة ! ..
نعم الحكومة المصرية عدوها الأول الآن هم كيزان مصر ، وأعلنوا الحرب ضدهم ! .. أما تعاملهم مع كيزان السودان المتحكمون فى السلطة تختلف ! ، فستكون أفضل من تعامل الحكومات المصرية من جمال عبدالناصر حتى عبداللطيف السيسى !! ، لأنهم موقنون أن لا أحد مستعد أن يبيع شبرآ من أرض السودان بمال الدنيا ، أو بالتخويف ! ، إلا كيزان السودان ! . المصريين عارفين أن مصلحتهم فى بقاء كيزان السودان ، والمصريون متأكدين من استسلام كيزان السودان لهم مقابل كنكشتهم فى الحكم ! ..
أما الميرغنى والمهدى ، فهم أخطر على مصالح النوبة من الكيزان !! .

على النوبة أن يتكاتفوا معآ أينما وجدوا ، ويؤازروا الحكومات الديمقراطية فى السودان أكثر من أى وقت مضى للحفاظ على منطقتهم من الغرق لمصلحة المصريين !، ولمصلحة النفعيين الطفيليون .

المصريون يفعلون أى شىء فى سبيل مصلحتهم ، ولا يهمهم شعب نوبى عاش أو مات ، ويقلقهم الحضارة الكوشية ! لأنها تنافس الفرعونية ! .

[سيف الله عمر فرح]

نورالدين عثمان
نورالدين عثمان

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة