المقالات
السياسة
القطامة فن وابداع
القطامة فن وابداع
06-17-2014 12:28 PM


يا اخوانا طبعا انا ما قاصدكم انتو بس الناس اليومين ديل مع السخانة الملهلبة في الجو وفي الجيوب وغلاء الاسعار والناس روحها محرقاها بقت القطامة هي الطريق القصير للاختصار والاسلوب الارقي الماشي في البلد وانواعها كثيرة "قطامة اجتماعية وقطامة تعليمية وقطامة صحية وقطامة سياسية والخ , يعني لو انت في بيت عزاء ومديت ايديك لزول ساكت ولحقنو اصابعيك وانت ما قاصد طوالي تلاقي عينهو اتكرمشن وعضلات وشيهو اتلملمن وعضه سنيناتهو ويقول ليك ياخي القطامة ليك شنو ما تسلم كويس وطبعا يا اخوانه اصلا مصطلح قطامة ده اصله لاتيني جاي من كلمة قطامينيشن ووقالو الخواجات نعم انهم كريمين ماقصروا قامو وزعوه للدول المستعمرة بس لانه انحنا وبحكم تفاصيل وجووهنا وجاهزية حالتنا النفسية قدرنا نستحوذ علي القدر الاكبر من القسمة يعني بس يكفي شافعنا تلقاهو ببكي ويحدر لامه وسنيناتهو تقرض في حلمة البزازة تعبيرا عن القطامة ورافع شعار براءة التحلل "" وبعدين فن القطامة ذاتو شدة ما متأصل فينا اصبح موزع علي كل الفئات يعني مثلا عندنا بعض القبايل الراجل فيها بيعرفو بقطامته يعني لمن يسلم عليك يديك خبيتات ترحاب علي كتفك لمن ضهرك يتلوي وبعد داك ان لحق قبض ايديك ياهو الكسر اصابعيك وانت تتململ تعاين ليهو في وشويهو تشوفو كله عضلات ويكرج في سنونو وانت تململ ويقول ليك والله مشتاقين وكيفك انشا الله تمام وسائلني ربي لمن يفك يديك بس حقنة بنج وطلقوها فيك وده يا ناس بسمهو سلام طيب الشكل كيفنو ؟
وبعدين انحنا ذاتنا بقينا اصحاب مهارة وفن في القطامة يعني تلاقي ابوك تاكي ضهرو تحت ضل النيمة سارح سرحة عدوك وتجي تقول ليهو يا با انت كويس فت مرة يتلفت عليك ويقول ليك لا لا تعال ربطني ولا وديني المكاشفي مالك شايفني مجنون ولا بريالتي انت يا ولد ما عندك شغلها تقضاها ولا شنو هي ناقصا الفينا مكفينا """ وفي المدرسة لو عملتها فيها الولد دمك خفيف وقولته لاستاذ العربي استاذ لو سمحت انت الاعراب ده في العربي بس ولا في اللغات التانية ؟ اول شئ يرمي الطبيشرة من اصابعيهو والفصل كله يصن ويقول ليك نعم انت شايفني هنا وداعية ولا فاتح دكان ونسة اعراب انت كدي اقدر علي اعراب العربي بعدين شوف اللغات التانية والله محن ؟ والعجب كل العجب والفن كل الفن والابداع في فن القطامة كله في المستشفى وما ادراك ما المستشفى يعني تلاقي زولنا المريض خلاص بطلع في الروح والممرضة او ما يسمي بملائكة الرحمة عندنا تقول ليهو هو ياراجل هوي كدي مد رجليك ديل الواحد فيكم بينه وبين القبر شبر وبرضوا داير علاج العالم دي يجيبوها من وين دم عليكم "" ولا العجب في عنبر الولادة تلقي الحامل وشها وارم ويديها وارمات بسبب الممرضات تلقاها تتوجع والممرضة واقفة فوق راسها ذي ملك الموت وتنهزر فيها هوي هوي خلاص الواحدة فيكن قايل هنا في امها ولا في ابوها كرهتونا يعني انتي فاكرة نفسك حامل بنبي الله الخضر "" وبعدين ده كله كوم والقطامة السياسية كوم ودي طبعا ظاهرة في كبارتنا سياد الحكومة واصحاب الرأي الواحد تلاقي الواحد فيهم فتحت خشمو كان يقول ليك ايها الشعب والله انحنا واضحين وما خيفين من احد الا الله والرهيفة التنقد والدايرنا اليلحس كوعو والزارعنة اليجي يقلعنا وبعد ما يخلص خطابه الجماهيري يرفع عصاته لتحية المساكين الواقفين تحته ومعها حميرة وتلاقيهو ينطط ذي المصارع والفنان وراها يهنق ساكت
بتريد اللطام اسد الكداد الزام
هزي البلد من اليمن للشام
سيفك للفقر قلام
ديم فى الدقر قال العمير مسيوم
القوى والضعيف من عينو طار النوم
الكفر النجوس ما بختوا من اللوم
حجرت الدرب خليت طيورو تحوم
الاسد النتر بى جيهة الابقار
لمولو الاورط شايلين سلاح النار
ود حبوبة قام ورتب الانصار
فى كتفية ديك كم شبعن صغار
وطبعا الجماعة الواقفين جنبه ميتين من الخوف وتلقاهم قايمين وواقعين تكبير وتهليل يعني بالمعني العام انحنا بقينا ناس متأصلة فينا روح القطامة والما مصدقني اليسأل اهل العريس لما مشو زعلانين بعد حفلة الزفاف لانه ام العروس قالت ليهم والله الحمد لله بقينا اهل ونسايب بس من هسي حقو يا اهلنا كل زول يعرف حجمه ووزنه ويتمدي علي طول لحافه وبعدين ووالله بس الله يجازي محنك يالقسمة بتي دي يا ما خطبوها الدكاترة والمهندسن والتجار ولكن يا بنات امي نسوي شنو ده الله وقسمته وطبعا الكلام ده يا دوب بعد حفلة الزفاف مباشرة ياهو ده النسب اب قطامة ويابلاش
يا خي حتي شكارتنا وحكامتنا تلاقيها في كلامها ده شئ كتر وبلحيل مخالف وعنوانه كله قطامة في قطامة يعني قبيل لمن مدحوا الفارس نقد الله ود عمر الركابي لمن وصل نسوان بارا وحماهم من الحرامية وقطاع الطرق شكروه شكر التاباني :



يسلم لي خال فاطنة ليهن*** بلالي البدرج العاطلة
اب كريق في اللجج سدر حبس الفجج
عاشميق حبل الوجج انا ابوي مقدام الحجج

والله بس الحمد لله الواحد خفف مرقاته وملاقاته للناس عشان يقلل مهارة القطامة يا اخوانا ما في بديل – خلونا نفكر
[email protected]


تعليقات 1 | إهداء 0 | زيارات 1057

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1038141 [مع العدالة]
3.71/5 (20 صوت)

06-18-2014 10:14 AM
روح بالله بلا قطامة بلا بطيخ عالم فارغة بشكل ملوة الويكة بى 135جنية وتقول قطامة بلا يخمكم

[مع العدالة]

ردود على مع العدالة
European Union [بارود] 06-18-2014 01:37 PM
والله يا بتاع العدالة انا من خلال تعليقك المتواضع ده عرفت ليه الزول ده كتب عن القطامة


عبد الباقى الطيب محمد الحسن
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة