الست الرئيس
06-23-2014 08:51 PM

يقول الخبر الذى ورد بهذه الصحيفة بعدد الخميس 19 يونيو الحالي ( كشفت أمينة المرأة بالمؤتمر الوطني إنتصار أبوناجمة عن عزمهم الدفع بمرشحة في قائمة الأسماء التي سترشح في المؤتمر العام لحزبها في أكتوبر القادم لرئاسة الحزب والجمهورية وأكدت إنتصار في تصريحات محدودة أن ذلك يتم وفق الدستور وأنه لا يمنع بالدفع بإمرأة للترشح لرئاسة الجمهورية)
إنتهي حديث (الست) إنتصار أمينة المرأة بالحزب الإسلامي الوطني والتي يبدو أنها لا تعلم أن جميع فقهاء المسلمين يشترطون فيمن يتولى الولاية العامة أن يكون ذكراً وجميعهم أكدوا بأن تولي المرأة الولاية العامة (الخلافة) لا يجوز لغير بالغ كما لا يجوز لمجنون ولا امرأة.
فالمراة يا ست (إنتصار) في الإسلام لا يجوز لها أن تتقدم على الرجال، ومن ذلك الصلاة إذ

لا يجوز لها أن تتقدم على الرجال؛ ولذا فإنه لا يجوز لها أن تكون إماماً بالرجال في الصلاة، كما أن صفوف النساء متأخرة عن صفوف الرجال، بل إن خير صفوف النساء آخرها، وهو ما ابتعد عن صفوف الرجال.
فكيف برئيسة الجمهورية وهي تتقدم (الجميع) والوزراء والمستشارين الرجال ماشين وراها !!
والمراة يا ست (إنتصار) لا يصح لها أن تخطب بالناس الجمعة. وقد عُلِم أن (الخليفة) هو إمام الناس في الصلاة، وهو خطيبهم في الجمعة، والعيدين، وسائر المناسبات، فكيف يصح للمرأة أن تخطب أمام حشود الحزب في (عيد الثورة) لو فضل فيها عيد .
إن الشرع قد اختص المرأة ببعض التكاليف التي تفارِق الرجل فيها؛ وذلك مراعاة لفطرتها وطبيعتها التي فُطِرت عليها، من ذلك: أنها أُمرت أن تقرَّ في بيتها، وألا تخرج إلا لضرورة (أها مع المؤتمرات دي كيف)، كما أنها أُمرت ألا تسافر يوماً وليلة إلا مع ذي محرم (بخت الراجل طبعن) وأُمرت أيضاً ألا تخلع المرأة ثيابها في غير بيت زوجها أو أهلها (يعني فنادق ما معانا) وأُمرت أيضاً ألا تخرج من بيتها متعطرة مطلقاً، (العطور خليناها الحنة كيف؟) وقد جعل الإسلام جسدها كله عورة !! خليك يا ست (إنتصار) من ده كوووولو الإسلام (يا أستاذة) قد جعل صلاة المرأة في بيتها أفضل من صلاتها في المسجد تقولي ليا (ليس هنالك ما يمنع بالدفع) ؟؟
تعالو أيها القراء الكرام نتخيل (مجرد خيال) أن الست (فلانه الفلانية) قد تم أختيارها (رئيسة للبلاد) و (تمت الناقصة) بداية سوف يكون السيد (بعلها) هو (سيد السودان الأول) يقف خلفها في المناسبات وهو يبتسم (الما بخليهو يبتسم شنو بايضه ليهو في قفص) ..
كما أن القصر سوف تدخله (مهن جديده) لم يعهدها منذ (الإستقلال) ستكون بلا شك هنالك (حنانة الرئيس) وهي التي يناط بها (نقش الحنة الما خمج) للست الرئيس كما سوف يكون هنالك (مصممة أزياء الرئيس) وهي التي تقوم بإختيار وتصميم (أثواب الرئيس) السادة والمشجرة و(الربط) كما أن هنالك مختصة (مكياج الست الرئيس) وهي التي تقوم بوضع اللمسات الفنية على وجه (الست الرئيس) من مساحيق و(كريمات) وخلافه (يعني تطلع على الجماهير بدون مكياج) !!
أما (صائغ الريس) فهو الشخص المناط بيهو إختيار السلاسل والختم والحلقان والغوائيش المناسبة (دهب دبي وإنتا طالع ) .. أما (كوفيرة الرئيس) فده (كلام تاني) لازم تكون زوله فنانة جداً عشان (الست الرئيس) لازمن كل يوم تكون بي تسريحه شكل (للمناسبات الخاصة طبعن) لأنو الماسبات الرسمية بتكون (محجبه) ما نظام الحكم إسلامي وكده !
ده كوووولو كوم وحكاية (حمل) الست الرئيس كووووم تاني تبدأ الحكاية من الشهر التالت عندما تبدأ (البطن) في البروز وتبدأ (الست الرئيس) في لبس الملابس الفضفاضه وهي أمام عدسات المصورين .. أما من الشهر السابع (وإنتا ماشي) عندما تبلغ المسأله مداها ويتعذر عليها (تفتيش قراقول الشرف) وهي تمشي (بالجنبات) فعندها تاخد (الست الريئس) إجازة وضوع حيث يتم حجز جناح لها في أحدي مستشفيات الولادة … الماليزية طبعن !!
كسرة :
ده كوووولو كوم ولمن يموت بعل الست الرئيس كووووم تاني … عشان ح تتحبس أربعة شهور وعشرة يوم وكده !!

كسرة :
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و+و؟
): كسرة ثابتة (جديدة
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و+و؟


تعليقات 44 | إهداء 0 | زيارات 7567

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1044235 [هباااااااااااااااااش]
2.60/5 (9 صوت)

06-25-2014 05:09 AM
ههههههههه الليله ياجبرة حسبو نسوان يكون مبسوط منك اربعه وعشرين قيراط

[هباااااااااااااااااش]

ردود على هباااااااااااااااااش
European Union [حسبنا الله ونعم الوكيل] 06-25-2014 11:20 AM
بالضبط نفس فهم حسبو نسوان والغريبة مثله كثر في هذه الراكوبة ولما الواحد يخالفهم الراي يقولوا ليك كوز؟؟!! هو ما ياهو ده ذااااته فهم الكيزان وأساسا ما جابو الكلام ده الا لأضحاك الشعب السوداني الهم عارفين نفسيته العجنوها في 25 سنة وحسبنا الله ونعم الوكيل


#1044111 [A. Rahman]
2.33/5 (7 صوت)

06-24-2014 10:57 PM
لكن يا شيخ الفاتح لما يقولو العمر لا يقل عن خمس و ثلاثين سنة لن تجد واحدة تتقدم للمنصب غير سارة نقدالله التي احتفلت قبل أسابيع قليلة بعيد ميلادها الستين، يعني بالتزكية، و بعدها مين يكون الامام؟. تحياتي

[A. Rahman]

#1044075 [تينا]
2.13/5 (6 صوت)

06-24-2014 09:44 PM
حبااااااابك الف (((سودانى ساكت)))اخوى ... ان شاء الله دائما فرحان يا رب والنور نورك اخوى ... اشكرك على شعورك النبيل ... تسلم ... تحياتى ...

[تينا]

#1043892 [الجمكسين قاتل الصراصير]
2.38/5 (7 صوت)

06-24-2014 05:30 PM
نهوض "القافل الصحافة" و"سقوط "الفاتح جبرا"

تصحى من النوم تلقى أمينة أمانة المرأة في حزب المؤتمر الوطني (اللي هو الحزب بتاع النظام العام وجلد النساء داك) بتتكلم عن مشاركة المرأة السياسية وطرح الأمانة لترشيح إمرأة لرئاسة الجمهورية، وتستغرب .. لكن بتفرح! لأنه وبغض النظر عن ماوراء هذا الخبر أو مدى جدية الحزب في الطرح، إلا أنه خبر جيد ويمكن أن يستخدم كأداة (مناصرة) لمشاركة المرأة (بشكل أكبر) في السياسة! الخبر لا يشبه المؤتمر الوطني – أيوة عارف القصة دي – لكن أي حادب/ة على حقوق الإنسان المفروض يركز مع الخبر ده ويتعامل معاهو بمسؤولية.

يقوم يجيك الكاتب (الساخر) الفاتح جبرا .. اللي هو كاتب محبوب وله جمهور ما شوية .. والمعروف بي إنه "مهموم" بالإنسان السوداني وبالغلابة وبي خط هيثرو (ووووووو) الباعوهو (ووووو) .. وما يلقى (يسخر) إلا من الخبر الفوق ده! وطبعاً الزول ده (كاتب) .. يعني شغال (كاتب) وظيفته وأكل عيشه (الكتابة) .. فما ينفع أنا (بإعتباري ناس قريعتي راحت ساي وبكتب بس لامن أتغاظ) ما ينفع أقول ليهو كان ممكن (تسخر) من أي خبر تاني من الأخبار المخزية المالية الجرايد والإنترنت دي .. وتخلي الخبر ده في حاله!

وبالمناسبة أنا من محبي كتابة الفاتح جبرا، ولكني لست من رواد مدرسة (تأليه) الكاتب وقبول (كل) ما يكتبه، فباب الخطأ موارب لكل إنسان/ة .. وأنا مرجعيتي مبادئي. وطبعاً ربنا هو الأعلم بالنيات، وقد يكون عمنا الفاتح جبرا قاصد (يسخر) من المؤتمر الوطني بي إنه يطلع المنسوبة بتاعته - أمينة أمانة المرأة - زولة داقسة ساي وما (إسلامية) وما عارفة تعاليم الدين الرصاها في مقاله العجيب ده (ما حأكتب إسم المقال لأنه ما عندي رغبة على الإطلاق في تسويقه زيادة .. كفاية الناس المتابعين جبرا وحيكونوا قروهو أصلاً)! لكن الأستاذ الكاتب (الساخر - المخضرم) فشل تماماً لو ده كان قصده، يعني بدل يسخر من المؤتمر الوطني، سخر من المرأة السودانية ومن مشاركتها السياسية، وده الفهم "المباشر" البيتفهم بيهو مقاله، وعليه ردي حيكون على الأساس ده ..

طبعاً بادئ ذي بدء .. أنا (كرهتي في الدنيا دي) حاجتين: الأولى حركات "لا يجوز في الإسلام" و "لا يجوز شرعاً" بدون عرفة وبدون دليل (قااااااااطع) ومقنع! و(كرهتي التانية) هي يا قول حبوبتي الله يرحمها (حشكين) – يعني حشر – الدين في المسائل بدون ما يسألوك عن رأي الدين في الموضوع ده شنو! أها أستاذ جبرا وقع ليك في الأمة دي تشريع تقيل بدون أي معرفة ولا مناسبة، ووقع ليك موعظة تقيلة في الناس دي! وطبعاً في (هوى) سوداني إنه من ما الموضوع يكون متعلق بالمرأة، الناس (تملص) قمصانها وبناطلينها، وطوالي تلبس (جبة) الداعية الإسلامي العجيب الحافظ الدين ده عن ظهر قلب!

والعجيب جداً (حنك) إنه "الخليفة" مفروض يكون إمام المسلمين في الصلاة! خلاص الخلافة البيقولوها من زمن ديك جات خلاص؟ بركة والله!!! خليفة مين والناس نايمين في السودان القاعد في قعر العالم في أي قائمة دولية .. ولا يتصدر إلا قائمة الدول الأكثر فساداً؟؟؟ حسي عليك الله ده (حنك) ليك؟ عشان الخليفة مفروض يئم الناس عشان كده المرأة ما مفروض تكون رئيسة؟ أها هو مش حنك ساي ونضمي فاضي؟ أها طيب كلمة (خليفة) دي زاتها نهايتها تاء مربوطة .. وعليه لا يصح إنه الخليفة يكون راجل! أها كيف بالله؟

يلا نغوص شوية في (ذكورية) و(أبوية) المقال .. حيث يقوم المقال (الساخر) بتحديد أطر (شرعية) لحركة المرأة .. يا بيت أهلها يا بيت زوجها .. والكلام ده في القرن الحادي والعشرين! أيوة والله في نفس القرن الفيهو عدد ثمانية عشر رئيسة جمهورية في العالم، والفيهو سيدة كويتية (رائدة فضاء) عديل .. هذه هي المساحة التي (يسمح بها) مقال الفاتح جبرا وعليه يرفض أن تكون الرئيسة سيدة في السودان! ثم (وفي إطار إضحاك القارئ) يفترض المقال بأن القصر الجمهوري حتدخله وظائف الحنانة ومصممة الأزياء وماكيير وبقية السخافات التي يرى بها المقال (وكاتبه) أن المرأة هي عبارة عن ذلك الكائن (السطحي) الذي لا عمل له سوى الحنة والمكياج حتى وإن كانت رئيسة دولة! بي نفس وجهة نظر المقال دي مفروض في القصر المليان رجال حالياً ده يكون في حلاق يحلق الرؤوس ويصبغ الدقون .. وترزي يعمل جلاليب .. ودكان صعوط!

كل ما سبق كوم .. وتحول (السخرية) إلى (مسخرة) ده كوم براهو! المقال يسخر من موضوع (حمل) المرأة ويعتقد أن إجازة الأمومة هي مبرر لكي لا تكون المرأة رئيسة! ويغض المقال الطرف عن أن النساء في السودان في أغلب الأحيان يقمن بالعملين (داخل المنزل وفي المؤسسات المختلفة) على أكمل وجه!
أنا أتمنى من كل قلبي أن تكون رئيسة السودان إمرأة، وما من أحد قادر على (نقد) أمنيتي هذه لأنه ببساطة لم يحدث هذا الشئ في السودان من زمن بعيد (زمن الكنداكات) .. ولمن يعتقد أن (الحيثيات) تجعل المرأة غير قادرة على القيادة، أقول وبالصوت العالي جداً بأن الرجال الذين حكموا السودان جميعهم فشلوا في إدارة البلاد بشكل يرقى للطموح، وتلك هي الحيثيات التي أراها ولا أرى غيرها.

عاش نضال المرأة السودانية

طارق
23 يونيو 2014

[الجمكسين قاتل الصراصير]

ردود على الجمكسين قاتل الصراصير
United Arab Emirates [الترزي ابلستك مقطوع] 07-08-2014 01:24 PM
انت بلاه الزول الكاتب الكلام دة اسمو طارق؟ انا والله العظيم قايلو مرة

European Union [كفارة يا جبرا] 06-25-2014 11:17 AM
ينصر دينك أ. طارق ويا الجمكسين قاتل الصراصير!! والدليل على صحة كلامك تعليقات السادة ادناه!! فلو ان جبرا انتبه لحقيقة انه اصبح من صانعي الرأي العام بالسودان لما تناول بالسخرية قضية مثل قضية المرأة فرغم نضالها المشهود وما وصلت اليه بالصبر والكفاح والعمل الا ان الانقاذ ذات ال 25 عام قد حطت من مكانة المرأة كثيرا وواضح من التعليقات ادناه الأفكار الرجعية والمذلة للمرأة التي تناولها البعض بكل استخفاف!! هذا المقال سبة للأستاذ الفاتح جبرا فلعله يرجع او يتراجع عنه وجل من لا يخطيء واذا كان لدى اي من المعلقين هنا حساسية او فهم لما تعانيه المرأة من اضطهاد نسبة لنوعها لما وجد اي سبب للضحك في هذا المقال بل هو مقال مسيء في الحقيقة للمرأة ومن قبلها أجبرا نفسه جعله الله كفارة له

[A. Rahman] 06-24-2014 11:01 PM
كوز كضاب، و كلام الفاتح جبرا حارق سنسفيل حشاك، انتو بعدما انكشفتوا الغاشي و الماشي بأرضكم مصرين على التشاطر؟

United States [نقة بس] 06-24-2014 10:27 PM
يا الجمكسين .. وجهة نظرك نحترمها حتى لو اختلفنا معاها .. بس ملاحظتين

الأولى : هى ان الأستاذ الفاتح هو كاتب لكنها (ماهى وظيفته واكل عيشه) ، يعنى ما محترف الكتابة ومتفرغ لها ، فهو استاذ جامعى وهى شغلته الأساسية

الثانية : كون الرجل السودانى لم يوفق فى الحكم، ما معناهو ان المرأة ستنجح .. فليس المهم من يحكم البلد ، لكن الأهم كيف يحكم البلد .. الدولة تقوم على مؤسسات يااخى ولا تعتمد على الفرد.






مقالك برضو ظريف

[Awad] 06-24-2014 09:04 PM
الأخ/ طارق أراك منفعل زيادة عن اللزوم فى موضوع نقدى هادف وهادف جدا.الأستاذ الفاتح جبرة لا يقصد أقصاء المراة عموما لترأس البلد فلو تمعنت المقال جيد رغم السخرية المحببة فيه لما أنفعلت هذا الأنفعال وحسب فهمى لما قرأته فيه أن يسخر من يلبسون عمامة الدين وكل يوم طالعين لينا بفقه جديد ويدعون أسلاميتهم وهى لله ولا لدنيا قد عملنا فكيف تكون فتواهم فى من أرادة التقدم لترشح نفسها لهذه الرئاسة والدين يمنع أمامة المرأة وتخليفها حسب المنظور الدينى ولو كان هناك وضع غير هذا الوضع الشابكنا أنهم أهل الدين لما كتب الفاتح بهذه السخرية.أتمنى أن أكون توفقت فى أيصال ما فهمته أنا مع شكرى لك.


#1043880 [فيصل]
3.50/5 (6 صوت)

06-24-2014 05:18 PM
كلامك ده كله يا توحة الترابي مسحه بي استيكة زمان يا اخوي

[فيصل]

#1043831 [محمد علي مصطفي]
2.88/5 (6 صوت)

06-24-2014 04:25 PM
والله ياجبرة اانت بتاع سجارة
هههههههههههههههههههههههههههههههههههههه

[محمد علي مصطفي]

#1043812 [hk]
4.25/5 (4 صوت)

06-24-2014 04:05 PM
لجأت امرأة في سابقة تعد الأولى بالقضارف ولم تخطر على بال أحد من موظفي مكتب وزارة التخطيط العمراني بالقضارف لإبلاغ رسالتها، وذلك حينما سنحت لها فرصة لم تكن في حسبانها ووجدت وزير التخطيط العمراني عادل الجنيد خارجاً من مكتبه حيث سجدت أرضاً وقبلت رجليه طالبة منه التصديق لها بقطعة أرض تأويها وأسرتها الصغيرة، وقالت السيدة التي قبلت رجلي الوزير إن التعب قد أعياها لهثاً خلف الوزير لفترة من الزمن.ولكنها فشلت في كل مرة تعاود فيها الوزارة لمقابلة الوزير بسبب الغياب المتكرر وانشغاله بمهام أخرى، مما جعل الوزير يجهش بالبكاء. وكان الوزير الذي تولى حقيبة الوزارة الشهر الماضي، قد أصدر جملة من القرارات من بينها إيقاف تصديقات الأراضي السكنية والاستثمارية.

الانتباهة

[hk]

#1043802 [جنرال زمان]
3.00/5 (4 صوت)

06-24-2014 03:53 PM
شوف يا جبرة كلامك دا كله مافيه مشكلة بعدين (ده كوووولو كوم وحكاية (حمل) الست الرئيس كووووم تاني) دي ما مشكلة تشوف ليها عريس يكون من ماركة أبو ركبة وخلاص. ووين إنت يا سيد زمن مختفي وما ظهرت أيام الحاويات والتحلل وأراضي وكيل الوزارة ولا علقت عليها بس بعد الصادق ولض الصديق طلعوه من سجن حميدة تي ظهرت لينا بي حكاية الولية الرئيسة!!!!! بعدين يا أخي احتمال تكون حرمة نزيهة وشريفة وتراعي الله في حق رعيتها (طبعاً إذا ما كانت كوزة، لكن لو كوزة الله يستر علي الجماعة بتاعين التعدين الأهلي والزئبق كال خشمهم)

[جنرال زمان]

#1043778 [تينا]
3.57/5 (6 صوت)

06-24-2014 03:38 PM
تسلم (((ودالباشا))) اخوى ... تقول شنو ظروف حكمتنا وحرمتنا من المتابعة الدائمة لحبيبتنا الراكوبة ذى الأول ... لكن كل ما القى فرقه صغيرونه كدا بجرى طوالى عليها اشوف الحاصل ... كتر خيرك كتير ... تحياتى ...

[تينا]

ردود على تينا
United States [sam7] 06-24-2014 08:10 PM
عودا حميدا اختنا تينا

[سودانى ساكت] 06-24-2014 05:10 PM
مرحبا اختى تينا صوت النضال والكفاح..نورتى الراكوبة..والله فرحانين بجيتك..


#1043755 [انقاذي للطيش]
3.94/5 (7 صوت)

06-24-2014 03:08 PM
هل هذه سخرية من الإسلام (ذات نفسه)، أم سخرية من الإنقاذ؟ إن كانت الأولى فتؤثم، وإن كانت الثانية، فيجب أن لا تسخر من الدين وتسخره للحط من من لا تتفق معهم. الموضوع ليس (ضحكة) وخلاص، بل يتمد إلى مابعد الموت، فسوف يسألك الله، فماذا أنت قائل له؟

[انقاذي للطيش]

ردود على انقاذي للطيش
United States [sam7] 06-24-2014 08:16 PM
ابو الجكس
شفته الدين بلعبو بيو كيف

[أبوالكجص] 06-24-2014 04:55 PM
خليهو جبره هو صحفي وليكتب بالطريقة التي يريد أن يوصل بها الرسالة
لكن:
أسألك بالله، ويبدو أنك من المؤتمرين (المؤتمر الوطني)، هل عمايلكم البتعملو فيها عمايل تمُت للإسلام بصلة(حرمتم كل سوداني غير مؤتمر وطني من حقوقه في العمل والكسب واحتكرتوا لأنفسكم كل شيء) وهل تؤهلكم لكي تدّعو أنكم الوحيدون المدافعين عن دين الله وينبري الواحد منكم ويدّعي الصلاح ويأمر بالمعروف وينهى عن المنكر؟

مسمي نفسك إنقاذي للطيش .. مبروك عليك التسمية لكن الماعارفو أن الكل حتى الصبيان الذين لم يصلوا سن الرشد صاروا يتضايقون ويتهكمون من دعاويكم وادعاءاتكم لكن مايؤسَف له أن الناس صاروا يروا في كل ملتحي حتى ولو كان صادقاً مجرد كذاب ومنافق وفاسد وذلك للنموذج السيء الذي قدمتموه بتبنيكم لشعارات الإسلام السمح وفي نفس لم تعملوا بها .... ولاحول ولاقوة إلا بالله

[abu shawarib] 06-24-2014 03:18 PM
قلت انقاذى للطيش ؟!

ما مؤاخذ


#1043742 [الطاهر محمد]
4.15/5 (8 صوت)

06-24-2014 02:56 PM
متعك الله بالصحة والعافية ودمت ذخرا لنا

[الطاهر محمد]

#1043725 [الصلاحابي]
4.13/5 (6 صوت)

06-24-2014 02:44 PM
بالله هسع ده رائيك فى المراة شكلك متخلف كان كده احسن لينا نكون مع الصادق علي الاقل بيحترم المراه

[الصلاحابي]

#1043689 [جملون]
1.93/5 (7 صوت)

06-24-2014 02:18 PM
والله بيت الحبس دى بالغت فيها عديل ياجبرا والله انا ضحكت لمن فترتا متعك الله بالصحه والعافيه يا جبرا وكتاباتك تمنحنا جزء من المتعهز لك الف شكر

[جملون]

#1043576 [abu shawarib]
3.38/5 (6 صوت)

06-24-2014 12:45 PM
؟

[abu shawarib]

#1043565 [Gogomri Salim KOKO]
4.19/5 (7 صوت)

06-24-2014 12:37 PM
where will be hufrta eldukhan , whose entitle to provide woods for that.............


God bless you ,Gabra you are realy sources of funny and pleasure for those lost hope and smile

[Gogomri Salim KOKO]

#1043512 [صابر مصبر]
4.15/5 (9 صوت)

06-24-2014 12:04 PM
ومالذي يمنع بأن تكون رئيسة الدولة إمرأة في ظل فشل الرجال خصوصاً في السودان منذ الاستقلال كم ريس مر علي البلاد ولم يتغيير الحال بل من أسوا إلي أسواء
في حين الشواهد كثيرة علي نجاح المرأة في الحكم ولكن في دول غير إسلامية

[صابر مصبر]

#1043502 [المشتهي الكمونية]
4.04/5 (8 صوت)

06-24-2014 11:59 AM
يا أستاذ جبرا ما وريتنا رئيسة الجمهورية دي لو طلعت مشاطة حتحكم البلد كيف ، وما وريتنا كمان كيف تحكم البلد وتؤدي وظائفها الزوجية في آن واحد ، يعني بعلها لو كان عندو مزاج ومحتاج لها وحلف عليها بالطلاق ما تمرق ، أها تتصرف كيف؟؟؟

[المشتهي الكمونية]

#1043413 [وحيد]
4.02/5 (10 صوت)

06-24-2014 10:58 AM
يجلس السفير الامريكي و وفد الاتحاد الاوروبي في قاعة الاستقبال بالقصر الجمهوري، الجميع في انتظار الرئيس ... يفتح باب .. تتعلق الاعناق في اتجاه الباب ... يظهر وجه الست الرئيس، و لكن بسرعة شديدة ترفع يدها و تضعها على فمها و يتغضن وجههاو تتراجع ... تم بعد دقائق تظهر الست الرئيس .. ترحب بالجميع و تجلس و يبدو على وجهها علامات عدم الارتياح ... يبدأ السفير الامريكي الحديث ... فجأة تهب الست الرئيس واقفة و تسرع نحو المكتب ...
استاء الحضور و تبرم السفير الامريكي و امتعض الاخرون ... يخرج النائب الاول يحيي الحضور و يعتذر عن الست الرئيس و انها اصيبت بوعكة صحية مفاجئة و انه سيواصل الاجتماع نيابة عنها ....
في حمام المكتب الرئاسي تقف الست الرئيس و هي تلهث و " تتوع" و تحاول الاستفراغ من بطن خاوية و قد تعرق جبينها .... تردد في نفسها " الله يسامحك يا شيخ هناي .. اريت اليوم داك كان نمت في البيت التاني ... فضحتنا وسط العالمين"!

[وحيد]

#1043405 [الصاحب]
4.13/5 (5 صوت)

06-24-2014 10:53 AM
على شرط تكون عاقر. احسن من الجابو اولاد اخير عدمهم (عبدالرحمن وجعفر)

[الصاحب]

ردود على الصاحب
[سودانى ساكت] 06-24-2014 05:21 PM
والله حرام عليك..حتى ام البشير وكل الامهات خط احمر..اسغفر الله..الاحترام والتقدير مطلق لكل ام اخى الصاحب وربنا يكرم امك ان شاءالله.

European Union [لا الله الا الله] 06-24-2014 01:13 PM
ام عبدالرحمن عليها رحمة الله من اشرف وأشجع نساء السودان بل اشجع من غالبية رجال السودان وامشي اتثقف لو ما فاهم!!! انت ذاتك أظنك سوداني إنقاذ لانو سوداني حق ما يسيء لام اي كائنا من كان كان احتراما للمرأة ولكن في سودان السجم والرماد اختلط الحابل بالنابل للاسف الاسيف


#1043404 [مواطن]
3.75/5 (5 صوت)

06-24-2014 10:53 AM
لا لا يايا استاذ الفاتح ... نسيت وظيفة فكي كارب كاااااارب جد بتاع المحايا والبخور عشان الفحل ما يفكر في اي واحدة تانية خالص ..... وطبعن حسبو نسوان ياويلو وياويلو لوقرب من السيد الاول اوقصر الرئاسة..

[مواطن]

#1043393 [khider]
4.00/5 (8 صوت)

06-24-2014 10:47 AM
ما تنسى رقيص العروس والعلمات داخل القصر

[khider]

#1043391 [االحدقنو ولما فلس فارقنو]
4.50/5 (5 صوت)

06-24-2014 10:45 AM
دا كوووووووووولوا كوم طيب وين شيخ الأمين الرئيس مبعوث الرئيس للامارات يعني شيخ الجكس دا بنفع وللا الرئيسي يشوف ليهو شيخ تاني؟؟؟

[االحدقنو ولما فلس فارقنو]

#1043388 [مفطوس]
4.22/5 (8 صوت)

06-24-2014 10:43 AM
ده كلو ممكن!!!!
ماسمعت بفقه الضرورة؟؟؟؟

[مفطوس]

#1043386 [ود جبرا]
4.13/5 (12 صوت)

06-24-2014 10:42 AM
على الأقل الست الرئيس ما بتحلف طلاق.. وما بتعرس مرتين!!

[ود جبرا]

ردود على ود جبرا
[المتشائل] 06-25-2014 09:46 AM
يمكن العصمة في يدها....
وممكن تخلع وكده لو عاوزها تغير (لضرورات سياسية تصب في مصلحة أمة المسلمين)


#1043346 [hanankokoabas]
3.29/5 (8 صوت)

06-24-2014 10:10 AM
يحكى ان الرئيس السوفيتى خروتشوف عندما زارته ملكة بريطانية وفى اثناء حفل العشاء المقام على شرفها تساءل خروتشوف عن العمل الذى يؤديه زوج الملكة بالنهار!!!!!!!!!!!!ههههههههههههههها

[hanankokoabas]

#1043284 [مريود]
3.00/5 (4 صوت)

06-24-2014 09:21 AM
تقدروا تعملوا مرة رئيس إلا نكسر ليكم السودان دا فوق روسيكم.

ولو بقى الرئس دا بكر البعرسو منو؟؟

[مريود]

#1043218 [osama dai elnaiem]
4.14/5 (11 صوت)

06-24-2014 08:07 AM
بسيطة موضوع الولادة --- مثلما في رئيس (رجل) لا ينجب ايضا في (ست) رئيس لا تنجب والباقي الجميع متساوون فيهفبقية المهن الهامشية فالقصر مليان بشيوخ (الغائب ) وطقته لزوم معرفة الطالع وتحديد فترة الرئيس بخمس وعشرين سنه وستة ايام ووظيفةغسيل ( سراوييل) الرئيس في مغسلة من دبي وهلمجرا--- يعني ( الست) الرئيس افضل لنا علي الاقل ما حتدخل لينا اهل زوجها وتملكهم اراضي او تتزوج ارامل زميلاتها في الحكم.

[osama dai elnaiem]

#1043195 [احمد]
3.75/5 (6 صوت)

06-24-2014 07:27 AM
ههههههههههههههههههههههههه

[احمد]

#1043161 [نص صديري]
3.04/5 (11 صوت)

06-24-2014 04:22 AM
على الاقل ياجبره:
1- رقصة الست الرئيسة بينبلع
2-فصاحتها وجعريبتها الدول الما شقيقة حاتقول ده كلام نسوان
3- ماحتحلف طلاق
4-ان كذبت ستتبعها بسجم خشمي ده كلام شنوا وبتعتذر
5-قوامها قطع شك حا تهتم بيه يعني لا كرش مدلدلة لا صلبا يجر قندران
6-ما حترتكب جناية دولية يسكوها من زقاق لزقاق
7-ان نهبت زي بتاعت الفلبين حا تشتري بيها مراكيب
8- طبعا لا مثنى لارباع لا مسيار
9-حاتلغي التوب السوداني واللفحي الماعندو لزوم
10-ما حتجيب النائب عبدالرسول ولا اسموا شنوا بتاع النسوان داك
11-علماء السلطان حايكونوا في حلقات زار دائمة وسيكفرون كل منتجي الكريمات المابتبيض

وتقول لي الكنداكة مصرية

[نص صديري]

ردود على نص صديري
United States [magdi] 06-24-2014 10:36 AM
انت اظرف زول و الله


#1043151 [تينا]
3.28/5 (9 صوت)

06-24-2014 02:56 AM
عاد بالغت يا استاذ جبرا مكياج ومساحيق وكريمات الست الرئيس شنو انت نسيت انو الجماعة ديل بحكموا بشرع الله والحاجات دى ما بتجوز ؟؟؟!

[تينا]

ردود على تينا
European Union [علاء الدين] 06-24-2014 04:34 PM
بتجوز بالبا هااهاهاهاهاهاهاهواللة السودان دا بقي مسخرة

European Union [ودالباشا] 06-24-2014 09:21 AM
والله بقيتى زى جبرا ظهروا وتختفوا والف مرحب بعودتكما


#1043140 [الاصم]
4.18/5 (9 صوت)

06-24-2014 02:16 AM
....... نسيت يا أستاذ فقه الضرورة والتحلل والسترة ........

..............تتحلل من الحجاب وتنوم خارج السودان عادى بفقة السترة

...........

[الاصم]

ردود على الاصم
[حية الوادي] 06-24-2014 03:37 PM
دا كوولوا كووم أها أكان جاءتها العادة السرية هي لا أقصد العادةالشهرية وهي في اجتماع مع رئيس دولة زائر أها دي إحلوها كيف؟


#1043134 [تصحيح]
2.63/5 (6 صوت)

06-24-2014 02:00 AM
طبعا و ليس طبعن

[تصحيح]

ردود على تصحيح
[المتشائل] 06-25-2014 09:51 AM
أهلن ومرحبن.. يومين كده وتخش في الفورمة يا سيد"تصحيح".. ومبروك الكونكت.

[ود ابو زهانة] 06-24-2014 07:37 PM
ياجماهة بالراحة على الراجل .. طبعا الغربال الجديد عنده شده .. قال تصحيح قال

[Abdo] 06-24-2014 11:44 AM
ما طلعت إلا بالملاحظة السغيرونة دي ؟؟؟؟

European Union [ودالباشا] 06-24-2014 09:18 AM
خلى الخفه وشكلك جديد على جبرا

[الحقيقة المرة] 06-24-2014 08:45 AM
الظاهر عليك أول مرة تقرأ للأستاذ .

European Union [سم زعاف] 06-24-2014 08:21 AM
هذه مقصودة يا تصحيح لزوم القرقرة وغيره كثير في مقالات استاذنا جبرا.


#1043131 [حسن]
4.19/5 (5 صوت)

06-24-2014 01:49 AM
لو قرأ الفاتح جبرا مقال الطاهر ساتي الذي وضح فيه كل شئ عن ضياع الخطوط السودانية وضياع خط هيثرو لكان اراح نفسه وأراح القارئ من (كسراته الثابتة والقديمة المزمنة) عن خط هيثرو وعن تنفيد توجيهات السيد الرئيس؟؟ مع الرئيس لا يستحق ان يقال له (السيد)!!
خليك مع الزمن ياعم جبرا واترك الخزعبلات..

[حسن]

#1043125 [لتسألن]
4.25/5 (7 صوت)

06-24-2014 01:30 AM
* ابسط إلينا يدك يا جبرا لنبايعك علي العبقرية.

[لتسألن]

#1043109 [صادميم]
3.57/5 (6 صوت)

06-24-2014 12:23 AM
المهنة الوحيدة التي لن تدخل القصر فهو صباغ شعر الرئيس لان موجود اصلاً

[صادميم]

#1043075 [ادريس]
4.17/5 (8 صوت)

06-23-2014 11:26 PM
زكرتني موﻻنا جمال الوالي لما قال الله زاتو قال العارف عزو مستريح شريعه التمكين وفقه السترة والتحلل بتاعت اﻻخوان المسلمين نزلت بالدين لما قبل القرون الوسطي -حسبنا الله ونعم الوكيل

[ادريس]

#1043064 [حكم]
1.88/5 (6 صوت)

06-23-2014 11:15 PM
يا جبرا .. الست الرئيس تتحلل اول حاجة وبعداك تدخل الرئاسة
تانى مافى عوجة


مرة شفنا فى التلفزيون وزيرة الدفاع الأسبانية كانت مرة ومدنية وكمان حامل
مشت اتفقدت القوات الأسبانية فى افغانستان وبطنها مترين

[حكم]

#1043060 [لا الله الا الله]
2.02/5 (9 صوت)

06-23-2014 11:11 PM
لا حول ولا قوة الا بالله والله يا أستاذنا العظيم افتكرتك بتهذر ولم أتوقع ان مثلك يكتب مقالا بهذه الضحالة!! اولا يا سيدي الفاضل وزيرة الدفاع الإسرائيلية قادت بلادها التى جهجهت الجيوش والبلاد العربية انكلودنق حكومة السجم والرماد العندنا وهي حامل فلم يؤثر ذلك على أداء جيشها الا بمقدار تأثر امريكا بوعود الانقاذ!!! اما اذا نظرنا للحالة السودانية فنجد نساء عظيمات مثال السيدة علوية المرغنية اللابسة حربية والسيدة ست البنات ام سيف التي استشهدت في فتح الخرطوم وحديثا نجد السيدة الراحلة سارا الفاضل التي حوكمت في محكمة عسكرية كثاني امرأة عربية تمثل أنام محكمة عسكرية وقد قال لها المرحوم السيد الحاج مضوي وهو من اكثر القيادات الاتحادية صلابة وقوة متأثرا بشجاعتها: هاكي عممنا ادينا توبك!!! يا سيدي المرأة السودانية (ولا أظنك تجهل) خرجت للحياة العامة واثبتت جدارتها واحترامها في كافة المواقع وكان ثوبها الابيض واحتشامها في المظهر من الادب الذي تربت عليه قبل ان تجي الانقاذ فيختلط الحابل بالنابل ومعروف ان التحضر والتشذيب يجعل المرء والمرأة مدرك لمتطلبات واقعه ومتماشي معها، لذلك شفنا السيدة الاولى لابسة التياب الملونة وناقشة الحنة ولكن قارنها بقرينات الرؤساء السابقين وتأمل الاختلاف في المستوى والمظهر!!!! ثم حتى ولو كنت تشعر بالحرج من اختلافات المرأة الفيزيولوجية واستغرب هذا من مثقف ومطلع بقامتك ولكن حتى لو فيا سيدي للمرأة عمر مديد ومنتج بعد انقضاء عمرها الانجابي اي بعد الخمسين ولك في نفسك عبرة!!! اما حديثك الذي ربط ذلك بالإسلام فلا أظنك جاد فيه وان كنت لا تعلم عوج كلامك هذا فيمكنني ان أشير اليك ببعض الكتب والمقالات لتتنور وتدرك خطل ما سقت!! ولك كل الود والاحترام وغايتو اعتبر مقالك هذا كبوة جواد لا غير

[لا الله الا الله]

ردود على لا الله الا الله
[المتشائل] 06-25-2014 09:55 AM
يا ود يوسف لف ليهو واحدة عشان يرتفع معانا...
وبعدين اختار ليك اسم معقول (طبعن ما إنت يا يود يوسف)..

[ود يوسف] 06-24-2014 08:39 AM
ارتفع انت لمستوى الفهم وبلاش ضحالة ، فالموضوع كله القصد منه السخرية من هؤلاء القوم ...


#1043043 [عصمتووف]
3.66/5 (7 صوت)

06-23-2014 10:38 PM
ما محتاجة لوظيفة عواسة الست الرئيس *كسره *قراصة* عصيدة*

[عصمتووف]

#1043040 [جيمى ابوالسرة]
2.57/5 (7 صوت)

06-23-2014 10:34 PM
شوف يا ابن جبرة - بطل الفلسفة واﻻستعباط - ياهو دا اﻻسﻻم اذا ماعاجبك الباب يفوت جمل .

[جيمى ابوالسرة]

#1043038 [طلال]
4.15/5 (14 صوت)

06-23-2014 10:33 PM
ماتنسه ..حفرة الرئيس لزوم الدخان وكده ..

[طلال]

#1043033 [حبيبنا]
4.15/5 (13 صوت)

06-23-2014 10:23 PM
ووووووووووووين ياجبرا مختفي والله انا خفت يكون ودوك لي داوود ولا كتبوك عند شيخ الامين ولا عملو فيك مصيبه زمان لكن حمدلا بالشوفه ,,,

نسيت "ساعه رضاعه" ياجبرا
دمت

[حبيبنا]

#1043017 [بت البلد]
3.80/5 (9 صوت)

06-23-2014 09:48 PM
ههههه يا جبرا ياخ انت كنت غائب وين حرمتنا لفترة من الضحك ... عودا حميدا سنضحك كثيرا

[بت البلد]

#1042996 [ربش]
4.25/5 (7 صوت)

06-23-2014 09:10 PM
إمتاع و أيما إمتاع .. متعك الله بالصحه و العافيه الرائع جبرا .

[ربش]

ردود على ربش
[ابو الطماير] 06-24-2014 08:11 AM
والله امتعنافي وسط الهم الاحنا فيه


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة