المقالات
مكتبة كتاب المقالات والأعمدة
محمد عبدالله برقاوي
محادثات البشير .. والسيسي ..مابين النهضة وحلايب والكابتن ميسي ..!
محادثات البشير .. والسيسي ..مابين النهضة وحلايب والكابتن ميسي ..!
06-29-2014 12:43 PM

جلس الرئيسان كلٌ خلفه وفده المشارك على مسافة إلا وزير دفاعنا كان ملتصقاً بالرئيس البشير لدرجة قطع النفس ..!
الرئيس البشير إبتدر المحادثات ضاحكاً بتهنئة الرئيس السيسي ممازحاً .. مبروك النجاح يا أخ عبد الفتاح والله عفارم عليك ، بسرعة كدة بقيت زينا مشير ورئيس حتة واحدة !
يضحك السيسي ويرد بصوته الخفيص ولهجته الهادئة ،، منكم نتعلم يا دفعة !
عبد الرحيم يقترب من فم الرئيس و ينثر فيه رزازا سبق سؤاله , وأنا متين يا عمر حاكون مشير ؟
يقرصه الرئيس في إذنه ويقول له.. بعدين بعدين مش هسه ما تفضحنا !
بس كيزانكم طلعوا أغبياء يا سيسي يقول البشير، مش كان يلعبوها صاح و تقسمو الحكاية من البداية زيي أنا والترابي ؟
السيسي .. ياأخي أنا قلت لمرسي ، قول للمرشد بديع إذهب أنت الى المقطم وخليك متهني زي العريس و هو يذهب الى الإتحادية جردل في شكل رئيس و أنا والجيش حانحرس لهم الميس ويا دار ما دخلك شر..ولا جواسيس بس هم مناحيس ما سمعوش الكلام وما كانش قدامي خيار تاني ، والله انا ماكنتش بفكر لا في رئاسة ولا دوشة فارغة.. مكرهُ لا بطل أه والله بقد !
يحاول البشير أن يحكي للسيسي أنه نصح كيزان مصر ومرسي ان يلعبوها صاح ، فيتجاوز السيسي هذه النقطة ممعناً النظر في ركبتي البشير وهويقول له بمناسبة حكاية العريس ديت ، مبروك عليك العمرة بتاعة الركب ياراجل ، على كده ده أنت بقيت فل الفل وعال العال ’ وحاتكمل الأربعة ستات ومبروك مقدماً !
يضحك البشير وهو منتعش ، ويقول للسيسي عقبال عندك !
يبتسم السيسي ويرد عليه ، لالا لا .. ياريس إنت ناسي إنو أنا عندي أربع ستات فعلا ، الأولى مدامتي أم العيال وبعدين خدت عليها الجيش ضُرة تانيه ثم التالته محاربة إرهاب الكيزان وبعدين الرابعة الرئاسة !
يضحك البشير ويضرب الأرض بعصاه .. وهو يردد حلوة حلوة .. يقترب منه عبد الرحيم ، أنا ما فهمتها ، يلكزه الرئيس ، بعدين بعدين بفهمك !
ينظر السيسي لعبدالرحيم وهو يخاطب البشير ، وماتنساش ، حضرتك ياريس عندك إسم النبي حارسو مريحك من الجيش خالص لدرجة إنو خلّص عليه وجابلك مكانه قوات دعم سريع كمان !
يضحك عبد الرحيم وهو يردد ، الله يبارك فيك يا عبدو ويهتف رافعاً عصاه ، الله أكبر .. الله أكبر !
عمر البشير يعتدل في جلسته وهو يوجه كلامه بصرامة وجدية ، طيب بالنسبة لموضوع حلايب وشلاتين عملتو لينا شنو ؟
وما تنسى أنا موضوع سد النهضة ده خاتيهو جوكر في جيبي !
يلوّح السيسي بيده في الهواء باستخفاف وهو يقول ، يا راجل سيبك من حلايب وشلاتين والنهضة والحاجات الهايفة ديت ، أنا جايبلك فكرة مشروع ما تخرش الأرض وحاتكسر الدنيا و بكرة حافكرك وتقول عبد الفتاح قالي !
يعتدل البشير أكثر و ينصت في إهتمام بالغ ، بينما السيسي يواصل , إنت مش ملاحظ ياعمر إن حكاية الكورة وكأس العالم غطت على كل الأحداث السياسية والحروب و داعش و الغبراء و كل النيلة والهباب الحاصل ده !
يتدخل عبد الرحيم ، بالله فريق يوغندا قالوا طلع من كأس العالم !
فينتهره البشير ,, يوغندا يا .....؟
أسكت يا خي الطلع ده فريق رويال أنجمينا !
يواصل السيسي ، أنا يا سي عمر حاجيبلك تنظيم مونديال 2022 من ديله كده أهو لعندك وأطلعوا من العيال بتوع قطر زي الشعرة من العجين , وكمان رئاسة الإتحاد الدولي بعد ما يتكل الحاج بلاتر على الله ، حاديها للواد جمال الوالي !
البشير بس ، نحن عندنا أولويات المشروع الحضاري والجهاد و تطبيق الشريعة و الحدود قبل توفير الغذاء ، وتنفيذ الجلد مباشرة بعدجلسات الطرب والغناء حسب فتاوي السادة العلماء !
السيسي مقاطعاً ، يا عم سيبك من العك ده ، وخليك منفتح شوية ، العالم دي الوقت عايش عالكورة وإنت عندك بلد واسعة زي البرازيل بالضبط وده أحسن استثمار يلهطو فيهو الكيزان وتلهي بيه الشعب خاصة الصيّع من الصبيان بتوع المظاهرات و قرفنا والقرف اللي زي بتوع رابعة عندنا !
أنا حاجيبلك مليون مقاول مصري وعمالهم ، يبنولك الأستادات اللازمة ،وأخليلك أكتر من دولة غنية بمعرفتي توفر التمويل، مثلا استاذ في أمو درمان ناحية غرب أمو بده ،، واحد في بحري قدام الحاجي يوسف وواحد خارج الخرطوم ناحية قبل الأولياء ، وواحد في حلفا وواحد في الصحراء الغربية والباقي حددو إنت بمعرفتك بقي !
البشير والله فكرة استثمارية عجيبة ، ويلتفت الى مصطفي اسماعيل بنظرة تساؤل ، فيرد الطفل الباسم ، والله ياريس ممتاز وتخلينا بالمرة نخلص من بقية فائض الأراضي و العطالة الماليه الشوارع دي !
أما مسألة سد النهضة ، يقاطعهم السيسي ، خلوا بالكو معايا !
فحلها بسيط !
مش عندكو هنا كم مليون ست حبشية ؟ نجيب عليهم عشرة عشرين مليون يا سيدي لخدمة رواد المونديال والسياحة والذي منه ، وكل واحدة تجيب جوزها أو الجكس بتاعها زي مابتقولو هنا ، وعلى كده نفضي أثيوبيا من تلتين أهلها و إنت أرضك واسعة ماشاء الله وتقوم تجنسهم ، مش بالمفهوم إياه طبعاً ، قصدي تديهم الجنسية السودانية ونعمل تكامل مصري سوداني ونطرح مسالة سد النهضة في استفتاء ، وطبعا حايكون عدد المصوتين في دولتي الوحدة هم الأكثر لأنو حتى الأثيوبيين المتجنسين حايصوتو لصالح عدم قيام السد ، وبالتالي نكون ضربنا عدة عصافير بحجر واحد ، إنت نظمت مونديال عليه القيمة وخطفت الأضواء من العيال بتوع قطر و تبقى اهم بالنسبة لأمريكا من النووي بتاع ايران ، وحلايب وشلاتين نخليهم مقر الإتحاد الدولي ’ وأنا بقى اتفرغ لك للشعب المصري عشان أخليه يمشي على العجين ما يلخبطوش ، زي ما إنت خلصّت على العجين نفسه بالمرة !
وربنا يديك طولة العمر يا سي عمر وإنت إمام عادل على شعبك زي ما نحنا عندنا عادل إمام ، و يخليك ليهم رئيس دائم ولو تبقى زاحف على كرسي زي بوتفليقة !
مستدركاً ..على فكرة مريت عليه في دار العجزة بالجزائر وأنا جاي من مؤتمر القمة الأفريقية قلت له سيبك من ذكرى الخناقة بتاعة مباراة الجزائر ومصر في أمو درمان وخلينا في مونديال البشير عشان تحّضر فريقك له خاصة وشايفو متقدم نحو دور التمانية النهارده في البرازيل .
وعجبته الفكرة !
إنفض الإجتماع على أمل تكملة النقاش لاحقاً في القاهرة , وحينما هم الوفدان بالخروج ، سأل عبد الرحيم ،السيسي ، ومنو الحاتجيبوه لينا مدرب لفريق السودان عشان كأس العالم ما يطلع مننا ،؟
ربَّت السيسي على دبابير عبد الرحيم ،وهو يطمئنه بثقة ،حانجيبلكو ، الكابتن ميسي طبعا ساعتها حايكون إعتزل اللعب .. و إنت حاتكون برضو مشير أد الدنيا ،، و إيه رايك يا ابو الرحوم نعملك إنت الآخر استاد بإسمك في دنجلا ؟
ورمضان كريم .

bargawibargawi@yahoo.com


تعليقات 3 | إهداء 0 | زيارات 1751

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1048507 [عثمان ابراهيم الحكيم]
4.50/5 (2 صوت)

06-30-2014 12:02 PM
هههههههههههههههههههههههههههه قوية قوية

[عثمان ابراهيم الحكيم]

#1048126 [Adam Ibrahim]
2.50/5 (2 صوت)

06-29-2014 08:06 PM
هههههههه.. والله إبداع يا استاذ برقاوى.. يديك العافية ورمضان كريم..

[Adam Ibrahim]

#1047858 [مدحت عروة]
4.25/5 (3 صوت)

06-29-2014 01:10 PM
مقال روعة !!!!

[مدحت عروة]

محمد عبد الله برقاوي
محمد عبد الله برقاوي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة