المقالات
السياسة

07-09-2014 01:39 PM


الجزء الأول : كيف كانت تخرج العملة الصعبة سابقا عبر شنط يحملها صحبة راكب موظفو بنك السودان وكيف تخرج حاليا فى أكياس نفايات الصوارمى
فى منتصف تسعينيات القرن الماضى كنت مسافر عبر مطار الخرطوم على متن طيران الخليج وكان خط سيرنا الخرطوم الدومة مسقط وفى العودة مسقط المنامة أبوظبى الخرطوم
فى مطار الخرطوم دخل الطائرة 2 موظفين ببنك السودان ومع كل منهما شنطة كبيرة مليئة بفلوس وكل شنطة بها كلبشات أشبه بتلك التى تربط فى يد المجرم ويد الشرطى - طرف الكلبش مربوط بإحكام فى الشنطة والطرف الأخر مربوط فى يد الموظف الذى يضع على صدره مايثبت إسمه ومحل عمله وخصص لهما كرسيين فى مقدمة الدرجة السياحية بحيث تجد الشنطة متسعا لتكون بجواره وكان هذا المنظر ملفت للأنظار ومحل فضول الكثيرين
نرجو من إدارة بنك السودان أن توضح لنا لماذا تم ذاك الإجراء بالصورة التى رأيناها فى تسعينيات القرن الماضى وماهى مسببتاها ولماذا لم تستخدم القوات المسلحة تصدير الأموال عبر البنك المركزى ؟ والى متى يتم تجنيب الأموال وإرسالها فى أكياس زبالة للخارج ؟ وهل السودان بيتحايل على الحصار بمثل هذه الأساليب ؟ سؤال أخير وبرىء - هل هذه هى أموال النفايات التى تجمعونها منا كرها وحيث أنكم تجمعونها بالمليارات ولا تستخدمون أكياس النفايات فى جمع النفايات رأيتم أن تستخدمونها فى تهريب الأموال ؟ وكيف حصلتم على دولارات من الداخل ؟ بينما الطبيعى أن تصدر منتجاتنا السودانية للخارج وتعود على شكل عملة صعبها دولارات يوروهات وأسترلينيات وين ويوان وريال ودينار كويتى وبعد من مصدرها الخارجى كان تتم عملية تحويل الـ 175 ألف دولار لحساب القنصلية العسكرية بمصر ، لكن أن تجمع الأموال بالمليارات بالعملة المحلية من نفايات وغيره من دمغات شهيد وجريح أو تشغل المطبعة الحكومبة ورديات إضافية لطبع مليارات الجنيهات لصالح الجيش أو إحدى المؤسسات المملوكة للجيش والتى تعمل فى التجارة والصناعة والزراعة والتى ضيقت الخناق بل قتلت القطاع الخاص حققت ارباح للجيش بالمليارات من الجنيهات ودخل ناس الجيش سوق العملة وحولوها لدولارات مما تسبب فى رفع قيمة الدولار الى مافوق العشرة ألف جنيه فى طريقه الة العشرين ألف جنيه وفى محطة العشرة ألف جنيه إشترى الصائم كل 2 ليمونه بجنيه ولمان الدولار يقفز الى عشرين ألف جنيه كل سودانى صائم فى رمضان القادم حيدفع جنيه لكل ليمونه والجماعة لا يهمهاشىء فهى تملك مطبعة عملة لو الليمونة بقت بعشرة ألف جنيه ممكن كل يوم يشتروا ألف ليمونه هم خسرانين حاجه ما مطبعة مدوره والبقية إن شاء الله تهلك مايهمهم عشان كده لمان توقفوا عن لم الزبالة بقى عندهم فائض اكياس زبالة عشان يصدروا به العملة الصعبة لأخوانهم خارج السودان
الجزء الثانى : الحكومة ترسل أحمد بلال وزير إعلامها وثقافتها ليحمل رسالة لهيئة علماء السودان أن أغانى وأغانى وأخواتها خطوط حمراء هى الأخرى ومهمتكم يا علماء السودان تحليل القروض الربوية وتحليل موازنة البنوك الربوية وتورونا نصوم متى ؟ ونعيد متى ؟ وبس مقابل تركبوا فوق ليلى علوى والباردو وتسكنوا الفلل وتجرى المليارات فى يديكم - أنتم لستم علماء - أنتم محللين للسلطان
نحن فى المصايب دى ليأتى الشيخ محمد عثمان صالح أمين عام هيئة علماء السودان ويصدر فتوى تحريم الغناء لترسل الدولة وزير الإعلام والثقافة المسترزق المأجور دكتور أحمد بلال ليحضر حلقة برنامج أغانى وأغانى للسر قدور الذى جلس الوزير الهمام بين المغنيتين إنصاف فتحى ونسرين الهندى ودى رسالة بليغة وخطيرة لهيئة علماء السودان من الدولة فتواكم بلوها واشربوا ميتها نحن شعبنا 25 سنة غير الغناء والرفص والطبل والزمر لم نقدم له شىء وشاغلنه بأغانى وأغانى وأفراح وأفراح ونجوم الغد عشان نتفرغ لتصدير الدولارات فى أكياس النفايات وإنتو يا هيئة العلماء لمان نوقف الغناء الشعب دا نلهيه بشنو بلى فيكم وفى فتاويكم - نحن صنعناكم عشان تفتونا فى قروضنا الربوية لتقولوا إسلامية - نحنجبناكم عشان كل تلاته منكم يراجعوا الميزانية الختامية لبنوكنا الربوية لتقولوا تمت وفق الشريعة الإسلامية - نحن جئنا بكم عشان تقولوا لقد ثبت أن يوم كذا هو اول شهر شوال وبس - تمشوا تمدوا كرعيكم للغناء واللهو والطرب الذى نلهى به عامة الشعب - بلى فيكم وفى فتاويكم - فى عالم دين بيركب فوق ليلى علوى أو برادو اخر موديل والنغنغة المننغنغنكم اياها دى لو وقفنا الغناء يا بروف محمد عثمان صالح لازم نشيل منكم كل المخصصات ونحولها خدمات علاجية وتعليمية وغيرها للشعب عشان الشعب يسكت - نحن يابروف أفهمها نحن بنسكت الشعب بالغناء والطبل والزمر عشان مايتظاهر وبنسكت امثالكم بالدولارات عشان تحللوا أى شىء حرام فى حياتنا دى بفتاويكم - عشان كده لمان رسلنا كلبنا المطيع عشان يحضر البرنامج الغنائى دى كانت رسالة واضحه ولعلمكم الزول دا برضو زيكم مأجور لكنه مطيع - رسلناه فهدد الصحافة وخوف الصحفيين - طلبنا منه تهديد كتاب الصحف الأسفيرية وشايفين هددهم وقال ليهم شنو ( أى راجل أو مرة يكتب تانى فتوقفوا جميعهم - وكمان رسلناه عشان يحضر أغانى وأغانى ويرسل ليكم رسالة تحذير - والعاوز يبقى عالم محترم تسمع كلمته يبعد عن مجالسة السلطان وأكل المال الحرام وركوب ليلى علوى والبرادو - ويمشى راجلا بين الناس ويلبس المرقع ويأكل مما يأكل عامة الناس - هسي البيعاين لى جضومكم دى بيقول ديل علماء أم عالمات - بلا يا خدكم إطلتموا - أغانى وأغانى شغاله وبعد رمضان جاييكم نجوم الغد وما خفى أعظم - والما عاجبه يقدم إستقالته عشان نقفل البلف بتاع الخيرات منه فورا
[email protected]


تعليقات 5 | إهداء 0 | زيارات 3187

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1055871 [ستارx]
0.00/5 (0 صوت)

07-11-2014 12:50 PM
ليلى علوى ؟؟يااا عمنا الكلام دة كيف ؟؟..ليلى علوى الوداها هناك شنو؟

[ستارx]

#1055820 [المستعرب الخلوى]
0.00/5 (0 صوت)

07-11-2014 10:42 AM
ود الدمازين ..حسه الكلام المكتوب دا مش ياهو الحاصل فىالبلد ولا إنت شايف حاجة تانية ؟ولا بس عاوز تطبق على روحك مقولة ( خالف تُعرف )..
وكدى انت حسه خلى كلام الباشمهندس سلمان بالجنب وقول لينا انت حسنه واااااحدة من حسنات السيد وزير الإعلام الهمام ..
غايتو واحدة من إتنين .. إما إنك .............وإما إنك .................
واللبيبو ......

[المستعرب الخلوى]

ردود على المستعرب الخلوى
Saudi Arabia [المهندس سلمان إسماعيل بخيت على] 07-11-2014 01:03 PM
لك التحية يا بشمهندس سلمان إسماعيل
رجاء ارسال رقم هاتفك عبر راسلنا مع اقرب مقال


#1055111 [ود الدمازين]
0.00/5 (0 صوت)

07-10-2014 08:31 AM
انت عندك مشكلة شخصية مع البلال وحسين من بدرى خالص؟؟ام عقدة او حاقد عليهم

[ود الدمازين]

ردود على ود الدمازين
Saudi Arabia [المهندس سلمان إسماعيل بخيت على] 07-10-2014 07:45 PM
يا [SUDANI] لو تعرف من هو ودالدمازين ماكنتش كلفت نفسك بالتعقيب على تعليقه وشكرا لكما يا سودانى ويا سيف الله عمر فرح والشكر لكل من يثنى ويطرى على ما نكتب والشكر ايضا لود الدمازين ومن لف لفه لأننا نكتب للذين يغردون خارج السرب لينضموا لسرب النضال الوطنى ولآ أظن أن سودانى أصيل من ضهر سودانى وصلب سودانية ودحلال وشريف وطاهر يقف فى خندق أعداء الوطن

Saudi Arabia [المهندس سلمان إسماعيل بخيت على] 07-10-2014 07:40 PM
ود الدمازين تانى رجعت وكمان فى شهر رمضان - اللهم إنى صائم
لو عاوز الحقيقة هى عقدة مش حقد والعقدة دى مابتتفك لأنها الوطن كله

Ireland [SUDANI] 07-10-2014 02:43 PM
رمضان كريم- بالله لو تعرف اى عمل وطنى اواى ممدوحه لهذين الشخصين قلها لانصافهم-والا تجحد حق من يكشف الفساد فى الوطن المفدى بما استطاع واعلم ان للمجتهد اجران اذا اصاب واجر واحد اذا اخطأ

Saudi Arabia [سيف الله عمر فرح] 07-10-2014 01:37 PM
ود الدمازين ، المزعلك شنو ؟ ..

الباشمهندس سلمان اسماعيل بخيت ، رسالته واضحة لا فيها نفاق ، ولا فيها كذب ، ولا فيها إفك .. هى لله ، هى لله ، لا لمنصب ولا تجارة ، ولا جاه .. الباشمهندس لم يسىء لشخص حسين خوجلى ، أو احمد بلال ، أو محمد عثمان صالح ، أو غيرهم ، إنما ينبذ أفعالهم القبيحة .وكتاباته نقد عميق بناء ، بس لمن يفهما .

عقدة إيه ، وحقد إيه ، يا ود الدمازين ، خليك واعى .


#1054995 [البعير]
0.00/5 (0 صوت)

07-10-2014 01:30 AM
كلامك صاح وهذا هو واقع البلد منذ أنقلابهم الشئوم في 30/6/1989

[البعير]

#1054831 [المقدوم مسلم]
0.00/5 (0 صوت)

07-09-2014 06:21 PM
للاسف ..هكذا تدار البلد فى عهد حكومة الاخوان المسلمين ..لا قيم.. لا اخلاق.. لا اعراف دبلوماسية .. والادهى والامر اصرارهم على تزييف الواقع والبقاء فى السلطة لحراسة مكتسباتهم بشتى الوسائل ..وكل يوم يتضح مدى سوء افعالهم وعدم وطنيتهم ..غير ان الاسواء من ذلك كله هو ان معظم اتباعهم هم ممن انضم اليهم بعد انقلابهم المشؤوم وهولاء من الانتهازيين والوصوليين الذين لا دين ولا ضمير ولا قيم لهم مستعدين لفعل اى شىء من سرقات واختلاسات وقتل وتعذيب للشرفاء وتدمير للبلد .. ..

[المقدوم مسلم]

المهندس سلمان إسماعيل بخيت على
المهندس سلمان إسماعيل بخيت على

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة