المقالات
السياسة
سيرة الجنوب
سيرة الجنوب
07-16-2014 08:48 PM

ياود الكلب ، تصيح به امه وهي تقذفه بالنعال في المطبخ يجري بقوة مندفعا الي الخارج تاركا خلفه المسكينة تمسح بخربة بالية ما تناثر من اللبن في ارجاء مطبخها ، يتلقاه والده صائحا: عملت شنو يا حيوان ؟ تعال هنا وبجريدة من النخل يلاحقه ضربا وهو مازال مستمرا في الركض ملتزما خرقة من القماش بها كراس وبقايا كتاب . صباح جميل ورائع ككل يوم من ايام هذا الشهر وأي شهر هذا ؟ نعم تذكرت انه شهر يوليو في منتصف ثمانينيات القرن الماضي (سودان علي كيفك والدنيا حرية ) . الثامنه صباحا الان بتوقيت خط الاستواء درجه الحرارة تجاوزت الأربعين والشمس تحي بإبتسامة كبيرة عشاقها سكان الوادي والمدرسة عبارة عن فصول مبنية من الطين ومعروشة بالزنك ،،لا أشجار هنا ولا ظلال في منتصف المسافة بين فصول الدراسة توجد مساحة كبيرة تسمي اصطلاحا بحوش المدرسة حيث ينتصب الان الطلاب في صفوف متوازية من الفصل الاول حتي السادس بالجلاليب البيضاء والشال مربوط علي الرأس والملابس الداخلية بنية داكنه ،،،كأن علي الرؤؤس الطير وكل المعلمين علي رأسهم المدير ذو النظارة السوداء وهي دائماً معلقة علي انفه صباح مساء ،يقومون بدورية تفتيش دقيقة جداً فاليوم السبت اول ايام الأسبوع وأطولها .،، ابتداء من الأظافر وانتهاءا بالملابس البنية داكنه اللون ، بعد الفرز والتدقيق ينادي بصوته الجهوري ( أربعة كبار ) ينسل من بين الصفوف أربعة ليسو كبقية الطلبة ، طوال ضخام أكبرسنا وأكثر خبرة بالمدرسة وفنونها نسبة لعدد السنين الذي يقضونه بكل فصل وأصعبها طبعا الرابع حيث ان معظمهم يقضي بها سنه او أكثر ومن ثم السادس وفيها يقضون في الغالب سنتين والي الشارع العريض ،،يأخذونهم كل من طرف من أطرافه الاربعة وتبدأ عملية التأديب من عشرة الي ما لانهاية حسب تقدير المعلم وبعدها الي الفصول للدراسة ،، بعد عملية الإرهاب هذه يكون معظمهم غير قادرين علي التركيز والاستذكار ويستمر الضرب طوال اليوم من مدرس الي اخر ومن فصل الي اخر ورغم ذلك (الناس حنان وظراف والدنيا حرية) .*يسأله المعلم ؛ يا غبي كم يبلغ مساحة السودان ؟؟ وهو يتلعثم والعرق يملأ وجهه : مليون ميل مربع يا أستاذ !!! ومن عنده يضيف ؛؛ والدينكا اكبر قبيلة فيها :: وكأن الزمان يقف هناك شاغرا فاه (والماشي درب الكار يغور والتاب من التنباك يتوب ) . يفيق من دهشته بأن إجابته خاطئة وهو لا يعرف الان كم تبلغ مساحة وطنه ولا من هم مواطنوه!! ويحاول ان يحفظ الأرقام الجديدة لكنها مركبة وكثيرة وهو تعود علي رقم واحد فكيف به يعالج هذا الدرس ؟؟ والعصا تلاحقه من مطبخ أمه المسكينة الي جريدة ابيه المكافح الي خيزرانة وخرطوشه أساتذته الأجلاء وسياط الأمن تذكره بكل ذلك وهو قابع في زنزانته يجتر الذكريات ، اذ يقتحم عليه خلوته احد زملاءه القدماء وفي يده سوط ومعه اخرون يعاقبونه علي ماذا ؟ علي انتماءه للوطن ام علي خيانتهم للامانه ؟؟ الكل يعاقبه والكل يهدده بالعقاب والرئيس يلوح بعصاه ( وانا ماااابجيب سيرة الجنوب ). والنهج الاقصائي التربوي المستمر يدفع به الي المناكفات والي استخدام عضلاته اكثر من عقله فهو يتحدي منتقديه قائلا : ان كنت راجل اطلع لي برة!! وهكذا مشمرا عن القتال في كل جبهة مندفعا الي الدماء في كل بقعه مخلفا الدمار بعصاه. وهل يمتلك هو عقلاً يقوم بجمع البيانات ثم تحليلها واستخلاص الفائدة منها .
بعد ان كانت (الدنيا حرية والأرض مروية والخدمة مظبوطة مظبوطة مدنية) في يونيو والصحيح هو في يوليو انفجر الظلم وظهرت الطحالب والفطريات وقئ السنين ليقود بالعصا ويعاقب الحرائر بالسوط والحرمان ،كأنه يرد دينا عليه انتظره بالسنين الطوال حتي يتم استيفائه وبعد سنين التمكين العجاف وثورة الاختلاسات تجلت يوليو من جديد ليصبح التاسع منه هو يوم ( أقول استقل وانا في صفوف الذوق واقف مع الواقفين بهنيهو، اول استقال ودا اول الأحزان او قالو باعوهو ودا ياهو قطيع القلوب ) وأخيرا ( أصبحنا ذي الزول قادل بوسط السوق سروالو نصلوه ،، وانا بجيب سيرة الجنوب).

داخل الأقواس لشاعرنا الكبير القدال من قصيدة طواقي الخوف .

محمد صالح*
فيينا*
15/7/2014*
[email protected]


تعليقات 2 | إهداء 0 | زيارات 923

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1059494 [احمد الجنوبي]
0.00/5 (0 صوت)

07-16-2014 09:45 PM
ما خايف المطر
يتحاشى الضهاري الراجية قولة خيرا
ولا خايف المطر
يمشي على الصحاري تلمو في بشكيرا
ولا خايف العشم
يتناسى العشامى ونيما ياكل نيرا
ولا خايف النفس
تتذكر نفسها وتنسى يوم حِدّيرا
خوفي على البلد
الطيب جناها وقمنا في خُديرا
شاحدك يا كريم
لا تحصل خراب لا أرجى يوم ودّيرا
***
وانا ما بجيب سيرة الجنوب.
عيال بتسرح للمدارس ..
والفطور نجماً بعيد.
بنوت بتجري
على الخطاطيب الخطاطيف
البتجرح ..
والعريس نجماً بعيد.
الدكاكين التملا تفضي،
السماسرة يسمسروا،
والبسفو الطين ..
يسفوا،
والبحتّوا الراب ..
يحتّوا،
والبناطلين ليها سستم،
والقوانين ليها سستم،
البنوك الفيها بستم ..
من سويسرا ولي ماليزيا
بالسفارات
والعمارات
والخبارات .. .
انا كنت متغطي ..
ومتدفي،
العمة ملوية،
والشال على كتفي.
سودان وكان ما كان
سودان علي كيفك
السكة ساعة إيد
والأرض مروية
والناس حنان وظراف
والراح يجيك ..
للحول
والخدمة مظبوطة
مظبوطة مدنية
والدنيا حرية
الماشي درب الكار يغور
والتاب من التمباك يتوب..!
انا مابجيب سيرة الجنوب.
الغبّوا عرفوهو
والعرفو سوّوهو
والسووا بلقوهو ..
……
أصبحت زي الزول
قادل بوسط السوق
سروالو نصلوهو
لو العِرق مسروق
أو قلبي نشلوهو
طعم الكضب مسلوق
ماسخ تضوقوهو
لو فمي ما مطلوق
أو كمي غسلوهو
ياني البسوي القوق
قولي البتابوهو
ماعندكم دمي
ما عندهم دمي
من دمي لا لا لا
ماقدروا فصلوهو.

وانا ما بجيب سيرة الجنوب؟
قول استقلْ ..
انا في صفوف الزوق
واقف مع الواقفين مزنوق بهنِّيهو
ويهنوهو
أواستقال ..
ودا أول الأحزان
أو قالوا باعوهو
ودا ياهو قطِّيع القلوب
أنا ما بجيب سيرة الجنوب،
فالسيرة كمين ألف عام
لوني المحرق مندوكور
وشكلي شكلين
شكل منقة
وشكل تور
دمي المشتت من قبايل نوح وحام
شعري المقرقد زي حصايا
اتشتت فوق الدروب
كتفي المهدل بالعيوب
وانا ما بجيب سيرة الجنوب
أصل البقت
من ساس وسايس أو يسوس
ياها البقت
خلونا من حرب البسوس
الفاضلة
تكفير الذنوب
الفاضلة لمليم البشاتن
والمعاطن
والخبوب
الباقي
مايخموكا تاني على
الدفافير والكناتر والحروب

الباقي تعظيم التماسك
في الخطوب
لا نافع الشَّدة العلوق
ولا نافع المبقوص يحوق
لا بنفعك عَرَق الزنوج
ولابرقعك لبن العروب
إلا الوقوف ألفاً ضكر
واحد براك
في الشيمة تلفحك الهبوب
الغيمة تديك
للسفاسف
والعواصف
والمطر
برطع مع الأفعال
وادخل على التاريخ
يغلب أجاويدك
من قرقريب عوسك
اخرِج من التاريخ
شيخك وعربيدك
لا نافعك التكفير
ولانافعك التوبيخ
فامشيه وحيدك
وامرق على التاريخ
تلقاه في السهلات
مستني كمسيدك
لا بيظلم التاريخ
ولا يرحم التاريخ
إياه عوس ايدك.

والأرض موقوت القنابل
في الحدود
والأرض منهبة الثعالب
والطحالب
والجيوش
باليوناميد
واليوناميس
والفُرقة بينات القبايل
والشتايم في المنصات
والشراكة الفي
المكايد
والخناجرفي الحناجر
والمنابر ..
آه من تلك المنابر،
إنداية كرتلة وبنابر
والجرايد
داقة طارات المدايد
الصَدَق في الناس كذوب
الساسة نِيّام العسل
بين انتباهة
وغفلتين
بين السلاطين والحبوش
والشلاتين
والقرايب
فين حلايب؟
واللي بنى الأرض كان في الفرض سوداني
عيني عليها
اتمزعت
حتة في قلبي
وحتة ف غصتي .. تاني
آدي اسرائيل في النيل
بكِّيني ولعبطني
والنيل أدنداني
إحنا حبايب في الطيّبة والآه؟
آ.
غنيلي ورقصني ؟
طيب.
بسِّ سمعني آه الآه في وداني.
***
أنقد السُقا وما بينصلح وكَّايو
وانكشح اللبن ما بينفعِن بكَّايو
بعدن بى الدروب مابقصِّرِن تكَّايو
والشاكي النقاص ناقص قمح شكَّايو
***
وانا لا بجيب سيرة الجنوب
ولا أكلوني
إذا ما أكلو التور الأبيض ..
(الأرض في الجزيرة)
وبدر الله فوق سماهو
يا ساسا يابساحوتة
مكوار حبس مياهو
عطشت قبايل ابقوتة؟
البودة في خلاهو
والأرضة في بيوتا؟
الزول رِبَت كلاهو
سمينة بي مقوتا
يا تمت المعاهو
أو خلصت الحدوتة
وانا لا بجيب سيرة الجنوب
ولا أكلوني
إذا ما أكلو التور الأبيض ..

***
يدر الله يابسلوكة
سلوكة الجزيرة
كل يوم فينا بتنتش
سكك الحديد بي كم؟
بي كم بيت المفتش؟
والبيع بيعة عدوكا
بعت الأرض بترابا؟؟
باكر تبيع أبوكا
وان مُتْ من تُخمة باكر
ناس الشرق يبكوكا
وناس الغرب يبكوكا
ناس الشمال يبكوكا
وناس الجنوب يبكوكا.
وانا لا بجيب سيرة الجنوب
ولا أكلوني
إذا ما أكلو التور الأبيض ..
***
حمدتكم بالجاية
والجاية فوق الجاية
وعسكري الجباية
قلبو الحجر اللداية
***
بشرتكم بالسادة
والسادة بعد السادة
وجرادة فوق جرادة
من دوكة لام كدلدة
***
حمدتكم بالواقعة
والصاقعة جنب الصاقعة
مقدودة مالها راقعة
والدمعة صابة وناقعة
***
بشرتكم بالتوية
والصبنة لي الدامبوية
في الحلة دي ام كدوية
ما تقعدوا شدرة موية
***
والأرض لا حليوة
ولاها دي الجزيرة
الأرض أمات الحنين
لو نقط الضحوي البريق،
في الحين تبتق شهوتِن.
تحبل
كما الأمات
وتشرق بالوحم
لو تسعة الميلاد بتمرق بالسنين،
أو دي الشوارع بالبنات متحينة،
ترسل تراتيل الخروج في يوم
وتقطع سرتِن.
الأرض تعريف الهديل
هدل الحمام بشري
وشوق السلام انسان
بالحيل بيعرف أنَّتِن
والأرض شافت
إلا خافت
من عيون الليل
تناجي حبيب
غريب في الليل
وتفرز غنوتِنْ.
زي بذرة في جوف الأرض
أو ضحكة عند طرف القلب
بتغني لو جات في العيون
والضحكة لاقت مرقتِن
الأرض منصوص الضمان
حضن أمك الدافي وأمين
ريحة حبيب
جاياني من شمة حبيبتي وكرفتِن
لو جاتا في يوم الهموم،
في الحين تزغرد فرحتِن.
أو حرقصت فوقها السموم،
باكر تهبهب نسمتِن.
والأرض ما بتعرف تنوم
ترتاح
وغابت جمتِن
بس تدِّي مدين للعديم
بالمدة تحفظ ذمتِن
***
هن مارقات خلاهِن
ما مارقات بَراهِن

لي بصاص حِداهِن
إو قصاص بِراهِن

هن مارقات تراهِن
تريانات تراهِن

الخوف ما حَماهِن
من شوفة حِماهِن

طمانات جناهِن
بي لبنا معاهِن

يوم الشينة جَاهِن..
مرقن ليهو جَاهِن

بالعز المبطَّر
والزوق الشَفاهِن

لا حايدات مداهِن
لا قايدات عماهِن

وما كشحن بلاهِن
فوق زولاً أباهِن

لو الضيم رماهِن
هِنْ ياهِنْ
وما هِنْ.
***

وانا لا بجيب سيرة الجنوب
لاني زول بالمرة خايف
إلا شايف
إلا شايف
إلا شايف
***

أنا شايف المطر
يتحاشى الضهاري الراجية قولة خيرا
وانا شايف المطر
يمشي على الصحاري تلمو في بشكيرا
وانا شايف العشم
يتناسى العشامى ونيما ياكل نيرا
وانا شايف النفس
تتذكر نفسها وتنسى يوم حديرا
وانا شايف البلد
الطيب جناها وقمنا في شدِّيرا


شاحدك يا كريم
لا تحصل خراب لا أرجى يوم وديرا.

[احمد الجنوبي]

#1059493 [Beh.]
0.00/5 (0 صوت)

07-16-2014 09:42 PM
الام: ياود الكلب ..
الاب: عملت شنو يا حيوان ؟ تعال هنا..
الكل يؤكد أنه حيوان ومن فصيلة الكلاب..

[Beh.]

محمد صالح
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة