المقالات
السياسة
المسمار الطبي والفتاوي العشرة
المسمار الطبي والفتاوي العشرة
07-19-2014 10:38 AM

كنت اقرأ بين المقالات فوقع بصري على موضوع بعنوان (مسمار طبي وغضروف)، قلت أفتحه لعلي أجد فيه فائدة علمية أو طبيةفإذا بس أتفاجأ بكمية من الفتاوي اللتي ليس لها أي أساس من الصحة و محاولات من الكاتب لإثبات أن الطب هو عبارة عن شهادة عضوية الكلية الملكية البريطانية.. والباقي أرمي في البحر. لو كان الكاتب كتب ما كتب على شكل اراء شخصية كان وفر علي عناء الرد ولكن للأسف قرر وضع اراءه على شكل حقائق ووقائع. وهذه كانت أبرزها:

1- "لا يوجد امتحان معادلة في الطب":
- من قولت تيت بادي غلط.. أمسك الفزورة دي، ما هو الفرق بين التسجيل التمهيدي والتسجيل الدائم في المجلس الطبي السوداني؟ والاجابة الصحيحة (امتحان). واحدة تانية: ما هو الشرط الأساسي للشغل في أي بلد تانية بما فيهم دول الخليج الجمبنا ديل؟ والاجابة الصحيحة (امتحان) مزاولة المهنة.

2- "زمان كانت أخصائي ولكن جابوا معنى تاني لكلمة اخصائي وغيروها بكلمة اختصاصي أو مستشار":
- جابو معنى تاني كيف يعني؟ التغيير اللغوي ما لازم يعني تغيير في المعنى، في حاجة في اللغة العربية اسمها تصريف الأفعال (فعل، يستفعل، استفعالا) في النهاية الفعلة واحدة. فأولا ما ممكن تغير معنى أخصائي لاختصاصي لأنهم نفس المعنى، وثانيا ما ممكن تغير كلمة أخصائي لمستشار لأنو أصلا هي ما بسموها كدة، بسموها "استشاري". ولأنو في فرق بتاع سنين خبرة بين الاخصائي والاستشاري. يعني أي استشاري اخصائي لكن ما أي اخصائي استشاري.

3- "على الزمن الجميل مستشار دا في القانون والهندسة. وأخصائي في الطب .. لكن يبدو أن الكيمان خُلطت على بعض":
- أنا ما عارف الزمن الجميل دا متين بالزبط لكن رئيس قسم الباطنية المعانا دا عندو الزمالة من سنة حفرو البحر و استشاري "consultant" في جامعة نيوكاسل من سنة 79 فكان الزمن الجميل دا اكتر من 35 شنو احتمال كلام يكون صاح.

4- "عضوية كلية الأطباء الملكية .. هذه ارفع شهادة للتخصصات الطبية في بريطانيا":
- غلط فادح، في عضوية وفي زمالة.. "Membership & Fellowship" وفي حاجات كتيرة ارفع.

5- "وأقول وبعين قوية أنها الأقوى في العالم غض النظر عن أميركا وألمانيا وأطباء الاعشاب في شوارع خرطوم أحمد":
- أولا خاتي امريكا والمانيا في جهو واحدة من المقارنة مع أطباء الأعشاب في شوارع الخرطوم "حصل خير". ثانيا مافي حاجة اسمها الأقوى في العالم.. لعبو تصفيات مثلا وفازو بكاس العالم؟ الطب مجالاتو كتيرة وما فيهو منتخبات وطنية. في جامعات و بحوث ومستشفيات و حاجات كتيرة لكن ما ممكن تعمم و تقول "بريطانيا دا بطل العالم في الطب".

6- "والطريقة التي حصلوا بها على هذه العضوية أو الشهادة العالمية.. هنا مافيش لعب عيال":
- الشهادة العالمية دي (العضوية) بيمتحنو (Part 1) بتاعها من جامعة الرباظ في بري "عشان ما تسرح شديد".

7- "الفيصل والمحك":
- لا فيصل ولا خالد. مقدار العلم والخبرة العملية هي البتفرق بين طبيب وطبيب.

8- "من تقعد به الحيلة يلجأ لدكتوراة وماجستير وهلم جرا":
- دي بالغت فيها لأن أقل تخصص معترف بيو في المجلس الطبي السوداني 3 سنين وأغلب التخصصات 4 سنين، بالنسبة للدكتوراة 6 سنين، في حين انو العضوية الملكية دي عبارة عن 3 امتحانات، تقرا بي بيتك وتمشي تمتحن. بعدين الدكتوراة شهادة علمية أكتر من عملية، في حاجة اسمها دكتوراة اكلينيكية لكن أغلب برامج الدكتوراة بتكون عن طريق البحوث العلمية. فمقارنتك دي زي لمن تقول أحسن صحن الشية الكارب ولا أحسن فريق برشلونة؟ البيعمل دكتوراة في الطب يعني لجأت بيو الحيلة دي خلتني في حالة "قف تأمل" وعموما درجة الدكتوراة أعلى من الماجستير والماجستير من أي جامعة مصنفة عالميا مش لو كان من ماليزيا أو مصر، لو كان من كمبوديا، أعلى وأقيم من العضوية الانت بتتكلم عنها دي لكن حصل خير برضو.

9- "في دول الخليج مخصصات الحائزين على هذه العضوية تختلف عن مخصصات غيرهم":
- عقدة الخواجة يعني الممرضة العيونها زرق بتقبض اكتر من الطبيب الاستشاري العربي. شكلو العقدة وصلتنا!

10- "بكل اسف كليات الطب في السودان صارت تمنح درجات الماجستير والدكتوراة في الطب":
- أنا ما فهمت دي حاجة يتأسفو عليها ولا يفتخرو بيها!

في السبعينيات، عميد كلية الطب الانجليزي في جامعة الخرطوم لمن جا يرجع بلدو قال "I am proud to leave behind the best university from cape town to the mediterian". ممكن هسي ما تكون الجامعات بنفس المستوى لكن تدهور الطب ما يعني بالضرورة تدهور التعليم الطبي، بالعكس التعليم والتدريب الطبي في السودان مازال نسبيا بخيرو. ولو ما كدة ما كان يجو الخليجيين يستقدمو المئات من الأطباء السودانيين كل سنة. وما كان مثلا تقرير الأخطاء الطبية السنوي في السعودية بين ألوف الأخطاء وعدد الأخطاء الطبية من السودانيين كانت "صفر". من ديل احسب العندو العضوية الملكية كم، 10%؟ عزيزي الكاتب، اسباب التحصل على عضوية الكلية الملكية البريطانية كتيرة لكن السبب الرئيسي هو مش الزيادة في العلم لكن الزيادة في فرص التوظيف والزيادة في الراتب للناس العندهم "عقدة الخواجة".

عزيزي الكاتب، قبل ما تكتب أقرا، عزيزي الكاتب.. ما تفتي.

[email protected]


تعليقات 1 | إهداء 0 | زيارات 1021

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1061206 [ابزرد]
1.00/5 (1 صوت)

07-19-2014 05:26 PM
نجتطو نجاض قبورة شكرا

[ابزرد]

ياسر الخضر
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة