كف السيل..
08-06-2014 09:38 PM

سلام يا شعبنا المنكوب..
غرقان في الشقا ومصلوب..
حرام وإنت الهزمت تلوب..
تلين خلف السكوت مرعوب..
متين تصحى ..وتقوم ..وتؤوب..
علي دريب فاطنة والمحجوب..
ومتين من غفلتك بتوب ..
من وجع الحشا المضروب..
وبي سيف الضلال مثقوب..
محكوم بالخداع معصوب..
وعقلك رايحة ليهو دروب..
مع طغمة فكر معطوب..
نظام موتور وشيخو لعوب..
رئيس موهوم ..كمان مطلوب..
مُطارد دوم شروق وغروب..
ده عدّم عزك الطنوب ..
إستهواهو فوقنا ركوب..
وهط سرجو بالمقلوب..
على الضهر النزف مغلوب..
***
عفاف العازة بات مخضوب..
دماهو تسيل الى العرقوب..
سوط الجهالة شاقو ندوب..
تنفيذ بالضحك مصحوب..
لي قانون نظام معيبوب ..


***
باعوا عمارنا للمحسوب..
عليهم من قطن وحبوب..
مشروعنا الزمان مزروب..
بي ساعد الجنا الحبوب..
وشارب من صفانا عذوب..
يا ما كان درع منصوب..
يصد الجوع عن المكروب..
وشوفو الليلة بات منهوب..
تقول شالت ثمارو هبوب..
بقينا نعاني يا ما خطوب..
عشان نستورد اللالوب..
قطارالسكة صار مجلوب..
في سوق الخُرد مكبوب..
هو الكان في السفر مرغوب..
وقط ما شفنا فيهو عيوب..

****
الزيت في جردلُن مصبوب..
كم .. كم عبو منو جيوب..
وضاع في غمرة الملعوب..
نصيب الأمة كان حي ووب..
هداك برميله نام مقلوب..
بلدنا الكان عظيم مهيوب..
مع صف الكبار محسوب..
مقدّم و للأمم مندوب..
شقوا جليدو زي كرتوب..
قطعوا في صدورنا قلوب..
وأسقطوا عنو أغلى جنوب..
****
بيوتنا العامرة طينة وطوب..
وفايحة الطيبة فيها طيوب..
يرقص من سخاها طروب..
فوق شِعبتنا سعن الروب..
مالو الليلة صابو نضوب..
وفي خشم الورل محلوب..
ضرعو الياما كفى شعوب..
****
حيشان العطاء الموهوب..
في جدرانها باينة ثقوب..
وفي كف السيول بتذوب..
وجانا الوالي داك يا دوب..
كوز فيهو الفساد مسكوب..
يقول للقلبو شاط مشبوب..
عليك بس ترضى بالمكتوب..
***
6/8/2014
***
[email protected]


تعليقات 4 | إهداء 0 | زيارات 1052

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1073079 [ودتنوب]
1.00/5 (4 صوت)

08-07-2014 12:51 AM
الف سلام من المحبوب الي صوت الجني المحبوب سلام يابرق يسبق الشوب سلام من فارعة في تنوب

[ودتنوب]

#1073034 [المر]
0.00/5 (0 صوت)

08-06-2014 11:04 PM
مقال الاستاذ حيدر احمد خيرالله بعنوان الحكومة والمعارضة والمخارجة والكراكتير المرفق بالمقال يتوأم مع القصيدة الرائعة كف السيل للاستاذ والكاتب المبدع محمد عبدالله برقاوي
نرثي انفسنا علي تحملنا وزر وثقل حمولة ذلك الكرسي الذي جلس علي اجسادنا المنكهة ست وعشرون عام

[المر]

#1073019 [المر]
0.00/5 (0 صوت)

08-06-2014 10:15 PM
لازم نصبر يابرقاوي وماتنسي الناس ديل مكلفين من رب السماء بحكم البلاد واستعباد العباد، انت ما عايز شقة استثمارية في الجنة بسعر مغري جدا ،اصبر شوية 26 سنة كمان وتلقي نفسك من ابوظبي والي الجنة طوالي والوالي أكان كذب عليكم في الدنيا ما بيكذب علكيم في الاخرة مش قالو ليكم لا لدنيا قد عملنا ونشاءالله ، شقتك في الجنة محجوزة يا برقاوي، بس هدن شوية مع الناس ديل وخلي المشاكسة ولعب العيال دا، وحول دولاراتك بسعر الصرف عبر القنوات الرسمية بعد الغربة الطويلة تلقي ليك شقة في الجنة تاني عايز شنو؟؟؟
انسي امر الدنيا والوطن والجماعة دول اكيد حيعوضكم في النهاية
قبر سياحي ، وقطعة ارض استثمارية مميزة وشقة ديلوكس في جنات عدن تجري من تحتها الانهار بس ابعد من ناس الراكوبة وغني معهم في حماك ربنا بدلاً عن شعرك البوديك في ستين الف داهية دا؟؟!!!والله انا بحبك في الله واحسن ليك تسمع كلامي

[المر]

#1073015 [ahmed]
0.00/5 (0 صوت)

08-06-2014 10:07 PM
والله العطيم يا محمد عبدالله برقاوى تطربني شعرا ونثرا شكرا لك يا رائع,,,نتلاقي في ساعة الفرح الكبير انشاء الله...

[ahmed]

محمد عبد الله برقاوي
محمد عبد الله برقاوي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة