المقالات
منوعات
استراحة - ثعبان ياراجل !
استراحة - ثعبان ياراجل !
08-09-2014 11:21 AM



فى مشوار ما واثناء توقف الهايس استجابة لامر شارة المرور الحمراء اطل علينا من خلال الشبابيك (بلاها النوافذ لانو ياعمك يمكن ترجع ليك الذاكرة فجاة وتبقى حاج متذكر لتتذكر انو كهربتكم خلصت ومفروض من محلك ده تمشى تشوف ليك نافذة دفع مقدم وماتعمل حركاتك وكلاماتك المن شاكلة كل تاخيرة وفيهاخيرة لانو حياتك حتضلم وتصيبك الحيرة ومهم جدا انو مايكون عندك التهابات جيبية الليلة هو صاح انتا هسة فاضى وعامل قاضى ودار تمشى تحل مشكلة فلان وانتا كلك مشاكل والله يزيدك لو كانت جيوبك فاضية لانو حتعمم الظلام والكابة على ناس البيت المعاك لوقت قد يطول او يقصر حسب الظروف المالية ومافى طريقة تقول انا مالى لانك المدير المالى للبيت ولادى كمان ناسيها ولو اتذكرتها (نافذة الدفع المقدم)بتتذكر معاها مقدم بعض معارفك لعلاج احدهم ممن طقتو ملاريا ورقدوهو عنبر بحثا عن العافية وانتا لسة مامشيت زرتو وعملتا الواجبات الكافية البتخارجك من اللوم المابتنفع معاهو ما النافية (ماكنت عارف وزميلاتا ) اقوليك الله معاك , المهم اطل احد الباعة المتجولين وقبل ان نرى وجهه راينا مجموعة من الثعابين الطويلة وكمان بتتلوى ! مقعدى كان مع الشباك الاخير واحدة عجبتا حكاية الثعبان البلاستيكى ده لانو طوالى سالتو الثعبان ده بكم ؟! بالله ثعبان بكم ؟ صحيح فعلا اللى معاهو قرش محيرو يجيب حمام ويطيرو سمعتو قاليها بسبعة وكمان بتتفاوض فى السعر -لالاغالى نزل شوية ! خلاص بديك ليو بخمسة - لالا كتيرة ولما (قنع منها) قام بمحاولة اخرى الى ان جا قصادى ملوحا بثعابينه عارضا لبضاعته قلتا ليهو : ده شنو ؟ قال لى : ثعبان قلتاليو : ماانا عارفو يعنى دايرنى اشترى منك ثعبان ياراجل؟ ! فماكان منه الاان اخذ فى الضحك وابتعد وهو لايزال يضحك بينما تحركت العربة اخيرا بعد الاشارة الخضراء . الالعاب البلاستيكية زى العرائس و الدمى صاح مهمة للاطفال الصغار لكن لما يبقى الموضوع فيهو ثعابين طويلة وتتلولو كمان مشكلة يمكن صاح يتعلم منها انو فى حاجة عاملة كده اسمها ثعبان لكن يمكن تكون المشكلة والله لاقدر لو حصل جاو واحد حقيقى حيمشى عليو عشان يلعب بيهو لانو حيفتكرو بتاع اللعبة داك اها كمان اللعبة دى يعنى هسة ممكن تقوم تختها فى ركنية فى صالون ضيوف مثلا مابتجيب خلعة لضيوفك ديل على الاقل فى الدقايق الاولى زى خلعة لعيبة الكورة لما يبدو مباراة مع فريق اقوى منهم اها معناها اتفقنا انها بايخة مع ضيوفك ديل لكن زى مابتقول يمكن تنفع مع زوار الليل ! ومع الحمام والطيور لو عاملة ليك ازعاج بينفع كخدعة رهيبة لكن برضو ياعمك يمكن الثعبان الحقيقى اللابد فى جحر ما من بيتكم الكلو حفر ده يفتكرو جد ويجيك طالع قاصدك عديل وعندها ستصاب بالهلع وتصرخ طالبا النجدة ثعبان ثعبان ثعباااااا انتا لسة بتكورك ماتخاف يازول مافى ثعبان حقيقى ولااى حاجة بس اعمل حسابك من ثعابين يمكن يكونوا حولك من بنى البشر وبنفس القدر احفظ لسانك الطويل ده عشان مايلدغك او تتلدغ بسببو وفى ذلك يقول الامام الشافعى رحمه الله :- احفظ لسانك ايها الانسان لايلدغنك انه ثعبان ومقتل الرجل بين فكيه ورب كلمة سلبت نعمة وجلبت نقمة وحذار ان يسبق لسانك تفكيرك ,واوعك من مصادقة الناس اللى دايما بيتلولوا وماتنسى الشاعر القال ليك :- ودع الكذوب فلايكن لك صاحباً انّ الكذوب لبئس خل ِ يُصحب , ياانتا ابعد عن دروب اللولوة والمتلولوين وامورك تمش عديل و دروبنا تلم وريدنا يتم وانتى تفوتى يااهة .

أبوبكرهارون على طه
كاتب وقاص سودانى
[email protected]


تعليقات 1 | إهداء 0 | زيارات 778

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1074785 [bakr]
0.00/5 (0 صوت)

08-09-2014 04:24 PM
خطأ فنى من الطباعة فى اصل المادة 1/ دايما بيتلولوا = بيتلولوو , 2/ ياانتا ابعد عن دروب اللولوة والمتلولوين وامورك تمش عديل و دروبنا تلم وريدنا يتم وانتى تفوتى يااهة =ياعمك انتا ابعد عن دروب اللولوة والمتلولوين وامورك تمش عديل و عندها يمكنك ان تغنى دروبنا تلم وريدنا يتم وانتى تفوتى يااهة .

[bakr]

أبوبكرهارون على طه
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة