عدوها خنق ...قال ..!
08-09-2014 04:01 PM

عدوها خنق .. قال ..!
( مقال سجعي )
***


يا السابحين في السيل الشال..
كل متاعكم .. والآمال ..
صال في بيوتكم ماصها وجال..
وفيكم من لبى نداء الآجال ..
وفات الدار القالو محال..
أبداً يوم فيها تدوم أحوال..
وخلى بعضكم هايم رحال..
نزح مكروب لا نال لا طال..
غير قبض الريح والجرح سجال ..
ينهش في قلبو وتابعنو جهال..
زايدين في نارو.. والهم ينهال..
***
بعد..ما غرقتو جاكم يختال..
يا الإتكومتو ..نساء ورجال..
للمنصبو والي وحايطنو عيال..
بي قامة تخينة كما التمثال..
وقف يتفرج وشدا البنطال..
يخطّب يتفشخر..وفوق رأسكم بال..
خاض في المويه وبله السروال..
ودفّق دمعو الزايف هطال..
ممثل فاشل ..تمساح محتال..
مسح الكرشه.. إتراقص ومال..
ردد آيات الصبر وقال..
أهو حالكم زين و مابطال..
عايشين تتنفسوا في الأوحال..
غيركم في الوادي غطس رحال..
وشعوب إندفنت بالزلزال..
أحمدو ربكم الحّلال..
أهو ..نحن معاكم .. بي حسن الفال..
زمان الشر كان قِصر أو طال ..
الخير جاييكم واللهِ جبال ..
في برنامجنا الكلو فعّال..
حاتشوفو عجب بعد الأقوال..
المآوى .. المآكل .. والأمصال..
قراية ..عدالة .. والكل شغال..
الكان متعطل أو قول تربال..
باكر يتهنى ويقدل خوجال..
خلونا نجخ صندوقنا ونحتال..
نشك الورق الداير عَمّال..
يخرت فيكم..بالإستغفال..
نوزعو.. تاني وفي إستمهال..
ننتخب الريس ودي دايرة سؤال..
مين غيرو بطيق حمل الأثقال..
وبحج للدوحة .. يجيب المال..
كان قلتو الروب أو طوّلتو البال..
ماليكم حل غير هذا المّوال..
نقعد فوقكم .. وقعدتنا حلال..
حانظل ..راكبين ..ما دمتو ..بغال..
نجدد مشروعنا ..ولو درتو نزال..
أو جاء يحركم ..واحداً ضال..
ده الحايضيعكم .. ويبقى وبال ..
وياما تشوفو .. رصاص و نصال..
***
وقول نحنا مشينا وده فرضِ مُحال..
بس نفرض يعني كما الأمثال..
مين حايخلفنا بالإحلال..
غير سيدي وسيدك وحكم الإهمال..
ويجوكم راجعين كده كم دجال..
الأكتر مننا إستهبال..
ياما يوروكم فلم الأهوال..
وتتمنوا غرقنا .. أو إستعجال..
عسكري ينشلكم ..من سوء الحال..
عدوها خنق ..مالينا بِدال..
إستحملوا لسع.. وأبقو رجال..
****
9/8/2014

[email protected]


تعليقات 3 | إهداء 0 | زيارات 1649

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1075046 [المر]
2.58/5 (21 صوت)

08-10-2014 12:42 AM
لك التحية الاخ المبدع برقاوى وانت رفضت تسمع وصيتي ....الظاهر انت ما داير قبر سياحي ولاقطعة ارض استثمارية في جنة عرضها السموات والارض باسعار مغرية جداً بس تكون فردة كورس في نشيد في سبيل ديننا وفي حماك ربنا( قول متين الخلاص)

[المر]

#1074804 [julgam]
2.59/5 (21 صوت)

08-09-2014 04:55 PM
حياك الله أبا ماهر ،،قال نقضى الباقى من العام دا خنق ،وقبلها قالوا تموا الباقى خيال،،،،
ياخى نحن ما جعليين ،لأنه قالوا الجعلى بقضى يومه خنق،،
ثم ثانيآ جاتنى فكره ليه ما يقضى الشعب السودانى باقى السنه خنق ولكن فيكم يا أبالسه يا أبناء الكلب والأحبه جميعآ بلا إستثناء ،كما قال مظفر النواب

[julgam]

#1074801 [ahmed]
3.99/5 (20 صوت)

08-09-2014 04:53 PM
ياسلام عليك تسلم البطن الجابتك

[ahmed]

محمد عبد الله برقاوي
محمد عبد الله برقاوي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة