الصادق وصاطة الموية بلا غلادة
08-09-2014 06:06 PM


والدتي عليها الرحمة ، كانت تقول عن ما لايتوقع منه انجاز اي عمل ، او من يقوم بعمل عبثي ,, بصوط الموية بلا غلادة ,, والغلادة هي ما يضاف الي الماء كالدقيق لعمل مديدة او عصيدة . وكل ما يضاف الي الماء لعمل ملاح او ادام من شرموط درابه ام شعيفة او ام تكشوا او كجيك او اي شئ يجعل الماء ,,غليدا ,, او غليظا . وبدون توقع اي نتيجة ، فالصادق بيصوط في الموية بلا غلادة .
والجبهة الثورية ما فايت عليها انه الصادق بيعتبرمن اكبرصواتين الموية بلا غلادة . وهم مخلنه في حاله . الصادق يحب التجمعات والمؤتمرات والمكرفونات ويدمن الاشادات والعمببة والتصريحات . لو كان اوربي لخطط الناس لوضع علي شاهد قبره رسم مكرفون او مجسم مكرفون . فلاعب التنس يضعون له رسم مضرب تنس او مضرب قولف للاعب القولف او كمرة للمصور المشهور . وتجمع باريس ليس من المناسبات التي يمكن ان لايشارك فيها الصادق .فهذه احلي حرارة بالنسبة له . ويموت غيظا عندما لا يشارك . وهذه صفات كل المصابين بمرض النرجسية .
الحكم بالنسبة للصادق والميرغني عبارة عن كاس او غنيمة هي ملك الاهي بالنسبة لهم يمكن ان يتشاركوها مكرهين . ولكن لن يسمحوا للآخرين من امتلاكها . وبالنسبة لهم الحكومات العسكرية حالة حمي تزول . يعودون بعدها لاستلام حقوقهم الشرعية . زائدا بعض البونص والتعويضات .. ولكن الخوف الآن ان يتطفل محاربي الجبهة الثورية واهل الهامش علي قدسية السلطة . ووقتها كماشة قبض مسمار . ولن يجد الصادق والميرغني فرقة . علشان كدة الصادق رجل في الطوف ورجل في المركب . او الايد في الخمارة والعين في السحارة . ولقد تعلم من استاذه الترابي مقدرة التملص . وبقي ذي ود الموية ، ما بنقبض . وبكرة نسمع انه ناضل وضحي . وانسجن عندما كان الرجل الوحيد الذي تحدي حميدتي ، وتحدث عن نعامة المك .
وسينسي الشعب السوداني المصاب بفقدان الزاكرة . اعتذار وجرسة الصادق . وستظهر صور الصادق في باريس عندما جمع المعارضة وتحدي النظام وانجح الموتمر الذي لم يكن لينجح او لينعقد بدون مباركة الصادق . ولماذا اوقف نائب الصادق من السفر ؟ يكون الموضوع عزف منفرد من الصادق بدون الخروج عن النص والنوتة الكيزانية؟ وابطال الموتمر السوداني لن يهتم بهم اي انسان عندما تنصب السرادق ويهلل الانصار الله اكبر ولله الحمد . ويصرخ الختمية ابو هاشم حوض العاشم . وسنواصل حياتنا كأمة من الاضينات . وسننسي ان الصادق قال امام العدسات التي لا تكذب ,, البشير جلدنا وما بنجر فيه الشوك ,, وها نحن قد نسينا . والصادق قبض الكاش . وامبارح القريبة دي الصادق مش علقوا ليه مشلعيب الانقاذ وقالوا تكريم ؟ وكان قاعد مع البشير والترابي وبيغرود ؟؟
بربكم هل سألتوا انفسكم من يدفع ملبس الصادق وعلف خيوله ومرتبات خدمه ، وفاتورة الكهرباء والماء والنفايات وبنزين السيارات وصيانتها ، والسفر والهوتيلات والرحلات والعلاج والدواء والتجمعات والعشاء وحفلات الشاي في منزل الصادق ؟ كل هذه المصائب يعيشها كل الشعب السوداني والميرغني والصادق لايدفعون هذه الفواتير ولا تقدم لهم . خلي اي زول يجيب لينا ايصالات . والصادق ما عنده لا فراشة ولا كنتين . بيملا الزير من وين ؟
لو نسينا ده كله ، عاوزين الصادق يدفع بجيوش الانصار علشان الجبهة الثورية تستلم السلطة علشان تحاكموا ولده وتتلتله ، وتجرجروه في المعتقلات والمحاكم ؟؟ عبد الرحمن ده يمكن يقدر علي الدردرة . لكن ود الميرغني الذي البسكويت المحشي عاوزين ابوه يسقط ليكم الا نقاذ علشان تقرقشوا ولدة ؟ عالم بتحلم . ود الميرغني حاكم من منازلهم . قصور ابوه والقصر الجمهوري ما استحملهم . قاعد في لندن . قطار الانفاق ما بيستحملوا خليك من زنازين كوبر . والايام دي الناموسة قدر القمرية .
والله يا الشعب السوداني امرك عجيب . الهندي سجل ليكم شريط . وقال ليكم عملوا اتفاق مع الصادق في 1977 وادوه عشرة شروط للاتفاق مع النميري بخصوص المصالحة . الصادق مشي واتفق مع النميري علي التعويضات لممتلكات اهله ومحلج ربك ودائرة المهدي . وجلس مع نميري في الاتحاد الاشتراكي . وبعد شوية دخل الترابي والكيزان . والاتفاق استلموا السوق وابعدوا عن السلطة . ودلوكت الصادق لا يستطيع ان يتحرك خارج المربع المرسوم . ما يمسكه الكيزان علي الصادق اذا تسرب واحد في المية ،حتي الشعب المغيب والمستغفل ما بيعاين للصلدق تاني. ومال البخلي تاجر السيخ كرتي يقدر يقول عن الميرغني والصادق سجمانين شنو ؟؟ زول يصف بواسطة وزير الدبلوماسية بانه ***** ، ولا يزال يلهث خلف الشاتمين . مابيعرف غير يصوط الموية بلا غلادة .
طيب الصادق بيقول ان لابنه الخيار في الانضمام الي الاتقاذ ، هل ادان تلك الخطوة . والصادق يعشق ويدمن التصريحات والتشريعات وانتقاد الآخرين . وينتقد الامن ويقول عنهم اكثرمن ، ما قالت ست العرقي في شاويش الكشة . نتحدي الصادق لان يدين انضمام ابنائه للانقاذ .

[email protected]


تعليقات 16 | إهداء 0 | زيارات 3819

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1076468 [جاقوم]
3.00/5 (1 صوت)

08-11-2014 04:08 PM
معقول ياعم شوقي وين وقار الشيوخ

ليه كل التحامل والكره دا

معقول بسكويت عديل

والله بالغت عديل


المثل بيقول السفيه نبز الباشا

[جاقوم]

#1076192 [زهجان من الضبان]
5.00/5 (1 صوت)

08-11-2014 11:01 AM
الصادق دا اكبر خازوق في تاريخ السودان يكفي انه هو السبب في ما نعيش فيه الآن
حيث اكد لي احد اعضاء مجلس راس الدولة السابق التقيتة في ورشة للسيارات انه ابلغ الصادق شخصيا بنية الجبهة في قلب الحكم .... لكنه كالعادة الصادق كان قاعدلو فوق راي و حصلت الكارثة ..
لو عندي سلطة حا انزع كل املاك الاقطاعيين آل المهدي و آل الميرغني و اردها للشعب

[زهجان من الضبان]

#1075647 [الحراس]
5.00/5 (1 صوت)

08-10-2014 04:46 PM
اقتباس من مقال عمك شوقى ( شفاه الله )
بربكم هل سألتوا انفسكم من يدفع ملبس الصادق وعلف خيوله ومرتبات خدمه ، وفاتورة الكهرباء والماء والنفايات وبنزين السيارات وصيانتها ، والسفر والهوتيلات والرحلات والعلاج والدواء والتجمعات والعشاء وحفلات الشاي في منزل الصادق ؟ كل هذه المصائب يعيشها كل الشعب السوداني والميرغني والصادق لايدفعون هذه الفواتير ولا تقدم لهم . خلي اي زول يجيب لينا ايصالات . والصادق ما عنده لا فراشة ولا كنتين . بيملا الزير من وين ؟

يا شوقى بدرى انت طايرة ليك .... واللا لسه ما شربت قهوتك ؟؟ انت ناسى بتتكلم عن منو ؟؟ بتسأل الصادق المهدى بجيب القروش من وين وانت عامل فيها ود امدرمان ؟؟ انت قايلو جاى من حوش بانقا اول امس ؟؟ اذا كان القروش بقت عند الناس البسكو القطر فى محطة حوش بانقا ما تتلقى عند الصادق حفيد الامام عبد الرحمن؟؟ ح تقول لى الامام عبد الرحمن اقطاعى زى الرجرجة المعجبين بيك ديل ؟؟ طيب يا اخى اقطاعى بس ورث اولاده قروش كفتهم هم الاغتراب للسويد والنرويج وكفتهم شرب البيرة الباردة والخطرفة فى النت ..
بعدين يا اخى الناس اوزان ... اهو الجبهة الثورية عرفت وزنو ووقعت معاهو ميثاق وقبلها الحزب الشيوعى والحركة الشعبية قطاع الشمال .. يكونوا ديل ما قروا مقالاتك الرهيبة دى عشان يغيروا رائهم تجاهو ؟؟
تانى بقول ليك زى كل مرة خليك فى حكاوى القعدات والحانات وسيب السياسة للمحللين الكبار ..

[الحراس]

ردود على الحراس
United Kingdom [نص صديري] 08-10-2014 11:11 PM
ممكن انت تورينا دخل الصادق من وين؟؟؟

Australia [احمد محمد] 08-10-2014 08:48 PM
ورثة الامام عبدالرحمن زمان قسموها زمان ولما ناس احمد المهدى واخوانه واخواته شالوا نصيبهم الفضل للصادق واخوانه الكتار ما كان كتير ( نصيب ولد واحد هو الصديق) عشان كده ومع تطاول السنين وتكاثر الذريات الحكاية بقت ما بتخارج واصبحت هناك حوجة لمصادر دخل أخرى للصادق ليعيش فى مستوى الملوك الذى يريده وأكبر دليل على ذلك ان مبارك الفاضل كان يصرف عليه اثناء وجوده بالخارج معارضا ايام التجمع الوطنى الديمقراطى بالقاهرة واسمرا لذلك فرض عليه اتفاق جيبوتى الذى عاد بموجبه للسودان ونفذ مبارك مآربه بان شارك فى الحكم وترك الصادق يلعق جراحه وبعدها جري ما نعرفه جميعا من مراوغات وتنظير ومماحكات تصب كلها فى مصلحة المؤتمر الوطنى ومخططاته بصورة او بأخرى وقراء الراكوبة المتابعين للسنوات الاخيرة يدركون ذلك وكيف كانت مواقفه متذبذبة ومتناقضة تثبيطا لكل خطط القوى المعارضة.
ليس دفاعا عن شوقى بدري ولكن يكفيه انه لم يعش على تاريخ جده ولكنه كافح وصنع مستقبله بكفاحه وبعرق جبينه والبيرة الباردة التى تعيبه بها ( ان كان يشربها ) فهو يشتريها من حر ماله وليس من عرق الآخرين ..
فى الختام قلت :( تانى بقول ليك زى كل مرة خليك فى حكاوى القعدات والحانات وسيب السياسة للمحللين الكبار .. ) بس أوعى تكون حاسب نفسك من المحللين الكبار .. والله الا يكون حصل طلاق بالتلاته عشان تبقى محلل

Sweden [shawgi badri] 08-10-2014 08:32 PM
انت عارف انه الترماج ما بمشي القماير ؟ انا لا بشرب قهوة لا شاي ولا في حباتي ضقت بيرة وما حاضوقها ولا شربت سجاير . امشي صلح معلوماتك . الصادق وكت عنده . بيقبض من الانقاذ ليه ؟؟ الشاهد كرتي قال بيقبض بالليل وبشتم بالنهار . ووصفه ب س ج ما ن . امشوا اشتكوا او اضبحوا كرتي .


#1075559 [سام بخت]
3.50/5 (2 صوت)

08-10-2014 02:54 PM
وما دورك الوطنى انت واباءك فى تاريخ السودان غير الفتن وموالاة كل ما هو ضد السودان

[سام بخت]

#1075390 [مصطفي ابراهيم]
3.50/5 (2 صوت)

08-10-2014 12:17 PM
السيد الامام
1- يجيد الطرح
2- يحب القسمة
3- لا يحسن الضرب
4- غير موفق فى الجمع
5- يشبهه (ص) فى علاقتها ب ( س )
6- فى حميع العلاقات المطردة هو الثابت
ومع ذلك فهو ينتمى الى مجموعة السودانيين الطبيعية
هل من رياضى ضليع يصوغ لنا معادلته

[مصطفي ابراهيم]

#1075372 [ابوغفران]
5.00/5 (1 صوت)

08-10-2014 12:00 PM
هلا ..هلاياعم شوقى عفيت منك.

[ابوغفران]

#1075232 [د. هشام]
5.00/5 (1 صوت)

08-10-2014 09:38 AM
والله يا أستاذ شوقي بدري كلامك جميل و بيضحكنا كتير... لكن المشكلة كلما نأمل في مخرج كلامك بيحبطنا!! أها! الشورة شنو و العمل شنو؟!

[د. هشام]

#1075148 [شاهد اثبات]
4.00/5 (1 صوت)

08-10-2014 07:15 AM
اقتباس -الحكم بالنسبة للصادق والميرغني عبارة عن كاس او غنيمة هي ملك الاهي بالنسبة لهم يمكن ان يتشاركوها مكرهين .

ويصرخ الختمية ابو هاشم حوض العاشم .

لكن ود الميرغني الذي البسكويت المحشي عاوزين ابوه يسقط ليكم الا نقاذ علشان تقرقشوا ولدة ؟ عالم بتحلم . ود الميرغني حاكم من منازلهم . قصور ابوه والقصر الجمهوري ما استحملهم . قاعد في لندن . قطار الانفاق ما بيستحملوا خليك من زنازين كوبر . والايام دي الناموسة قدر القمرية-انتهى الاقتباس

عمنا شوقي "تالله انك لفي ضلالك القديم"..وعايز تخلط الاوراق ساكت -بالله ركز لينا على الامام تقدس سره فقط بدون تهويمات ..
الحزب اللاتحادي الديموقراطي ومرشده السيد محمد عثمان الميرغني...ليس لهم ملشيات وماضي مشين ومجلل بالعار في القتل في لهامش او خفة يد الثورية في المركز وظلت مواقفهم ثابتة وما بضرورة تجاري اوهام الناصريين اوالشيوعيين او ابواق "سوط العرب" وجاءواعبر العصور القصر الجمهوري بالانتخابات..وعلى قلة الانجازات وكثرة المخازي في السودان القديم يعتبر الحزب الاتحادي الديموقراطي الاقل ضررا بعد
1- لاخوان المسلمين
2- حزب لامة نسخة الصادق
3- القومجية بتاعين التطهير واجب وطني المسخو العلم و الشعار والتعليم والخدمة المدنية والقوات النظامية والامن والقتلو الازهراي بخساسة بقطع الميعنات الدوائية عنه-جريمة قتل من االدرجة الثانية - والقعدوا يجعروا لمن مات هبل صنم العرب االاكبر عبدالناصر .ذى ابوعيسى
4- الشيوعيين "خضراء الدمن الفتاة الحسناء في منبت السوء"..وديل مسؤلين بالاشتراك لجنائي مع انقلاب القوميين وكل مخازي 1969-1971
وشهادة د.قرنق في محمد عثمان الميرغني في زمن التجمع هي ارفع وسام وموثقة
ظل ثابت على موقفه فى التجمع لاخر لحظة
التزم بي نيفاشا حتى لمن هرول قطاع الشمال مع المهرولين الامة والشيوعيين من المؤلفة جيبوهم وخاض لانتخابات 2010الى اخر شوط وهذا يعني انه لم يدفع له ولا يتعيش من المؤتمر الوطني..
اما لمزايدة لرخيسة على مواقف الحزب وموقفه من الوضع الراهن والمؤتمر الوطني دي ما بقيما اهل النخبة لسودانية وادمان الفشل ناس غلفا وشايلة موسا تتطهر بل التاريخ
يا عمنا شوقي الختمية والحزب الاتحادي رصيد ايجابي للسودان الجديد وحليف استرايجي للحركة الشعبية نسخة دكتور جون قرنق وليس نسخة ياسرعرمان القاعد لينا مع الجبهة الوطنية 2014وليس خصما عليه وهذا ما ادركه دكتور جون قرنق االذكي ان الاتحادي الديموقراطي ليس له ايدولجية -وافدة- ولامطامع في السلطة واالثروة ..
يكونو اقطاعيين يشيلو نخلنا نحن راضين "ياكلا الاسد ولا تاكلا الضبعة" وهسة النخل بقا يحرق براه ونزعت منه البركة في البلد الذى خبث ..واتحداك تختو االصناديق في انتخابات حرة نزيهة عشان نشوف منو فعلا البمثل الشعب لسوداني
القمة بقت
1- حزب المؤتمر السوداني وابراهيم الشيخ
2- الحزب الجمهوري تحت التسجيل
3- الحزب الاتحادي الديموقراطي -الاصل-فقط يحتاج الى خطاب تنموي جديد ونسخة مطورة
عاش ابوهاشم واااييي وايييي

[شاهد اثبات]

ردود على شاهد اثبات
Qatar [ابوغفران] 08-10-2014 11:54 AM
والله ياشاهد اثبات انت ظريف ,تهظر ساكت مافارقة معاك ,تحت تحت متكيف لكلام شوقى بدرى .


#1075032 [المر]
2.56/5 (22 صوت)

08-10-2014 12:25 AM
ود الميرغني الذي البسكويت المحشي عاوزين ابوه يسقط ليكم الانقاذ علشان تقرشوا ولد !!
( شنو ياعمك الضرس تاورك ؟؟!!)

[المر]

ردود على المر
Saudi Arabia [M. khiery] 08-10-2014 05:54 PM
ياأخي عمك شوقي حيسلم الولد لعثمان الترزي!


#1075013 [حسين]
3.70/5 (23 صوت)

08-09-2014 11:41 PM
يا عمك .. قول نتحدي الصادق أن يصّمد في رأيه بأنه اتفق مع الثورية ووووو
في خبر قبل شوية براكوبتنا دي زاااته ، الإمام اتصل بمؤتمره الوطني بما فعل وبكرا لما بجي يمكن يعتذر او يقول كلام تاني .
ما عهدنا في الصادق (صدقاً) ..

لو أرادت الجبهه او قوي الاجماع النجاح فلتترك أمر الصادق ، أما رئيس حزب الفته فالرجل واضح داخل بكل كرعينووو في المركب المعطوب .

[حسين]

#1074975 [طارق]
4.38/5 (24 صوت)

08-09-2014 10:23 PM
اقوى ما كتب شوقي بدري
عفيت منك يا استاذنا
وادام عليك الصحة والعافيه

[طارق]

#1074956 [نص صديري]
3.70/5 (22 صوت)

08-09-2014 10:10 PM
والله ياشوقي اضحكتني بعد كجر سماع اخبار بيانه مع الجبهة تعرف فعلا مفروض الصحفيين يحققوا في دخل الصادق ده من وين لانه برضوا مال عام وقصة التعويضات ما بتتبلع
زمن الانجليز ربما تذكر قصة السيد عبدالرحمن وبزخه ودين بنك باركليز وقصة الشيك الطاير لقد اشارت وثائق الخارجية البريطانية للدين ده لكن لم تفرج عن محتوى الورقة السرية التي وقعها لممثلها رغم اشارتها لها في الوثائق المفرج عنها.
الصادق ناس الانقاذ عارفينوا مابيعيش بدون فلوس والواضح قابضين عليه حاجة

[نص صديري]

#1074929 [عمدة]
4.37/5 (31 صوت)

08-09-2014 09:37 PM
شكرا استاذ شوقى. انت طبعا من القلائل الذين يعرفون (البير وغطاها). شخصيا لا أهتم كثيرا لما يقول الامام السجمان فقد تمت تربيته ليكون هكذا (وطبعا لا أقول ما يفعل لانه فى الاصل لا يوجد فعل)ولكن مشكلتى فى هذه الدنيا مع معشر (العبيد والتابعين وحارقى البخور) وللأسف الشديد جدا منهم متعلمين (علم القلم الما بزيل بلم) وبعد شوية حيطلع ليك المئات منهم مدافعين عن سيدهم. نريد تحرير الافراد من عبادة الأسياد أولا ومن ثم سيكون للتغيير معنى. ودمت.

[عمدة]

#1074896 [hijazee]
3.33/5 (24 صوت)

08-09-2014 08:38 PM
شنو هو فى تقديرك يا استاذ الحاجات الماسكها الكيزان على الصادق اذا تسرب واحد فى المائة منها يجعل حتى الشعب المغيب والمسنغفل ما بيعاين للصادق تاني.ده معناه مصيبة كبيرة

[hijazee]

ردود على hijazee
United Arab Emirates [ودالباشا] 08-10-2014 12:29 AM
نحنا عايزين نعرف الحاجات دو شنو


#1074863 [الخمجان]
3.36/5 (23 صوت)

08-09-2014 07:15 PM
اها يا عمك تنقوا الاتفاق بين الصادق والجبهة الثورية حرقك بقيت تهضرب ؟ دة كلو حقد على الصادق لانو استفزاك فى اوروبا قدام البروفيسورات والدكاترة لمن قليت ادبك عليهو ... الله يشفيك من عقدة الصادق

[الخمجان]

ردود على الخمجان
United Arab Emirates [ودالباشا] 08-10-2014 12:28 AM
انت ماتخفس الكلام وتوصلو حدو

Canada [الدنقلاوي] 08-10-2014 12:02 AM
أشيد باختيارك لاسم الخمجان
فالأخماج في الطب في هي الفطور الرمامة والتجمعات الكبيرة للجراثيم والبكتريا في مناطق معينة في الجسد والتي تحدث تحلل وتعفن للخلايا الحية كأخماج الجهاز التنفسي أو المعوي أو أخماج داء السكري، ويبدو أنك خمجان بمعنى كثير الأخماج الفكرية والسياسية والله يديك العافية ويخليك لسيدك


#1074854 [الغضنفر]
2.46/5 (22 صوت)

08-09-2014 06:53 PM
(والله يا الشعب السوداني امرك عجيب)!!!!!!!!!!!!!!!! و هذا مربط الفرس يا عم شوقي
و علامات التعجب من عندي

شعب منوم مغناطيسياً .. تقول شنو بس؟؟

[الغضنفر]

ردود على الغضنفر
Yemen [شاهد اثبات] 08-10-2014 07:21 AM
لا تهين الشعب يا فاشل
طلع 5 مليون لي قرنق 2005
وسجل 18 مليون في انتخابات 2010
العيب فيكم وفي بضاعتكم البايرة واعاة التدوير المملة من تجمع جوبا لي قوى الاجماع الوطني لاعلان باريس ولازال قطاع الشمال في متاهته من جبهة ثورية لي اعلان باريس وفقد بوصلته تماما بسبب الشيوعيين المستشارين المتكلسين في 1964وفي القطاع وفعلا يموت الزمار واصابه تلعب
لمن تجي رؤية محترمة جديدة ذى بتاعة قرنق _الاصل -الناس كلها بتطلع ودابى استيقنت مقولة محمود محمد طه الشعب السوداني شعب عملاق يتقدمه االاقزام

Qatar [الحازمي] 08-10-2014 02:59 AM
الشعب المنوم مغناطيسيا دا نصحي كيف؟؟؟؟!!
بالقناة الفضائية و انتو في الخارج "أبيتوا دت كي" ما تساهموا في الاعلام السلاح الفتاك الذي تخشاهو المعارضة قبل الحكومة؟؟؟؟
كم نحن لحم راس تتلاعب بنا طوائف تجار الدين!!!!!


شوقي بدري
شوقي بدري

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة