المقالات
السياسة
ود الشول ..السفاح اللفاح..11
ود الشول ..السفاح اللفاح..11
08-10-2014 02:12 AM

ود الشول..السفاح اللفاح..!!

يمة ..وين إنتى يا الحاجة..
مالك يا المكاوى فى شنو..؟
ناس الجندى قالوا راحلين ..
ماشين وين يا ولد ..؟
قالوا ماشين المدينة هداك الدفار واقف يشيل فى حاجات البيت والجندى خلى دكانه لى ود أخوه..ولدوا قالوا بنى ليهم بيت كبييير وسمح وقال ليهم أنا اشتريت العفش من برة ما تجيبوا عفشكم القديم داك..والدفار الواقف ذاتوا قالوا حقوا...أنا ماشى أرفع معاهم العفش وبجى راجع اتغدى..
ما شاء الله اريتوا حال السرور شغال شنوا هناك يا ولدى..؟
ناس الحلة قالوا شغال ليهوا فى مصلحة بتاع سفح ولفح..
يعنى شنو يا يمة سفح ولفح..؟
ببساطته نفسها ردت عليه معناها يا المكاوى شاطر وتفتيحة شديد..
لكن يا يمة ما قاعد يجى الحلة زمان طوالى كان بجى خالوا اتكلم معاهوا قال ليهوا جبت القروش الكُتار ديل من وين خلى الحلة، هو كان داير بت خالوا السمحة الفى الجامعة ديك..خالوا قال ليهوا كان ما وريتنى جبت القروش ديل من وين ما بتمسك إيده...أسى يا يمة ما بدونى ليها..
إندخر ليك يا المكاوى هو ما أداها لى ود أخته المروق ده يديك ليها إنت يا الكِبة..
خلاص أنا ماشى ليهم أرفع معاهم العفش وبعدين بكلموا يكلم لى ولدوا التفتيحة ده يشغلنى معاهوا هناك عشان أروق زيوا..والله يا حاجة الشول أرطب بيك ترطيبة وترحلى معاى بعد ما أبنى ليك بيت صاح ما زى بيتك المبشتن ده..
من خشمك لى باب السماء يا ولدى عند ربى ما قاسية..
كعادته ود الشول الشاب البسيط صاحب الهمة والمروءة العالية إجتهد كثيراً مع بقية شباب قريته فى رفع العفش وقد عُرف عنه التفانى فى خدمة الغير من أهل قريته ومحبته الكبيرة لهم وهم كذلك يبادلونه الحب لما يتمتع به من سريرة خالية من شوائب وقلب فيه كثير من صفاء ..كان مستمتعاً مع أقرانه فى مساعدة أهل الجندى وقد عزموا الرحيل من القرية...
مع رفع أخر قطعة من العفش المُراد حمله للمنزل الجديد صاح ود الشول بأعلى صوته منادياً حاج الجندى ..عليك الله ياحاج كلم لى ولدك يشغلنى معاهوا فى المصلحة السمحة الشغال فيها دى ..أجابه عمه الجندى باسماً..
تشتغل فيها شنوا يا ولدى المكاوى..؟
زى ولدك سفح ولفح ساى بس إنت قايلنى أنا ما بعرف حاجة والله أنا شاطر ومفتح خلاص أسأل أمى كان ما مصدقنى..
يا ولد ده كلام شنوا البتقول فيهوا ..صاح الجميع فى ود الشول ..
أنا قلت شنوا غلط عشان تهيجوا فينى كدة كلكم.
همهم بعضهم..قلت الكلام الما بقدر غيرك يقولوا..
صمت الجميع وتحرك الدفار..

بلا أقنعة...
صحيفة الجريدة...
[email protected]


تعليقات 2 | إهداء 0 | زيارات 1440

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1076425 [صلاح مصطفي أحمد]
1.65/5 (9 صوت)

08-11-2014 03:05 PM
جميلة جدا وللأسف في كل قري السودان ومدنه يوجد ودالشول وفي كل الأماكن الأخري يوجد السفاح اللفاح ـ يعطيك العافية وهكذا السودان ؟ الاخ زاهر بخيت هل انت أخو الصادق بخيت والله الشبه يخلف مليون .

[صلاح مصطفي أحمد]

ردود على صلاح مصطفي أحمد
[محمد سنادة الزمزمى] 08-12-2014 01:56 AM
نعم هى كذلك تُحدث عن واقع فيه نعيش الآن وتكاد المقالة تُحدث كل فرد فيناعن مجتمعه وما أكثر ناس السفحى واللفحى الآن بيننا...بالمناسبة هو أخو دكتور الصادق بخيت مع اختلافه معه فى تناوله للمواضيع التى تهم المجتمع والناس وايصالها لهم فى قالب جميل بسيط..


#1076369 [samar]
1.00/5 (1 صوت)

08-11-2014 01:43 PM
سبحان الله انا بعرف برضو واحد تاني ود الشول السفاح اللفاح الحاقد ابو قلب اسود

[samar]

زاهر بخيت الفكى
زاهر بخيت الفكى

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة