المقالات
السياسة
د. مريم الصادق المهدي
د. مريم الصادق المهدي
08-13-2014 11:43 AM

مسرحيه؟ والله كان مسرحيه ماعارف. انتو الناس دي حكايتا شنو مع قيادات حزب الامه؟ اي خطوه يقومو بيها يشوفوها مسرحيه. وزي ماكتب واحد في النت الصادق مشكلته كبيره. يصالح ووب , يحارب ووب, يقاطع الجبهه الثوريه ووب يتفق معاها ووبين. يكون مع الحكومه تلاته ووبات ويهاجما مليون ووب. حتي الندوه النظمته المعارضه في لندن لي فاروق ابوعيسي رئيس قوي الاجماع الوطني عشان يورينا هم منو وبعملو في شنو وحسب قولو كمان دايرين يعرفو راينا كقوي مستنيره في كيفيه تشكيل المستقبل, اتحولت الندوه دي لي هجوم لاذع لي حزب الامه والجبهه الثوريه كانهم هم الحكام للسودان الان. فاروق ابو عيسي قدر ماحاول ينظف لسانو من الكلام البيسئ للسيد الامام فشل في ذلك واتعامل مع اتفاق باريس كانه اتفاق مع المؤتمر الوطني وليس بين اكبر قوي مدنيه معارضه وعسكريه لازالت هي المقاتل الوحيد في الميدان العسكري. بعدين هي قوي الاجماع الوطني دي ذاتا شنو غير مجموعه من الاحزاب بعضها لا تزيد عضويته عن اصابع اليد الواحده. يجي السيد فاروق ابوعيسي يحاول يقنعنا بانو داير حزب الامه القومي يرجع عضو في قوي النتجمع وداير واحد من الاحزاب دي يكون رئيس عليه كمان؟ دي يفهموها كيف ياحضره الاستاذ. غايتو الناس ديل مغصونا وساهرو بينا لغايه ماقرب القطر الاخير يفوتنا. برضو في الندوه دي ريحة المسرحيه كانت طاقه.
اسطوانة المسرحيه المدوره من امبارح في خبر اعتقال الدكتوره مريم كانت فعلا سمجه وممله. ياخ مسرحيه شنو والدكتوره جات نص الليل لقت ناس الامن مستننها وراحو ماخدنها من جوه الطياره لي مكاتبهم وهاك ياتحقيقات لغايه تاني يوم وبعد داك ودوها سجن امدرمان. انتو الناس دي فاكره التعامل مع ناس الامن شئ ساهل ولا القعده اليوم كلو نوع من الترفيه, ولا سجن امدرمان خلاص فندق خمسه نجوم؟ المغالط اليسال المناضل محمد ضياء الدين. سجن امدرمان دا لو جيت ماشي بي جنبو بس يحصل ليك اكتئاب. يعني هل ممكن ناس الامن بالتعاون مع ناس حزب الامه يعملو مسرحيه علي ضوءها يسوقو الدكتوره يودوها سجن امدرمان؟ يجوك ناس عشان يقللو من نضال الدكتوره يقولو ليك هم زاتهم في سجن امدرمان عاملوها مازي بقيه المساجين. ياناس المعارضه بطلو سخف معاكم علي الاقل لو ماقادرين تفهمو كيفيه النضال واحفظو للناس حقها.
البفرس في ناس المعارضه ديل لواكتهم لي حكاية المسرحيه دي. ياخ ديل نفس الدكتوره دي ناس الامن قبل كده كسرو يدها عديل كده, برضو الرمم ديل قالو دي مسرحيه. غايتو ولا نحنا شعب اهبل ولا الناس المسئولين مننا ناس هبل.
بصراحة كده ناس حزب الامه حسب ماشايفينهم لا بتاعين مسرحيات ولا الله قال. مما جات الانقاذ, الناس ديل خطهم واحد اصلو ما اتغير عكس ناس كتار بس سحليه وشاركو عديل في الانقاذ وامكن كمان يكون هبرو ليهم كم هبره تحت تحت كده. زعماء حزب الامه مكانك سر. الناس الداوشنا كل دقيقه بي حكاية عبدالرحمن الصادق المهدي بنقول ليهم دا ضابط في الجيش ارتضي يدخل الحكومه ودخل. ومن ديك سقطت عضويتو في حزب الامه والكلام دا اعلن علي الملا بس مافي زول داير يصدق والمثل بقول " القاصدك بحدر ليك في الضلمه".
نجي للشئ المحير. لاحظنا كلما ناس الامن يقبضو الامام ولا اي واحده من بناتو يجي زول يقول ليك ومال اخوانهم بعملو في شنو ماواحد في الامن والتاني في القصر كيف يرضو يقبضوهم. هسع دي بلاي تتحسب لي ال المهدي ولا عليهم؟ لو اتدخل اي واحد منهم, القيامه حاتقوم خصوصا من انصاف المناضلين امثال المدعو مادبو والذي يمثل عار في جبين حزب امه وحسين خوجلي الاتعود يبني بطولاتو علي حساب الحزب الكبير. الشايفنو نحنا غايتو كل زول في ال المهدي بياكل في نارو. المناضل بخش السجن والمنبطح بمشي القصر وسيظل حزب الامه ثابتا علي مبادئه الاتعمل من اجلها.
اخيرا نصيحه للمعارضه. الشايف دخول مريم السجن مسرحيه خليو يمشي ينسجن بدون مسرحيه عشان يعرف المسرحيات الجد. والشايف التوافق بين حزب الامه القومي والجبهه الثوريه نوع من (الغوصنه) اليورينا شطارتو ويسقط لينا الحكومه دي. اهو ديل ناس حزب الامه ودي مقدرتهم وداك سجن امدرمان ورونا بدخلو كيف من غير مسرحيه عشان ذاتنا بعد كده نحنا كشعب دايرين نفرز الحملان من الذئاب.
الحريه لدكتورة مريم. ونتمني ان لا يعود الامام الي السودان اهو برضو نوع من النضال ونحنا محتاجين ليو بره اكتر من جوه. ولتتوحد صفوف حزب الامه القومي والجبهه الثوريه مع كل المناضلين الشرفاء لاسقاط هذا النظام بالقوه فما اخذ بالقوه لا يسترد الا بالقوه. يعيش مالك عقار..يعيش ياسر عرمان وجبريل وعبد الواحد ومناوي وليحفظ الله لنا سيادة الامام وابنته سيدة نساء السودان وليذهب الكيزان الي نار جهنم خالدين فيها ابدا.
Follow me in [email protected]_elrazi
[email protected]


تعليقات 17 | إهداء 0 | زيارات 2973

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1079158 [النوبى الشهم]
0.00/5 (0 صوت)

08-14-2014 11:09 AM
مدرسة المنتفعين..

[النوبى الشهم]

#1078905 [الاصم]
0.00/5 (0 صوت)

08-14-2014 02:28 AM
......... لقد انصفتهم فى الزمن الصعب ؟ شكرا

[الاصم]

#1078673 [امابي صميم]
2.00/5 (2 صوت)

08-13-2014 06:56 PM
لا فض الله فاك دكتور ابو قنايه , هو دا ديدن انصاف المناضلين والحالمين بكراسي وثيره بعد الحريه والمغرضين والمنافسين الحزبيين ذوي البصيره التعبانه والزمه الغرقانه والهمه الفترانه واضف اليهم المشككين واشباه المستبدين والمستبدين الصغار والمعديين بتطاول العهد الشمولي الذي خرب رؤوس الناس وعقولهم ووجدانهم السليم ! , القافله ماشه وسايره والحريه جايه ويلزمنا صبر وطولة بال وبرامج توعويه وتثقيفيه وسمنارات وورش واصلاح نفسي واجتماعي وتدريب بالموسيقي ورعايه سايكولوجيه وبعضهم عاوزين "ثرابيوتك منجمنت بلاان" رسمي وغيرو لاصلاح ما افسدته الانقاذ وعهدها والله المستعان ,, كتر خيرك يا منصف وسديد وواعي .

[امابي صميم]

#1078656 [د الزهجان]
0.00/5 (0 صوت)

08-13-2014 06:32 PM
الصبر على البلا نجاح

في ناس عايشه على الفتن




>> الله يكون في العون



[email protected]

[د الزهجان]

#1078643 [محمد حجازى عبد اللطيف]
5.00/5 (3 صوت)

08-13-2014 06:22 PM
د\ الرازى --لك الود
وهكذا فى طريق دفاعك عن الحق الواضح اسقطت الاخرين --انت ومن تدافع عنهم اكبر من هذه الكلمات واللكمات -- وهذا اخر ما كتبت قبل ساعات فقط اهديها لمقامكم المحترم -دمتم

المحلل راشد عبد الرحيم يتحلل ويطبل!!

ولماذا تتعب نفسك وتهدر صحتك وتضييق خلقك مع تلفزيونات السودان الفضائيه بهذه العباره المشفقه بادرنى اخى الاصغر عوض والذى يقضى ايام الزياره التى اقتطعها لكى يلازمنى الغربه والاغتراب حتى حين وهو محق فى كلما ذكر فالقنوات الفضائيه على قفى من يشاهد وبها من الاخبار والبرامج ما هو مفيد ومغذى ومسلى واخرى .
وبدون رياء او ادعاء فان حبى للوطن السودان ولا مزايدة فى ذلك هو ما يدفعنى لمتابعة تلك الفضائيات السودانيات مع علاتها واخبارها المؤلمه الملفقه فى احايين كثيره وذات الطابع الحكومى المدفوع الاجر والحوافز للمؤلفة قلوبهم من اساطين الاعلام الجدد وبعضا من القدامى المتجددين وفى جانب اخر فان حب التوثيق للتاريخ هو دافع اخر يشدنى لمشاهدة ومتابعة تلك القنوات قسرا وذلك لان اصحاب القرار اعلاميا سوف يعمدوا الى طمس كل اثار الجريمه فى اول تغيير يعم البلاد وبالتالى سوف يتنصل الجميع مما اقترفت اياديهم وألسنتهم من جور وبغيى فى حق الوطن والمواطن ويتحقق لهم التسلق والتسلط على رقاب العباد مرة اخرى مع تغيير الشكل والمضمون على حسب هوى الحكام الجدد .
فى ضيافة برنامج تحت الطبع الذى يعنى بعناوين الصحافه الصادره بالعاصمه المثلثه الخرطوم مع مراعاة حالة العطش العام والبلد غرقانه المهم فى الامر فقد وردت انباء مؤكده بان الحبيبه الدكتوره مريم الصادق المهدى حبيسة لدى جهاز امن النظام (الحبيبه كنايه عن آل بيت المهدى الامام فوالدها يكنى بالحبيب وهى الحبيبه ) وبسؤال الصحفى المحلل راشد بن عبد الرحيم عن رايه التحليلى فى الامر الجلل حتى انبرى المحلل الصحفى بان هذه امور لا بد من حسمها مع الصادق المهدى حيث انه استخدم وسيله اعلاميه مضاده للحكومه وهى اذاعة دبنقا الناطقه باسم متمردى دارفور (الثوار هذه من عندى ) وبهذا يكون السيد الصادق قد تعمد اثارة الحكومه لكى تعتقله مرة اخرى وبذلك يسجل نصرا اعلاميا وان الجبهه الثوريه حاضره وجاهزه بعدة توافقات واتفاقات ولكل من جلس اليهم وبالتالى فان مريم الصادق تسير فى نفس النهج .
وبتحليل بسيط مغاير لتحليل الاستاذ راشد فان الامر سياسه فى سياسه هى استخدام فن الممكن للوصول لما امكن باقل الخسائر وتحقيق افضل النتائج اما للعام او الخاص وطالما نتحدث عن حزب بحجم الامه وقيادة الحبيب الصادق وابنته الدكتوره مريم فان اعتقال الحكومه لهما او احدهما يعتبر كسبا وممارسة مشروعه لسياسة فن المكن والمتاح والتى يجيدانها ممارسة وحبوا فى بلاط السياسه المخضرمه والتى لا تفهمها الحكومه واركانها واعلامييها من امثال المحلل راشد واخرون . واما الجبهه الثوريه فلا يؤخذ عليها تعدد التوافقات لانها تسعى لممارسة السياسه بديلا عن السلاح وبالتالى عليها تلمس ما يتوافق مع رفقاء الدرب والمصير لتحقيق ما يمكن للوطن .
اما الخطوه التى اتخذها الحبيب الصادق المهدى فيما يخص اقامته فى الفتره القادمه فهى السياسه بكل ابعادها من حيث اختيار المكان والزمان فمصر التى تعودت الصد والصدود من حزب الامه والانصار ومنذ امد بعيد اصبحت اليوم الخيار والبديل الامثل لقادة الانصار وحزب الامه لزوم السياسه وليس لحب فى قلب الحبيب وارجو ان يوفق فى كسب الحب وفتح القلوب والاتجاه نحو السعوديه والامارات وبعضا من الجيران افريقيا بديلا عن تركيا وقطر اللتان تناصبان كل من يعارض حكومة الجبهه العداء والصدود .
اسقاط الحكومه والحوار معه خطان متوازيان .
من لا يحمل هم الوطن – فهو هم على الوطن .
اللهم يا حنان ويا منان ألطف بشعب السودان – آميـــــــــــــــــــــــــن .

[محمد حجازى عبد اللطيف]

#1078628 [البرجو]
4.00/5 (1 صوت)

08-13-2014 06:06 PM
"إِنَّمَا يَسْتَجِيبُ الَّذِينَ يَسْمَعُونَ ۘ وَالْمَوْتَىٰ يَبْعَثُهُمُ اللَّهُ ثُمَّ إِلَيْهِ يُرْجَعُونَ" صدق الله العظيم
إن عصابة المؤتمر الوطني متوجسة ومرتعبة من تقارب قوى الإجماع الوطني ممثلة في أحزاب المعارضة السودانية ودخول الجبهة الثورية والحركات المسلحة الشارع لتؤكد الريادة في المعالجات السياسية السلمية للتحول الديمقراطي بما يتيح تطبيق تنسيق العمل المتكامل السياسي والثوري المسلح لتخويف الإنقاذ وإبعادها من الحكم والإبقاء على تماسك بقايا البلاد موحدة في ظل المدنية الديمقراطية الفيدرالية مع ضمان الكفالة بالمحاسبة العادلة لشرذمة تجار وكهنوت الدين. اللًهم جنبنا شرور الطغاة وفتنة المتغطرسين وأيدنا بنصرة دينك وعبادك المهمشين، والله أكبر ولله الحمــــــــــد،،،،

[البرجو]

#1078554 [ابو ابراهيم]
2.00/5 (2 صوت)

08-13-2014 04:19 PM
كلام زي العجب ومن زول فاهم
دايرين الناس الما بتجدع ولا بتجيب الحجار تورينا شطارتا بدل كلاما الما بودي ولا بجيب
وخصوصا امثال حيدر احمد الذي يدعي لموائد الانقاذ وياتي ليوضح لنا كيف تكون المعارضة

[ابو ابراهيم]

#1078511 [ابو محمد]
5.00/5 (1 صوت)

08-13-2014 03:36 PM
اتقى الله قبل ذلك خرج الصادق فى تهدون وقال الهجره شرقا وذهب معه بعض الشباب ماذا كان مصيرهم اعتصموا بدار حزب الامه واعتدوا على عمر نور الدائم بعدما تركهم وعاد بعمليه تفلحون التى قبض فيها مليون دولار بشهادة مبارك الفاضل وعمر نور الدائم وعلى ذلك اصبح ولدة بالقصر والاخر ضابط عظيم بالامن يفعل مايشاء اسأل منه شباب الامن الصغار ياخى استحى عماذا تتكلم ليست ذاكرة الشعب ضعيفه مهما فعلت الانقاذ الشعب لايقدر ليها على جزاء

[ابو محمد]

ردود على ابو محمد
Qatar [الحازمي] 08-13-2014 11:48 PM
و قبلها زج بأهلنا البسطاء في 1976 في عملية "المرتزقة" و لم يعد الاعتبار و الامام صالح النميري وعمل نايم
و قبلها أزاح المحجوب من أجل رئاسة الوزارة
الامام صديق القذافي الدكتاتور الرهيب
الامام صديق القذافي الدكتاتور الرهيب
الامام صديق القذافي الدكتاتور الرهيب
الصادق أحد أضلاع الكارثة في السودان
سعال ليس للتأمل:
لماذا لم يزر الامام ليبيا بعد سقوط الصديق؟


#1078430 [السفروق]
1.50/5 (2 صوت)

08-13-2014 02:35 PM
أجمل شي البناضل بخش السجن والمنبطح بدخل القصر..هو ذا حزب الامه..خرج منه مبارك مبااااارك والزهاوي وامين والصادق وغيرهم ولازال صامدا..أوفيت وكفيت..اما أحزاب الركشه هذه فلا أحد يلتفت لها والشيوعي والبعثي والناصري والمستقلين وغيرهم تكفيهم حافله واحده فقط لتحملهم لمزبلة التاريخ يامهرجين

[السفروق]

#1078364 [elgaily]
4.00/5 (1 صوت)

08-13-2014 01:58 PM
مني ليك الف تحية انت بكلامك العادي قلت الحقائق نقول لابد للصبح ان ينجلي وصنعاء ان طال السفر وعاش كفاح ونضال الامام وبقية العقد الفريد بس يا الامام عاونزك تقيف عديل كل الانصار معاك

[elgaily]

#1078314 [ابوغفران]
3.00/5 (1 صوت)

08-13-2014 01:19 PM
(مسرحيه؟ والله كان مسرحيه ماعارف. انتو الناس دي حكايتا شنو مع قيادات حزب الامه؟ ) خلاص يااستاذ مامسرحية ( ? are you happy ).

[ابوغفران]

#1078306 [سوداني وكفي]
5.00/5 (1 صوت)

08-13-2014 01:14 PM
لاتوجد مسرحية كل ماذكر صحيح ولكن علي مر التاريخ السياسي في البلاد اثبت الصادق المهدي خذلانافي كل المواقف السياسية خصوصا في ظل الحكومة الحالة فهذه الحالة التي عليه هي ملخوليا سياسية متأخرة واصبح لايهم الشعب كثراّ لاهو ولا ابناءة الذين يرتعون داخل القصر .
* تخريمة
اتمني ان تستخدم قنايتك فيمايفيد

[سوداني وكفي]

#1078300 [دولار حار]
5.00/5 (1 صوت)

08-13-2014 01:08 PM
يالاخو نحنا ماعندنا سيد غير الخالقنا وكمان سيدة نساء السودان!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!
!!!!!!! البشير ليه 25 سنة(89---2014)
الصادق 50 سنة (1964----2014) اريد الانضمام لحزب الامة وطموحى ان اصير رئيسا للحزب .ممكن؟؟ذى اوباما مثلا.

[دولار حار]

#1078261 [محمد احمد]
3.00/5 (1 صوت)

08-13-2014 12:46 PM
الانقاذ جات رجالة و عايزين الامام يقلعها رجالة كدا . الا ان معرفتنا بالامام زول خواف و فى اقل ميلان للورى المعارضة بتلب و قد فعلها مع محمد نور سعد وحسن حسين وحتى راعى الضان فى بادية البطانة يعرف هذه الحقيقة . يا دكتور لمن تراهن لا تراهن على جواد اعرج و مجرب . انت عارف السودان دا لا يحكمه الا من اتى من صلب المؤسسة العسكرية عشان كدا الصادق ودا عبدالرحمن هناك , ام عبدالواحد و عقار و عرمان السجمان لا اعتقد ان حظهم فى الحكم اكبر من حظى و حظك .

[محمد احمد]

ردود على محمد احمد
Saudi Arabia [ابو ابراهيم] 08-13-2014 04:32 PM
وانت قاصر ورينا سويت شنو
داير يغيرو ليك ووانت منتكل في الحيطة
دا الضيعنا زاتو شعب اتكالي


#1078260 [صاقعه هجايم الليل]
3.00/5 (2 صوت)

08-13-2014 12:46 PM
كلام واضح و عديل

[صاقعه هجايم الليل]

#1078235 [atif]
5.00/5 (2 صوت)

08-13-2014 12:26 PM
خلي المهدي يكون فاعد برا لانكم محتاجبن ليهو برا!!! التغير يحدث فقط علي الارض . انت زاتك و كل من يهمه السودان و له القدرة الواجب عليهو العودة للوطن و كلها ساعة شدة لانقاذ ما يمكن انفاذه. ماذا يفعل الامام في الخارج غير ان يكون ناطق باسم الحركة الثورية و مصر القاعد فيها دي هل يمها السودان الجغرافيا ام نظامها ديمقراطي؟ بعدين ماهي اخبار الاسعاف العابر للحدود؟

[atif]

#1078199 [ابو محمد]
4.00/5 (1 صوت)

08-13-2014 11:57 AM
ارجو من الكاتب ان يحترم عقل القارى عبد الرحمن الصادق وابناء الصادق لايعيشون فى المريخ هم مع الناس والناس عارفه الحاصل وكل ما فى الامر هو لعب على الشعب السودانى المسكين رجل فى الحكومه واخرى فى المعارضه

[ابو محمد]

د .الرازي الطيب ابوقنايه
د .الرازي الطيب ابوقنايه

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة