يازول يا حر تسلم ..
08-16-2014 02:15 PM

image

يازول يا حر تسلم ..
***
تحية مؤازرة ومناصرة للمناضل الصامد الأستاذ / إبراهيم الشيخ .. وهو يقاوم علتي البلد والجسد ..!
***
سجانك مرعوب .. وانت حبيسو..
لأنك فرح الغضبة عريسو..
وحتماً مهرك ننفض كيسو..
بأس الحابسك ماهو شديد..
إنت الصامد ..وهو الرعديد..
مهما نفاك من خوفو بعيد..
قيدك أغلى حرير في الإيد..
***
يا مشتول في رحم الِعزة..
عز الفارس ..ما بيهتزا..
بكرة حناجر الرعد الرزه..
تدوي مع زغرودة عازة..
***
وإنت شرارة ..ومشعل ضاوي..
يهزم جنح الليل .. ويداوي..
جرح الضيم بالجمر الكاوي..
وتبقى نفير الثورة الداوي..
ترسم فال الفرحة غناوي..
يصبح ذيل الكبت العاوي..
راقد في زنزانك لاوي..
والدجال .. العامل حاوي..
ياما يلاقي هوان وبلاوي..
***
راح محجوب .. وخلّد اشعار..
في وجدان كل والأحرار..
وخلى الكلمة سيوف للتار..
ودم الشهداء بيهتف حار..
كيف يتقسم طين الدار..
والأطراف ماكلاها النار..
خير .. وطن الناس الأخيار..
إتبدد وصار عند الأشرار..
التعليم ..والصحة ودار..
والأسواق الما بتنزار..
شباب متسكع ليل ونهار..
والكيزان كبار وصغار ..
خامين البيض وقايلين شُطار..
***
وجع الروح بلغ الحلقوم..
أظنك جيت أمس الخرطوم..
كرامة الناس في السيل بتعوم..
والحكام رفعو أم دلدوم..
قالوا الخالصة رويحتو يقوم..
يقول الدغمسة ظالمة وشوم..
يا ود الشيخ الدنيا عموم..
مستغربة كيف شعبك محكوم..
بارد نفسو .. وخامد مكتوم..
بالإرهاب السكن النوم..
وكيف ينضام زولاً موسوم..
في الحوبات ..ما بجيب اللوم..
هو الكان هبه رياح و سموم ..
يوم أكتوبر.. وزاد الكوم..
في أبريل أسفار وعلوم..
***


***
شوف سودانا الوطن القارة..
جاتو صروف الزمن التارة..
والأركان الواسعة وشارة..
ديل هدوها ..وسقطت خارة..
وأرضو الولدت ..ولسع دارة..
لفظت ناسها المرقت فارة..
***

يا ابراهيم ماتحمل هم..
يازول يا حر إيدك تسلم..
أهوال الشر.. مهما .. تتلم..
أصمد ..قاوم ..ما تستسلم..
جاييك الخير ..أبشر ياعم..
يا صمت الأرض الإتكلم..
بكرة هتافنا عليك ينضم....
وصوت الظلم الطال ينطم..
دي البطن .. الجابت منك كم..
ما بتعقر .. أبداً ..لا بتندم..
***
**
*
16/8/2014
[email protected]


تعليقات 5 | إهداء 0 | زيارات 1439

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1082361 [ود مدنى السنى]
0.00/5 (0 صوت)

08-18-2014 12:45 PM
رجل فى زمن قل فيه الرجال وكثر فية الخبال

[ود مدنى السنى]

#1081393 [أحلي]
0.00/5 (0 صوت)

08-17-2014 12:11 PM
الأستاذ عبد الله
لا يعرف الفضل لأولي الفضل إلا أولو الفضل

[أحلي]

#1080802 [سعيد شاهين]
1.00/5 (1 صوت)

08-16-2014 05:50 PM
التحيه للمناضل الشامخ ابراهيم الشيخ وهو لايحمل السلاح ليقتل جزء من ابناء شعبه لكنه يحمل سلاح الصمود الذى يقتل به سجانيه الف مره فى اليوم لدرجة اطاشت صوابهم هذا هو نهج مانديلا وغاندى يحافظوا على ارواح بنى وطنهم ويزهقون ارواح اعدائهم الى ان يرمونهم فى مزابل التاريخ ان قبلت بهم تلك المزبل من نتانة ما يحملون
والتحيه لك يا برقاوى على هذه المسانده الوطنيه التى تعلى من قيمة مثل هذا النضال

[سعيد شاهين]

#1080733 [المر]
1.00/5 (1 صوت)

08-16-2014 03:25 PM
اه اه يابرقاوى تسلم يابرقاوي ويسلم الوطن ويسلم قلمك الذي اصبح نصير للمظلومين ونسأل الله السلامة لود الشيخ

[المر]

#1080713 [سوداني اغبش]
1.00/5 (1 صوت)

08-16-2014 02:54 PM
البطن الجابت منك ما بتعقر ابدا ما بتندم ... الحريه ليك يا مناضل ..و لكل المعتقلين كل يوم نتعلم من صمودكم المزيد ... بنحلم بوطن يشيلنا كلنا و الرهان عليكم كبير

[سوداني اغبش]

ردود على سوداني اغبش
Saudi Arabia [انا] 08-18-2014 12:46 PM
يا ابراهيم ماتحمل هم..
يازول يا حر إيدك تسلم..
أهوال الشر.. مهما .. تتلم..
أصمد ..قاوم ..ما تستسلم..
جاييك الخير ..أبشر ياعم..
يا صمت الأرض الإتكلم..
بكرة هتافنا عليك ينضم....
وصوت الظلم الطال ينطم..
دي البطن .. الجابت منك كم..
ما بتعقر .. أبداً ..لا بتندم..


محمد عبد الله برقاوي
محمد عبد الله برقاوي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة