المقالات
السياسة
تعقيب علي قصيدة هاشم صديق رئيس البلد وينو
تعقيب علي قصيدة هاشم صديق رئيس البلد وينو
08-19-2014 04:09 PM


ياود صديق
الزول ده مالك ومالو
خلينا فى حالنا وخليهو فى حالو
لاجايب خبرا تقول فى شنو
لاهو عارفك انت منو
تقول رئيس البلد وينو ؟
هو رئيس البلد فاضيلك
قضيتو ماها قضيتك
وطاقيتو موطاقيتك
مسئوليات جسام
وشعبوا عايش فى امان
لاطفلا انخطف
لازولا انقتل
لا مالا اتنهب
والبلد سلام وامان
مليارات بتتسرق
وناس بتحترق
فى الكوشه تبحث عن طعام
والسيول الخلت الطين حطام
شالت حفيظه بت نفيسه
وعنقريب دار السلام
تقول لى شنو الرئيس وينو؟
الرئيس ياود صديق نشهدلو بالعداله
والناس مبسوطه الافنديه والعتاله
وكوم الطلبه العطاله
ياود صديق
على الجوع اتعودنا
خلينا فى حالنا ماسكين دربنا
لرب العباد رفعنا ظلمنا
لا بنعرف منقه لا لحمه
اللالوب بقى يتباع بالدسته
وصاحبك بيضرب قشطه
لبن وزبادى وتفاح بالخلطه
الحال عندو تمام فى تمام
ملك عايش الغرام
يوم بهناك ويوم بى جاى
دسامة شوق وصينيه تمام
لحم كبده جداد وحمام
دحين يازول انا ماغبيان
هو ماقالو عيان
رواكبوا خربانه
وفراملوا تعبانه
وبطنو طربانه
بسط ....ساكت من التخمه تعبانه
غلابة البلد دايشين
مابفرقوا بين البنيه والولد
العيون طشت بالرمد
حالهم حال عدوك
لااما نامت من البعوض
لاطفلا غمد
البعوض فتر
مالاقيلو زولا عندو دم
لناس حيرانه شبعانه هم
انت يابعوض ماعندك فهم ؟
تجى للغلابه الشهور ماشافولن لحم
شوف ناس العمم
الناس النظاف المابشيلو هم
ناس التفاح والعنب
النسواهن مليانين دهب
لابعرفوا هم لاضاقوا الكرب
خموا البلد خم
عمارات ودولارات ماليها حد
حفايا جوها
صبحوا سياد بلد
عربات اخر موديل
وفلل تقول ياليل
لا قعونج يكورك لا ضجيج بالليل
مسلسلات واغانى شيتا سمح بالحيل
لاب توبات وموبايلات
اخر حداثه
الثلاجه بالتخمه شبعانه
والكهربه موها عطلانه
لاسقفا صبه
لاسبلوقه خربانه
لاسيلا يشيل شباك
لاماما سهرانه
تقول لى الرئيس وين راح
اريت كان اكلو التمساح
شليل وينو اكلو الدودو
رئيسكم وين راح
اكلو التمساح
كذاب يازول يهو داك راقد مرتاح
منقه وتفاح
عجبك عجبك ماعجبك موت وارتاح
خلينا نشوف غيرك كان نلقالوا ملاح
ياايدى شييلينى ختينى فى بيت الريس
امكن القاهو مبسوط و كويس
يدينى عنبه وتفاحه
امشى البيت واقيف فى الساحه
الم اهلى واولاد الحله
شمومه شمومه
نسعر تانى تجينا الحمى
يقولوا تسمم
جسم غريب دخل المعده
ماليهو علاج غير حبة نبقه
او كسره مره بشوية مرقه
وفات فات فى ايديهو
سبعه منقات
والمنقه وقعت فى البيير
وصاحبها ريسنا بشير
سير سير يابشير
نحن فداك نحن حماك
افرم ا فرم تحن معاك
أ سحق اسحق برضو معاك
ماانت كبيرنا وانت رئيسنا
انت اتغذى ونحن بننسى
نوم واتمتع ونحن بنصحى
امكن سيلا يجى جنب بيتنا
يشيل العتبه معاها النبقه
والبيت يتهدى والنبقه تروح
ياقائدنا قوم اتغدى
سمك وجداد وكباب حله
ما انت الراعى وانت الرائد
هى لله هى لله
انت تعيش ونحن فداك
وسير سير يابشير
كمال صدقى///18/08/2014

[email protected]


تعليقات 3 | إهداء 0 | زيارات 4328

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1084680 [انا امدرمان]
1.00/5 (4 صوت)

08-20-2014 02:21 PM
الاستاذ هاشم صديق أعلن ان القصيدة لا تخصه ولا يعرف عنها شيئ وانما الصق اسمه بها
لكن من قصيدتك دي أحس انو قصيدة سيد البلد بتاعتك لانه نفس النظم اضافة الى أنك تريد تذكير الناس بمقدراتك عشان بعد البشير يتكل تقول انا قلت القصيدة ، تحياتي

[انا امدرمان]

#1084441 [راشد الحبر]
0.00/5 (0 صوت)

08-20-2014 10:55 AM
ولسه بنسأل ... رئيس البلد وينو ؟؟؟

[راشد الحبر]

#1083918 [mahmoudjadeed]
0.00/5 (0 صوت)

08-19-2014 08:29 PM
ما كنت ترد على هاشم صديق .. بوظت القصيدة لأنّ ردك عصيدة .

[mahmoudjadeed]

كمال صدقى
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة