المقالات
مكتبة كتاب المقالات والأعمدة
شوقي بدري
حمدي ... انعل ابو المؤتمر الوطني
حمدي ... انعل ابو المؤتمر الوطني
08-25-2014 04:36 AM

عمر محمد الطيب نائب جعفر نميري ، قدم للمحاكمة . وكان يأتي للمحكمة بتيرمس وموية . بعد كم يوم طلبوا منه التخلص من من تلك الاشياء . فطلب من عسكري ان يضعها بعيد فقال له العسكري وديها براك . فقال مستغربا ,, هي وصلت لحد كدي ؟
بعد ما شبع حمدي بقي ينعل ابو اسياده . هي وصلت لحد كدي ؟ الحمد لله الانقاذ صارت ملطشة . دلوكت عنده مشكلتين . ناس الوطني ما حيخلوه . والشعب السوداني في الرصيف مستني . وبعد الانقاذ عينك ما بتشوف الا النور . تذكرت محاولة حمودي بالتملص من قبل . والصقر كان وقع كترت البتابت عيب .
اقتباس

يا حمدي ابو الاقتصاد سامعني ؟؟
شايفك بديت تتملص وتعمل رايح . الصواطة الحصلت للاقتصاد السوداني مسئول منها انت في المكان الاول . كدي بس طول بالك . قانون تسجيل الشركات الذي اجيز في السودان سنة 1925 ، من احسن القوانين في العالم . عرضته علي اهل الامارات في السبعينات ولم يصدقوا ان السودان كان منظما بهذة الطريقة منذ العشرينات . كانت كل شركة ملزمة بتقديم حساباتها بواسطة محاسب قانوني . والمحاسبين القانونين يتحصلون علي الزمالة من انجلترة مثل المهندسين والاطباء .

وحتي التجار كانوا ملزمين بتقديم حسابات وكان هنالك ما عرف بالاستاذ وهو دفتر الحسابات الضخم . وكان الناس يقولون ساخرين ,, ياخي بتحاسبني كده انت بتاع دوبيا . وعرفنا ونحن صغار ان الدوبيا هي الحساب التجاري الدقيق .
عندما سرقت الانقاذ السلطة استدعي البشير ممثلي كبار الشركات وطلب منهم دعم . طيب ممكن تشرحوا لينا الدعم ده الشركات دي تنزلوا تحت ياتو بند ؟؟ يكون ياربي بند خارج روحك وربي اولادك ؟؟ عندما ذهب بيطار لمقابلة البشير اخذ معه مسئول العلاقات العامة والذي كان خالد الحاج مؤسس سودانيات . وتردد بيطار لانه لم يفهم الحاصل. لان بيطار الكبير لم يسرق بل خلق الشركة بجهده وعرقة . وكان يوزع البريد في امدرمان في بداية حياته . وحجار الكبير كان وكيل بوسطة . وقام مفتش انجيزي زهجان في الاستوائية بتاسيس مزرعة بن وشاي . وعندما عرف المدير البريطاني بأ ن المفتش البريطاني استعان بمساجين . طرد من الخدمة . عرضت المزرعة للبيع واشتري حجار المزرعة بخمسين جنيها ارجعت للخزينة . وحجار انتج وقدم للبلد ووفر العملة الصعبة . وتبرع للتعليم والصحة ومجالات اخري .

واقنع خالد طيب الله ثراه بيطار بان يدفع . وتعهد روجيه بيطار بدفه 2 مليون جنيه . وكان هذا وقتها مبلغا محترما . بكل صفاقة وكأنه صاحب حق ، قال البشير بانهم يتوقعون عشرة مليون . وبدأ بيطار في الاعتذار ولاحظ خالد ان البشير بدأ يغضب . فقال ,, طبعا دي شركة وعندها التزامات ، وفي مشكلة سيولة وانشاء الله الشركة حتساهم اكتر في المستقبل ,, وانكشف خالد . وتبرع من من بلغ عنه كشيوعي . وكانت بيوت الاشباح . ولم يشفع له ان عمه رحمة الله عليه ابراهيم عبيد الله الاقتصادي والاخ المسلم .
عندما تبلطج الدوله وتقلع من الشركات والتجار ، فليس امام التجار والشركات سوى سرقة المواطن والتلاعب بالحسابات، وابداء الولاء حتى لا يُفتك بها. وعندما تجد الحماية تأتي ببضائع منتهية الصلاحية، وغير مطابقة للمواصفات. وصارت البلد كرخانة او جبانة هايصة. وتجي يا استاذ حمدي تقول ما سمعوا كلامك. ما هو كلامك الغطس حجر البلد. والعطاءات والعقودات المطبوخة ما حصلت وانت شايف بي نضاراتك سامع بي اضيناتك عثمان صالح الرجل الامي نافس الشركات الاوربية مثل متشل كوتس وسودان مركنتايل. وقام بالتصدير كاسرا الاحتكار الاوربي. وانشأ شركات لصناعة الاحذية ومطاحن للغلال. كان من المفروض ان يقام له تمثالاً. ولكن النميري منفذ سياسة ناصر امم شركاتة وهو جار آل عثمان صالح. وانتم يا حمدي تنفذون سياسة تنظيم الاخوان العالمي. وانت كنتا موجود لمن الاخوان هربوا من مصر للسودان في الخمسينات وحتي القرضاوي كان في السودان وبديتوا بسندوتشات اللسان والمخ في محلات خيرات واماكن اخري. الى ان سيطرتم على الاقتصاد السوداني عن طريق البنوك الاسلامية التي هي ربوية.
الناس الجابوهم وسلموهم السوق. كانوا فاكرين السوق ده هو جلابية وعمة كبيرة وملفحة، وعبارات ممجوجة. مثل في ميزان حسناتك. وبارك الله فيك اخي الكريم، وتسلم ياشيخنا.

اديك امثلة. من كان يرتبط بسوق الصاج والحديد والخردة في السودان، كان العم رجل البر والاحسان الزبير موسى حامد . لم يقفز علي رؤوس الآخرين . بدأ حياته مثل العم الجاك جفون في امدرمان كصبي حداد مثل ناصر الحداد . وهؤلاء عرفوا بحدادي الواطة . ورشهم في امدرمان كانت بارضية ترابية وبدون ابواب وشبابيك . زودوا البلاد بالفئوس والطواري والحشاشات والنجامات والكلابات والعتلات والازمات والمناجل وكل ادوات البناء والزراعة . ووفروا للبلد كثيرا من العملة الصعبة . بل وظفوا وعلموا الاطفال فنون المهنة . وطوروا البلد وانفسهم. ومن تلاميذ ناصر الحداد الفنان ابراهيم عوض وفردته سليمان قلووظ الذي اسس شركة حدادة بمعدات متطوره واعطي عملا للمئات . والصين لم يكن عندها صناعة تذكر وبدا الانتاج بالحديد في الخمسينات والستينات ولم يتوفر لهم الصلب . وكانوا يلفون اليايات للعربات والشاحنات بالايدي . وكان الناس يبيعون اطفالهم بسبب الفقر . ويريطانيا بدأت ثورتها الصناعية بال كوتدشج اندستري ، او صناعة الكوخ . والسويسريون لا يزالوا ينتجون قطع غيار الساعات والاجهزة الدقيقة في منازلهم .

الدولة حتى في ايام برمبل المفتش البريطاني كانت تساعد المهنيين وتحفزهم . ولقد اعطي الحدادون قطع سكنية في حي امبور الذي يجاور المظاهر والعمدة وفي هذا الحي عاش العم رجل البر الزبير موسي حامد وبقية الحداحيد طيب الله ثراهم . ووزعت ورش النجارة والحدادة وصيانة السيارات في المناطق الصناعية في كل السودان. وكان البنك الزراعي والبنك الصناعي والبنك التجاري كلها مؤسسات سودانية خالصة.

الاستاذ حمدي . انت من قمت بمحاربة الحرفيين والمنتجين والتجار والشرفاء . فالعم الزبير ملك الصاج كان يعرف السوق ، حجمه احتياجاته وكيف يتنفس . والاهم انه كان يعرف الناس وكان يسلم ويؤجل الدفع ويمهل . واهم شئ في السوق هو الثقة والعامل النفسي . وكما يقول الخواجات يمكنك الآن زراعة اعضاء بشرية ولكن لا يمكنك ان تزرع الخبرة . ناسكم الجبتوهم ومكنتوهم . ولو طلقوهم في امدرمان كانوا راحوا . اديك مثال . ممثل السودان في الامم المتحدة عبد المحمود ابو تفة البشاكل ضله، لفح ليه كمشة فلوس ودخل سوق الورق. اشترى ورق من فنلندا بواسطة سوداني ابوه كان مرشح قبل نميري لقيادة الانقلاب. والورق بيع لحسين خوجلي للجريدة طلع الورق ما بمسك الحبر. وجماعتكم يا حمدي فاكرين التجارة دي لعب. وحكم البلد زي انتخابات اتحاد الجامعة والمراهقة الطلابية. والدليل جابوك انت ومسكوك الاقتصاد.

بتكون سمعتا بي الراجل العظيم ادريس الهادي. انه صاحب مصانع اللحام والهواء السائل. لو ما عرفتوا وده ما غريب عليكم، ممكن تكون شفتا المسلة العملها في الخمسينات في تقاطع العرضة والاربعين. وديل شوارع في امدرمان. قلت النحدسك امكن ماتكون عارف انت ما ساكن في لكوندة. تعرف يا حمدي سكن اللكوندات واكل المطابخ زمان بينبذوا بيه . . انا ساكن في لكوندة في شاد جاني السفير عبد المنعم ساتي وشاكلني لأنه عرف من الوزير حسين كودي انه في سوداني ساكن في لكوندة بحيرة شاد. وقال لي ده عيب في حق السودانيين وطلعني من اللكوندة ده في 1987 ووقتها السودان اكتر قطر مؤثر في المنطقة والسوداني مكان تبجيل. طيب لمن يجي مسئول اجنبي لمساعدة السودان او لدعم الايتام والجياع ويلقي وزير المالية ساكن في الهيلتون ، مش ممكن يقول الناس ديل ما محتاجين مساعدة . رئيس الوزراء السويدي مرتبه 12 ألف دولار وبعد الضرائب بتصفى على 7 او 8 الف , وانت يا حمودي بتضربها طلبات في ا لهيلتون. في 1995 في الموتمر العالمي انتو مش جيتوا كوبنهاجن مع البشير وسكنتوا في اغلى الهوتيلات وكنتو اربعة دستة وحرباشة. امريكا ما كان عندها 50 زول .

ادريس الهادي طيب الله ثراه كان يعمل بيديه الى ان لقي ربه . هو من انشأ الجملونات التي احتاجها الجيش الامريكي في قاعدة وادي سيدنا. وصار صديقا لماكنمارا وزير الدفاع الامريكي ورئيس البنك الدولي فيما بعد. وكان يتاخر من تلبية دعوتة زيارة امريكا ضيفا على ماكنمارا لانه مشغول بالعمل. هذا الرجل انشأ امبراطورية صناعية، قام بتصميم الابواب المستعملة في الري في الجزيره وكل السودان. وكان سعرها ربع سعر المستوردة. التي كانت تسبب مشكلة في الترحيل بسبب وزنها. لقد ترك ابنائة احمد وعلي ومحمد.

ولكن مع الانقاذ لامجال لعمل شريف. في الثمانينات قال قال لي مهندس سويدي اخذته الى السودان ان اصابع اللحام من مصانع ادريس الهادي كانت اجود من النوعية التي استوردناها من السويد. فاللحام والاسمنت من الواجب ان يكون طازجا. ادريس الهادي كان مع العميد يوسف بدري يرأسان محكمة الاحداث في ادرمان. وكان ادريس الهادي يوظف الجانحين. وحكومة الاستاذ حمدي تفرض المكوس والجبايات والاتاوات حتى على ستات اللقيمات والمشاطات والوداعيات .
اول تنظيم للاخوان المسلمين كان برئاسة المفتي و العم بدوي مصطفي وعلي طالب الله. وهؤلاء كانوا اسلاميين شرفاء. والعم بدوي مصطفي هو من ادخل الدين الاسلامي في الشهادة السودانية عندما كان وزيرا للمعارف. وكان من اول المصدرين للجلود . وكان شريكا للتاجر الامدرماني الكبير الشيخ العوض، ومن اشهر التجار كان آل الدعيته واخرين. وكان العمل مبنيا على التعاون والشرف والثقة. ولكن العم بدوي مصطفي خرج من السوق لان العمل صار همبتة وفساد. وهو الذي رفض الدخول مع السويديين في شراكة مدبغة حديثة تستوعب 300 عامل، خوفا من شبهة الربا في السبعينات دلوكت انتوا تدخلوا شراكة مع شمهروش. حتى الاخوان المسلمون الشرفاء تركوا لكم السوق يا استاذ حمدي. والعم بدوي مصطفي عمل في التصدير منذ الاربعينات.

يا حمدي انت من نحر الاقتصاد السوداني. قول واحد . البنوك لا تدخل في التجارة بالقانون. ولا انا غلطان؟ والشركات لايسمح لها بأن تندمج او تتحد او ان تبني كارتل او كونسورسيوم. قول اتنين والعقوبة في كثير من الدول قد تعادل عقوبة القتل. ومن اكبر الجرائم هو ما عرف ب انسايد انفورميشن. فتسريب معلومات عن اندماج او افلاس او شراء شركة يعرض المسرب للمعلومات لعقوبة طويلة المدى، بنك انرون مثالاً. وحمدي دور في الاقتصاد شلاليت وكجم. بناء الكارتل ان تتحد مجموعة من الشركات وتقدم عرض عالي للحكومة. ومن يقع عليه العطاء يقسم مع البقية وبدون منافسة. كلنا نكجم؟
اكبر طبخة كانت ان شركات العربات اشترت شركة المواصلات العامة في لوس انجلس وقفلتها. وباعت العربات للناس. ولهذا فلوس انجلس اكتر بلد فيها عربات. ولان الدول تحمي انتاجها فلقد كان ممنوعا استيراد الثياب والملبوسات والاحذية في ايام نميري. وقام تاجر بارسال جزم فردة شمال ولم يستلمها وبيعت بملاليم في مزاد علني وكان الناس يتساءلون حيعمل بيها شنوا؟؟ لكن وضح انو التاجر كان جاب الفردة التانية قبل مدة عن طريق مطار الخرطوم . وهذا تحايل على قانون الحماية الذي يحتاجه اقتصادنا. فما خرب الاقتصاد الافريقي البسيط انه لايستطيع لضعفه ان ينافس، وتجد الالبان والطحين والسمن الفائض في اوروبا من يدخلها برشوة الي الاسواق الافريقية. وتحرير الاقتصاد العشوائي لارضاء جشع التجار هو خيانة وطنية.
كلما الدولة تحتاج تدفع للجيش والامن والجنجويد وناس سيدي يدوروا المطابع ويطبعوا زي اي طاحونة. في عملة في العالم تحت حكومة عندها شوية معقولية الدولار زاد فيها الف مرة؟.

انت ياحمدي لمن القروش كانت حبة والرزق تلاقيط، ما مشيت لجامعة الاحفاد وكنت عاوز تمسك الكافاتيرية. وقالوا ليك هم عندهم دراسة كاملة انو زول يعمل مبني كامل مجهز بكل المعدات. والتكلفة كانت 300 الف دولار وبعد عشرة سنين المبني يكون تابع للاحفاد التي هي مسجلة وتابعة للشعب السوداني مافي ود مرة يمتلك طوبة منها. يعني اقل من 3 الف اجار في الشهر. انت يا حمدي ما قلتا ,, والعارف منو الحكومة دي تستمر عشرة سنة؟؟؟ ,, علشان كدة سا كن في الهيلتون . جلابيتك في سنونك . كاني ماني تقوم قطن مش صوف. بالمناسبة سمعت قبل سنين الكافتيريا مسكها واحد سعودي. وانت انتقلت الى مستويات البلايين.

لقد كتبنا وقلنا منذ البداية ان الانقاذ تحمل بذور فنائها في داخلها، لأنه ليس هنالك ما يكفي من الاسلاب والغنائم للجميع. ومن اخذ سيطالب بالمزيد. ومن لم ياخذ سيتربص بالاخرين، وطال الزمن ام قصر سيفتك بهم. والآن عدو الكوز الاول هو الكوز المغبون. وامال ناس ود ابراهيم والسائحون والنائحون والعتباني ديل كانو شيوعيين؟؟
كان في قانون ونظام. هل تعرف يا حمدي انوا الانجليز حكموا بالسجن على اثنين من الانجليز بسبب الفساد لانهم اتصرفوا في مواد التموين في ايام الحرب وأحد القضاة كان سودانيا. ولقد حكم مولانا الدرديري بالجلد علي انجليزي ونفذ الجلد. ورئيسك يعفي عن مجرم مدان باغتصاب فتاة صغيرة. والمفروض ان ينفذ فيه حد الردة. وانت ياحمدي عاوز تاخد شهادة خلو طرف؟؟ يا حدق دقدق . ألست انت المسئول الأول من تخريب الاقتصاد بسياسة التمكين. عندما اتيتم كان هنالك 425 تاجر جملة مسجل. في سنوات قليلة صار العدد 27 تاجراً. لأن البقية قد افلست وسجنت وبيعت منازلها. لقد كانوا يستوردون الخيش مثلا ويدفعون ويدفعون ويدفعون الجمارك والاتاوات. ليجدوا ان منظماتكم قد ادخلت الخيش معفيا من كل شيء . ومن كان يستورد السكر وضع في السجن ووضع ابنة وهدد بأشياء لا تذكر وتنازل عن كل شئ . ومن كانوا يستوردون السيخ والاخشاب وجدوا ان السوق قد امتلأ بواسطه مؤسسة الشهيد والذبيح و الجريح والسليم والما عندو عوجة . وطلع الشهيد فطيس.

ليس هنالك في كل العالم شئ اسمه اقتصاد حر . الاقتصاد له قوانين و تشريعات وغرف تجارية ومحاكم تجارية . ولا يسمح باستيراد عشوائي . لقد كانت وزارة التجارة لاتسمح باشياء ما عندها معني كانوا يطالبون بالمدخلات الصناعية والادوية اولا. ولكن حمدي حرر الاقتصاد . وصار الناس تستورد الحنة الصناعية في شكل ورق والكريمات المضرة بالصحة ولعب اطفال هايفة تتكسر بعد دقائق . وترامس شاي بتولع . والبلد عدمانا الانسولين وحبوب الضغط ومحاليل غسيل الكلي. لانه الهتش بيكسب اكتر .
امريكا لاتسمح بادخال كل البضائع من كل العالم . البضائع التي تأتينا من الصين يمنع دخولها الى امريكا واوربا . لانها تاتي من السجون او من مصانع تستغل الاطفال او النساء بطريقة مجحفة . وهذه الدول تحمي انتاجها المحلي وتضع قيودا على كثير من البضائع . وانت ياحمدي تتبجح بأنك حررت الاقتصاد وهيئته للاغتصاب. هذا شئ يخجل ان يذكره الانسان ناهيك عن الافتخار به . لقد فرضت امريكا ام الاقتصاد الحر قيودا حتى على حليفتها اليابان ورفعوا شعار ,, اذا اردت ان تبيعها هنا فلتبنها هنا . ولان الامارات تستورد من امريكا فلها الحق في ان تصدر حسب قانون امريكا. وقامت مصانع صناعة الملابس في الامارات في الثمانينات . وكان الغرض اغراق امريكا بالملبوسات . ولكن تلك المصانع اغلقت بهدوء . وانت ياحمدي بي اقتصادك بتاع ملينتين وتعريفة عاوز تحرر. بعدين الزبير الجاء مانشستر يونايتد. انت يا حمدي الزول ده اقتصادي جد جد؟؟ ما عارف كل ما اشوفوا اتذكر الحجبات والمحاية.
انت مش قلت السودان ده يطلعوا السنكيت والفليتو والباقي يجدعوه بره ولا انا غلطان؟؟
ع . س . شوقي
[email protected]


تعليقات 33 | إهداء 2 | زيارات 6871

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1089365 [kam]
0.00/5 (0 صوت)

08-26-2014 09:45 AM
عفيت منك اخوي شوقي ..تسلم ايدك المسكت القلم ويسلم فكرك النظم الكلم ويسلم يراعك الخط النقاط فوق الحروف في الورق ...اول مرة تعجبني كتابتك في كل مراحل المقال من اوله لاخره...بارك الله فيك وفي قلمك وربنا ينتقم من الظلمة الفاسدين ويعريهم كمان وكمان

[kam]

#1089278 [شاهد اثبات]
0.00/5 (0 صوت)

08-26-2014 07:57 AM
image
تسريحة "انعل ابو المؤتمر الوطني"
طلع لي ضب في راسي

[شاهد اثبات]

#1089178 [kaml]
2.75/5 (3 صوت)

08-26-2014 01:34 AM
تسلم ايدك وقلمك وفكرك اخي شوقي ..اول مرة تعجبني واتفق معاك في كل ما كتبت ...بارك الله فيك

[kaml]

#1089054 [بنت الناظر]
3.00/5 (2 صوت)

08-25-2014 08:56 PM
غايتو ياأستاذنا الفاضل ماخليت للراجل صفحة يرقد عليها زى مابتقول حبوبتى نجمته نجام قبورة ..لو كل فار من فيران مركب الإنقاذ بحاول يتذاكى على الشعب السودانى وفاكر بخارج نفسه قبل المركب ما تغرق وبيلقى ليه زول يذكره بالذى مضى ويديه على راسه ماكان فى واحد بيتجرأ يعملها تانى.
واحد من المعلقين قال عبدالرحيم حمدى قبل الإنقاذ ماكان عنده بيت ..ده بعد الإنقاذ عنده بيت حدادى مدادى فى لندن وفبه حوض سباحة كمان ..ظبط روحه مع بدايات الإنقاذ فى أوائل التسعينات لما لسه الجماعة كانوا غبش وما عرفوا سكة اللبعى ..
اقول له ولكل من أجرم فى حق الشعب السودانى أن هذه المرة الأمر سيكون مختلف تماما ولن يكون مثلما تعامل الشعب مع ناس نميرى وغيره لأن ما فعله أوغاد الإنقاذ كما أسماهم الأخ عبد المنعم سليمان ..مافعلوهوالا يغتفر ونقول لهم كما قال إمرؤ القيس لو كان الشعب أيام نميرى فى حالة خمر فإنه فى حال الإنقاذ سيكون غدا أمر

[بنت الناظر]

#1088951 [ابوغفران]
2.50/5 (2 صوت)

08-25-2014 05:31 PM
كالعادة قمة الروعة والموسوعية . ياريت يااستاذ شوقى لو لقيت فرصة او كان عندك مزاج ان تعطينا نبذة قصيرة عن الخلفيات الاسرية والمهنية لكبار افراد هذه العصابة علنا ندرك ولو قليلا جذور هذا الشر المستطير .

[ابوغفران]

#1088883 [سوداني]
2.50/5 (2 صوت)

08-25-2014 04:11 PM
انت عارف يا اخي شوقي لقد كتب شيخ الصادق بان ناس خمدي ديل تابعين للمسونية العالمية واحكي لك عن شرف ونزاهة شيخ الصادق اتي اليه علي عثمان والحاج ادم وعصام البشير في منزله زيارة اجتماعية وهم انذاك في السلطة فتبرع النائب الاول لشيخ الصادق بقطعة ارض في الرياض ولكن الشيخ المربي اعتذر عن هذا العرض مع العلم شيخ الصادق لا يملك منزل وهو يسكن مع اهل زوجته

[سوداني]

#1088877 [shawgi badri]
1.00/5 (2 صوت)

08-25-2014 04:04 PM
حمدي قبل الانقاذ ماكان عندو بيت كان ماجر . لم يكن يدفع ورفض الخروج من بيت الاجار . واخذت القضية سنين عديدة . واخرج بالبوليس . هذا انسان لا يختشي . تنكر لانه كوز في سجن نميري . وجاهر بتأييدة لمايو . هذا انسان ما بشبع . عنده دكان تياب في لندن .

[shawgi badri]

#1088830 [على العلوبة خسم الموس]
1.00/5 (1 صوت)

08-25-2014 03:03 PM
اكبر دليل على ان ناس المؤتمر الوطنى يعملون اشياء ويتحثون عن اشياء ويدافعون عنها بشدة من اجل البقاء فى المنصب ليس الا
والا قل لى بربك كيف يتنكر حمدى مهندس سياسة التحرير والمدافع الاول عنها بكل هذه البساطة نعم شارك معك اناس كثر ولكنك انت المهندس والمدافع الاول
ثانيا الذى كنا نعرفه عن حمدى وما كان يصرح به تلميحا او تصريحا انه مرتاح وموش محتاج للوزارة والمناصب ولكن ناس الحكومة جابرنه عليهاواسرته مقيمة بعاصمة الضباب زكان يسكن هيلتون كما ذكر الكاتب الان وسمعنا بذلك فى وقته ولكنه يزعل اليوم ويتنصل لانهم ( همشوه ) يا اخى ما كفاية الفترة القضيتها فى الوزارة خلى الباقين كمان ياخدوا دورهم وياكلوا من الكيكة والشعب ما لاقى الفتريته الجافة بجون ملاح والله انا افهم انو الزول يكون حرامى ومجرم وقاتل وانانى واى حاجة لكن يكون جلده بالتخانة دى ومتبلد الاحساس بالشكل ده ما شفته (انا ما قاصد حمدى بس لكن كلهم من بشيرهم لى نذيرهم )

[على العلوبة خسم الموس]

#1088807 [مدحت عروة]
3.00/5 (3 صوت)

08-25-2014 02:35 PM
مقال اكثر من رائع وعليك الله يا شوقى بدرى اصلك ما تقيف من الكتابة!!!
انت ماك عارف انه الحركة الاسلاموية السودانية بت كلب وبت حرام؟؟؟؟يا رااااجل!!!!!!!!!!!!!ده الكلب وبت الحرام ما يقبلوا هذه الاهانة بتشبيههم بهذه الحركة الملعونة!!!!!!!

[مدحت عروة]

#1088786 [صلاح عثمان]
3.25/5 (3 صوت)

08-25-2014 02:07 PM
كلما الدولة تحتاج تدفع للجيش والامن والجنجويد وناس سيدي يدوروا المطابع ويطبعوا زي اي طاحونة. في عملة في العالم تحت حكومة عندها شوية معقولية الدولار زاد فيها الف مرة؟.

امس حمدي صرح بانه تم تخفيض قيمة الجنيه 13 مرة ولم ينصلح الحال
الشهامة هي التي ستسقط الحكومة - بعد ما تنكشف اسعار الاراضي ورهون البنوك وشركات الاتصالات علي الاراضي .

وسيفقد الجميع الثقة في العملة المحلية ولن ينفع الحكومة تدوير المطابع

اجمل المقالات التي قرائتها- تسلم ايدك

[صلاح عثمان]

#1088736 [omer ali]
3.00/5 (2 صوت)

08-25-2014 01:26 PM
عبدالرحيم حمدي وسفلة الاخوان اعتمدوا علي قولة الترابي المشهوره ان شعبنا قصير الذاكره ,,,افعل بهم ما تشاء وبمرور الزمن تصبح فعايلك ذكري منسيه,,

لكن هيهات هناك من ابناء شعبنا من يوثقون كل ما جري ويجري في هذا الزمن الانقاذي وحسب ما ذكر مولانا سيف الدوله ان الاستاذ علي محمود حسنين يملك كم هائل من الوثائق

وعلينا ان نشكر الاستاذ بكري الصائغ وتوثيقه لما فعل سفلة الانقاذ من جرائم ضد شعبنا وتذكيرنا بها حتي لا تبقي في ذاكرتنا للابد,,

مقالاتك يا استاذ شوقي تذكر اجيالنا واجيال المستقبل بكل ما هو جميل في بلادنا قبل ان يسطو حسن الترابي علي السلطه ويدمر ويخرب ما فعله العظام مثل عثمان صالح ورجل البر الزبير مسوسي حامد وبيطار وغيرهم ممن ذكرت وستبقي كل تلك الاسماء التي تذكرنا بها استاذ شوقي خالده في ذاكرتنا بفضل جهدك المقدر,,,

[omer ali]

#1088709 [marj]
1.00/5 (1 صوت)

08-25-2014 01:05 PM
ان أبوه معروف كان سوا فينا كدا. دا ود حرام دا"انعل أبو المؤتمر الوطنى

"المؤتمر الوطنى دا لو ك

[marj]

#1088678 [ود الكوتش]
2.50/5 (3 صوت)

08-25-2014 12:43 PM
يا عم شوقي طلب صغير بس منك أشرح لينا من وجهة نظرك أسباب التخلف السياسي العندنا في السودان ، أنا ما بفهم في السياسه و لا بحبها لأنها كلها كذب وعدوك الليله وبكره صحبك وتاني يرجع عدوك يعني لعبة الكراسي دي ما بعرف ليها لكن البعرفه انه الدول الكبيره أو العظمى زي ما بتسمى فيها حزبين بس زي الأجنحه في تيم الكوره يمين و ليفت ، أها نحنا ليه عندنا ديشيليون حزب وما نافعين زي ما بقولوا الحلبه المصريين سبع صنايع و البخت ضايع ، و على حسب القعده العملها بشه قالوا كم و 80 و الله أعلم
ليه الأحزاب دي ما قادره ترفع قدر السودان ، الواحد فينا بقى همه يشيل جواز تاني عشان يقدر بصوره كويسه اذا في الخليج أو في مطار أي دوله أعجميه زي ما ذكرت في المقال السفير قال ليك عيب كسوداني تنزل في لوكنده أها نحنا في زمنا ده عيب تفكر تسافر بجوازك السوداني

[ود الكوتش]

ردود على ود الكوتش
Saudi Arabia [nour] 08-25-2014 05:39 PM
الاحزاب ما قادرة تعمل حاجة لأنه ما عندنا وعي سياسي


#1088658 [خالد ود المدينه]
1.00/5 (1 صوت)

08-25-2014 12:27 PM
استاذ شوقي لك التحيه
لماذا لاتعود وتدينا من ذاكرتك الحديديه دي وتنفعنا بيها "احنا الشباب ".
استاذ ارجوك نحتاجك انت وغيرك من الوطنين البمتازو بالمقدرات دي .
هل تصدق اني حاولت افتش ليك فيديو واحد في اليوتيوب مالقيت ليك ؟؟!؟!...
ماحرام العمر يمضي ويفنى واحنا الجيل الماشفناك ولاعرفناك الا على الورق والنت؟؟!؟!

[خالد ود المدينه]

ردود على خالد ود المدينه
[متأمل] 08-25-2014 06:16 PM
لأنو السودانيين ما عندهم اخلاق
وحتتتتتتتتى لو شال جواز تاني ياهو سوداني وما عندو اخلاق
معقوله بس بلد فيها النهر الخالد والاراضي الخصب والكفاءات الماعلمه من العشرينات زي ما ذكر العم شوقي وبعد ده كلوووو ده يكون حالنا
فالنتيجه اذا لاااااا اخلاق للسودانيين

Saudi Arabia [متفائل] 08-25-2014 04:45 PM
العزيز خالد ودالمدينة سبحان الله نفس الاقتراح كان على بالى بكل دقة وأكرره معك بشدة وأيضا ياحبذا لو يشمل مع الاستاذ شوقى كل من ( بكرى الصائغ / مولانا سيف الدولة)
على سبيل المثال وكل الكتاب وأصحاب الوثائق وكل المهتمين بمختلف تخصصاتهم الاقتصادية والاجتماعية والقانونية لكل التجاوزات التى صارت فى ال/25 عام العجاف وذلك للتوثيق الحديث والمثبت صوره وصوت والاجيال القادمة. نرجو من كل من يقراء هذه الافتراحات وله خاطر لهؤلاء المؤرخين والموثقين على تشجيعهم وحثهم لعمل اللازم .
والعمر مشى والزمن دوار .

وبكــــــــــرة أحلـــــــــــــــــى


#1088654 [مكرام]
4.00/5 (3 صوت)

08-25-2014 12:24 PM
يا استاذ شوقي لو كان حمدي هذا في اي بلد لاتيني كان صفوهو بدري لكن حظو انو عايش في السودان'انه خيانة عظمي تمشي علي قدمين

[مكرام]

#1088634 [محروق الحشا]
1.00/5 (1 صوت)

08-25-2014 12:06 PM
والله بحبك ياعم شوقى ...

[محروق الحشا]

ردود على محروق الحشا
Sweden [shawgi badri] 08-26-2014 01:35 AM
قد تكون عضوا في نادي نادر الاعضاء . لقد جعلنا ما نكتب وما نقول يجعل الناس تبتعد عنا ناهيك عن الحب . شكرا يا ابني .


#1088622 [ود الكوتش]
1.50/5 (2 صوت)

08-25-2014 11:54 AM
ههههههههههههه والله يا عم شوقي ندمت الراجل على الكلمه القالها ، ما خليت ليهو ركن يتدسه فيه ،محروق منه حرقه شديده اتاريك
لكن يا عم شوقي ناس الانقاذ يستاهلوا انه بقول عليهم كده لأنهم شايفينه الخبير الاقتصادي و الشفت المالي وحاجات كتيره وهو في النهايه اداهم فوق راسهم

متعك الله بالصحه والعافيه ان شاءالله و قواك على نجاض الجماعه ديل

[ود الكوتش]

#1088569 [الهادي إبراهيم]
2.00/5 (3 صوت)

08-25-2014 11:06 AM
يا أخي ديل عبارة عن مجموعة من المجرمين و بعض الدراويش. ومما يدل علي دروشتهم أنهم يدعون العلم بكل شئي, أي Omniscient كما يقول الخواجات. نعرف هذا منذ أيام الطلب في الثانوي و في الجامعة في القاهرة, إذ كان الكوز يطربق و يدعي أنه أفلح من غيره و عندما تعوزه الحيلة يلجأ إلي العنف لإسكات الآخر. هذه واحدة من أسباب فشلهم. و مما يدل علي إجرامهم, سرقتهم لموارد البلد, وتسخير جهاز الدولة لمصلحتهم الشخصية دون حياء أو خوف من الله. ماذا كان يملك نافع علي نافع قبل ان يصبح مسئولاً في الدولة؟! هذا مثال بسيط لفساد هذه الجماعة.
في بداية عهد الإنقاذ, أخذ الإعلام يلمع في بعض الشخصيات و منهم عبدالرحيم حمدي, وزير المالية السابق و لدورتين. شبهوه ب ( لودفيج إيرهارد) وزير المالية الألماني و مستشار ألمانيا بعد الحرب العالمية الثانية و قيل أنه صاحب المعجزة الألمانية و هو الذي عبر بالمانيا من الخراب الذي حدث بفعل الحرب العالمية الثانية, إلي البناء و الرخاء, حتي أصبحت ألمانيا قوة عظمي, يشار إليها بالبنان. و اليوم يعود عبدالرحيم حمدي ليتبرأ من السياسة التي طبقها بحذافيرها و إدعي أن سياسة التحرير الإقتصادي ستعالج مشكلات الإقتصاد السوداني. ما حدث لم يكن تحريراً, بل كان فوضي, لقد ذهل بعض الإقتصاديين الغربيين حين سمعوا أن حكومة الإنقاذ حررت السوق تحريراً كاملاَ و بجرة قلم و مرة واحدة, في حين أن مطالب صندوق النقد الدولي كانت عبارة عن حزمة من الإصلاحات المالية و علي رأسها برنامج التعديل الهيكلي Structural adjustment program و التدرج في سياسة تحرير السوق و الخصخخصة.
إن ما حدث و يحدث في بلدنا لا يمت إلي الإقتصاد بصلة, بل كان بعضه عبارة عن هترشة و شغل دراويش و بعضه عبارة عن سياسة إجرام بهدف سرقة البلد و التمكين لهذه الجماعة.

[الهادي إبراهيم]

#1088500 [n k]
3.75/5 (5 صوت)

08-25-2014 10:28 AM
انت يا استاذ شوقى حكيم فى الشان السودانى وذاكرة ما شاء الله حديد ولكن نسيت حاجة مهمة حدثت فى عهد حمدى تم تحويل التمويل الزراعى للمشاريع الكبيرة من الخزينة العامة الى ما مسمى بمحفظة البنوك واذكر ان سعر الفائدة كانت حولى 54% من السنة الاولى فى العهد المشئوم مع انه المحصول المتوقع من الفطن او جزء منه كان يباع قبل الزراعة يعنى المزارع هو الممول الحقيقى للموسم الزراعى 00قف المزارع حينتج شنو عشان يدفع تكلفة تمويل 54% ؟ ثم ان الحكومة كانت تقلع انتاج المزارع بالبندقية التى حملها الامنجية بعد ترك بضعة جوالات فى احسن الاحوال للمزارع اما اذا كان انتاجه متوسطا او قليلا من القمح فلا يترك له شىء

[n k]

ردود على n k
United Arab Emirates [ودالباشا] 08-25-2014 05:38 PM
يمولانا شمس الحرية لن تأتى والشعب فى سبات عميق برغم انه اصبح يفضل الموت ويتمنون ان تقوم القيامة غداً كيف تأتى وانتم تكتبون ونحنا نقرا هكذا انحصرت الادار وليس هناك من يحرك الشارع ويخطط ويقود الجماهير حتى الذين يحملون السلاح مجبورين سنين عددا لن تأتى بثمار حتى الان بل تحمل البسطاء فى تلك المناطق معاناة يذوب لها الصخر الاصم سبب هذا النظام الدموى اللعين وصرفت جل مزانية الدولة للحرب والنتائج يدركها الجميع لقد تجاوزنا مرحلة التعرية وكشف الغطاء الشعب يموت والوطن يتلاشى فمتى نكون بقدر التضحية للوطن ويكنس هؤلاء الحرامية ومن ثم ننفذ وصية محجوب شريف حانبنيهو

Saudi Arabia [الهادي إبراهيم] 08-25-2014 02:29 PM
و بعد داك إستقر في لندن و طور نفسه شوية في مجال الإقتصاد. دخل في علاقات مع صالح كامل صاحب بنك البركة و مع بعض جماعة الإسلام السياسي و هي الجماعة التي تدير حركة الإخوان المسلمن علي مستوي العالم و تعد حكومة خفيةBehind the throne و لها إرتباط بالماسونية العالمية بدليل أنها تحمل نفس أفكار الماسونية و ذات السلوك القذر الذي يصم الماسونية من قتل و سحل و سجن و تعذيب. و في لندن ناسب حمدي واحد باكستاني يقال انه رئيس الكونسورتيوم الذي عمل مجال البترول السوداني. عبدالرحيم حمدي حنكه قوي و لديه قدرة علي المراوغة و الإقناع و هذه هي كل مؤهلاته مثل الدكتور/ علي الحاج, لذا تمكن من إقناع الجماعة و لقي ليهو موطئي قدم ساعده في إنشاء بنكه أو بنك الأولاد كما قال!.
هذه عينة من الجماعة الحاكمين البلد بإسم الإسلام.

Sweden [shawgi badri] 08-25-2014 12:28 PM
يكتبو شنو ويخلو شنو . الراجل ده لمن اعتقلهم نميري انكر صلته بالكيزان وايد مايو . من موظف مغمور بيقول اخد رخصة بنك علشان يخلي حاجة لي اولاده . تصور .


#1088485 [عوض عمر]
3.88/5 (5 صوت)

08-25-2014 10:17 AM
نود أن نعرف معني السنكيت و الفليتو. مع خالص تقديرنا للكاتب و لصحيفة الراكوبة.

[عوض عمر]

ردود على عوض عمر
Sweden [shawgi badri] 08-25-2014 12:24 PM
عزيزي عوض لك التحية . السنكيت هو سنام الثور يتغذي منه في حالةانعدام الغذاء . لا يتواجد في ثيران اوربا . لانه لا يتحرك يكون هشا طريا . وعادة يحتفظ به وصايةلاهل الحظوة . الفليتو او الفليه عضلة طويلة في الظهر لاتتحرك وهي اغلي لحمة ثمنها قد يكون 3 اضعاف اللحم العادي وهي خالية من العظم . الارجل لانها تتحرك تكون قاسية وهي ارخص اللحم .


#1088483 [سوداني]
1.00/5 (1 صوت)

08-25-2014 10:11 AM
يا عم شوقي الزول ده شيشك عليهو يمكن يكون ود كوشة او ود برميل زي اخوانه وزي ما قال الطيب صالح من اتى هؤلاء. اصلو ود الحلال ما بسوي كدي

[سوداني]

#1088474 [ود أمدرمان]
2.00/5 (3 صوت)

08-25-2014 10:07 AM
مقال أكثر من رائع والله كفيت و وفيت

[ود أمدرمان]

#1088467 [ايوب]
4.00/5 (3 صوت)

08-25-2014 10:02 AM
شكرا استاذ والله حال البلد بقت صعبة شديد ناس الانقاذ ديل
فاكرين الشعب ده اهبل السنة المضت قالو الدعم يذهب للاغنياء
والفقراء ما راكين عربات والبستهلكو الوقود الاغنياء عشان كدا لازم
نزيد نرفع الدعم ونعطيهو مباشر للفقراء ناسين ولحد الان ماف فقير واحد ادوهو قرش واللان نسمع نفس الاسطوانة الدعم يذهب للاغيناء تصور يا استاذ ولاية جنوب دارفور بها 30محلية يعني اي خشم بيت قبيلة عندو محلية يصرفو من مال الفقير التعبان بدون ما يقدون شي و90%من هذة المحليات مكاتبها داخل عاصمة الولاية نيالا ما داعي المحلية اصلا انهم سبب البلاوي في هذا البلد الطيب اهلو ولك كل التقدير

[ايوب]

#1088459 [دولار حار]
3.00/5 (3 صوت)

08-25-2014 09:56 AM
شكيت محنك.. الحلبى ماخليت ليه صفحة ارقد عليهاود ام زقدة

[دولار حار]

#1088427 [أبو محمد]
2.75/5 (5 صوت)

08-25-2014 09:33 AM
ابو الزفت ....غاينه البيقع في يد شوقي بدري تعب ...حديث خالي

من الحذلقة والتقعير ...كلام مباشر وبسيط لكن يحمل معاني كثيرة

[أبو محمد]

#1088395 [د. هشام]
3.00/5 (2 صوت)

08-25-2014 08:57 AM
متعك الله بالصحة و العافية أستاذ شوقي بدري!! هذا المقال أي تعليق عليه يفسد ما جاء فيه!!لأنه مقال وافي و كافي.

[د. هشام]

#1088365 [حزب الراكوبة]
4.00/5 (3 صوت)

08-25-2014 08:23 AM
والله ياعم شوقي محاضرة قيمة ومرافعة مسبكة لو كانت قدام قاضي شريف لحكم على هذا الرجل بالرجم
وصحيح لسه هذا الرجل يسكن في الفنادق ؟؟؟؟؟

[حزب الراكوبة]

#1088359 [شاهد اثبات]
1.00/5 (1 صوت)

08-25-2014 08:15 AM
وقال شنو "انعل ابو المؤتمر الوطني"
كوجيتو ينفع تسريحة شعر لاسقاط النظام..الواحد(والواحدة) يحلق صلعة زيرو ويخلي قنبور واحد بس في نص صنقوعوا واصلنا شينيين وما فارقة معانا
طبعا انت ياعمنا شوقي ده شعر ما عندك ليه رقبة
ما بتقدر تقشر بي الموضة دي
الله يحفظك ويرعاك
لكم انت خبير في الانساب ماقلت لي البصيرة ام حمد بتبقي لي حمودي ده شنو؟؟

[شاهد اثبات]

#1088356 [حسن علي]
3.50/5 (3 صوت)

08-25-2014 08:11 AM
شغل نضيف اديته بالجيهة الفيها الحديدة لامن جبت خبره

[حسن علي]

#1088348 [ود الباشا]
4.25/5 (5 صوت)

08-25-2014 07:49 AM
تسلم ياعم شوقى وربنا يطول عمرك تعرف يا عم شوقى انت بتعلم فينا تاريخ هؤلاء اللصوص والله لولاك لانعرفة وهذا هو تواصل الاجيال واهم شى توثيقك هذا لان الشعب السودانى حنين ونساى حمدى نفسو نسى ما فعله واعتقد بعد مقالك دا سيتوارى اذا كان عندو ذرة من الكرامة

[ود الباشا]

#1088337 [عودة ديجانقو]
1.50/5 (2 صوت)

08-25-2014 07:21 AM
حقيقه أخ شوقى كلما أقرأ إسم عبدالرحيم حمدى تسبقه عبارة الخبير الاقتصادى يقفز الى ذهنى إسم الخبير الاقتصادى بحق وحقيقه والحائز على نوبل فى الاقتصاد والاستاذ بجامعة كولومبيا جوزيف ستغليتز من باب المقارنه التى لا توجد أصلا حتى فى السن بينهم إذ جوزيف يصغر حمدى. ولذلك لا أود الدخول فى مقارنه ناهيك عن الاسهامات فى مجال الاقتصاد.

[عودة ديجانقو]

#1088331 [لوممبا]
3.00/5 (4 صوت)

08-25-2014 07:08 AM
اسعد الله صباحك وامد ايامك ومتعك بالصحة والعافية كفيت ووفيت وربنا يحل البلد من هؤﻻء الشرذمة .

[لوممبا]

#1088306 [العراب]
2.50/5 (3 صوت)

08-25-2014 04:51 AM
من هو ابو المؤتمر الوطني ؟؟ لا يوجد...
حتي انه ليس له... من أين أتي هؤلاء !!!

[العراب]

ردود على العراب
Saudi Arabia [حمدى] 08-25-2014 03:30 PM
ابو ابليس ابوعصاية


شوقي بدري
شوقي بدري

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة