المقالات
مكتبة كتاب المقالات والأعمدة
الفاتح يوسف جبرا
مصرف فى التهانئ !ا
مصرف فى التهانئ !ا
02-14-2011 11:48 AM

ساخر سبيل

مصرف فى التهانئ !

الفاتح جبرا

عمتى (ربنا يطول فى عمرها) أمية لا تعرف القراءة والكتابة لكنها مولعة أشد الولع بالتفرج على صفحات الصحف اليومية التى أحضرها للبيت ورؤية الصور التى بها .. وعلى الرغم من أنها لا شأن لها بالسياسة إلا أنها قد صارت تتعرف على (صور) كبار المسئولين التى تتصدر الصفحات الأولى يومياً منذ عقود من الزمان بل حفظت أشكالهم عن ظهر قلب ! ويكفى أن تشير بيدك إلى أحدى الصور وتقول ليها (ده منو؟) حتى ترد عليك دون تردد : ده ما فلان كمان صورتو بتغبانى !
بالأمس وهى تقلب صفحات إحدى الصحف فاجأتنى قائلة وهى تمد لى بالصحيفة مشيرة إلى إحد الأشخاص :
- إنتا الزول البجيبوهو الأيام دى كتير ... ده منو؟ كل ما أفتح ليا جريده ألاقيهو مرة ومرتين !
أمسكت بالصحيفة نظرت (للتهنئة) التى جاءت فى (نصف صفحة) وقلت لها :
- لا .. ده بس (والي) كان عيان وسافر بره يتعالج ورجع !
- ونحنا مالنا !
- لا يا حاجة الكلام ده والتهانئ دى ما لينا أنحنا .. الكلام ده موجه ليهو هو .. عشان (يصلح البايظ) وكده !
بالطبع لم تفهم (عمتى) عبارتى (الكونكانية) لكن فهمها لم يذهب بعيداً فيما يبدو إذ خاطبتنى قائلة :
- يعنى هم قاعدين يعملو ليهو أعلانات التهانى دى عشان يصلح ليهم حاجاتهم البايظة وكده ؟
- عليك نور يا حاجه.
- أها والإعلانات الفى الجرائد دى دحين ما غالية !
- والله من ناحيت غالية يا حاجه فهى غالية .. (خاستن) إنهم بيعملوها كبيرة عشان تناسب مقام (الوالى) .. يعنى أقل حاجة نص صفحة زى الإعلان الوريتينى ليهو ده.
- يعنى يكون يا ولدى بى مية .. ميتين جنيه !
- مية شنو يا حاجه ده بتاع إتنين .. تلاتة مليون كده !
- والله يا ولدى أصحابو ما قصرو معاهو مش هم يهنوهو ويدفعو القروش دى !
- أصحابو شنو يا حاجة .. الإعلانات بتاعت التهاني دى (مدورة) ليها كم إسبوع وكلها (وزارات) ومؤسسات (حكومية) وشركات !
- (وهى مهجومة) : أجى يا ولدى؟ بيدفعوها من جيب (الشعب الفقران) ده !
- (مواصلة) : كدى هسه ورينى دى ياتو وزارة قاعده تهني فيهو بى سلامة الوصول وعامله ليها نص صفحة !
لدهشتى ..(لو فضل لينا فيها دهشة) فقد كانت التهنئة من (ديوان الزكاة) !! .. ديوان الزكاة ممثلاً فى أمينه العام (للولاية) ... نعم يا سادتى الأفاضل (ديوان الزكاة) يهنئ السيد الوالي بمناسبة عودته للولاية سليماً معافى بعد رحلة الإستشفاء التى قام بها ويختتم تهنئته ببيت الشعر (المجد عوفى إذا عوفيت والكرم وزال عنك إلى أعدائك الألم) ..ولم ينس أمين الديوان (المهنئ) أن يضع (صورته البهية) يسار صورة الوالى (المتهنئ) !!
من خلال متابعتى للصحف وإطلاعى المستمر خلال الأسابيع الماضية لإعلانات التهانئ (بعودة هذا الوالى بالسلامة) وجدت أن عدداً من (الوزارات) والمصالح الحكومية قد شاركت فى هذه الإحتفالية (للأسف الأسيف) وأنفقت من ميزانيتها من مال (محمد أحمد الغلبان) ما أنفقت لكننى رغم إستيائى البالغ من هذا الأمر فقد تركت تناوله بإعتبار أن هذا الأمر قد أضحى (سنة سخيفة) لكن أن يشترك (ديوان الزكاة) فى هذا (السخف) صارفاً ملايين الجنيهات فى مثل هذه التهانئ (الفجة) فى ولاية تعد أكبر مستوطنة فى العالم كما تقول التقارير للأمراض الصدرية وتورم الكبد وتفتقد بعض أنحائها إلى الماء العذب !
العبد الفقير إلى الله (جبرا) يقول : للبعد عن شبهة الصرف من أموال المسلمين كان يفتروض على (ديوان الزكاة) عدم الزج بنفسه فى مواقف كهذه حتى وأن كان مبلغ إعلان التهنئة ده (وأشك فى ذلك) دافعو (الأمين العام) الخاتى صورتو ده من (جيبو الخاص) !
كسرة :
لم نسمع بمصرف يسمى (وفي التهاني)

الرأي العام


تعليقات 20 | إهداء 0 | زيارات 4152

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#96020 [ANTI KOAZ]
0.00/5 (0 صوت)

02-15-2011 05:04 PM
كلب والينا المعظم عضني اليوم ومات

فدعاني حارس الامن لاعدم حينما اثبت

تقرير الوفاء ان كلب والينا تسمم


#95954 [hamed]
0.00/5 (0 صوت)

02-15-2011 03:31 PM
الوالي ابوضرس يهمه يلهط باي وسيلة وربنا كشف امرو بعد ان اعتقد الكثير من الناس انه عمر البلد لكن ربك يمهل ولايهمل اول مطره خفيفه انكشف المستور وغرقت البلد في شبر ماء لا العمل مكلفت وغير مدروس قامت به شركات السيد الوالي المكوش علي كل شي ولاتستطيع ان ترفع حجر الي وتحته شركات الوالي والمواطن ويذات في الاطراف حدث ولا حرج هو في حالت موت من لظة ولادته هذا اذاولد وماماتت امه وربا ياخذكم ونقلعكم ونامم الشركات كلها بما فيها حقات المركز المتمركز انشاء الله


#95924 [The key]
0.00/5 (0 صوت)

02-15-2011 02:55 PM
يا استاذ جبرا...
كدي راجع نفسك...امكن الامور اختلطت عليك...سلامة نظرك...ديل ناس ديوان الزكاة ولاديوان الذكاء؟!!!


#95694 [الزول السمح]
0.00/5 (0 صوت)

02-15-2011 09:59 AM
الأخت مواطنة

أستاذ جبرا ده راجل ظريف وكاتب متميز وله شكس أفكار رهيب ونحنا لما نفتح باب راكوبتنا دى أول حاجة بنفتش عن جديد ساخر سبيل لأنه مواضيعو البيختار كتابتها فيها جميع صروف اللغة العربية من تورية وجناس وإقتباس..وهو عارف طريقتنا معاهو وبكتب لينا نحنا ديل البنناكفو ..إنت الحارق رزك شنو؟


#95602 [ودالبحر]
0.00/5 (0 صوت)

02-15-2011 07:04 AM
والله يا جبرة انت قديم وما مواكب التطور والحداثة في المشروع الحضاري ؟؟

انت من زمن مصارف الزكاة الزماااااااان ديك ؟ ما حدثوها عشان تواكب التطور الحاصل في السودان ؟؟.
بدل إبن السبيل ... أهل الوزير
بدل العاملين عليها .. العاملين فيها
بدل في الرقاب .. في ذمة الجماعه ( دي طبعا ذمة كبيييييرة)
واخر مصرف هو .. مصرف أبوعنجة لانه كبير وواسع وبشيل اي حاجة ما يجدوا ليها سند ودليل من التبرير وكدة ..


#95513 [مواطنة]
0.00/5 (0 صوت)

02-14-2011 10:05 PM
الناس دي ما بتبطل الهيافة والعبط دا البعترض علي اوضاع من اردأ ما يكون اوينتقد يبقي علي طول مدمن وسكران ومسطول وفي حالة البنات يكونو جكس وصيع والي اخر القائمة السخيفة دي جاكة قديمة كانت تناسب التسعينات شوفو غيرها قسمتو بلدنا يقسم شوفكم


#95463 [ابو الهول]
0.00/5 (0 صوت)

02-14-2011 07:43 PM
والله الظاهر لي كده انو جبرة بقي يباصي الصنف الخطير بتاعو ده للجمهور كمان
والما مصدقي يتابع تعليقات الناس التحت دي


#95456 [سودانية]
0.00/5 (0 صوت)

02-14-2011 07:25 PM
ياريت يجىءيوم شكرهم واحد وراء الاخر واى يوم شكر لهم نحن مسامحين فى اموالنا بس بشرط بعد الدفن لو فى جثه وانت مسؤال من الخير الطائرات الروسيه بطل تقع بالمسؤالين ليه لينا زمن منها ام بقو فالحين وعملو طائرات اروبيه وامريكيه خاصه ام شوارع الاسفلت كثرة


#95439 [وجع الزمان ]
0.00/5 (0 صوت)

02-14-2011 06:29 PM
انشاء الله يتخلع هو زاتو زي ماخلعوا ضرسو
كسرة :
التهنئة للوالي والشعب يتولول


#95428 [احمد ]
0.00/5 (0 صوت)

02-14-2011 05:51 PM
هل استرد الديوان مساهمته فى قناة الضحى بعد ان تاكد للجميع انها قناه وهميه (المبلغ كان خمسين الف دولار)


مصارف الزكاه فى الاسلام 8 يعلمها جميع المسلمين لكن فى الاديان الاخرى لاعلم لنا بها


#95419 [blackberry]
0.00/5 (0 صوت)

02-14-2011 05:38 PM
الجوطة دي كلوووووووووووها في ضرس ؟ مالكم حاسدين ياجماعة الوالي مشي يظبط الضرس علشان يمضغ كويس.


#95385 [odabdiga]
0.00/5 (0 صوت)

02-14-2011 03:52 PM
ياكافى البلا البيت كلو مرضان بى الشغلة دى


#95371 [محمد ااحمد]
0.00/5 (0 صوت)

02-14-2011 03:19 PM
يا استاذ جبرا ما تتعب نفسك مع الجماعة ديل لأنو رئيسهم الرقاص اب جاعورة زاااااتو غير اللحس والكذب ما يقدر يسوى حاجة ويكفي أنه قبل ذلك الغى الكثير من الزاكاوات والضرائب والرسوم والجبايات (وهو يعلم) أن رفقاؤه المسئولين لن ينفذوا قراراته أو أنهم سيجدون طريقة اخرى لتحصيلها مع تغيير المسمى او تغيير الجهة التي تقوم بالتحصيل أو تغيير الوعاء الضريبي ... وكمثال على ذلك عندما يطلب المواطن خدمة معينة من جهة حكومية صدر قرار لها بإلغاء رسوم معينة فعندما يذهب الى هذا المرفق الحكومي لا يدفع شيئا تنفيذا لقرار الرئيس ولكن تطلب منه هذه الجهة الحكومية احضار خلو طرف (لم يكن موجود قبل قرار الإلغاء) من جهة حكومية اخرى ويمشي عشان يجيب خلو الطرف ويجد في انتظاره رسوم مضاعفة يعني يلبسوا المواطن الطاقية بل ويتم مضاعفة الرسوم يعني بالمختصر المفيد اي قرار يصدر في ظاهره مصلحة المواطن إنما هو وبال ومصيبة تدبر له في الخفاء وهذة هي سياسة المشروع الغير حضاري غش وتدليس وتجويع كذب وتجويع وتجويع وتجويع ونحن لا نقول إلا ... حسبنا الله ونعم الوكيل.


#95350 [jwaad]
0.00/5 (0 صوت)

02-14-2011 02:39 PM
هم غير الكلام الفارغ عندهم شنو
واحد وعشرين سنة كضب في كضب
تسمع الواحد فيهم يتكلم بعد كل عشرة ثواني يقول_ بإذن الله سبحانه وتعالي_ تقول خلاص دا البخاف الله وما باكل حق زول
وهو اكبر حرامي
قدوتنا الرسول عليه الصلاة و السلام ادخل يده الطاهرة في فم سيدنا الحسين وطلع منو التمرة لأنها من الصدقات
الله ابتلانا بارزقية استغلوا الدين مطية لاشباع رغباتهم الوسخة النجسة
وبرضو يقولو دايرين يطبقو الشريعة تقول هي حنة


#95343 [قاسم خالد]
0.00/5 (0 صوت)

02-14-2011 02:27 PM
و العجب العجييييييب قالوا كان بيتعالج من وجع ضرس .. وجع ضرس ... الضرس عوفي إذا عوفيت و الضرس ... و جاتكم بلا و داهية و جاكم الألم ... يا دوواين النهب المزكى ..


#95334 [smy]
0.00/5 (0 صوت)

02-14-2011 02:11 PM
العاملين عليها .
والتهاني .


#95320 [أبورماز]
0.00/5 (0 صوت)

02-14-2011 01:46 PM
كدى يا جبرا تقريبا تقريبا لو الجماعه المهنئين ديل إشتروا خرفان ـ بدل ما يدفعوا مواهيكم ومواهى ناس عووضه وساتى ـ لسعادة الوالى .. تقريبا تقريبا يكون عدد الخراف كم .. ؟

خلف دور :
نهنى نحن محبى الراكوبه بالداخل والخارج شحادين كنا أو قطيع أو نمل أو عيال فيسبوك والينا بسلامة العوده ونسأل الله له دوام الصحة العافيه وألا تظهر صوره على الجرايد بمكروه وأن تظهر فقط لزياراته لنا فى رواكيبنا وودياننا ومستشفياتنا وفى إفتتاح مبانينا وآبارنا وحفائرنا وفصول مدارسنا بعد أن يرميها الخريف .. أمين ..

كسره :
جبرا حاسب الجماعه بتوع الراكوبه دول بقيمة الإعلان لأنك إنت السبب ..!!!


#95309 [هاشم عبد الماجد خالد]
0.00/5 (0 صوت)

02-14-2011 01:21 PM
كدى يا جبرا رسل لى صورة عمتك


#95280 [سودانية]
0.00/5 (0 صوت)

02-14-2011 12:36 PM
دا ما ديوان زكاة دا ديوان محاباة وذكاء ودهاء وحيل لاستنباط اوجه صرف لاموال الزكاة غير الثمانية مصارف المعطلة من زمان من باب فقه الضرورة


#95265 [الزول السمح]
0.00/5 (0 صوت)

02-14-2011 11:58 AM
يا استاذ جبرا

ده حالتو قلِع ضُرس ..لو كان طهروه كان عملوا ليهو شنو؟

شولة..

إنت عمتك دى قاعدة تشاركك الصــنف؟؟


ردود على الزول السمح
Saudi Arabia [لمتين ] 02-15-2011 01:15 AM
المشكلة والينا ابوضرس عنصرى وديكتاتور ويجيد اللعب بعقول البسطاء ماذا نستفيد من كافتريا على البحر يملكها مصرى وجرسوناتها حبشيات فى حين لاتوجد حقنة بنسلين فى مستشفى الولاية بل لا يوجد مستشفى فى طوكر التى مات اهلها ووالينا المبجل يصرف على مهرجان السياحة الدشليونات ... احترامى للحرامى


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة