المقالات
مكتبة كتاب المقالات والأعمدة
حسن وراق
المهاجر عينو قوية !! وحاجات تانية
المهاجر عينو قوية !! وحاجات تانية
08-30-2014 03:29 AM


الحركة الإسلامية السودانية الحاكمة أعلنت الهجرة الي الله في إطار التوبة النصوحة. شروط التوبة معروفة.(ندم علي ما فات وعدم العودة للذنب و رد الحقوق لأهلها) ، الحاصل الآن ، الجماعة مبسوطين من العلينا و ما ندمانين وقاعديين و مزبطيين الانتخابات عشان يجوا تاني و المظاليم كتااار ما في زول أدوهو حقو .. . أول حاجة توبوا لله يا مفترين وبعدين الهجرة إلي الله دي قايلنها الي ماليزيا ؟

يا رئيس القضاة أسمعنا مرة !!
العاملون الذين ألغيت وظائفهم بمشروع الجزيرة (3577 عامل) استغرقت قضيتهم العادلة ، 5 سنوات في المحاكم والقضية الآن تنظرها المحكمة الدستورية لأكثر من 5 أشهر والدستورية عاملة أضان الحامل طرشا !! معقول 5 شهور في انتظار حكم ياقضاة العدالة . أنصفوا هؤلاء المظلومين لان تأخير العدالة إنكار لها .

ح نأكل نيم ونجيلة كمان !!
وكيل وزارة الزراعة بهاء الدين خميس أعلن جاهزيته تنجيل كل الساحات والميادين الرياضية بالنجيل الأخضر ؟ يعني خلاص حلينا مشكلة الزراعة فضلت علي الميادين ؟ وزارة الزراعة تعاين في المشاريع الزراعية تنهار وتخرج من دائرة الإنتاج والمجاعة محمدانا ، بالله عليكم الله دي مش مسخرة وقلة الادب ذاتا ؟

زيتنا طلع !!
ناس الغرفة الصناعية قالوا أن أسعار الزيوت ستنخفض بنسبة 30% وهي ذات النسبة التي خفضت بها الرسوم الجمركية علي الزيوت .بالتجربة ما في حاجة في البلد دي طلعت جات نازلة تاني إلا المؤذن .ما في سبب بخلي الزيت اسعارو تنزل ، لا زرعنا حبوب زيتية ولا عندنا دولارات والبركة في اغاثات الغرب الصليبي .

يا ود البدوي غادي غادي..!!
ارتبطت سيرة المدعو أحمد البدوي بتدمير مشروع الجزيرة عندما كان أول مديرا عاما له في بداية الإنقاذ وهو أحد المتهمين في قضية الأقطان .ما يزال الجميع يسخرمن محاضرته في بركات عام 1990 بعنوان (مشروع الجزيرة في القرآن الكريم ) . ود البدوي جاء راجع تاني للمشروع رئيسا لنفرة القمح ..كان كدا يانا الما زرعنا .

حاج سعد الظريف عطشان الخريف!!
رغم الخريف الناجح ومطر البُخات في الجزيرة إلا أن ذلك لم يمنع المزارعين من استعمال الطلمبات لسحب المياه من الترع لري محاصيلهم ، هذا ما يحدث في السديرة ، القسم الشمالي في ترعتي حاج سعد جنوب وشمال التي يوجد بها أكثر من 12 طلمبة . هذا يحدث الآن فكيف الحال بعد شهر سبتمبر بعد توقف المطر؟؟؟

يا كمال النقر!! 3 مصانع جديدة لنج تختفي من عهدتكم .. وديتوها وييين؟؟
[email protected]


تعليقات 0 | إهداء 0 | زيارات 1624

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




حسن وراق
حسن وراق

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة