بتاع الخواجة !
08-31-2014 12:18 PM


عزيزي القارئ لابد لأنك تعلم بما يُسمى بالسكن العشوائي وهو أن يقوم أحدهم بتسوير مكان في أطراف المدينة ويبني عليه عشوائيا وبوضع اليد (كم أوضه) تأويه، وإذا تيسرت له الأمور أكمله منزلاً بكافة المرافق.. ولكن هل نما إلى علمك أن يقوم أحدهم بإعلان دولة (عشوائية) عن طريق وضع اليد على مساحة طرفية لإحدى البلدان تبلغ 800 ميل مربع؟
هذا ما فعله الخواجة الأمريكي (جيرميا هيتون) في الخبر الذي أوردته صحيفة (واشنطن بوست) الأمريكية مؤخراً. والقصة كما تقول الصحيفة أن (الخواجة) كان يلعب مع ابنته الصغيرة (أيميلي) ذات الستة أعوام في منزلهما بولاية فيرجينيا في الشتاء الماضي، قامت الشافعة قالت ليهو (بالأنجليزي طبعن):
- يا بوي أنا ممكن أكون أميرة حقيقية؟
- (فأجابها) بالحيل.. تبقي أميرة ونص وعشرة واعمل ليكي مملكة كمان.
وكمن يريد أن يبني منزلا عشوائيا على أطراف المدن أخذ الخواجة يبحث في اطراف (الدول) ذات الحدود (الهاملة) حتى يقوم بتحقيق حلم ابنته، وبعد بحث و(قوقلة شديدة) مستخدماً الإنترنت وجد الخواجة (جيرميا هيتون) ضالته في منطقة (بير طويل) وهي منطقة (سودانية) مساحتها 2.060 كم² (أكبر من البحرين وسنغافورة معاً) تقع على الحدود السودانية المصرية!.
وطوالي قوم يا الخواجة صمم (علمك) وهو علم أزرق اللون يحمل أربع نجمات (ذهبية) وتاجاً وتلالاً صخرية وأحجز (للشافعة) وأمها واخوانا التلاتة وسافر (مصر) .
في يونيو الماضي حصل هيتون (في القاهرة) على موافقة من الحكومة المصرية للسفر عبر البلاد إلى منطقة بئر طويل ومن هناك بالعربات أقطع ليك 800 ميل في 14ساعة لحدت ما دخلوا (بئر طويل) حيث قام الخواجه باختيار أعلى مكان وغرس فيه علم مملكته التي اسماها (مملكة شمال السودان) منصباً نفسه ملكاً عليها ومعلنا أنها باتت مملكة خاصة به وبابنته الأميرة، حيث حظيت القصة بتغطية واسعة من وسائل الإعلام الأمريكية والعالمية!
وبعد هذا التنصيب عاد الخواجة إلى مسقط رأسه وقام بتجهيز تاجًا لطفلته ايميلي وأمرها بأن تبقيه على رأسها طوال اليوم، كما صمم لها سريرًا على شكل قلعة ملكية جميلة قائلا لوكالات الأنباء: (بمساعدة كاملة من الحكومة المصرية، سافرت لمدة 14 ساعة مخترقا الصحراء المفتوحة إلى أن وصلت إلى بئر طويل وهناك زرعت علما صممه أطفالي وأعلنت ملكيتي لهذه الأرض وبناء على ذلك، فإني أعلن أن هذه المنطقة منذ السادس عشر من يونيو من عام 2014 ستسمى مملكة شمال السودان, المملكة ستكون ملكية ذات سيادة، وسأكون أنا رأس الدولة، وإميلي ابنتي ستكون أميرة حقيقية. ولذلك أطالبكم عندما ترون إميلي أن تخاطبوها بالاسم الرسمي: (الأميرة إميلي) !!
وبعد عودته لبلده وإعلانه لدولته طفق أصدقاؤه ومعارفه يسألونه (نظام شمارات):
- بالله هسه مافي زول إتعرض ليك وللا سألك قال ليك أوراقك وينا؟
- نصيحتي ليك لو عاوز تبني حقو تبني بالطوب الإسمو (النجدة) عشان كبير وبسرعة تخلص وما يجو يكسروها ليك.
- يا مستر (هيتون) الناس العشوائي ده بيشيلوا ليهم خمسمية متر ألف متر إنتا تشيل ليك 800 ميل مربع لا شك إنك تبالغ.
- يا مستر هيتون والله دي مافي زول (خواجة طبعن) عملا.. بالله لو لقيت ليك (قطعة فاضية) ذيها كده كلمنا !!
لم يلتفت مستر (هيتون) إلى حديث أصدقائه المغرض لأنه يعلم أنهم (حاسدين) ساي، فلا أحد منهم يستطيع أن يجد مثل هذه الفرصة (العجيبة) فيقوم بإنشاء (مملكة عشوائية) والظاهر كمان إنو عارف إستحالة (إزالة) السلطات السودانية لمباني هذه المملكة لعلمه بأن السلطات (يا دوووبك) تستطيع أن تقوم بإزالة بعض (الكرتون) العشوائي باطراف الخرطوم !
ولك أن تعلم عزيزي القارئ أن (الملك هيتون) كما جاء في بعض الصحف الأوروبية يعتزم توجيه طلب إلى الاتحاد الإفريقي للإعتراف به وبمملكته (العشوائية) ومن ثم (طبعن) الأمم المتحدة، ولم ينس (الملك هيتون) أن يصرح في إحدى إفاداته بانه مشغول هذه الأيام بتصميم (عُملة) للمملكة وأن بعض اصدقائه (الموسيقيين) في طريقهم للإنتهاء من تأليف (السلام الجمهوري)... وإتفرج يا سلام !!
كسرة:
بختنا ح يكون عندنا نشيدين جمهوريين.. نحن جندالله جند الوطن (حقنا) ونحن جند الله جند الوطن (بتاع الخواجة) !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و.
[email protected]


تعليقات 35 | إهداء 0 | زيارات 8695

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1095548 [ساهر]
5.00/5 (1 صوت)

09-02-2014 04:48 PM
تروي النكتة: أن رغد كريمة الراحل صدام حسين قالت له عقب احتلاله للكويت وأثناء عنفوان مجده وتجبره وتسلطه أنها ترغب في امتلاك حديقة ضخمة تكون باسمها، فرد عليها: لا تخافين سوف أحتل لك البحرين وأسويها لك حديقة خاصة. كنا نضحك من هذه النكتة ولكنها انطبقت علينا الآن..... الموضوع جد والله.... بداية الاستفزاز استئذانه من السلطات المصرية وليس السودانية.

1- يجب استدعاء السفير المصري بالخرطوم وتسليمه احتجاج رسمي وتوضيح لهذا الأمر.

2- استدعاء السفير الأمريكي بالخرطوم وتسليمه احتاج رسمي لخرق أحد مواطنيه لحدود دولة أخرى والاعتداء عليها، وإفهامه أنه لو كرر هذه المحاولة فسوف يكون دمه هدراً.

3- إرسال قوات نظامية وأمنية إلى تلك المنطقة السودانية على وجه السرعة.

4- ضرب كل من تسول له نفسه التلاعب بمقدرات الأمة.

5- إفهام المصارية أنهم لو أمعنوا في الإزدراء بنا وتحقيرنا بهذه الطريقة المستفزة فسوف نقطع علاقتنا معهم، ونغلق هذا الطريق الحدودي الذي لن نستفيد منه شيئاً.

6- الإسراع بدعم الأحباش لإكمال بناء السد، والوقوف معهم في كافة المحافل الدولية.

7- الاستعداد وإعلان الجهاد.

[ساهر]

#1095545 [ساهر]
5.00/5 (1 صوت)

09-02-2014 04:39 PM
هذه عينة من ما قاله الخواجة المعتوه لصحيفة واشنطن بوست ثم نقلته مجلة بيبول، حسب النص التالي، وكلها أمور توضح أن حكومتنا قاعدة (أم فكو)، أي عارية، وأن عناصر الأمن والاستخبارات موجودة في الخرطوم بس وفي الخرطوم موجودة في الدائرة الضيقة حول الرئيس. بالمناسبة فلسطين أُحتلت بالإدعاء، الذي تحول إلى حقيقة ماثلة أصبح من الصعب تغييرها.

BY TARA FOWLER

07/13/2014 08:00PM
Like all little girls, Emily Heaton wanted to be a princess – only her dad actually made it happen.
Jeremiah Heaton was playing with his then 6-year-old daughter last winter when she asked him if she could ever be a real princess. He told her yes, then journeyed to a stretch of unclaimed desert in Africa to plant a flag for her.
"I wanted to show my kids I will literally go to the ends of the earth to make their wishes and dreams come true," Heaton told the Washington Post.
The area, about 800 square miles, sits along the Sudanese border and was previously known as Bir Tawil by the locals. Heaton and his family now call it the "Kingdom of North Sudan."
The father of three plans to formally reach out to the African Union for cooperation in establishing his kingdom.
Heaton found the land after searching online for unclaimed territories of the world. A border dispute between Egypt and Sudan left the remote patch of desert as "terra nullius," meaning "land belonging to no one." He requested permission from the Egyptian authorities to visit the area, admitting that he was dubious of his own plan at first. But everything worked out in the end.
"I cannot stress how kind and generous the Egyptian people are," Heaton told the Post.
He now plans to convert the area into an agricultural production center, after his daughter said she wanted to make sure people of the region had enough food.
"That's definitely a concern in that part of the world," Heaton told the Associated Press. "We discussed what we could do as a nation to help."
It remains unclear whether Heaton's claim over the land will be deemed legitimate. At the very least, he will need to get legal recognition from the neighboring nations.

"I feel confident in the claim we've made," Heaton told the AP. "That's the exact same process that has been done for thousands of years. The exception is this nation was claimed for love."

[ساهر]

#1095355 [ساهر]
5.00/5 (1 صوت)

09-02-2014 12:08 PM
رجعت للموضوع الأصلي باللغة الانجليزية المنشور على عدة مواقع إسفيرية: الخواجة بنى فرضية امتلاكه لهذه الأرض على أساس أنها ظلت 100 عاماً دون أن يدعي أي أحد ملكيتها، هي أرض (محايدة- (Buffer zone) لا تتبع لمصر ولا للسودان، كما لم تقم مصر ولا السودان بإدعاء ملكية هذه الأرض حسب زعمه. لذا جاء وقام (بغز) علمه عليها، على طريقة التمتير والتشبير العشوائي الذي لا يحدث في المناطق العشوائية فقط كما ذكرت بل يحدث حتى في عالمنا المعاصر هذا، وما جزر الفولكلاند التي تملكها بريطانية بطريقة (غز العلم) إلا واحدة من قصص الحكور التي تفور الصدور.

*** الرجل اعتبر أن مجرد قيامة ب (غز) (دلاقانه) المسمى علماً سوف تصبح الأرض ملكاً له لأنه الشخص الوحيد في العالم الذي قام ب (غز) علم عليها، وأنه ينوي أن يستصلحها ويستزرعها ويصدر خضرواتها إلى كل العالم بما فيها إسرائيل طبعاً، ويجب أن لا ننسى أنه سوف يرويها من النيل كمان!!!!؟؟؟؟؟

**** إذا رجعنا لخلفية أن هناك عدة شركات إسرائيلية تستثمر بالسودان تحت مسمى شركات أردنية ولبنانية، وأن الخصروات السودانية تذهب إلى إسرائيل عبر هاتين الدولتين، وإذا استصحبنا تدخلات نجوم هوليود في قضية دارفور، وإذا رجعنا قليلاُ إلى ضربات إسرائيل المتكررة للعمق السوداني، وإذا وضعنا في أذهاننا نوم وشخير حكومتنا الذي أيقظ القاصي والداني، فيجب أن لا نستبعد أن نصحو يوماً ونجد العلم الإسرائيلي مغزوزا في الخرطوم وشندى ودارفور وسنار ومكوار وغيرها....

*** الموضوع جاد، ويجب مناقشته على أوسع نطاق سياسي ورسمي.....

**** يجب على القوات المسلحة السودانية ضرب أي عربة تسير في الصحراء دون هدى.

***** لقد (قومت نفسنا) الله يقوم نفس القوم نفسك.

[ساهر]

#1095066 [Faisal]
3.00/5 (2 صوت)

09-02-2014 03:37 AM
[النيل أبونا والجنس سودانى]




النيل أبونا والجنس سودانى comment from

3.75/5 (3 صوت)
08-31-2014 03:08 PM
الإعلام المصرى دائما يتحدث عن ملكية حلايب لمصرعكس الإعلام السودانى الذى ظل صامت. أما عن مملكة شمال السودان والأميرة إميلي فى منطقة بيرطويل لم يتحدث الإعلام المصرى عنها إطلاقا .
الأخ الفاتح جبرا أنت وبعض الكتاب السودانيين الذين كتبوا بخصوص بيرطويل وقعتوا فى الفخ المصرى وهم منتظرين منكم إقناع الشعب السودانى وحكومة الكيزان العره بحق ملكية بيرطويل للسودان ولأنها تقع داخل العمق السودانى بالرغم من بيرطويل تتبع لمصر. وبعدها ضياع مثلث حلايب السودانى أيضا بفهم أنه يقع داخل العمق المصرى .
الأخ الفاتح جبرا حاول أن تنظر الى خريطة السودان بدقة و راجع منطقة بيرطويل أين تقع ومثلث حلايب أين يقع .لامكان للسخرية فى هذا الأمر وكلام بختنا ح يكون عندنا نشيدين جمهوريين هذا الكلام لايجب أن يقال.
لدينا الوثائق التى تثبت تبعية مثلث حلايب للسودان. لابد من إسقاط حكومة عصابة المؤتمر اللاوطنى وبعدها إرجاع حلايب والفشقة مع الحدود الأثيوبية

[Faisal]

#1094811 [النون الساكن]
1.00/5 (1 صوت)

09-01-2014 05:10 PM
فخامة الملك المفدي جيرميا هيتون اطال الله عمركم .. نحن الشعب السوداني الفضل نرجو من جلالتكم التفضل بقبولنا خدما لسعادة الاميرة المبجلة ذات الحسب و النسب كما نرجو بضمنا الي مملكتكم الفتية و افراغ جمهورية السودان للجبهجيون بس نشوفن عايزين يعملوا شنو ..عشان يامنو..
خدامكم الشعب السوداني الفضل

[النون الساكن]

#1094733 [M. Ayyoub]
1.00/5 (1 صوت)

09-01-2014 03:24 PM
هكذا سيصبح مقال الفاتح جبرة بنهاية المدة التي حددها بلة الغايب:

شنووووو

[M. Ayyoub]

#1094353 [محموم جدا]
1.00/5 (1 صوت)

09-01-2014 09:29 AM
أقترح على الملك جيرميا هيتون ملك مملكة شمال السودان أن يدخل على المعلومات بيدي ناسا لمعرفة الموارد الطبيعية لهذه المملكة التي لا اشك أن الذهب أحدها و عليه بعد المسح الطبوغرافي الحقيقي للمناطق كافة في المملكة و تحديد حجم الثروة المعدنية أن يتقدم للبنك الدولي بالموافقة على القروض الموازية و الى وزارة المالية الامريكية باعطائه المنح الموازية لما تهبه لمصر و اسرائيل كما يطالب اسرائيل بتغطية المملكة بالدروع الصاروخية و أن يفتح باب اللجوء السياسي للمواطنين السودانيين و يبني ليه مساجد و كنتونات و أن يعمل سبايل كثيرة و يمدد مواسير مياه من بحيرة ناصر و مطار و شركة طيران شمسودانير و يمدد شارع ظلط عابر يصل بالخط العابر بين مصر و السودان و مملكة شمال السودان و أتقدم لملأ وظيفة مستشار العائلة المالكة للتخطيط و العلاقات الخارجية و كدا تعال بالشوف و النظر زحزحني يا وزير يا دفاع ...

[محموم جدا]

#1094342 [أبو مصطفى]
1.00/5 (1 صوت)

09-01-2014 09:23 AM
هو الخواجة ده عبيط وأهبل ساكت أول ما حيبقى رئيس ويجى فى زيارة لجمهورية وسط السودان الجماعة ديل يخلوهو يبيع دولتو جرى ويقول يا فكيك.

[أبو مصطفى]

#1094210 [Nubawi]
1.00/5 (1 صوت)

09-01-2014 04:32 AM
do you know king Germia Huntton has made me the prime minster .of north sudan Kingdom.
the door is open for citizenship.all are welcomed except the NCP members with their families.

[Nubawi]

ردود على Nubawi
Japan [yousif] 09-01-2014 01:23 PM
Give me space
NCP member AND Their Families
All are WELCOME


#1094139 [saif]
1.00/5 (1 صوت)

09-01-2014 12:13 AM
لو ماالخواجة دة مشى هناك واعلن المملكة انت كنت حاتعرفها كيف؟ قراااااااااااااااااااااااااااااى سااااااااااااااااااااااااى ياجبرة مايشيلا هو انتو جايبين خبر حاجة ؟؟ غير الشمارات يابطة

[saif]

#1094084 [الحقاني]
1.00/5 (1 صوت)

08-31-2014 10:48 PM
بير طويل اوطويله تتبع تاريخيا للعبابدة (عرب القبله) والحقت بمصر رقم وقوعها جنوب خط22 ش اما ابورماد وشلاتين في ملك للبشارين لذا فتتبع للوطن (المسمى جورا وبهتانا السودان)
على العبابدة ات يتصدوا للخواجة لأن المنطقة منطقتهم بالاساس بغض النظر عن انتماءها لاحد الدولتين

[الحقاني]

#1094063 [عصمتووف]
1.00/5 (1 صوت)

08-31-2014 10:09 PM
عليك الله اتوسط لي يخليني اكون اول احد الرعايا واكون خدام لسمو البرنسيسة ميلي بعدين برسل ليك جميع الحبوب خاصة الضغط والسكري والحنكلو
* الحنكلوا
الحك الحلو لو بجهز ليك ي جبرا قالب حلو بااااااااااااااااااااااااارد

[عصمتووف]

#1093959 [المر]
1.00/5 (1 صوت)

08-31-2014 07:26 PM
ما تنسو يا جبرا تجيبو ليكم كم الف سريلانكي لانهم عاملونا بأدب واحترام

[المر]

#1093942 [داوودي]
1.00/5 (1 صوت)

08-31-2014 06:53 PM
يا أستاذ / جبره انتا بتقول هي منطقة (سودانية) مساحتها 2.060 كم² (أكبر من البحرين وسنغافورة معاً) تقع على الحدود السودانية المصرية!.

بس الحقيقة انها منطقة غير معترف بيها من حكومة السودان ولا مصر ، ودي الحتة اللقاها الخواجة ( السايبة وما عندها سيد ) . لانو لو اعترف بيها المصريين حيكون دا اعتراف باحتلال مثلث حلايب مننا ولو اعترفنا بيها نحنا معناتا ما لينا حق في مثلث حلايب .

[داوودي]

#1093931 [وحيد]
2.00/5 (3 صوت)

08-31-2014 06:26 PM
احتمال كبير الجماعة يكونوا باعوها ليهو.. اصلهم ضعاف قدام الدولار و الامريكان .... قوة العين دي الا صاحب حق

[وحيد]

#1093926 [kalifa ahmed]
3.00/5 (6 صوت)

08-31-2014 06:19 PM
أنا ح أقدم من أسع للجنسية الشمال سودانية..... من الدبة وندقش الخلا 6 ساعات بكون في المملكة والحمد لله جنسيتي ح تكون بالميلاد وملكي هيتون واميرتي إميلي ونتفكا من ناس حاج ساطور وسعاد الفاتح وهلم جرا من مرض .... والراجل ود مقنعة يجيناهناك قسما نرشو ليك بالبدون طيار زي الما حصلت حاجة !!!!!!!

[kalifa ahmed]

#1093905 [ali]
1.00/5 (1 صوت)

08-31-2014 05:30 PM
هى بقت على الخواجة ماالدنيا جايطة شويتين لمصر وحبتين لاثيوبيا والدنيا ماشة والناس مشغولة فى السفسفة خليهو يكون دولته عشان نطلب اللجؤ عنده ويمكن بنته الاميرة تحب ولدى ونعمله زوج الاميرة وبعدين يعمل انقلاب ونخلص

[ali]

#1093902 [Moss Side]
1.00/5 (1 صوت)

08-31-2014 05:27 PM
يظهر انو خلاص مشاكل السودان كلها اتحلت
السودانيين كلهم حينزحو لي مملكة شمال السودان ويخلو البلد فاضيه
اله كريم على عبادو

[Moss Side]

#1093875 [كاره الكيزان محب السودان]
1.00/5 (1 صوت)

08-31-2014 04:38 PM
يا زول هو الكيزان بكون قبضوا حقهم من الخواجة بول جمل

[كاره الكيزان محب السودان]

#1093846 [النيل أبونا والجنس سودانى]
2.38/5 (4 صوت)

08-31-2014 04:08 PM
الإعلام المصرى دائما يتحدث عن ملكية حلايب لمصرعكس الإعلام السودانى الذى ظل صامت. أما عن مملكة شمال السودان والأميرة إميلي فى منطقة بيرطويل لم يتحدث الإعلام المصرى عنها إطلاقا .
الأخ الفاتح جبرا أنت وبعض الكتاب السودانيين الذين كتبوا بخصوص بيرطويل وقعتوا فى الفخ المصرى وهم منتظرين منكم إقناع الشعب السودانى وحكومة الكيزان العره بحق ملكية بيرطويل للسودان ولأنها تقع داخل العمق السودانى بالرغم من بيرطويل تتبع لمصر. وبعدها ضياع مثلث حلايب السودانى أيضا بفهم أنه يقع داخل العمق المصرى .
الأخ الفاتح جبرا حاول أن تنظر الى خريطة السودان بدقة و راجع منطقة بيرطويل أين تقع ومثلث حلايب أين يقع .لامكان للسخرية فى هذا الأمر وكلام بختنا ح يكون عندنا نشيدين جمهوريين هذا الكلام لايجب أن يقال.
لدينا الوثائق التى تثبت تبعية مثلث حلايب للسودان. لابد من إسقاط حكومة عصابة المؤتمر اللاوطنى وبعدها إرجاع حلايب والفشقة مع الحدود الأثيوبية .

[النيل أبونا والجنس سودانى]

#1093842 [ودالباشا]
1.00/5 (1 صوت)

08-31-2014 03:57 PM
بالله كلم جلالة الملك هيتون يضم لمملكته بقية البلد احسن من تضيع يكون ما قصر .بعدين عنوانك معناه انت وصلت الاااااخر

[ودالباشا]

#1093840 [انقاذى فاسد ومكابر ولايختشى]
3.00/5 (2 صوت)

08-31-2014 03:56 PM
لقد سالت ريالة بنى كوز حتى ابتلت لحاهم القذرة ولا اشك فى انهم يتقاتلون فى هذا الصيد الثمين الذى سيحلب لهم اوراقا خضراء يفعلون كل شئ للظفر بها وباى وسيلة.
ولهم وله(من ولهان) وحب شديد لعنوان مقالتك

[انقاذى فاسد ومكابر ولايختشى]

#1093835 [حكم]
3.00/5 (2 صوت)

08-31-2014 03:47 PM
الخطة كالآتى
اول ما يعترفوا بيهو بانه ملك لدولة مستقلة
يجوا كم فلسطينى يحتلوا البلد عنوة قبل ما يعمل ليهو جيش
عشان لما الأمم المتحدة تقوم وتقعد وتقول دا تعدى على دولة ذات سيادة
اها الفلسطينين يلعبوها صاح فى المساومة
.
.
.
.
.
.
.
.
.
.
.
كان معاكم الكاميرا الخفية

[حكم]

#1093830 [عبد الله]
3.00/5 (3 صوت)

08-31-2014 03:46 PM
سجلنى عندك اول مهاجر لدولتك الجديدة وكمان ممكن اشتغل ليك جاسوس للسودان الاوسط

[عبد الله]

ردود على عبد الله
Saudi Arabia [شموس البلد] 08-31-2014 10:12 PM
والله ضحكتني,, شكرا ليك..


#1093812 [ماشي كويس]
1.00/5 (1 صوت)

08-31-2014 03:22 PM
ماشي كويس يا استاذ , المرة الجاية قول بسم الله و افتح موضوع حلايب ولن يصيبك إلا ما كتب الله لك ..

[ماشي كويس]

#1093811 [محمد احمد]
1.00/5 (1 صوت)

08-31-2014 03:22 PM
انا من منطقة الملك هيتون واذا اقام مملكته بطريقة امريكية سوف أكون اول رعايا هذه المملكة الوليدة
أقل شئ يا جبرا ما حيكون في ظلم وأكل اموال الشعب بالباطل ولا جهاز أمن اقوي من الرئيس نفسه
واقل ما يوصف به دولتنا الوليدة انو ما فيها امطار وبالتالي لا توجد مستنقعات وبرك وبعوض وذباب وما تصحبهم هذه الايام من امراض
وكمان نكون اتخلصنا من دولة الكيزان الما بيخافو الله
سير سير يا هيتون ونحن رعايا في مملكة شمال السودان ( المملكة النوبية الجديدة)

[محمد احمد]

#1093776 [فارس عبدالرحمن]
1.00/5 (1 صوت)

08-31-2014 02:43 PM
بلد هامله وما عندها سيد يا ابوناجى والكيزان مشغولين باكتناز الاموال والاراضى الاستثمارية تقول لى بئر طويل دى يكونو اصلو ما سمعو بيها ولو كان المتر فيها يسوى كم دولار كانو حوشوها وسجلوها باسماء اولادهم

[فارس عبدالرحمن]

#1093769 [محمد علي]
1.00/5 (1 صوت)

08-31-2014 02:36 PM
الخواجه ولا المصاريه...... ما عند جواله يا جبره او ابريده e عشان عند ليه ولايه بواليها وشعبها بدل الصحراء

[محمد علي]

#1093755 [sudani]
3.00/5 (2 صوت)

08-31-2014 02:24 PM
كده يا جبره النبي كان ما سالتو لينا موضوع المطار حيعمل فيهو شنو ..؟؟؟

[sudani]

#1093726 [ابو عمر]
1.00/5 (1 صوت)

08-31-2014 01:58 PM
لو الكلام ده طلع حقيقه يبقي لازم يدفع رسوم عبور النقط لمن بترولو يطلع
خواجك القريب ولا ود امك البعيد

[ابو عمر]

#1093682 [عمور]
3.00/5 (2 صوت)

08-31-2014 01:25 PM
ههههههههههههههههههههههههههههــــ والله الكلام دا مضحك ومبكي في نفس الوقت ... اللي لقاها الخواجة دا نحن أولاد البلد ما لقيناها .... كدي بقدم عنده وظيفة وزير يمكن يشيلوني

[عمور]

#1093667 [سؤال برئ]
1.00/5 (1 صوت)

08-31-2014 01:15 PM
يا مستر هيتون رأيك شنو تعين العبد لله سفير لمملكتك لدى المملكة المتحدة؟9

[سؤال برئ]

#1093661 [جنوبي]
3.00/5 (4 صوت)

08-31-2014 01:13 PM
هسي ناس الحكومة بكون كللللل تفكيرم انهم كيف يدعموا المعارضين في الدولة الجديدة دي !!
سمح البقيت قاصد النشيد يا جبرا ! هجمتنا بالعنوان ده !!!

[جنوبي]

#1093643 [ود اللحوين]
3.00/5 (3 صوت)

08-31-2014 12:58 PM
انا موافق ان انضم بمحض اراتي وكامل قوي العقليه الى ملك مملكة شمال السودان واكون ضمن الخدم والعبيد

علي اقل شى نعيش ماتبقى من العمر فى الحريه وسيادتة حكم القانون مع ومولاي ملك الحريه والديمقرطيه والرفاهيه
على الاقل اسرائيل لاتضربه ومصر تحترمه وجواز سفره يدخلك اي بلد ويقولوا ليك الخواجة ولاتقدم للهجرة

[ود اللحوين]

#1093623 [وحيات الشعب السودانى]
3.00/5 (2 صوت)

08-31-2014 12:45 PM
خط هيثرو كده يكون راح شمار فى مرقة!!!

[وحيات الشعب السودانى]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة