المقالات
منوعات
الحصار بين نبوءة عمي ابراهيم ويوميات خيرو!!!
الحصار بين نبوءة عمي ابراهيم ويوميات خيرو!!!
09-02-2014 11:23 AM



ذات جمعه من صيف حار وجاف بعيد وقوع الانقاذ التامنا بمنزل الاتحادي الراحل عباس الجزولي في مناسبة (عقيقه لاحد ابنائه) وكالعادة كانت الاحداث الساخنة ببلدنا سخونة صيفنا المستمر حتي الان مدار حديث الجميع وكان حاج الطيب رحمه الله صهر عباس انصاريا قحا عائدا لتوه فحكي كيف انزلوه من الطائرة لمكتب الامن فقال ( ذهبت مع الشرطي وفتحت الباب ودخلت الي مقدم يجلس امامي )
حاج الطيب:ـ السلام عليكم
المقدم وهو ينهض :ـ وعليكم السلام
حاج الطيب:ـ عندك لا تصلني انا انصاري ومهر استقلال البلد دي من دمنا لاب نخونا ولا نبيعا ولا بنتامر عليها ولا بنعمل ضدها والدايرنو بنقولو عديل بدون مدسة عندك حاجة عندي خليني الحق الطائرة وان حاولت تصلني بنموت الاتنين هنا فهمت ولا ما فهمت
المقدم :ـ فهمت شكرا ياحاج الحق طيارتك طالما انت واضح كدا
حاج الطيب:ـ الانصار كلهم واضحين كدا ما تخلقو عداوات من الفاضي مصايب البلد كتيره الله يقدركم عليها ثم قال حقيقة الولد كان متفهم لكين من الشايفو البلد حتتازم بشكل حاد وتدخل في متاهات لانو الجماعة ديل فايرين ساكت بلا عقل ما عندهم تجربه الله يستر من الجاي وهنا تدخل الاخ حسين مؤيدا الانقلاب ومسك الجلسة واعظا ومجرد ما انتهي تدخل عمنا حاج ابراهيم وهو حزب امه ومعلوم ان كل انصاري حزب امه وليس كل حزب امه انصاري وقال بفكاهته المعهوده
حاج ابراهيم :ـ ياحسين انا خايف الحكاية تبقي فصاحة ساكت بلا عمل
حسين :ـ حتشوفو هذه ثوره عمل وانتاج وشريعه
حاج ابراهيم :ـ انتو بالنفس الحار حتخلقو مشاكل في المجتمع ودا ما في صالح العمل لانو المجتمع ككل هو ماكينة العمل في اي دوله وبداياتكم دي ما مبشره بخير كدي طالع كشوفات الاحالة للمعاش الايام دي دا وحدو كافي يجهجهنا بعدين شنو مظاهراتكم ضد الناس بره والمجتمع الدولي دا ان قام علينا قيامه وربطت
حسين :نحنا امريكا واوروبا ما سائلين فيها حنعتمد علي ذاتنا في تفجير ثرواتنا
حاج ابراهيم : ما في مشكله ابقو قدر حجمكم ولا تتطاولوا تقومو تجيبولنا هوا
حسين : لا تسمع مظاهرات البطان دي ديل ساكت عشان يهيئو الناس للقادم
حاج ابراهيم : اوروبا وامريكا ما بتعرف انو دا كلام بطان انما وجه اخر للنظام
حسين : نحنا ما محتاجين للاحزاب نحنا البلد دي اصبحنا سيادا
حاج ابراهيم : والله ياحسين تقربو علينا بعلاقتنا الخارجية نسدكم سدت كلب في طاحونه ....الكلب بياكل الدقيق !!!
والان كلما اقابل حاج ابراهيم يضحك ويقول ( الجماعة رقدو رز بقو يبكو من الحصار نان زمان قلنا شنو كان حنان قالو بطان وغنو ورقصو نامن الرماد كال حماد ) تعرف يا فلان البطان مع الفنانين ديك الغنو ورقصو وهيجو الناس والطلعو مظاهرات ديل طلعو اذكياء قبضو وروقوا وورطوا الكبار والبلد وقعد يردد (تحسبو لعب شليل ترتار وقيره ) همهمت في نفسي صدقت نبوءة رجل عادي بسيط من عامة الناس يعرف معني الدولة والسياسة اكثر من نخبنا التي اضاعت البلد فعلا محنتنا محنة نخب !!!
وذات مره اقلب في اوراق قديمة من يومياتي مع خيرو صاحب المزاج وجدت حوارا طريفا كالعاده وهو في طريقه للسينما الشعبية مع (ود عماري )
ود عماري : يا خيرو الايام دي ريحتنا من اذاعة الكورة بصوت عالي سترتنا الله يسترك
خيرو : والله ياحاج الكبر حصل والحنك برد شويه وكمان الشبع يقي مجهجه مع الجماعة الشقايا ديل !!!
ود عماري : كيف قاعد تشبع
خيرو : والله مباصره الله يكون في العون
ود عماري : احسن تتوب من الجهجه دي
خيرو : تعرف ياودعماري الشبع اصلو كوته لما تكمل التوبه تقع وبعدين دا عيش يقوتنا ويقوينا للعمل طالما الزول ماسك
دربو عديل ما قاعد ياذي زول تبقي الحكاية كدا وكدي خلينا من السيرة دي اليوم سامعلي طقه الناس بتقول كان في
مظاهره الحكاية شنو !!!
ود عماري: والله كانت هيصه وكوراك ضد امريكا !!!
خيرو : قالو شنو العقاير ديل !!!
ود عماري : كلام كتير ما ليهو معني لا سبه لا سبب جن فهمت منو انو امريكا عذابا دنا
خيرو : هي يكا ان كان امريكا عذاب دنا نحنا عذابنا يبقي شنو ...احيا يا الرز الابو الطلبه...قال امريكا قال ... البودي الناس للعقرب في حجرا شنو ...والله دا عين الخطا ...وعين اصابتنا !!!
ود عماري : ما تقول كدي يا خيرو انحنا الفينا مكفينا بلاوينا متلتله !!!
خيرو : سجمنا ود الدوم كدمنا امريكا عديل كدا حسع الناس ديل لو فكرو شوية امريكا دي كيفن نصلا بعدين ما نمد كرعينا
قدر لحافنا الفنجيط لزومو شنو كدي نحل مشاكلنا في البلد .زي مشكلة الجنوب مثلا نحارب العطش في الغرب نشوف
ناس الشرق والله يا ود عماري حالتم تحنن والله لو ما تسمع صوتم تقول ما ناس والله الواحد تعد ضلوعو من بين الخرق
تعرف يا ود عماري الجماعة الامريكان لو قبلو علينا ياهو الموت عديل نحن اصلو عقاب عمر الله يدينا حسن الخاتمه
والله يستر علي الجايين عشان كدا ما عرست وما عندي جنا ياكل اضاني والله يسالني منو بلدكم دي عارفه ما عندها حال هيي يكا يضحك ويبصق السفه ويتجه نحو السينما الشعبية وهو يردد بلد وانطبلت والمفتاح عن جون وجون في امريكا يغني ويعزف مزيقا وبكلمة واحده لا يتور نفسو ولا يضيق خلقو يحرقنا حريقه ..باكر زيتنا يطلع يقولو ليك حاصرونا الناس دي جنت هسع الحاصر نفسو منو ....اكلو الدقيق دا احيا يا الكلب !!! حليل امي زمان كان لما تنصح وما يسمعو نصيحتا وتقع المصيبة تغني :
واي انا الما عندي هداي
حماري البعتو في البكوتي والشاي
ود عماري يدخل برندت الدكان وهويتمتم للقاعدين تعرفو صدق من قال (خدو الحكمة من افواه المجانين ومن عندي السكرانين ) نحن اصلنا دايرين شنو من اي زول يحكمنا غير تدبير امرنا في الحياة باخوي واخوك غايتو اولادنا المتعلمين ما عارف قرو شنو في العلم عشان يسووو فينا كدي !!! والله انا خايف كلام خيرو يبقي حقيقة ويبقي المجنون احسن من العاقل ...بلد مقلوبه!!!

[email protected]


تعليقات 1 | إهداء 0 | زيارات 852

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1095335 [محمد محمد صالح]
0.00/5 (0 صوت)

09-02-2014 11:44 AM
الجاهل يضر نفسو و بالكتير عئلته و جيرانو لكن المتعلم اضر بالبلد كلها حاضرا و مستقبلا بدون سقف زمني مرصود. رحم الله عمنا ازرق اترشح ضد الازهري في اول انتخابات، الازهري ينادي بالاتحاد مع مصر و عم ازرق يقول الانجليز ديل يقعدوا معنا تاني عشرين سنة يعلمونا كيفية الحكم و ادارة الدوله!!! الناس المتعلمين قالوا عليهو اخرق و جاهل و مجنون. اها بعد النتائج الحصلت دي ، راي المتعلمين شنو؟؟؟ خليك من الجهلاء ما في سائلم.

[محمد محمد صالح]

سيف الدين خواجة
 سيف الدين خواجة

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة