المقالات
مكتبة كتاب المقالات والأعمدة
الفاتح يوسف جبرا
غناوي اللحمة
غناوي اللحمة
09-03-2014 01:54 AM


تعد مسألة مجاراة الأغاني وتحويل كلماتها إلى (مونولوج) ساخر من ضروب الفكاهة التي ازدهرت لدينا في عقود سابقة، فأبناء جيلنا أخالهم يتذكرون جيداً الأغنية التي كان يترنم بها عميد الفن السوداني الراحل أحمد المصطفى (حياتي حياتي) التي صاغ كلماتها الشاعر الراحل مبارك عبد الوهاب والتي تقول:
حياتي حياتي
أحبك أنتِ كحبي لذاتي
أحبك أنتِ لحبك أنتِ معاني الحياة
سلكتي طريق
طريق محفوف بكلّ محب وكلّ عطوف
نبذت الضيق نزعت الخوف
وقلتي نسير .. نسير ما نقيف
وقلتي ما دام في الدنيا حبّ وعاطفة عميقة في روحنا تدب
وإيد في إيد .. وقلب جنب قلب ليه ما نسعد وليه ما نحب
الدرب السالكاهو والقلب المالكاهو هم قلبي ودربي
وحبك إياهو بطراهو وبرعاهو آه لو ترعي حبي
نحن السعادة أحبابا ونحن الموّدة طلاّبا
والجنّة الليها نتشابى باكر ندق على بابا
ندق وندق وندق .. والجنة تجيب
لأملنا نشق .. إن شاء الله قريب
وتهلل علينا في قلوبنا الحزينة بشاير السنين
بي غمرة هنانا تتشابك إيدينا يسار في يمين.

هذه الأغنية التي قام بتلحينها وأدائها (العميد) تم إفراغ كلماتها وتحويلها إلى منلوج ساخر عن (الحماة) أي (النسيبة) في ستينيات القرن الماضي وقد كان يردده أحد نجوم الفكاهة في ذلك العهد، غير أن الذاكرة لا تسعف العبدلله في تذكر اسمه (نتذكر شنووو واللا شنووو ... واللا شنووو؟)
المنلوج الذي يجاري الأغنية يقول مطلعه:
حماتي حماتي
يا أخت القرنتي
وشك انتي
محتاج لجونتي
جرى منو البعاتي.

لزوم هذه المقدمة أنه وبينما كان العبد لله يقوم بتصفح أحد المواقع الإليكترونية إذا به يقف أمام تجربة (حديثة) مماثلة قام فيها أحد (المدوناتية) على الشبكة العنكبوتية بتحويل نص شاعرنا الجميل (صلاح حاج سعيد) الذي تغنى به الفنان الرائع الراحل (مصطفى سيد أحمد) إلى منلوج يخاطب فيه حبيبته (اللحمة) التي أصبحت عصية على جيبه، تعالوا أولاً نقرأ معاً قصيدة شاعرنا صلاح حاج سعيد يخاطب حبيبته (وبعدين نشوف موضوع اللحمة) :
يقول شاعرنا الجميل:
وبقيت أغني عليك غناوي الحسرة والأسف الطويل
وعشان أجيب ليك الفرح .. رضيان مشيت للمستحيل
ومعاكي لي آخر المدى .. فتيني يا هجعة مواعيدي القبيل
بعتيني لي حضن الأسى .. وسبتيني للحزن النبيل
ومشيت معاك كل الخطاوي الممكنة وبقدر عليها وبعرفا
أوفيت وما قصرت في حقك ولا كانت عرفة غيرك أصادفا
وقدر هواك يجيبني ليك .. جمَع قلوبنا وولفها
وقتين بقيتي معايا في أعماقي في أعماق مشاعري المرهفة
لا منك إبتدت الظروف ولا بيك إنتهت الأماني المترفة
ندمان أنا ؟! .. أبداً وحاتك عمري ما عرفت الندم
ما أصلوا حال الدنيا تسرق منية في لحظة عشم
وأنا عندي ليك كان الفرح رغم إحتمالي أساك يا جرح الألم
كان خوفي منك جاي من لهفة خطاك على المواعيد الوهم
وأهو نحن في الآخر سوا باعنا الهوى ماشين على سكة عدم
… وبقيت أغني عليك غناوي الحسرة والأسف الطويل.

وها هي عزيزي القارئ القصيدة بعد أن تم تحويلها إلى منلوج ساخر يخاطب فيها الشاعر حبيبته (اللحمة):

بقيت أغني عليك غناوي الكسرة في الصحن التقيل
وعشان أجيب ليك اللحم ... رضيان من الجزار أشيل
ومعاك في آخر الشهر يا ناقصة ماهيتي القبيل
سبتيني لي حضن الغﻼ .. وبعتيني لي الجزار عديل
عديتا فيك كل القروش الممكنة وبقدر عليها وبصرفا
عديت وما قصرت في ... هجرك وﻻ صرفة غيرك عارفا
وقدر جفاك نساني ليك ... لمع جيوبنا ونضفا
وكتين بقيتي معانا في اعماق بطونا المرهفة
ﻻ منك ابتدت الصحون .. ﻻ بيك انتهت الصواني المترفة
جيعان أنا أبدا وحاتك ... عمري ما ضقت اللحم
وﻻ كرشي في يوم اتملت عايش دوام أنا في جحيم
وأنا عندي ليك كان الصحن .. باللحمة كم قالوا اتردم
وأنا خوفي من آخر الشهر يصبح وهم
أهو نحنا والراتب سوا ... طايرين هوا
ماشين على البوش السجم...

كسرة:
لو لقيت ليك كلبين بيتشاكلو في (عجورة) ما تندهش .... عاااادي!!!


تنبيه :
يوجد (واو) جديد ... (للعلم وكده) !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و


تعليقات 20 | إهداء 0 | زيارات 7295

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1097396 [عبدالحكم]
0.00/5 (0 صوت)

09-04-2014 09:19 PM
الكيزان ديل غطسوا حجرك ياجبرا.. خلي نفسك كبيرة وابعد منهم ولا تخشى شئ وخليك ولا تكن ود ريف لان الارزاق بيد الله وخلينا من المسرحيات هذه.. مع الشكر الجزيل..

[عبدالحكم]

#1096519 [ود الهادي]
0.00/5 (0 صوت)

09-03-2014 04:55 PM
بقيت ما عندك حاجة وتجيب مونولوجات الناس مالك؟ هل ذلك من عدم اللحم أم من كثرة الشحم؟ أين إبداعات عبدالمنتقم و قدرناه منازل وأمثالها؟

[ود الهادي]

#1096144 [عمور]
5.00/5 (1 صوت)

09-03-2014 11:11 AM
هههههههههههههههـ أضحك الله سنك يا أستاذ الفاتح جبرا


لك التحيــــــــة

[عمور]

#1096120 [الحاج]
0.00/5 (0 صوت)

09-03-2014 10:44 AM
وشك انتي

جرى منو البعاتي
غايتو المقطع دا ذكرني الكوزة سامية

[الحاج]

#1096106 [ابو الرشا]
0.00/5 (0 صوت)

09-03-2014 10:26 AM
روائع ياستاذ جبره واهو نطلع من الحاله شويه

[ابو الرشا]

#1096084 [حكايه]
5.00/5 (2 صوت)

09-03-2014 09:59 AM
حلوه قصة الكلاب يتشاكلو في العجوره لانو خايف ماحيلقو العجوره زاتا

[حكايه]

#1096083 [شفق الغيب]
0.00/5 (0 صوت)

09-03-2014 09:59 AM
قمه الإبداع جبره وهذا قدرنا مع حكومه الفسادشبعانين ناس وجيعانين ناس فى هذا البلد الاراضيه بكر

[شفق الغيب]

#1096081 [بكرة أحلا]
0.00/5 (0 صوت)

09-03-2014 09:58 AM
هذا هو زمن التحول فلا تستغرب أن تنتشر مثل هذه الاشياء في ظل تحولنا من اكل لحم الضان الي للحم القعونجة ومن السمك إلي الجراد ومن البيزا الي الكسرة

[بكرة أحلا]

#1096077 [عبدالحفيظ]
0.00/5 (0 صوت)

09-03-2014 09:53 AM
.


وﻻ كرشي في يوم اتملت عايش دوام أنا في (القرم)

يعنى طوالى قرمان للحمة!

.

[عبدالحفيظ]

ردود على عبدالحفيظ
Saudi Arabia [الباشا] 09-04-2014 09:29 AM
غلطة مطبعية هو يقصد (جحم)ومعناها عدم أكل اللحم .... تقبل مروري


#1096075 [محمد محمد صالح]
0.00/5 (0 صوت)

09-03-2014 09:53 AM
شكرا، قليلا من الضحك لا يشرط!!!!

[محمد محمد صالح]

#1096069 [الحلومر]
5.00/5 (1 صوت)

09-03-2014 09:48 AM
برضو ماتندهش لو لقيت الفاتح جبرا في نص الزلط مقبقب ليهو وواحد متين لابس سفارى عندو لحية وخانقوا خنقة بت كلب وبيقول ليهو قروشي شي شي قروشي هسع ناو

[الحلومر]

#1096033 [ابو السيد]
0.00/5 (0 صوت)

09-03-2014 09:17 AM
لو لقيت ليك كلبين بيتشاكلو في (عجورة) ما تندهش .... عاااادي!!!

[ابو السيد]

#1096013 [أبو محمود]
0.00/5 (0 صوت)

09-03-2014 09:06 AM
غناوي الحمة والله يا الفاتح انت قديم خلاص غني للدكوة (ذبدة الفول السوداني) ، لحمة هو دكوة ما في ؟ ولا شنو

[أبو محمود]

#1096003 [أبو محمود]
3.00/5 (2 صوت)

09-03-2014 09:00 AM
هو اخبار سودانير ذاتها شنو خليك من خط هيثرو شنو

[أبو محمود]

ردود على أبو محمود
Sudan [أبوعبودي] 09-03-2014 01:13 PM
سؤال في محله


#1095973 [ساهر]
5.00/5 (3 صوت)

09-03-2014 08:39 AM
حلوة حلوة...

********* من الغرائب التي لا تصدق أن كثير من شباب الخليج، أعادوا قراءة الشعر الحلمنتيشي السوداني الذي ساد خلال حقبة السبعينات، بعد أن تم تحميل بعض القصائد على اليوتيوب.... بالذات قصيدة (بنت هندسة) للشاعر الدكتور عمر خالد..... أيضاً أصبحت نكات الفرق المسرحية السودانية منتشرة لدى هؤلاء.... بل ويفهمونها كما يفهمون الشعر الحلمنتيشي.... محليتنا كانت ناتجة عن ضيق أو عدم وجود وسائط الانتشار اللازمة... ولم تكن في أي من يوم ناتجة عن ضعف المحتوى أو سذاجته......

******* اليوتيوب وسيلة مجانية لنشر ثقافة الشعوب... فانشروا ثقافتكم وجيد بضاعتكم عبره يا راعاكم الله.....

[ساهر]

#1095948 [مندهششششششش]
0.00/5 (0 صوت)

09-03-2014 08:23 AM
لو لقيت ليك كلبين بيتشاكلو في (عجورة) ما تندهش .... عاااادي!!!

ههههههههههههه , رائع يا استاذ



اللهم ارحم مصطفى و اجعل مثواه الجنة ..

[مندهششششششش]

#1095908 [صالح عام]
5.00/5 (1 صوت)

09-03-2014 07:48 AM
يا جبره صاحب منلوج حماتى حماتى هو المرحوم ( بلبل ) انت زول عجوز تحياتى لك والى القريه 22

[صالح عام]

#1095887 [قول يا لطيف]
0.00/5 (0 صوت)

09-03-2014 07:24 AM
أعتقد أن المنلوجست هو المرحوم بلبل ويقول في المنلوج:
حماتي حماتي .... يا شبه القرنتي ....مسخت حياتي
ووجهك أنت .... دايرلو جونتي .... جرى منو البعاتي

[قول يا لطيف]

#1095881 [ابو الطماير]
0.00/5 (0 صوت)

09-03-2014 07:15 AM
صدقني يا استاذ جبرا واواتك عن خط هيثرو حتستمر الي ان يرث الله الارض وما عليها اذا استمرت هذه الحكومه ومشكلتك سوف تكون في space الذي سوف تكتب في لانو بعد شويه حتلقي كل الراكوبه امتلات ووات ولم تترك مكان لكتاب اخرين عشان كده اقترعليك ان تستخدم الضرب بدل الجمع في عدد الووات يعني يد ماتكتب ووووو عشره مرات مثلا اكتب 10 ووات

[ابو الطماير]

#1095842 [سمكرجي]
5.00/5 (5 صوت)

09-03-2014 04:04 AM
روعة .. و كان تكون أحلي لو قلت : عايش دوام أنا في ( وحم ) .. بدل ( جحيم ) .

[سمكرجي]

ردود على سمكرجي
United Arab Emirates [حسن شاش] 09-03-2014 02:02 PM
من السياق أظن الياء زائدة في كلمة (جحيم) وهي غلطة مطبعية لأنها تخل بوزنة البيت، أظن الشاعر يقصد (جحم) ومنها جحمان وقرمان وعرمان لتوصيف حالات التوقان النفسي لأشياء متعددة

Saudi Arabia [الحاوي النقراوي] 09-03-2014 09:51 AM
ما تخليها ( عايش دوام انا في قرم ) وبعديها تجرها قرررررررمان انا

Saudi Arabia [خالد فارس] 09-03-2014 09:25 AM
اطلب من كل القراء نخلي المنلوج هذا زي حلة العزابة كل واحد يدية كوز ويدخل فية حكومة السجم خلت اللحم عندنا (زي تمر الفكي شايلو ومشتهيه) بلد تنتج ملايين من الثروة الحيوانية ويشتهو اللحمةونبداء بالسمكرجي طالما عدل وبداء يسمكر في المنلوج (بدل الجحيم خلها الوحم


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة