الشبكة طاشة
09-11-2014 05:58 PM

عندما كانت الخدمة المدنية خدمة مدنية لم يكن باستطاعة أي موظف أن يقوم بمطالعة الجريدة أثناء ساعات العمل الرسمية، ولو حصل وقام رئيسه بضبطه بالثابتة (قيامتو قامت)، وأقل ما يمكن أن يتعرض له هو التوبيخ ومحاضرة في الانضباط، وإنو الوقت للعمل مش لقراية الجرائد.
وجاء عصر الهاتف النقال (الموبايل) والذي تحول بفعل شركات البرامجيات إلى جهاز حاسب آلي مصغّر يحمل كل البرامج، وعلى رأسها برامج التواصل الاجتماعي ذات الإمكانات التقنية الهائلة الشيء الذي جعل استخدام الهاتف النقال (الموبايل) متفشياً من قبل الموظفين في أروقة الدوائر الحكومية في كل قطاعتها، حيث أصبح غالبية الموظفين العاملين في تلك القطاعات لا يستطيعون الاستغناء عنه.
تمشي شباك أي مكتب تلاقي الموظف أو الموظفة ماسك الموبايل و(السبابة) شغالة طالعة ونازلة تمسح بالطول والعرض على شاشة الموبايل، هذا (المنظر) غير المسؤول ربما عايشه كلاً منّا حين اضطرته الظروف إلى الذهاب إلى مصلحة حكومية أو مؤسسة ما، ما أن تطلب من الموظف النظر في أوراق معينة لإنهائها، حتى يأتيك الرد بكلمتين «دقيقة بس»، هذا الرد الذي يشير إلى انشغاله، لكن الطامة الكبرى حين يكون صاحبنا مستغرقاً في الحديث مع شخص آخر عبر الموبايل في أمر لا علاقة له بطبيعة العمل المكلف به!.
وتكون مشكلتك مشكلة إذا كان سبب الانشغال هو مطالعة خبر ما أو الرد على صديق أرسل للتو رسالة على برنامج «واتس آب» أو غيره من برامج التواصل الاجتماعي الشهيرة، أو لمتابعة آخر تقاليع الموضة عبر الإنستجرام وخلافه بالنسبة لبناتنا الموظفات.
العبد لله يعتقد أن العروض المغرية التي تقدمها الشركات المختلفة سواء في ما يتعلق بالدقائق المجانية أو غيرها من الخدمات تعد واحدة من أسباب تنامي هذه الظاهرة، بالإضافة إلى (البطالة المقنعة) التي تعاني منها مكاتبنا حيث يتكدس عدد كبير من الموظفين في مكتب واحد؛ لأداء مهمة يمكن أن يقوم بها موظف واحد، و(طبعن) علاوة على التسيب وعدم المراقبه من قبل رؤساء المكاتب.
في كل البلاد المتقدمة نجد أن الوقت للعمل فقط، وهنالك ساعة للراحة، وتناول الطعام، يمكن للشخص أن يتحدث خلالها مع من يشاء، ولكن عندنا (الموضوع مختلف)، فالموظف عندنا يا (في الفطور)، يا (في الصلاة)، يا (مع الموبايل)، وفي غير هذه الأوقات (فالشبكة طاشة وكده)!.
من المؤكد أن وجود الموبايل مع الشخص في مكان العمل أمر مهم فربما كان هنالك شيئ طارئ أو رسالة مهمة يجب أن تبلغ له كمرض شخص، أو تعرضه إلى حادث، وما إلى ذلك، ولكن بالمقابل يجب أن لا يساء استخدام هذا الجهاز بهذا الشكل الذي نراه الآن في المؤسسات والدوائر الحكومية.
مناسبة هذا المقال أن للعبد لله مراجعة بإحدى (الدوائر) لدى إحدى الموظفات التي كانت منهمكة تماماً في الحديث مع صديقتها:

- دي طريقة قديمة يا (سلمى) والله أوريكي ماسك يبيض ليكي بشرتك في دقيقة.
- ...................................................................................
- شفتي تجيبي ليكي معلقة بودرة جونسون
- ..................................................................................
- آآيا بدرة جونسون بتاعت الأطفال الواااحدة دي.
- .................................................................................
- وتجيبي معاها معلقة موية ورد ومعلقة لبن ومعلقة دقيق أبيض ونص ليمونة وتخلطيهم وتمسحيهم في وشك.. وبعد 20 دقيقة تشطفيهم بي موية دافية.
- ..............................................................................
-
- خيار شنووو.. والله ده عملتو حنان جارتنا لمن أنا ما عرفتها.
- .............................................................................................
- إنتي بس أعملي الماسك القلتو ليك ده وقولي (حفية قالت).
وبعد أن انتهت (الست حفية) من برنامج (أناقتك يا سيدتي) وانتبهت لوجودي قامت بوضع الموبايل على المكتب وهي تبتسم قائلة:
- الشبكة طاشة يا أستاذ!!.


كسرة:

نحنا ذااااتنا شبكتنا طشت!!.


كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و+و
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و+و
مصحح مجاهد


تعليقات 14 | إهداء 0 | زيارات 5113

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1112214 [سوداني]
0.00/5 (0 صوت)

09-22-2014 03:54 PM
والله انحنا شبكتنا وقعت عديل يا استاذ

[سوداني]

#1104636 [محمود ود احمد]
0.00/5 (0 صوت)

09-13-2014 11:33 PM
يا جبره الله يعطيك العافية نحن ناقصين تقوم تفتح لينا نار جديدة نحن ما عندنا اولاد صغار داير تدخل بودرة جونسون لينا اسع المرة دى يحلنا الله منها من قرت كلامك دا دايرة تجرب الوصغة دى يا حفية شكيناك لى الله يا الدايرة تخربى بيوتنا

[محمود ود احمد]

#1104307 [mabasadig]
0.00/5 (0 صوت)

09-13-2014 02:25 PM
وشنو لو وصفت ماسك
تفرق شنو هماك
بقس داير ضربه في قفاك
انت الفيك ما مفاك
وبرضو ديمة تقول كاك
اسمع جبرا
تنس ولا تطري
احسن يزم تتزرة
ونفتش حل بالمرة
وماتلقاه بالعشرة
انت يامسكسن ما فاهم تب
تسأل من شق لضب
ما هيثرو بلعوه جب
وانت تلهت ما بتتعب
كثرت الكسرات وافاولات
وانت تزيد في الواوات الضكرات
ما كويسه معاك تملا الصفحات
ونحنا نقرأ في الرايحات
ياخ ما تنسى واقرع الفاضلات

[mabasadig]

#1103947 [Haj Ahmed]
0.00/5 (0 صوت)

09-13-2014 01:47 AM
كورتك فكت ياجبرا. شايفك رجعت الدفاع ليك فترة، أهو بتشتت كويس.

[Haj Ahmed]

#1103553 [الههم اجعل كلامو خفيف علينا!!!!]
0.00/5 (0 صوت)

09-12-2014 01:24 PM
جبرة ماتطشش لينا شبكتنا معاك!اسه الولية تصدق القصة وتقع في لبن الشفع ودقيق القراصة جليط!!!ونحنه ماناقصين!!!بتاع اللبن !!!شغال ابي الدولار اسه اربعة ونص لو زدنا رطل للجليط الميزانية المقدودة بتفرقع!!! قول زيدي طين بحر حليهو بي موية بلاعة اي هزار مابخسر!!!!!!!!!!!

[الههم اجعل كلامو خفيف علينا!!!!]

#1103552 [ظريفة!!]
4.00/5 (1 صوت)

09-12-2014 01:19 PM
خلينا في المهم المكياج ده نعملوا !!!!!!!!!!

[ظريفة!!]

#1103405 [لورى سفنجة]
0.00/5 (0 صوت)

09-12-2014 08:45 AM
هى الشبكة بطش من هين مامن نوع الكلام الزى الكاتبو انت ده هو البطششها عفيت منها البت بتاعة بدرة الجنسون ماخاطية عليك

مقالاتك زاتهابقت محتاجة خلطات بدرة جماكسين

[لورى سفنجة]

#1103404 [لورى سفنجة]
0.00/5 (0 صوت)

09-12-2014 08:43 AM
هى الشبكة بطش من هين مامن نوع الكلام الزى الكاتبو انت ده هو البطششها عفيت منها البت بتاعة بدرة الجنسون ماخاطية عليك

مقالاتك زاتهابقت محتاجة خلطات بدرة جماكسين

[لورى سفنجة]

#1103403 [ام احمد]
0.00/5 (0 صوت)

09-12-2014 08:35 AM
جبرا ماتجى تارى فى الحريم الله يرحمك خليك فى الكيزان

[ام احمد]

#1103298 [عزو مستريح]
5.00/5 (2 صوت)

09-12-2014 12:09 AM
شكراً جبرة,,,, لأول مرة نجد كاتب ينصف مصحح بإظهار اسمه,,, حيث ورد في نهاية العمود (مصحح مجاهد) تحية لمجاهد دا.

[عزو مستريح]

#1103272 [sami]
1.00/5 (1 صوت)

09-11-2014 11:11 PM
يا أستاذ جبرا انت قايل الناس دي عندها قنابير!!!
انت تتزاوغ وتتهرب من المواضيع التي تمس النظام وتفضحه وهي كثيرة لا تحصى ولا تعد ولكنك تتجنبها رهـبة ورغـبة (خوفا وطمعا) وهذا لا يحتاج تفسير لشخص مثلك..
كنت اداوم على قراءة مقالاتك قبل اكتشاف هذه اللعبة التي تمارسها في حقنا!!
نسأل الله الهداية لنا وللجميع..

[sami]

#1103164 [ودالباشا]
3.00/5 (1 صوت)

09-11-2014 08:09 PM
طيب كويس يا استاذ جبر ده معناه الناس عايشه فى بحبوح مادام يجلطوا الاكل فى وشهنانا عارف مزعلك موضوع الشبكة طاشه وضياع الزمن الذى وفق كتير

[ودالباشا]

#1103138 [موظفة]
4.50/5 (2 صوت)

09-11-2014 07:22 PM
شكرا يا استاذاستفدت من مقالك وكتبت الخلطة

[موظفة]

ردود على موظفة
[عباس سيد الدكان] 09-11-2014 10:30 PM
يا استاذة عواطف ( موظقة ) آهن من باكر مافي جرورة . كل يوم جاياني زبادي جرورة سكر جرورة وبتفولي لي اولادي عايزين الفطور اتاريك بتجلبطيهم في وشك .. خلي بتاع هيثرو ده يديكي بدرة جونسون .


#1103134 [وراق احمد]
4.00/5 (2 صوت)

09-11-2014 07:11 PM
نسال الله ان يغير الحال وتنصلح البلاد ويبقي سودانا فووووووووق تقدم وحضارة وانضباط وتعود ايام زمان زمن المحنة والمحبة والسلام ترجع الالفة القديمة ويذهب الشقي والعذاب ترجع لينا السكة حديد وسودانير في كل مكان بس ياريت نتناسي الفات لا ثورية ولا انقاذ لا قبلية ولا احزاب وتعود دارفور بلد القران والخرطوم للكل امان ويبقي العدل لينا شعااار وربنا قادر يا اخوان يحي النفس وهي عظام وعليكم السلام.

[وراق احمد]

ردود على وراق احمد
Sudan [وراق احمد] 09-12-2014 07:15 AM
اكيد عامة

United Arab Emirates [amir] 09-11-2014 10:11 PM
كلمة اخوان في السطر الاخير دي ما في ليها داعي غيره بيا سودان او اي كلمة اخرى عشان الكلمة دي بقت مقرفة انا بقيت اقول شقيقي واشقائي بدلا عن السابقة ولك الود

Sudan [حاج ابكر] 09-11-2014 10:09 PM
يا وراق (يااخوان) دى عامه ولا خاصه الله يهديك ما تطشش شبكتنا


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة