المقالات
مكتبة كتاب المقالات والأعمدة
شوقي بدري
مصطفي عثمان شحادين .... اكان انت نسيت انا متذكر
مصطفي عثمان شحادين .... اكان انت نسيت انا متذكر
09-14-2014 09:28 PM


في يوم الاحد 12 ديسمبر سنة 1994 حضرت ومعك وفد الي اجتماع بالجالية السودانية في كوبنهاجن . متذكر ؟ ولقد دعاني السفير الفريق محمد احمد زين العابدين . وكان معك رجل امن متجهم اسمه علي ، والاخت اقنس دوني لوكودو وهي والي بحر الجبل و جوبا . وابنة خال اخي عيسي سولي من الباريا وانجلو بيدا من الزاندي نائب رئيس المجلس الوطني او البرلمان . والسيد بدر الدين مدير شركة كوبتريد الحكومية التي ابتلعها الكيزان ، وفواد عبد المنعم رجل اعمال ورئيس لجنة الحي الشعبية في الخرطوم اتنين ومش العباسية . وحضر الندوة كثير من اعضاء الجالية السودانيه .
لقد طلبتم منا ان نعطي المجتمع الاسكندنافي فكرة جيدة عن السودان وان نحثهم على الاستثمار في السودان . ولقد قلت لكم ان الاسكندنافيين ليسوا باغبياء . وان لكم اسوأ سجل في اختراق حقوق الانسان . وان علاقاتكم سيئة مع كل دول الجوار . وردك كان انه يوجد تعذيب وسجون للمعارضين . ولكنكم احسن حالا من الدول المجاورة . وردي كان ، انكم كمن يقول ,, انا بدق مرتي بالكف والشلوت لكن جاري بدق بالعكاز ,, ولماذا نقارن انفسنا بالسيئين ؟
وتدخل احد المبعوثين وهو كوز كامل الدسم وايد سياسة التعذيب واستشهد بالآية الكريم ,, واغلظ عليهم .... الخ ,, ووافقت انت . متذكر ؟؟؟
بخصوص علاقاتكم السيئة بدول الجوار قلت انت بخشمك الكان بياكل الكابيدا ويمكن الكافيار دلوكت . ان علاقتكم بمصر متردية بسب تغول مصر علي حلايب . وان تلك الجريمة مسئول عنها النميري ووصفته بأسوا النعوت . وقلت ان نميري هو من اعطي مصر عشر محطات في حلايب بدعوي حماية السد العالي من هجوم اسرائيلس من الجنوب . وقلت انكم لن تتركوا مصر . وان عندكم سفير جنوبي في هولندة متخصص في القانون الدولي . ولقد فرغتوه لقضية حلايب . وتوعدت مصر . واليوم انت مع مصر سمنه ومديدة تمر. ورئيسك بمشي مصر يقعدوه تحت خرطة مصر و حلايب مقطوعة . والبشير بيكون قاعد ذي الافندي في الانداية . خايف ومنطط عويناته .
شايفك امبارح بتتكلم عن حلايب وجاري واطي وعملتها مسح جوخ وبلبصة للمصريين . اقل حاجة ابقو رجال وسجلوا بلاغ في تمنة الامم المتحدة . زمان قلنا للمصريين اعتبرونا اخوان ابونا ترك عزبة وانتم الاخ الاكبر العاوز يشيل العزبة والتركتر والجاموسة ودماسة الفول والزير وبلاص العسل وكنتوش المش . وده مابيبقي . انت نسيت يا دكتور ولا شنو ؟
قلت لنا ان مصر تكذب وانكم لم تدربوا اي اصولي واحد في السودان . ما بن لادن وجماعته ديل كان ببيضوا حلل في سوق امدرمان . وكارلوس كان بيعبي الضل في القزاز . والرسلتوهم اديس اببا لقتل مبارك جو من الراهبات ولا اليونتي اسكول . وتهديدك لي مصر كان قبل شهور من مؤامرة اغتيال مبارك . وكل زول تنصل . والاولاد المساكين صفيتوهم ذي السورج في الحيسونة .
لقد قلت ان علاقتكم سيئة مع السعودية وامريكا هو بسبب موقفكم من حرب الخليج . طيب ليه تدخلوا نفسكم في حرب الخليج وحتستفيدوا شنوا من ضم الكويت للعراق ؟؟ والكويت كانت تقدس علاقتها بالسودان .لان قائد القوة السودانية قبل ركوب الطائرة ادار الطابور العسكري وامرهم قائلا صفا انتباه ارضا ظرف . وكان يقصد الظرف الذي اعطاه لهم امير الكويت لمشاركتهم في حماية الكويت من الاحتلال العراقي في الستينات . والسودانيون قالوا انهم لا يتقبلون اجرا . وكان قائد المجموعة الظابط صديق الزيبق الذي اشتهر بالامانة والانضباط . ولقد استدعته حكومة الكويت كمستشار . يا مصطفي الناس تبني سمعة رائعة للسودان . وانتم تتبولون عليها . ولا ترفضون الهدية بل تسرقون مال اليتيم .
قلت ان سبب سحب السفير الاريتري هو رفض السودان تسليم بعض المعارضين الاريتريين . انتم تدخلتم ودعمتم كل من قال انا مسلم بحق او بدون حق . وحاولتم تصدير نظامكم الاجرامي لدول الجوار والدول البعيدة . وقلت ان علاقتكم سيئة مع كينيا ويوغندة لدعمها لقرنق . الم تهدد انت شخصيا في التلفزيوم هذه الدول ؟؟ ودعمتم الكيزان المسيحيين ممثلين في جيش الرب واسكنتم زعيمهم كوني في جنوب السودان وكانت له حاشية وخدم وحماية خاصة ؟؟ ولا نسيت بسبب حمي التبن ؟؟
وقلت لنا ان علاقتكم بافريقيا الوسطي سيئة لان افريقيا الوسطي قد احتلت اراضي سودانية . طيب مصر دي احتلت حوض برسيم ؟؟ مابتدو فيهم اللحم والاراضي والسيارات للفريق القومي المصري الذي فازفي كاس الول الافريقية الانحنا من المنافسين فيه . زول يغلبك في عيتنوبة تقوم تضبح ليه . . انها المحن السودانية .
انت يا مصطفي ما قلت لينا انكم ما مقتنعين بالحكم العسكري . وان الوضع اذا استمر بتلك الطريقة فالمتوقع انقلاب مضاد او انفجار شعبي عفوي يستهدف النظام . وقلت لنا في ظرف سنتين ستجري انتخابات سميتها بحرة . وهو في انتخابات غير حرة يا مصطفي ؟ وقلت سيكون هنالك مراقبين دوليين .. وحتي بعد سنين من كلامك عملتوا انتخابات خجيتوها اكتر من سعن لبن . والجاية حتجيبوا ليها خلاط خرصانة .
وفي نفس الوقت رديت علي وقلت انكم لا تؤمنون بالتعددية الحزبية لانها تؤدي للفوضي . اسي بعد التوالي والتكافل وادونا نظرة وعيرونا لفتة . الاحزاب بقت اكتر من غنم الاشلاق .
وقلت لنا ان الاعتقالات حتنتهي وان الحرية الحقيقية هي الحرية الاقتصادية . وتدخل بدر الدين من كوبتريد وهو اقتصادي وقال . ان الحرية الاقتصادية هي عدم تدخل الدولة بين المستهلك والمنتج . وان الاخيرين سعداء ويشكرون الدولة علي هذه السياسة . ما اي موفعين يدخلوه زريبة غنم حيفرح . الناس يامصطفي بتنتخب الحكومات علشان تحميهم من تغول التجار وتكون الحامي للمستهلك . انت بدر الدين ده درس اقتصاد في سوق الطواقي ؟؟ وكمان قال ان الدولة سترفع يدها من الدعم لاي سلعة وان الاجور مفتوحة بين المخدم والاجير . وعلشان كدة وقعتوا في البلد سف وقرش .امير الحج بياخد اردبين فلوس . ووكيل وزارة المعارف تلاتة قنطار . وقال لانه بيتصدق علي المحتاجين .
عند سوالي كيف تتخلي الدولة عن التزامها بالتعليم والعلاج والبوليس والاطفائية والسجون والامن ؟؟ قلت لي كل شئ سيكون خاص . ماياهوا عشان كده مامون حميد واقع في المستشفيات عض وكجم . وقلت لنا ان الدولة ستعيش علي الجمارك والضرائب . وهذا يحدث في كل العالم . نعم يحدث ولكن العائد للشعب . وبقيتوا تاخدوا رسوم لعيادة المريض ووداع المسافر . وفي محلية اخدت جبايات علي ازيار السبيل . وبما انه السبيل عائده حسنات فمفروض صاحب السبيل يديهم دعاوي وفواتح .
تتزكر يا مصطفي لانه انا ما بنسي انك رديت علي السودان كا بيتلقي 800 مليون دولار مساعدات وانكم بتتلقوا 30 مليون فقط . ده ياربي من شنوا . يكون ياربي لانكم غنيتوا وبقيتوا اغني من الترويج الما عاوزة تستخرج نفطها لانهم ما محتاجين . وما عاوزين يسرقوا من الاجيال القادمة . انتو سرقتوا الاجيال الحاضرة والجاية والاتخارجت . الآثار طلعتوها حراج . راح نبيع راح نكسب . ابن حلال يفتح الباب . دلالة بي جرس . انت متزكر ولا عنك شيزوفرينيا ام برد ؟؟
قلت لنا ان الشعب يعاني والمعيشة صعبة . وقلت انكن تطبقون النظرية الصينية في الاعتماد علي النفس . بالمناسبة الصينيين ديل اسألني منهم . ديل شيوعيين . وانتم قلتوا جيتوا تطبقوا كتاب الله . ديل ولا حتي من اهل الكتاب . ديل اهل الكلاب بيضربوا الكلاب مرارة نيفة وكمونية .
ردا علي الحرية الدينية وفصل الدين عن الدوله ، واضطهاد الاقباط والتضييق عليهم رديت علينا بطريقة مراوغة شيخك السابق حسن ابليس . وقلت ان الشريعة لا تطبق في الجنوب وان هنالك حرية دينية بدليل وجود اثنين من الجنوبين في الوفد .
وحول ايقاف الحرب في الجنوب والجيش الذي يدفع له من دم وعرق الشعب المسكين ، قلت ان هذه مهمة الجيس وتريدون فرض سلطة الدولة . طيب هرستوا كل البلد عشرين سنة . ما كان تتوصولوا للفدرالية او الكونفدرالية الطالب بيها قرنق وترتاحوا وتريحوا .
قلت لنا ان النمو الاقتصادي بلغ 13 % وان انتاج الحبوب قفذ من 800 الف طن الي 3 مليون وسيصل سريعا الي 7 مليون طن . تقدر تقول لي كم هو الانتاج الآن ؟ اظني بقي ريكة وملوتين . وقلت ان السلع الاستهلاكية متوفرة حتي في الجنوب . ولكن الناس بقت غير مرشدة في استهلاك الدقيق والسكر . وقلت ان شوال اعيش نزل من 35 الف جنيه الي 8 الف في جوبا . تمانية الف دي اليوم ما بتجيب صحن فول مظبط .
وقلت لنا انكم تدفعون اقساط ديونكم للصندوق والبنك العالمي ، بالرغم من انها ديون متراكمة منذ ايام نميري . الغريبة كل حاجة لبستوها لنميري وقلتم عنه اكثر من ما قال سيد الكوارع في موظف الصحة . وبعدين جبتوه السودان معزز مكرم . وسجل ليكم احسن لعيبة مايو .
استنتاجاتي كانت ان الوفد اتي للتسول ومد القرعة لحكومة الدنمارك . ولاستقطاب رؤوس اموال دنماركية . ووقتها عضتكم تسعر . ولكن الدنماركيين ما هببوا ليكم . ولهاذا قمتم بمسرحية الرسومات المسيئة الي الرسول صلي الله عليه وسلم . ولقد جبتم البلاد الاوربية ذي سيد الرايحة بدون فائدة . .
انطباعي كان ان فؤاد عبد المنعم هو الذي يمول الوفد لانه وكيل لبعض الشركات الدنماركية احداها الشركة العالمية قروند فورش التي تنتج المضخات الغاطسة . والدنمارك كانت تتبرع للسودان ببناء حفائر وبناء سدود صغيرة وحفر ابار .... الخ وعندما تشتري الحكومة الدنماركية للسودان عداد فؤاد بيرمي . ولهذا انضم لكم ناس دعوني اعيش واللابش الريش .
الوفد احضر الجنوبيين كواجهة . وكانوا يبحثون عن اي مكاسب . وكان الوفد مكون بطريقة غربية بدل جميلة وبدون دقون . وكنت يا مصطفي في منتهي التهذيب . وعندما اراد علي رجل الامن وآخرون ان يتدخلوا لحسمي ، كنت تقول لهم ,, خلو شوقي يتكلم ,, ولم اكن اعرف انك تعرفني . ولكن عرفت فيما بعد انك كنت في اتصال بي في الثمانينات .
بعد الندوة اراد مدير كوبتريد بدر الدين وفؤاد عبد المنعم حملي للتعاون التجاري معهم . واعتذرت لهم لان التعامل مع نظام الانقاذ يعتبر من المحرمات بالنسبة لنا . وقبلها بمدة اتصل بي السيد مجدي حسين يوم 12 اكتوبر 1994 من لندن بخصوص التعاون في الخشب السويدي والذي يحتاج لمتابعة لصيقة . وعندما سالته عن صلته بالجبهة انكر . انتو يا مصطفي ما بترمشوا . تكذبوا بكل بساطة . لانه عندما طلبت من دكتور خالد الكد طيب الله ثراه التأكد من الشركة وجدهم في استرلينق هاوس الفاخر . الشركة اسمها اسبيك قلف وحجم تداولها التجاري كان 65 مليون استرلينني , ويقول لي ما كيزان . وقال لي خالد الكد انهم كيزان بي شهادة .وبالرغم من كدة انتو ما ممكن تصدقوا انه المال ده ما ممكن يشتري كل الناس . وانتو الكيزان تطلعوا من الشعبي تدخلوا الوطني ذي ايد الفندك . بكل سهولة . بس مين يدفع اكتر .
كركاسة
بعد ندوه كوبنهاجن ذهب السفير والفريق محمد احمد زين العابدين الي السودان وعندما عاد الي السويد اتصل بي . وطبعا انت تعرف ان محمد رحمة الله عليه كان رئيس البشير والزبير . وعندما قرروا طرد البشير من الجيش بتهمة الانتماء للكيزان . قام محمد بالتحقيق مع البشير الذي اقسم بكل مقدس بانه لا صلة له بالاخوان . وصدق محمد وقام بحمايته ورفض طرده . واكتفي بنقله الي بانتيو . ولهذا كانت مكافئة محمد سفارة السويد لاطول من الفترة المقررة .
محمد كان يقول لي ان البشير يشكي لطوب الارض وانه والجيش يريدون الحوار والسلام ولكن الكيزان يرفضون .وان بعض المتشنجين يرفضون التفاوض بغير السلاح . وان القذافي بتاثير من مصر قد اوقف مساعدتهم . وانه صار يدعم قرنق . وان ايران لا تدعهم الا بالسلاح وتطلب الدفع مباشرة . الكلام ده يا مصطفي ما يزكرك بالحاصل اليوم ؟؟


شوقي بدري
[email protected]


تعليقات 26 | إهداء 1 | زيارات 5718

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1290836 [louis]
0.00/5 (0 صوت)

06-22-2015 08:01 PM
أنت في أي نوع من الصعوبات المالية؟ هل تحتاج إلى قرض لمسح الديون الخاصة بك؟ انت ذاهب الى زيادة اموالك؟ كنت رجل الأعمال الذي يريد توسيع له / لها الشركة. يطلب منك هنا في الاتصال البطل الحقيقي والثقة والقروض فعالة الجدارة الائتمانية للشركات الإقراض. تعلمت كل من الأفراد والحكومة لتحقيق الكفاءة العالية.

وتشمل الخدمات:
* القروض الشخصية (غير المضمونة والآمنة)
* القروض التجارية (آمنة وغير المضمونة)
* تحسين المنزل
* القروض المخترع
* قروض السيارات
الخ ..

يرجى أن يعود الينا إذا كنت مهتما، من خلال [email protected]

نحن مصدقة،
جدير بالثقة وموثوق بها وفعالة وسريعة وديناميكية.
[email protected]
مع خالص التقدير،
لويس بانر

[louis]

#1107070 [ساهر]
0.00/5 (0 صوت)

09-16-2014 02:43 PM
رغم خلافي واختلافي مع العم شوقي بدري على خلفية نقده الهدام المتكرر للصادق المهدي، إلا أنني اليوم اعجبت جداً بهذه اللغة الدراجة وتقعرها التهكمي الباتر.

[ساهر]

ردود على ساهر
Sweden [shawgi badri] 09-16-2014 04:02 PM
يا ساهر الصادق المهدي مشكلته اتلما مع الكيزان ز بقي معاهم في كل مناسبةعقدوفراش ., لعبوا بيه ولسة بيلعبوا بيه . . هل سمعتني بتكلم عن الهادي المهدي كان عفيف الذيل واليد. ولده اسي كويس .
اشرح لي الصادق طرد ود عمه لانه اتفق مع الجبهة الثورية . طيب الصادق ما عمل معاهم انقاجي . الصادق عاوز يشوت كل البلنتيات . يرفع الكورنر ويحصلها ويدخلها قون .


#1106876 [سيف الله عمر فرح]
5.00/5 (2 صوت)

09-16-2014 11:55 AM
الحمدلله حمدآ كثيرآ ، الحمد لله الذى سخر لنا نعمة الصحف اللإلكترونية ، لولا هذه النعمة ، ما كنا قد عرفنا كثير من كتابنا المميزين أمثال شوقى بدرى ، وسيف الدولة حمدناالله ، على سبيل المثال لا الحصر ، وما كنا قد استمتعنا واستفدنا من كتاباتهم المفيدة .. لولا نعمة الصحف الإلكترونية كنا سنكون مجبورين على قراءة كتابات مطبلى النظام الحاكم والمنافقين ، كما نحن مجبورين على مقدمى البرامج التلفزيونية المنافقين !، 90% من البرامج التلفزيونية مسخرة للدعاية والإعلان لصالح حزب المؤتمر الوطنى ! ، وبعد هذا نرى ونسمع دكتور غندور يتحدى ويقول ، أن حزب المؤتمر الوطنى لم يأخذ مليمآ واحدآ من الدولة ! ، ونحن صدقناه ، لأن شبابنا لم يروا مليمآ مجرد رؤية خلال 25 سنة مضت ! ، دعكم من المليم ، هم لم يروا قرشآ واحدآ ، ولمعلوميتهم ، القرش كان يعادل 100 مليم ..

شكرآ أستاذ شوقى لكتاباتك المخلصة للوطن ، لك ولأمثالك احترامنا وتقديرنا .

[سيف الله عمر فرح]

#1106873 [ابو مصطفى]
3.00/5 (2 صوت)

09-16-2014 11:53 AM
والله أنا ما كنت عارف انه العراق كان عايز الكويت فى الستينات (لا كين عرفنا هسع) وأجمل مافى المقال (صفا انتباه أرضاً ظرف) حليل زمان

[ابو مصطفى]

#1106793 [شخلول]
3.38/5 (4 صوت)

09-16-2014 10:46 AM
رغم الضنك والعزاب النحنا فيه بنستمتع بمقالاتك حد الضحك.لانها صادقة ومن انسان ملم بالاحداث ونضيف اليد .اعجبتنى عبارة المرفعين كان دخلوه زريبة الغنم بفرح!!ياما الزريبة انكسرت فيها مرافعينا لابتشبع لابتنقرع

[شخلول]

#1106613 [عصام الدين خليفة كرار]
5.00/5 (1 صوت)

09-16-2014 06:18 AM
وازيدك من الشعر بيت يا استاذ شوقى عن اريتريا ففى عهد الزبير محمد صالح تم تدريب وتسليح جماعات من الكيزان الاريتريين بيد كارلوس وفى كسلا تم دعمهم بالسلاح وقال ليهم الزبير بالحرف الواحد كيف انتو مسلمين ويحكمكم مسيحى. وطبعا الاريتريين كانوا لهم بالمرصاد فبمجرد دخولهم الاراضى الاريترية تم قبضهم واعدامهم. ودى كلها بالوثائق صورة وصوت عند الحكومة الاريتريه محتفظه بها للتاريخ

[عصام الدين خليفة كرار]

#1106571 [بنت الناظر]
4.38/5 (6 صوت)

09-16-2014 02:27 AM
غايتو لو مقابل أى واحد من ثعالب الإنقاذ ديل لقينا واحد زى الأستاذ شوقى يديهم فى المليان كان حال السودان إنصلح.. ومهما كان الوجه الآخر للنميرى بهذا السوء يظل قطرة فى خضم القبح الإنقاذي..

[بنت الناظر]

#1106568 [لوممبا]
2.75/5 (4 صوت)

09-16-2014 02:15 AM
.بسم الله والصلاة والسلام على الهادى الأمين
الأستاذ/ شوقى بدرى اهل الركوبة الكرام .
أعذرونى لست بمكان القراء المواظبين على التعليق إلا فى القليل الحاقا لموضوع نميرى وما ثناه الأستاذ/ شوقى ب(الأقنان والعبيد) أراه قد حزم أمره وتلفح بخبث الحديث وماتبقى له إلا أن يبرز عضلاته المشتهر بها وتفقد سكين ذراعه وتأبط قرجته التى فى أخرها (فرول عجلة ) ومستعد لمطالعة الخلاء كما يسميها الفتية فى الحوارى .وأقول يكفينا أن تورد لنا ماعاصرته أنت ِخصصيا ولاتورد لنا ما تناقلته الألسن وقد كانت فقرة مقالك التى أوردت بها ذكر المراجع جيدة لاكن فى ما نقلته بالسماعى ذلك فيه إنة نريد أن تورد لنا ماعشته من فترة وعيك وماشاء الله هى من فترة إستقلال البلد ولست مشككا فى ما تورده عاصرته أنت شخصيا لاكن ماتناقلته لك الألسن لابد من زيادة هنا ونقصان هناك وبخصوص سودانا فيه مافيه وخاصة فى فترة المهدية وما بعدها لاكن بعد الأستقلال وما برز من كل ما تسمى بالنخب كل له نصيبه من( شخصيات وأحزاب)أما نميرى ماهو ولدكم ولد أم درمان نط فى الحكم بإيعاز(حارسنا –وردى) وأختلف مع مجموعته لإنقلابهم عليه ماهو كنه إختلافهم مازالت كثير من الأمور لم تتضح بعد وو دنوباوى والجزيرة أبا كلها أمور مازال يعتريها كثير من اللغط(دور الأخوان)(الشوعيين)1971 وبعدها كانت أتفاقية 1972 مارس ووقف الحرب وتبعتها تحرير سيناء 1973 أكتوبر ودور الجيش السودانى (الداسنها المصريين )وبعدها 1974 موضوع محاربة العطش فى كردفان وشمال دارفور (سيد خليفة-بالملايين ) و1975 (حسن حسين ) و1976 (محمد نور سعد )الجبهة والوطنية (أمة وأتحاديين وأخوان )وبعدها تصالح معهم الى دخولهم 1979 . عشرة سنوات مليئة بالأحداث الدامية ومليئة بالعمل (اتفاقية- حرب تحرير مشاريع –تعليب فواكه تجفيف ألبان- الكناف-الفاو كبرى جوبا كبرى حنتوب كبرى برى كبرى شمبات كبرى كوستى شارع بورتسودان غزل الحاج عبدالله غزل الحصاحيصا غزل كادقلى شارع كادقلى شارع مدنى سنار كوستى شارع الجبل كوستى سكر غربى سنار سكر عسلاية سكر كنانة سكر ملوط لم يكتمل لعودة الحرب البترول كل الأبار محفورة ماناقصها غير تركيب طلمبات الضخ وخط الأنابيب ...
بعد اتفاقية الصلح جميعهم الأحزاب كان لايعجبهم ماحدث من تنمية وبالذات الترابى وتنظيمه أخد عضوية الأتحاد الأشتراكى ودخل وعمل على تمكين جماعته من داخل الحكومة ودخلوا فى عصب التجارة بواسطة تمويل بنك فيصل والاموال الخيرية من بداية الثمنينات وهو كان مستشار القصر للشئون القانونية الذى أوعز لنميرى بخرق الأتفاقية بتقسيم الولايات الجنوبية (بحر الجبل البترول جونقلى المياه) وتماها بقوانين سبتمبر وتخلل ذلك إضراب السكة حديد ما السر فيه؟ إضراب القضاء ما السر؟ (الأستاذ/سيف الدولة ) هل من تفسير ؟ ما الذى أدى الى تفاقم الأمور بين نميرى وهؤلاء . من أجل ذلك الناس تدعو فى صلواتها (اللهم أرزق الحاكم البطانة الصالحة ) المثل بيقول (قل لى من تصادق أقول لك من أنت) .
نلنا الأستقلال لسنتين نوفمبر 1959 عبود حتى 1964 أكتوبر ماذا حدث ؟ إغرق حلفا الأحزاب 1966 حتى نميرى تناكفت ليعتلى هو السلطة ومن ساعده لاتسثنى أحد ولاتلميع لأحد .
أسف للأطالة مع أنى لاأجد الوقت للكتابة لاكن قارئ ومتابع عبر الموبايل ولردائة الشبكة لايمكن لى من كتابة تعليق بسهولة .
لك ودى وأحترامى وللسادة القارئات والقراء الكرام . لانريد تمجيد نريد الحقيقة ولا عبودية ولاإسترقاق ولاضغينة نميرى غاب لاكنه حكم السودان 16 عاما لابد من سبر غورها وإستيضاح الحقيقة من الجميع الأستاذ/ شوقى قضى منها ردحا من الزمن لخلاف يعرفه هو فى الخارج والحمدلله تيرب فى غربته اللهم أحفظ ذريته وكثرهم وله العمر المديد والذاكرة الحيدية نقها له حتى نتزود من معينه .

[لوممبا]

#1106416 [جمال علي]
1.00/5 (2 صوت)

09-15-2014 09:43 PM
و الله كلامك سمح, لكين كلامك يومتها عن نميري ما عجبني لأنو فيهو تزيد علي الرجل و هو في رحاب الله. يا أخي نحن جيل مايو و نميري دة زي أبونا.
و كمان لو سمحت تعرف لينا : السورج - الحيسونة - العيتنوبة.
أظنك قديم من زمن الحبوبات و أنا متربي في القرية في دنقلا و رغم دة ما بعرف هذه المصطلحات.

[جمال علي]

#1106267 [قاسم]
2.88/5 (4 صوت)

09-15-2014 04:53 PM
زي بقية خلق الله باحب الزول الضكران و عشان كده يا استاذ شوقي محبة في الله لا شفتك و لا في معرفة لكن و الله من كترة ما تعجبني رجالتك علي الايمان حبيتك زي أخوي الكبير ... لا بد زي ما قال الجماعة تجمع كتاباتك دي في كتب عشان الناس بتحتاج ليها ... ياخ أنا منك عرفت تواريخ تخص المهدية ما لقيتا في أي محل ... الله يحفظك و يمتعك بالصحة يا راجل يا راقي .
الكيزان جونا جعانين و رقابن مسلولة (راجع الصور القديمة) و بطونن مطفوقة ، يوم الليلة الواحد كرشو زي المره الحامل و الرقبة السيف ما يشيلا و العجب المؤخرة ... مخلوعين و لا يوم الله ما بيشبعوا ... الجعان ما بيشبع ... أكلوا قروش البلد ، ان شاء الله ياكلوا نار في بطونم ... حقنا ما عافينو للحي و الميت .

[قاسم]

#1106059 [مدحت عروة]
2.74/5 (7 صوت)

09-15-2014 12:57 PM
واصل الكتابة يا شوقى بدرى يا رائع واروع مافى كتاباتك انها سودانية بلدية وطنية وما شاء الله ما بتنسى حاجة!!!
الانقاذ او الاسلامويين يا اخ شوقى عار على الدين والوطن واشهد الله على ذلك !!!!

[مدحت عروة]

#1105995 [المستغرب]
3.24/5 (7 صوت)

09-15-2014 12:11 PM
الف حمدلة علي السلامة يا عمنا شوقي كل يوم بدخل الركوبة وبفتش علي مقال من كتاباتك والليلة من الفرحة ما مصدق شفنا خط يدك ربنا يديك الصحة والعافية ومنور الركوبة

[المستغرب]

#1105910 [EzzSudan]
3.50/5 (6 صوت)

09-15-2014 10:55 AM
PLEASE DON'T STOP, ALLAH BLESS YOU AND KEEP YOU SAFE FOR BELOVED SUDAN.

[EzzSudan]

#1105899 [omer]
3.00/5 (6 صوت)

09-15-2014 10:50 AM
والبشير بيكون قاعد ذي الافندي في الانداية . خايف ومنطط عويناته .ههههههههه
لازم تتحفنا بتجاربك وخبراتك في الحاجات دي ياود ام ادر. معلم كبير ياعمنا شوقي .

[omer]

#1105863 [محموم جدا]
3.38/5 (7 صوت)

09-15-2014 10:11 AM
مقالات تحفة و مليئة بالفلكلورية السودانية و الادب الشعبي و تحمل ما تحمل من النقد لمن يفهم بالاشارة و لمن يفهم بي ام دلدوم لكن الجماعة ديل نسوا الله فأنساهم انفسهم و لا يرون ابعد من كافوري و مسجد النور و هم اجساد خاوية لا تفقه ما تسمع من كلام عصام البشير المموسق و المنسق و لا تعي ما تقول غير دبي و ماليزيا ... الشعب و الكادحين يرونهم من خلال الزجاج المظلل فيرونهم اشباح أمام ابواب المستشفيات و كما قال أخ صباح اليوم و هو يشكو من التهابات أصابت إبنه (الأدويةالبيجيبوها للبلد دي بقت ما بتداوي).. و كما قال أحدهم أنو الريس لو رسل واحد تشاد لازم يمر عن طريق دبي.. يا ود بدري ديل قوموا الناس بدري قبل العالم بي ساعة و رجعوا ناموا بعد الصبح لإحياء سنة القيلولة ..
نسوانهم بجع و نسوان غيرهم زرازير ..
بيوتهم قصور و بيوت غيرهم كراكير ..
سياراتهم مكندشة و رقشات غيرهم مدشدشة..
خزناتهم معشعشة و جيوب غيرهم مملطشة..
عزاءهم صالونات و غيرهم خيم مغبرات ..
زواجهم مهرجانات و غيرهم لحقوهم الكورات ..
عيالهم منقنقة و عيالنا في التراب ممرقة ..
مهر بناتهم فارهة و مهر بناتنا الفاتحة ..
تراهم في ذات الخمس نجوم و غيرهم يا حي يا قيوم..
تيوسهم في دبي تحوم و تيوسنابالجرب تحك النوم..
لباسهم حريرة و غيرهم يا ساتر السريرة..

[محموم جدا]

#1105789 [د. هشام]
4.00/5 (7 صوت)

09-15-2014 08:59 AM
يا سلام يا أستاذ!! كلامك جميل و يُضحك كثيراً ... أعجبني أكثر التالي:
"ما بن لادن وجماعته ديل كان ببيضوا حلل في سوق امدرمان"
"والرسلتوهم اديس اببا لقتل مبارك جو من الراهبات ولا اليونتي اسكول"
"طيب مصر دي احتلت حوض برسيم ؟؟"
"الاحزاب بقت اكتر من غنم الاشلاق"
"انت بدر الدين ده درس اقتصاد في سوق الطواقي ؟؟"
ههههههههههههه!! كما يُعلق شباب الفيس بوك!!

[د. هشام]

#1105744 [سري]
4.00/5 (4 صوت)

09-15-2014 07:54 AM
شوقي مرة اخري وفي الصميم. كعهدي بك تضع اصعب الأمور في اسهل قالب وتوفيها حقها. كتاباتك في منتهي البساطة والواقعية .تمليكك الحقائق لقراء كتاباتك في سرد مفصل لوقائع موثقة لا يقدر بثمن. تذكرني صديق قديم كنت أزوره في مدينة لند في السبعينات واسمه شوقي بدري لك الف تحية واتمني ان نلتقي. لا ادري اين ومتي لكني اتمني. سري محمد علي. من كندا

[سري]

ردود على سري
Sweden [shawgi badri] 09-15-2014 01:57 PM
الحبيب سري آخر مرة مقابلتنا كانت في 1972 فس يلدة نستفذ جنوب كوبنهاجن لمن كنت انت دكتور وعندك عربية خدراآودي موديل نفس السنة . بعض لوحاتك كانت تزين غرفتي الطلابية في جامعة لند . صورتك كانت معلقة في مكتبي في لعشرين سنة .
استشهد كثيرا حتي اليوم بقولك في من خانوا خط الحزب الشيوعي في 1970 ثيراننا الكبيرة الحمراء قد اصبحت تسير للوراء . وكذالك رفضك لمبادرة السلام الكاذبة غصن الزيتون الاخضر تأكله البقرة وحمام السلم الابيض يشوي .
قال لي حسين ود الحاوي انه قد قابلك في الخليج في السيعينات . . واخبرك بانه تعرف عليك لانه كان يشاهد صورتك في المكتب كل يوم حيث عمل معي لسنين .
بعد تحطيم السفارة ودق الليبيين دق العيش . كنت انت لابس فنيلة نص كم صفراء اللون وبخطوط دقيقة وجينز واسع في الرجلين . وسستة في العنق . وعندما حولونا للسجن قلتا لينا ماتاكلوا الاكل لانه فيه بروم . وده بيدوه للمساجين لايقاف انتاج الحيوانات المنوية . وقلت انك تعرف ريحته لعملك كطبيب .
قبل ان تحضر لبراغ وعندما كنت في جامعة بيلزن علي الحدود الالمانية كانت بيننا مراسلات ومداعبات . لقد كان زمننا جميلا .


#1105701 [شاهد اثبات]
3.00/5 (7 صوت)

09-15-2014 05:46 AM
image
عليك الله يا عمنا شوقي..امشي اقلع ليك عمود في صحف الامارات او الخليج من المصريين وانشر كل مقالاتك الثرة هناك...عشان ضميرنا يرتاح...هذه المقالات احوج ليها الوعي العربي المازوم وهو الفضاء الذى يتحرك فيه هذا الكائن اللذج وسبق ان رد عليه كتاب خليجيين افذاذ لمن وصم السودانيين بالشحدة
المرحلة الان هو تعرية السودان القديم من 1 نياير 1956 الى اخر ورقة توت
بالله شوف البيان او الاتحاد..والامراتيين ديل وكت ما عايزين يدو فضائية خليهم يفتحو الصحف بتاعتهم
اردم لحدي ما يضحك السمك ويتبسم الباعوض

[شاهد اثبات]

#1105694 [نص صديري]
1.00/5 (1 صوت)

09-15-2014 05:10 AM
ما معاك انت ذاتك في كثير تلجك للكويت
هل تعلم ان الكويت هي الدولة العربية الوحيدة التي لم تتنازل عن مليم احمر اقرضته السودان (راجع مديونية السودان في البنك الدولي)
يا اخي ديل حتى القرض الذي قدموه لبناء حلفا الجديدة عندمل دخلو واسطة لاقناع السودان بالتخلي عن حلفا القديمة مازالوا يطالبون به رغم انه قدم من وسيط خير للمصريين!!!!
سبب مشاكل الكويت كلها مع صدام كانت ديونها ديل اكتر عرب جلود ماعندهم مانع يستدينوك لكنهم ماعندهم خوة في المال
معظم ديون السودان الحالية فوائدها للكويتين لو اردت الحقيقة فما تكتر من كثير التلج عنهم

[نص صديري]

ردود على نص صديري
United Kingdom [نص صديري] 09-15-2014 06:18 PM
شوقي شكرا للرد لكن هنالك حقائق عن علاقة الكويت بالسودان لم يتناولها الاعلام سواء في فترة عبود او النميري او الان ببساطة الكويت الدولة العربية الوحيدة التي تتلقى فوائد ديون يعني ربا بتسميتهم من السودان الحفيان ده من ايام عبود والى هذه اللحظة كما انها اكبر بلد مدين للسودان بعد امريكا وهولندا

الاخ عودة ديجانقو
تفاصيل الديون بالمليم اردت ان اقول منشورة في موقع البنك الدولي بل اذا بحثت في الانترنت عن قروض السودان هنالك قاعدة بيانات بها للتحميل، انا لن اطالب الكويت لتعفي ديونها كما فعلت كل الدول العربية في فترة نميري بل على الاقل ان يخجل حكامها من تلقي الفائدة الربوية عليها اذا انت كقتنع بالاية التي مرجعك
الكويت اكبر مستثمر في حوجة السودان للقروض وكما ضربت مثلا لشوقي انهم دخلوا كوساطة بين السودان ومصر في قضية السد العالي واقنعوا السودان بتقديم قرض لبناء مدينة جديدة للحلفاويين وببساطة السودانيين توقعوا ان تعفيها الكويت فلم تفعل وهي مثال بسيط اما اذا راجعت بيانات الديون سيشيب راسك عن الفوائد البنكية التي تلقتها الكويت في عهد عبود ولم يتنازلوا عنها حتى عندما تدخل الانجليز لان الكويتيين نسوا القرض السوداني في عهد الحكم الثنائي الذي اشترى حقوق حقول نفطهم من الايرانيين وتلك كانت من ميزانية السودان وضماناته

Sweden [shawgi badri] 09-15-2014 02:48 PM
انا لو علقو لي محلب ورسموا لي خرطة ما بعرف اكسر تلج . البكسر تلج بكون عاوز حاجة او حاري كرتة . هل تفتكر اني من النوع ده ؟؟ في سنه 1983 وفي يوم عيد الاضحي اكتشفنا ان الطيارة السودانية الغيت وقعدنا في مطار القاهرة يوم وليلة . قابلت الاخ زكي من توتي وكيل وزارة المالية ومعه عبد العزيز الدرديري نقد من مكتب المدعي العام. وثالت سكوت لم يقدم نفسه . وكانوا عائدين من الكويت . وقابلوا وفد اليمن الجنوبية الذي كان جمبعه من السودانيين ومن قابلهم كان تيما من الصندوق الكويتي كله سودانيين . لقد كانت الكويت والعالم يثقون ويحترمون السودانيين .
اساطيل خليل عثمان للصيد كانت تشغل مئات السودانيين في الكويت . وخليل كان يسكن وسط امراء الكويت . وكان صديقة جابر الصباح بتوسط لنميري لاطلاق سراح دكتور خليل ز .
هل نحن شحادين لكي نتوقع ان يتصدق علينا الكويتيون او خلافهم ؟؟ هنالك فهم خاطئ ان العرب عندهم كل فلوس العالم ز كل الفلوس الدخلت السعوديو في 2013 كانت 219 مليارد دولار امريكا شربت بيرة بي 259 مليارد فناند دخلها اكتر من كل الدول العربية مجتمعة .

United States [عودة ديجانقو] 09-15-2014 11:24 AM
هل تعلم ان الكويت هي الدولة العربية الوحيدة التي لم تتنازل عن مليم احمر اقرضته السودان (راجع مديونية السودان في البنك الدولي)
************************************************************************

يا نص صديري انت بتتلاعب بالالفاظ ولا شنو؟؟؟ كلامك ده اسمه خطوط عريضه ولا حتى انت واعى بما تقول..وما هى علاقة مديونية البنك الدولى مع قرض الكويت...بعدين من وين نراجع لنعرف مديونية البنك الدولى...ولما لا تكمل جميلك وتختصر لينا عناء البحث فى دهاليز البنك وتورينا التقرير كامل...وهل كلامك يعنى ال 45 مليار مديونية البنك الدولى هى فى الاصل قروش كويتيه؟؟ ..ثم بأى حجه ان تتنازل الكويت عن فلوسها للسودان.
اقرأ آية الدين اطول آيه فى القرآن وبعدين نواصل لو فى مواصله

United States [EzzSudan] 09-15-2014 10:59 AM
MAY ALLAH BLESS ABDULLAH ( JUBBA ) AND ACCEPT HIM IN PARADISE.

Saudi Arabia [الضكران] 09-15-2014 10:45 AM
لمن جغمت القرض كان حلو ولمن قالو ليك سدد بقا ليك حار ... ما تبقا راجل تسدد وكمان بلا خجل تقول ما اتنازلو ... ما سمعت بحكاية (أرضا ظرف) ..

Sudan [د. هشام] 09-15-2014 09:04 AM
لكن الكلام دا حصل متين يا "نص سديري!!"؟؟.... سأرد على سؤالي على طريقة الأستاذ شوقي بدري:"بعد ما الدحيش أكل العيش؟؟"!!


#1105640 [ابزهانه]
1.00/5 (2 صوت)

09-15-2014 01:06 AM
في التنك .

[ابزهانه]

#1105639 [المشروع]
2.50/5 (3 صوت)

09-15-2014 01:00 AM
والله يا عمنا شوقي (عفارم) عليك ملحتلم مع الكلاب ...وقالو البياكل براهو يخنق ديل جاءوا الى السودان بنية الاكل براهم وفعلا اختنقوا وخنقوا السودان الله يخنقهم زي ما خنقوا السودانيين والحمد لله يا شوقي ذاكرتك نضيفة الله يقويك ويجعل البركة فيك ويقوي ذاكرتك حرباً على المفسدين .. ديل ما بخجلوا ولا بختشوا وهم كما قال تعالى في وصف المنافقين (مردوا) على النفاق (وممن حولكم من الأعراب منافقون ومن أهل المدينة مردوا على النفاق لا تعلمهم نحن نعلمهم سنعذبهم مرتين ثم يردون إلى عذاب عظيم) تعرفي يا شوقي من ضمن معاني كلمة (مردوا) يعنى ان النفاق والكذب والتقية صارت عادة لهم فالامرد في اللغة هو الصبي الذي لم ينبت شنبو وهؤلاء رضعوا من ثدي النفاق منذ ان كانوا مُرداً عشان كدا مردوا على النقاق والله تعالى اعلم ؟ ونسبة العلم اليه اسلم وديل زي الرقاق الفي الراكوبة ما يتمسكوا ولا يتقبضوا وكلهم ملة واحدة وتربية شيخهم الترابي الذي يتلولو في الكلام ويأتي بحركات غريبة والغريب في الامر ان شاهدت سامية نائبة رئيس البرلمان وجدتها تعمل نفس حركات الترابي بيدها قلت سبحان الله ذرية بعضها من بعض .... وهي نفس حركات على عثمان..
الحمد الله انك ما خليت لهم شي واجعبني كلامك الجميل خاصة قولك ( وقلت لنا في ظرف سنتين ستجري انتخابات سميتها بحرة . وهو في انتخابات غير حرة يا مصطفي ؟؟؟؟؟؟؟ هههههه فعلا في انتخابات ما حرة .. شكرا لك وشكر والف شكر

[المشروع]

#1105633 [Dr. Eltayieb Elnaiem]
2.63/5 (5 صوت)

09-15-2014 12:27 AM
Please and again please, keep all your articles in a book. It will be a great loss if they are lost. We need them all in a great Book. Thanks and God Bless you

Dr. Eltayieb Elnaiem
Orthopedic Surgeon
Saudi Arabia

[Dr. Eltayieb Elnaiem]

#1105605 [أبو يس]
1.50/5 (2 صوت)

09-14-2014 11:40 PM
لقد أسمعت إذا ناديت حياً ... ولكن لا ( حياء ) لمن تنادي

[أبو يس]

ردود على أبو يس
Saudi Arabia [عوض عمر] 09-15-2014 12:16 PM
لا حياة لمن تنادي. يعني حي كميت. لذا لا تعدل في النص الشعري. عارفك حتقول وضعتو بين قوسين ليناسب المقال. لكن البيت في أصله يعبر عن واقع الحال. فلان حي كميت و آخرين تحت الأرض أحياء.


#1105598 [Hamdi]
3.00/5 (3 صوت)

09-14-2014 11:24 PM
( بخصوص علاقاتكم السيئة بدول الجوار قلت انت بخشمك الكان بياكل الكابيدا ويمكن الكافيار دلوكت . ان علاقتكم بمصر متردية بسب تغول مصر علي حلايب . وان تلك الجريمة مسئول عنها النميري ووصفته بأسوا النعوت )
عارف يا شوقي لو لا نميري زي مصطفى دا كان لسع مرمي في رومي البكري ، الزول دا من بخله وتقتيره علي نفسه أصيب بالتي بي في بريطانيا لسؤ التعذيةرغم أن حكومة تميري كانت ترسل له أعانة عندما كان مبعوث من قبل كلية طب الاسنان الذي أنشأ في عهده, المهم أنت عارف نميري زي مصطفى مابجيبو مراسلة ليه

[Hamdi]

#1105594 [المتغرب الأبدي]
3.00/5 (6 صوت)

09-14-2014 11:15 PM
عمنا شوقي .. أولاً ربنا يديك الصحة والعافية ..
يا ريت مصطفي عثمان يقرأ كلامك دا ..

[المتغرب الأبدي]

ردود على المتغرب الأبدي
[ود الشريف] 09-15-2014 09:30 AM
يا متغرب .. ما تخاف بيكون ( قراهو ) بس ديل ما عندهم اي إحساس


شوقي بدري
شوقي بدري

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة