المقالات
السياسة
من يوميات تربال ....زيادة السكر !!!
من يوميات تربال ....زيادة السكر !!!
09-17-2014 03:32 PM


بالنسبة للترابله عموما ظل السكر الابيض عليه معول كبير في حياتهم واساسي لتغذية ابدانهم التي يجهدها العمل المضني خاصة في الشمال حيث يتركز العمل في الزراعة علي الجهد البدني المتواصل طول اليوم من صلاة الفجر الي صلاة العشاء واحيانا يمتد الي ما بعد منتصف فيما يعرف بالسهرة (اي ان التربال يكون عليه سقاية الزرع حسب الترتيب المعمول به في الجدول الزمني وقد يكون ذلك بعد العاشرة مساء ) ومعني هذا ان احيانا الوجبات الثلاثه يتناولها في المزرعة كما يؤدي الصلوات الخمس هناك واهمية السكر لا تكمن في حلاوته وفائدته الغذائية وحسب وانما تكمن في سرعة تناوله مذابا في الشاي او القهوه او في حليب العشاء لانه لا وقت لهم لاكل البلح او الفواكه فهي تاخذ وقتا هم في امس الحاجة للوقت في الزراعة واعلاف بهائمهم لذلك اصبح السكر عادة اكثر منه فائدة وللاسف ظلت الحكومات غير الرشيده تستغله استغلالا سيئا في زيادة اسعاره والمؤسف اكثر ان زيادة اسعاره لم تنعكس علي المواطن في شكل خدمات اخري تحسن من وضعه الاقتصادي بل بالعكس كل الزيادات كلها في هذه المادة ذهبت ادراج الرياح فيما لايفيد الوطن او المواطن مما جعل التذمر عادة مستدامة كعادة الحكومات في الزيادة بغير ادراك وقد حدثت اول زيادة مثيرة وبفارق كبير في عهد مايو حيث تمت الزيادة من 7 قروش الي 12 قرش هكذا مرة واحده وكان جدنا الباقر تربالا وناظر المويه في تلك الفترة لدقته وتجويده عمله وهذا معناه اخر مزارع ينوم فجاء متاخر ذلك المساء ووجد الناس نيام تماما فصلي العشاء في قوز رماله الناصع البياض اكثر من السكر والقمر فوقه ثم اتكأ علي رمله يتامل النجوم متاوها يبثها رهقه وتعبه براحة ضمير منقطعة النظير انه ياكل حلالا فنادي :
الباقر : يا بت يا خجيجي جيبي العشاء
خجيجي : سمح يابا ...فطير باللبن ( كانت تريد ان تدس خبر الزيادة بخبث )
الباقر : الله يفتح عليك كل يوم مع نظارة الموية اديك السهر ..
خجيجي : يابا انت بعد توزع الموية علي السواقي وتمر تحول من واحد لواحد بتتاخر ليه تعال ماشي دربك !!!
الباقر : يا بتي دي امانه في رقبتي ومراقبة الترابله صعبه كلهم مو واحد وكلهم ما خايفين الله ...بعضهم يقرن الموية في الحيضان عشان يسرق زياده ما بقيف بالحوض يولون وحدين نامن المويه تددن ....دا خراب الله ما برضا !!!
خجيجي : انا ذاتي راجاك ناكل سوي عشان براك ما بتقدر تاكل !!!
الباقر : بارك الله فيكي اقعدي وقولي بسم الله !!!
خجيجي : بعد العشاء في كباية مديدي بالحلبه ان كان تجمك شويه اصلك طول النهار مهنقل !!!
الباقر : بسم الله ...الله يباركلنا في رزقنا ...مع اول لقمه ...يا بت دا شنو ومالو مسيخ وين السكر .....!!!
خجيجي : سكر شنو تاني يابا انت ما عندك خبر !!!
الباقر : خبر شنو
خجيجي : نميري زاد السكر سواهو 12 قرش !!!
الباقر : افو علي الدنيي... نان ما خربت..... الله يقرش كمكومو ود الذين امنو وكمكوم اهلو وكمكوم الناس الناس الجابو لينا دا شنو الفقر دا خلاص بدينا الطربقا قولي واحد الله !!!
خجيجي : والله قالو الخرنوم جايطه شويه حتي النميري داخ وغمر ..نامن حريمو المعاهو رشنو بالموية !!!
الباقر : اريتو كان مات ....فايتو شنو ...بدا الخراب من هسع ...كان يرشو جبكسين بدل الموية والحريم المعاهو ديل حريم مطلقات ما عندهن والي يا حراميات يهون زي الكلاب خايفات علي ضنبن والكلب بيحرس سيدو !!!
خجيجي : والله سووها وقعدو ....تاني ما في طريقة وبالطريقه دي ياهو ماشي طوالي ما بقيف !!!
الباقر :: كدي عليك الله جيبلك شوية يطعم اللبن دا ناس بي فوق ديل افندية عطاله قرو شنو ما عارف .....نحنا السكر دا الحاجة الوحيدة الحلوة البتدخل جسمنا والله بلاها نموت نروح ساكت والزراعة ورانا تموت والزراعة ان ماتت ياهو مرض الجوع جاكم ومرض الجوع دا قالوا زي السوس ينخر الزول ما بحس بيهو الا في الاخر والمصيبة بيعادي ...والله يقرض الناس قرض !!!
خجيجي : تطعم اللبن شوية .... تاني لازم نعمل حسابنا .....الشاي والقهوة في اليوم مرة بالتمر ومرة بالسكر عشان نستر حالنا !!!
الباقر : يا بتي تمر شنو نحنا ما عندنا زمن لاكل التمر والقعاد في الضللا نحنا ضلنا شمس الله حقو ياكلو الافندية بالفوق ديل قاعدين مرتاحين ما جايبين خبر يصرف في القروش ويركبو في العربات ونحنا المساكين ندفعلهم ان شاء الله بالساحق والماحق والبلا المتلاحق دحين من فاتو الخواجات شفتيلك ود بلد مرا علينا ولا سال عن صحتنا ....بس يلعبو في الكشتينه وقمار كمان..... ويشربو في العرقي وينومو نامن الشمش تشرق يمشو مكاتبم ديل فيهم خير الزول ان ما صحا مع الفجر الرزق بجي من وين ... والله البلد دي ما بتعمر تاني ......الله يرجع الخواجات !!!
خجيجي : تصبح علي خير قوم تعال نوم مشان امسح ليك كرعيك بزيتن بوي باقي حفانات والله شقهن يدخل الضب !!!
الباقر : بارك الله فيكي ...النوم الجاكم شنو السكر زادو !!!
خجيجي : داير تسو شنو !!!
الباقر : ارقد في قوزي دا ادعي نميري الليل كلو ان شاء الله لا يعمر لا يتمر ..وفعلا ظل علي حاله حتي اذان الفجر يلعن في نميري وحكومتو بكل ما اوتي من ذخيرة دعاء او شتيمه وينهر ويتاوه كانه مصروع حتي خرج عليه ابن اخيه ود علي !!!
ودي علي : يا عمي مالك الليل كلو تكورك ما اديتنا النوم ماك نصيح الحاصل شنو !!!
الباقر : (بتهكم ) الحاصل شنو !!!....بالله انتو رجال !!! ...سجمكم ورمادكم والعجاج ضربكم والمحنة جاتكم السكر زادو وانتو تنومو زي الضان في المراح !!!
ود علي : نان نسو شنو ....حكومة السجم والرماد الجديدة دي الظاهر معاها تاني ما بنشوف خير لي قدام !!!
الباقر : ان سكتو يا هو خت سرجو وركب وكمان خلف رجلو وتاني البلد دي ياها وقفت وتمشي لي ورا ...الله يستر من الجاي !!!
بعد فترة سافر الباقر للخرطوم لجلب اسبيرات لوابور الماء وظل يشكي من زيادة السكر وكيف اثر علي كل الاسعار وظل يلعن في الحكومة فقال له ابن اخيه :
محمد علي : يا عمي لو وديتك لنميري تقول الكلام دا !!!
الباقر: ايوه يرخص السكر نحنا معاهو للنهاية غير كدا انا ضدو للنهاية !!!
محمد علي : يلا اركب معاي في السياره حنمشي قدام القصر هل تدخل تلاقي نميري !!!
الباقر : يلا والله اسمعو كلام ابوهو ما قالو ليهو داير يسو شنو ....يكتلني يبقي اخير اصلنا ميتين ...اخير نموت مرة واحدة بدل البهدله دي ...علي الاقل ندخل الجنه ونميري بي سببنا يدخل النار ...الله ان شاء الله النار التاكلو دنيا واخري ...العاقر الماعندو جنا الله الجن اليركبو .....!!!
ويمروا من امام القصر ...........
محمد علي : نميري هنا !!!
الباقر: نزلني خليني امشي ليهو انا تربال لا شايل سلاح ..بس اقولو كلمتين انو ما يسمع كلام الافندية في الخرتوم ديل ...ديل ما عارفين حاجة عن البلد ....لما يزورونا ويعرفو حالنا بعدين يتكلمو مش يقعدو يتفاصحو في المكاتب ويضكو الحنك علي الفاضي ...ان ما ودو البلد دي في ستين دهيه خيبة الله عليا !!!
محمد علي : بعد شوية الانتخابات جاية ..اها رايك شنو ياعمي !!!
الباقر : عمي دقوسه ياخدكم ينزل السكر بديهو صوتي خلاف كدا ما عندو حاجة عندنا يورينا عرض اكتافو !!!
وبسبب من زيادة السكر تلك وما تبعها ظل الباقر ضد نميري حتي سقوطه وظل يردد قوله الماثور عنو ( ما قلتلكم البلد دي تاني ما بتنفع دحين اي حاجة سووها الخواجات قدرتو زدو عليها شنو والله ياهو تكدو فيها نامن تموت ونموت معاها وخيبة الله عليا ان ما ندمتو علي مروق الخواجات و سفيتو التراب وبطانا ديل ما فيهم رجا كلام ساكت بلا فايده بلد وراحت بس الله يدينا حسن الخاتمه )!!!

[email protected]


تعليقات 1 | إهداء 0 | زيارات 670

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1108066 [الريشة]
0.00/5 (0 صوت)

09-17-2014 05:39 PM
نميري الله يرحمه في زمنو التعليم والعلاج محانا .الذين يحكمونا الان تمتعوا بهذه الخدمات خاصة الفقراء منهم .نلاحظ انهم ينتقموا من طبقتهم برفع الدعم عن التعليم والعلاج فقط للاغنياء بعد ان نسوهم

[الريشة]

سيف الدين خواجة
 سيف الدين خواجة

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة