المقالات
السياسة
الكريمت تش
الكريمت تش
09-21-2014 04:31 PM


الكريمت تششششش


والقصة تقول ان صاحب فكرة علاج(الكى) بعد ان ذاع صيته قرر ان ينقل خدماته للمناطق النائية التى لم يتمكن سكانها من الوصول اليه فحزم امتعته وامتطى(اللورى) قاصدا ربوع كردفان وهناك اجتمع الكل تحت راكوبة ودضيف الله .. احمد الضاكر(التمرجى) الوحيد بالقرية كان هو المسؤول الأول من التنظيم والترتيب حيث اقام مسؤول(التش) براكوبة ودضيف الله .. كانت الجموع قد قدمت قبل ثلاث ايام حينما سمعت الخبر وأمتلأ البيت بكل اصناف العذاب .. فالمرض هناك يقاسمهم الحياة والسكن .. (شفخانة) القرية التى بها التمرجى الوحيد لايوجد بها سوى امصال (المناريا) التى وجد لها اطفال القرية وظيفة أخرى غير الحقن .. حيث يقوم الأطفال بوضعها فى النار ويغطى عليها بالرماد ولحظات ويعم المكان انفجار ضخم يشبه انفجارات الحروب فثقافة الحرب قد استوطنت بالمنطقة فى كل تفاصيلها فالحبيب عند الفتيات هو (الجيم 3) المعدل ... وصل طبيب(التش) فى الصباح الباكر والقرية قد استيقظت على توها واصوات البهائم تستعد لرحلة النشوق ... الأستقبال فاق حد الوصف فالقرية لم يزورها مسؤول طوال تاريخ الحكم فى البلاد فهى لاتعرف الايدلوجيات واللجان الشعبية وسكر التموين والزواج الجماعى .. هناك ود العم لبنت العم عن طريق ثقافة (غطى قدحك) ... وصول طبيب(الكريمت) كان اشبه بتلك الكرنفالات فى مواسم(الترت) الجميع كان يمتلك شكواها لتقديم(عريضته) الصحية حتى (الداية) الوحيدة فى القرية كانت هناك فهى قد حاصرها العمر وتشتكى من الم المفاصل نتيجة مشاوير تلك السنين .. المهم وجد الطبيب كل صنوف العذاب ... أحمد الضاكر بدأ بترتيب مقابلة الحكيم حسب التسجيل .. ووقف شيخ القرية مخاطباً الجمع
ــ هووووى ياناس داهو الحكيم كتر خيرو جاكم من البحر .. والزول (بونسوا) مرضو .. انا فتحت راكوبتى الكبيرة دى للحكيم ودايركم تدخلوا ليه واحد واحد
ــ كل القرية بصوت واااااااااااحد .. حاااااااااااااااااضر ياابورقية ... وانتظمت الصفوف .. رائحة الشواء عمت المكان وتحلقت الصقور فى السماء خصوصاً تلك التى تعرف فى القرية با(الهدية) فهى عدو الجميع بماتقوم به من خطف السواسيو الصغار ... لم يشعر الجميع بذاك الألم .. فألم المرض كان اوجع .. وبينما الجميع فى تلك الحالة توقفت فجأة سيارات ذات الدفع الرباعى وخرج منها اشخاص لم تشاهدهم القرية طوال تاريخها .. اشخاص كما فى تلك الأساطير .. الجميع الجمتهم الدهشة والأستغراب .. هل لقدوم هذا الحكيم كرامات للقرية فهى لاتعرف السيارات ولاتسمع اصواتها فوسيلة المواصلات الوحيدة عندهم هى تلك الحمير التى يستغلها الجميع فى الأسفار والاسواق فهى هناك انواع فالذى يسرع المشى هو الحمار(الريفاى) وهو يكسب صاحبه ميزات اجتماعية اخرى .. نزل هؤلاء الاشخاص من تلك السيارات وتقدموا خطوات الى حيث يجلس شيخ القرية بالقرب من حكيم(الكريمت) كان وقع خطواتهم يحفر فى الدواخل أعماق التساؤلات ... أجى ياحلوم الناس البييييييييييييييض (دول) جايين من دار ريح فى شان الحكيم أتارى الحكيم دا سرو باتع ... كو يا(مرخة) الناس دول ما(عانين) الزول دا .. ديل فى وشهم شئ اخر معقولة ديل (بمرضوا) وبموتوا زيينا كدا ... مخير الله ... فى خضم تلك التساؤلات فاجأ أحدهم الشيخ بعد ان أخرج من دفتر أخضر اللون وامسك بقلمه ... ثم قذف بهذا السؤال
ــ مين شيخ القرية دى؟؟؟؟
ــ انا الشيخ ود ضيف الله .. شيخ القرية
ـ عندك تصديق بالعيادات المتجولة دى!!!
ـ الشيخ .. مافهم كلامكم يعنى شنو عيادات(متجوجلة)
ــ قلنا ليك عيادات متجولة
ــ برضو مافهمتها معليش انحنا هنا ماعندنا زى كلامكو البتقولوا فوقا دا
ــ طيب ياشيخ منوا السمح ليكم تجيبوا بتاع الكريمت دا
ــ مخير الله فى خلقوا الزول وحيييييييييدا جانا عشان يعالجنا من الأمراض .. الفرنديد لحق حدنا
ــ انا سالتك اسئلة محددة حقو تجاوب لى عليها عشان مانفتح ليك بلاغ بتاع معاكسة مسؤل
الشيخ باستغراب مسعوووول!!! مسعووول من شنو لاقدر الله؟
ــ قلت ليك مسؤول انحنا ناس الحكومة
ــ الحيكومة !!
ـ ايوا انحنا ناس التحصيل
ــ بتحصلوا فوق شنو!!
ــ بنحصل فى كل زول قابل بتاع الكريمت
ــ يعنى فى كل(تشة) عندكم فيها تحصيل!!!
ــ ايوااا بالظبط كدا .. يلا شوف لينا الناس القابلت الزول دا و(اتشتت)
ــ بلحيل ..
ثم نادى الشيخ فى الجميع .. هوى ياناس تعالوا اسمعوا العجب وولادة الدنيا بلا(درة) لحظات وكان الجميع امام الشيخ ..
وقف الجميع مشدوهين ثم تقدم أحد المسؤولين نحو الشيخ هامساً فيه ـ انا عاوز الجميع اظهار علامة(التش) ... أمر الشيخ الجميع بأظهار تلك العلامات التى تبين موضع (الكى) ثم امسك الأخر بدفتره وتقدم نحو الجميع قائلاً
ــ انحنا ناس التحصيل جينا عشان نتحصل وعندنا ايصالات .. اى شخص تم(كيه) عليه جنيه ... الجنيه فى القرية كان غريباً فى ملمسه .. اصطف الجميع حسب ما اشار لهم ذلك المسؤول استعداداً لأستلام مبلغ التحصيل ثم تقدم المسؤول الأخر ليراقب عملية التحصيل ... الجميع اظهر اماكن (الكى) بينما وقف اخر وهو يتزحزح للوراء كلما تقدم صف الجماهير ... لاحظه المسؤول المتحصل ثم نادى عليه بصوت عالى
ــ انت هناك تعال بجاى مالك بتزحزح لوراء
ـ انا
ــ اى انت ومال انا
تقدم خطوات ثقيلة نحوه ثم وقف محازيا لذلك المسؤول
ــ المسؤول ... مالك انت واقف بعيد
ــ الشخص مافى شئ
ـ المسؤول .. كدا ورينا مكان(الكى)
ـ الشخص وهو منحنى الرأس ... انا ماعندى(كى) زى الناس ديل
ـ المسؤول .. ومال عندك شنو
ـ الشخص .. وهو يتمتم انا عندى ام ش ق و ق
ـ المسؤول ... شنو يعنى ام شقوق
وعم المكان صمت رهيب قطعه شيخ القرية وهو يمسك بعصاه قبل ان يعالج بها ذاك المسؤول صائحاً ... ام شقوق دى اريتها تجيك انت وحكومتك وماتلقى ليها علاج ... جايين تتحصلوا فى( العافية) ... جايين تتحصلوا فى صحة الناس .. وين انتو وقت المرض هدا حيلنا .. وين انتو وقت (تتوجع) حريم (الحلة) ومانقلى غير (داية) الحبل(ام مهلين) .. ين الحكومة والفنرديد(ربطنا) فى العناقريب ... ثم سقط الشيخ على الارض .. ولم يتحرك ... سقط الى الابد
[email protected]


تعليقات 3 | إهداء 0 | زيارات 1766

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1112111 [سوداني وبس]
1.00/5 (1 صوت)

09-22-2014 01:43 PM
يعتي شنو ام شقوق يا قريبي ؟

[سوداني وبس]

#1111571 [الشاذلى تيرا]
1.00/5 (1 صوت)

09-21-2014 11:09 PM
جميل جدا يا ايهاب واتمنى ان تواصل فى هذا الاتجاه الذى يبدو من الواضح تمكنك منه وشكرا ليك على اتحافنا بكتاباتك الرائعة دى

[الشاذلى تيرا]

#1111405 [Ahmed]
1.00/5 (1 صوت)

09-21-2014 05:34 PM
الموضوعية يا أهل النظام و المؤسسية!

[Ahmed]

ايهاب مادبو
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة