المقالات
السياسة
مبروك للشعب السوداني القصر الجمهوري الجديد
مبروك للشعب السوداني القصر الجمهوري الجديد
09-23-2014 01:13 PM

image

والله الواحد ما عارف يقول شنو ويبدأ من وين وينتهي وين .. في عز كوراث السيول والامطار وبيوت تهدمت ومتاع ضاعت وارواح فقدت .. تبني ثورة الانقاذ قصراً جمهورياً جديداً لنج يحاكي قصور غرناطة والحمراء فخامة وبهاء وترفاً .. قصراً جمهورياً جديد وبعض الغلابة والمشردين والشماشة والمعلمين الله يأكلون من بقايا الموائد وينبشون المزابل يفتشون عن لقمة عيش فاضت عن موائد مترعة رحم الله شاعرنا محي الدين فارس وكأنه كان يصور بقلمه مأل السودان بعد ربع قرن من الزمان
تمشى الملايين الحفاة العراة الجائعون مشردون
في السفح في دنيا المزابل والخرائب ينبشون
والمترفون الهانئون يقهقهون ويضحكون
والشعب المنوم مغنطيسياً مهموم مغموم بمعيشة اليوم .. جعلوا الناس سكاري وما هم بسكاري حياري وما هم بحياري ونحن الكنا بنحلم بيه يوماتي وكنا بنحلم بانه يقوم
مكان السجنِ مستشفى .. مكان المنفى كليّه .. مكان اﻷسري..ورديّه مكان الحسره أغنيّه.. مكان الطلقه ..عصفوره
تحلق حول نافوره ..تمازح شُفّع الروضه
السجن مازال قائماً والمنفي اصبح بلاد الله كلها .. والأسري الشعب السوداني بأسره والحسرة بدل الفرحة ملت النفوس والطلقة مازال يتردد صداها في درافور وكردفان والنيل الأزرق اما شفع الروضة اتذكر قول احد الحبوبات عندما خرج شفع الروضة ذات نهار فسألت ديل هيل منو فأجابونا ديل شفع الروضة فعقبت هي الروضة عندها شفع قدر ده
وكنا وكنا بنحلم بالتساوي في كل شي
وطن بالفيهو نتساوى .. نحلم.. نقرا .. نتداوى .. مساكن.. كهربا ومويه..
ده كله تبخر في سماء الإنقاذ وامطرت سماؤها قصراً جمهورياً جديداً يعني بدل ما يكون مكان السجن مستشفي ولا مدرسة ولا حتي روضة اصبح قصراً جمهورياً جديداً "بللا يخمكم"
يا بناة القصر من عهد الرشيد .. اليس فيكم رجل رشيد .. فلل رئاسية وقصر مشيد بختكم يا شعبنا حظكم في الكرتلة طلع قصر جمهوري جديد يللا امشوا اتفرجوا وصوروا بموبايلاتكم الذكية خيبة حكومتنا الغبية وغفلة شعبنا وسهواته الكثيرة التي لا يزيلها سجود سهو مائة عام.
يا قصرنا المرسوم
على اسفلت المسافة
ومالي من طول الطريق
قول للبنيـّة الخايفة
من نار الحروف
تحرق بويتات الفريق
قول ليها ما تتخوفى
دى النسمة بتجيب الأمل
والأمل بيصبح رفيق
والأصلو فى الجوف إندفن
لا بتنسى .. لا بنمّحى
لا بنتهى منو الحريق


[email protected]



تعليقات 3 | إهداء 0 | زيارات 1698

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1113226 [المهندس سلمان إسماعيل بخيت على]
1.00/5 (2 صوت)

09-23-2014 10:21 PM
بالله البلد دى مافيها كوز عاقل يقول للبشير عيب عليك البيوت المهدمة فى الصالحة ومرابيع الشريف ونهر النيل والجزيرة وكردفان وكسلا والنيل الأبيض كانت أولى بهذه المليارات
أنت قايل نفس ملك إبن ملك عشان تعيش فى هذا العز وشعبك بيوته مدمره وموية الشراب اتخلطت مع موية المراحيض
حتمشى وين من ربك
حسابك عسير يابشير سير سير فى الضلال والخطأ وبطانة السوء التى حولك تزين لك كل حرام
حيكون فى عقابين
عقاب فى الدنيا قاسي جدا
وعقاب فى يوم العقاب الله أعلم به
ألحق نفسك يا تلحق يا ما تلحق

[المهندس سلمان إسماعيل بخيت على]

#1113112 [warrag ali]
1.00/5 (2 صوت)

09-23-2014 06:12 PM
احتج الاماراتيون للشيخ زائد بان الاجانب تملكو البنايات الشاهقه وزاحمونا في بلدنافرد عليهم بحكمته لو شفتو اجنبي في المطار شايل معه بنايه يكون لكم علي حق فيما قلتم فمشكلتنا مع المؤتمر الوثني بعد استرداد الحريه الاموال المنهوبه خارج السودان اما المنهوبه داخل السودان من السهوله قلعها منهم وتمليكها للشعب مهما بنو وعمرو سوف يرجع لنا ان شاء الله وانا اري ذلك قريبا باذن الله

[warrag ali]

#1113061 [كديس]
1.00/5 (2 صوت)

09-23-2014 04:34 PM
ان يامر الرئيس بشراء سيارات جياد للدستوريين وعدم شراء السيارات المستوردة وبعد يومين وقبل ان يجف مداد الرئيس نسمع باستيراد المايباخ الالمانى للسيد الرئيس نفسو
بناء القصور لشرازم لصوص ليجتمعو بها للسرقة والاجرام شى غريب
هذا الرئيس اما مريض نفسيا او متحلف عقليا
الناس فترت من الكتابة وكشف الفضائج واحد يبالى ولا يخاف لا من الله ولا من الناس والشعب السودانى فى نوم عميق

[كديس]

عمر الفاروق عبد الله
مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة