المقالات
السياسة
ساكت لمتين؟ ..قصيدة ..عتاب من شهداء سبتمبر
ساكت لمتين؟ ..قصيدة ..عتاب من شهداء سبتمبر
09-25-2014 12:11 AM

ساكت لمتين؟

( عتاب من شهداء سبتمبر )


ساكت لمتين
يا الشعب النايم؟؟
وعينك للشر
في بلدك حايم
وبيتك بيتشلع
وعامل ما فاهم
وأهلك تايهين
في مدن العالم
والشوفة سنين
وأعياد ومواسم
والرجعة متين؟؟
ربك هو العالم
خدعوك بالدين
ولبسوك كالخاتم
ضربوك بالنار
وزادوها شتايم
رصفولك دربك
ألغام وجماجم
نهبوك في أرضك
وأثار .. ومناجم
معقول يا أخوي؟
لسع ما فاهم؟

ساكت لمتين
ولي نفسك ظالم؟
وخايف من ايه؟
ومتين حا تقاوم؟
دافع عن حقك
ولي ظالمك هاجم
قالع في حقك
وما تلين وتساوم
خليك عملاق
وبطَّل تتقازم
حا تموت حا تموت
حا تموت يا نايم
بمبيد مغشوش
في خضار و طماطم
و بالسم الهاري
في العسل الطاعم
وبالطلق الناري
وربك هو الدايم
ومعقول يا حر؟
تعيش كالخادم؟
اتحرك يا زول
وفي حقك صادم
ما عشانك انت
شان جيلنا القادم
شان طفلك ينشأ
معافى وسالم
ويكبر في رياض
وزهور وحمائم
شان طفلك يسلم
وما تكبر نادم
خليك أنسان
لي أمرك حازم
وحرك شفتيك
في وجه الظالم
حرك ايديك
في وجه الظالم
شان بكرة تعيش
زي البني أدم

ضياء الدين مدثر رجب
برلين
23.09.2014


[email protected]



تعليقات 3 | إهداء 0 | زيارات 849

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1114562 [عميليق]
5.00/5 (1 صوت)

09-25-2014 12:08 PM
يا اخوى صاحب القصيدة انت فى برلين نايم قفا ونحن فى الحر و الغبار ما قادرين ناكل . انا اقول لاخونا فى المهاجر مسؤلية تحرير السودان من هؤلاء الفسقة مسؤلية جماعية تهم كل سودانى تعالوا من منافيكم وشدوا حيلكم معانا عشان نشيل الناس ديل بره ونوريهم الويل زى ما ورونا ولكن انتو بعاد وبترسلوا لينا بس فى القصائد دى ما بتحل مشكلة لازم الكل يشارك مش يموتوا ناس وناس يجوا يلقوها باردة .

[عميليق]

ردود على عميليق
Germany [ضياء الدين مدثر] 09-25-2014 04:49 PM
تحية وسلام واحترام أخي عميليق
شكراً لك علي التعليق

الرحمة والمغفرة لشهداء سبتمبر الأبرار فهم خيارنا وأشجعنا ..فقد جادوا بدمائهم الطاهرة من أجلنا.
ولتكن صحوتنا جماعية في الداخل والخارج.. ايد على ايد بترمي بعيد... ,لنساهم جميعاً..الكحة ولا صمة الخشم..

الحر والغبار واصلنا في برلين..وسيصلنا حتى لو ذهبنا الي الاسكا وسيبريا..ربنا يعين.

كن بخير
مع فائق تقديري


#1114356 [خالد]
0.00/5 (0 صوت)

09-25-2014 09:32 AM
this pretty nice thank you brother

[خالد]

ردود على خالد
Germany [ضياء الدين مدثر] 09-25-2014 04:53 PM
Thanks for the compliment Khalid... May Allah bless your soul dear brother


#1114166 [بت البلد]
4.00/5 (1 صوت)

09-25-2014 12:47 AM
شعبك يا خوي خدعوهو زمان
غسلو المخ وحشوهو هلاوس
قالو لو تعال:
نديك في الجنة عرايس
أضرب طخ
وهاك مليون دولار واركب هايس
أكسح قش واعمل زي ما عايز
واسرح وامرح
انت السيد ومين غيرك عايش

شعبك ياخوي كلو مخدر
نايم يحلم فاكر انو عنتر
ولمن يصحا
جاري يكوس في اللقمه وباقي السطله
واحد نص ورشوشة فول وحبة شطة
بس قول يا رب
أرفع عنا الظلم وادينا الستره

[بت البلد]

ردود على بت البلد
Germany [ضياء الدين مدثر] 09-25-2014 04:30 PM
تحية وسلام واحترام بت البلد....
الشكر الجزيل للتعليق

اللهم أستر عوراتنا وأمن روعاتنا...
اللهم أرنا الحق حقا وأرزقنا اتباعه وأرنا الباطل باطلاً وارزقنا اجتنابه..

اللهم عليك بالظالمين وأعوان الظالمين فانهم لا يعجزونك..

اللهم تقبل شهداء سبتمبر في أعلى عليين...

مع فائق تقديري


ضياء الدين مدثر رجب
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة