09-25-2014 10:03 PM

image

وحشة عيونك... والضجر..
رحلة... متاهات الأسى..
السايقاني في دروب السهر..
أتاتي فوق ... جمر الصبر..
أمشي .... وأقيف..
والدنيا ... صيف ..
مكسور جناح ... وزماني راح..
داخل علي ...سكة رياح..
مجنونة ... في ليل الخريف..
وطول ... عمري ضيف..
وتصيح ...مزامير الشتاء...
تهبش ...جروحي تباغتا ..
وبجراح ... جديدة... أسكتا..
وقابض ... علي مجرى النزيف..
والحال ... شفيف..
ورغم الظروف.. بحلم أشوف..
منك طيوف ..لو بس تطوف ..
تغشاني في باقي السحر..
يا العيونك واحة...
لي قلبي العطوف..
وآخرمحطات السفر..
القاها كيف..؟
أتمسى بالرمش الوريف..
وامسح...تباريح النوى..
المنقوشة في ...كبدي الرهيف ..
وبيني بينك ..
قسوة الليل والمسافه ..
سهرة يوماتي ..بتشيلني..
لي ...فصولك وإختلافا..
يا جواب ...فتّر سؤالي..
في دروبك ...ناسي حالي..
نفسي... أتوسد هضابك ..
أسكب.. الروح في ترابك..
أبقى... في لوحك ... شرافه..
وبيني بينك .. سر كبير..
وريده... للنفس الأخير..
يشهد.. الشوق البطير..
فوق... جناحات الأثير..
إني... يا بحر العبير..
في ..عويناتك أسير..
يا مكمله .. في عفافك ..
وغاليه... زي دمعة ضفافك..
يا مأصله... يا ... قيافه ..
وبيني بينِنك سر إضافي..
لا هو..باين ... لا هو .. خافي..
همسه ... في بوح القوافي..
نابضه ... من وجع المنافي..
وارتعاشات ... المرافي..
والسهاد ... اللي موافي..
يامواسم ...فرحة جايه..
وبيّنا... ممتدة الحكايه..
ريدنا... فوق ليل المسافه..
وعارفو ... يا همي الخرافي..
إنو ... وعدك ما بجافي ..

وساعة ...عيوّنا اتلاقو ..
وإنتي ...بسمتي عاد ..
ولامسني ضيء عينيكي ..
يوم ...لقيا الميعاد..
هتفت ..جيوش الصحوه..
في ... غلس السهاد..
عشان ...يا يازينه..
إنتي ...حلم قديم..
ساكن ... خيالي مع الزمن..
في صحوي .. شايلك ضو نهار..
ومنامي ...لي طيفِك وطن..
ومضات ... حنينِك في سماي..
ساهرات.. وأبداً ما أنطفن ..
عاقد عليك .. أفراح سنيني..
الجايه.. في ركب المضن ..
حسيت وراك .. يوم غبتي..
إنو .. زماني راح ..
فتحّتي..في جمرات..
ظنوني ... سكك رياح..
نثرتي ... فوق شرخ الضياع ..
ملح ...الجراح..
وذوبتي ... في حر النوى..
عيون ... النواح ..
والليلة .. رجعتي الأمل..
بعد ... الوجل..
بالي .. استراح..

همست نواعسك ..في هوان ..
سألتني.. وينك من زمان ..
وعشان .. سؤالِك زي عتاب..
ضاع .. الجواب وبياني غاب..
خفت الكلام ..بعد السلام ..
يصبح ... ملام ..
ومن تاني ... نفتح باب خصام..
نكست ... هامة الإحترام ..
ورديت عليك ... من غير كلام ..
****
دولة الإمارات العربية المتحدة/ العين ..
25سبتمبر 2014

bargawibargawi@yahoo.com



تعليقات 0 | إهداء 0 | زيارات 641

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




محمد عبد الله برقاوي.
محمد عبد الله برقاوي.

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة