المقالات
السياسة
مع ثلاثى الوجع دكتور مصطفى وأحمد البلال وحسين خوجلى
مع ثلاثى الوجع دكتور مصطفى وأحمد البلال وحسين خوجلى
09-27-2014 02:46 AM

مع ثلاثى الوجع دكتور مصطفى وإستثمارته الفاشلة وأحمد البلال الطيب وتلميعاته وحسين خوجلى وخرمجاته التى لا تحصى
فى جزئية من حديث حسين خوجلى لم أتطرق إليها بالتعليق وحقيقة هذه الجزئية حسين يجترها إسبوعيا وأصبحت ممجوجه وتفضح جهله حتى بمعرفة الصحافة
حسين خوجلى يقول لك انا كيف احترم حزب ما عنده صحيفة
خلينا نسأل حسين خوجلى ما هى الصحيفة الناطقة بإسم الحزب الديمقراطى الحاكم فى أمريكا ؟
ما هى الصحيفة الناطقة بإسم الحزب الديمقراطى الحاكم فى أمريكا؟
ما هى الصحيفة الناطقة بإسم الحزب الجمهورى الأمريكى ؟
ما هى الصحيفة الناطقة بإسم حزب العمال البريطانى ؟
ما هى الصحيفة الناطقة بإسم الحزب ................؟
حسين خوجلى عنده فهم خاطىء أنه لازم يكون لكل حزب صحيفة تربطه بجمهوره ودا مش سياسة سليمة لأن سياسة الحزب تبلغ للقواعد عبر تنظيمات الحزب وليس أمر عام ينشر
بعدين حسين خوجلى كل مره يعكر دمنا أنا فى مجال الصحافة دى بعمل منذ نعومة أظافرى وأن كنت أنا لسع شايف أظافرك ناعمة يا حسين
اللت والعجن البتسووا فيهو فى ألوان والصحافة اليومية الأخرى دى موعمل صحفى يرقى لمصاف الصحافة العالمية – دى صحافة منقوصه لأنها ولدت فى بيئة قهر وكبت سياسى وأضطهاد وأى رئيس تحرير ينطق بالحق صحيفته حتصادر وتغلق ويغرم
أنتو يا حسين واشباهك فى الصحافة والرأى العام والأخبار والسودانى والتيار وأخواتهن لا تنقلون نبض الشارع – أنتم تنقلون نبض الحاكم ونبض الحاكم واصل لينا وصدقنى لو أوقفت كل الصحف اليومية السودانية المواطن لن تفرق معه إلا الصحف الرياضية عشان يعرف إتهزمنا كم فالبلد ليس فيها مؤشر سعاده وفرح – هزائم فى السياسة – هزائم فى الأقتصاد نتج عنها هزام إجتماعية وتدهور السودان فى الفن والأداب والفنون والكره من بينها نتاج للفشل السياسى الذى نتج عنه فشل إقتصادى أدى لفشل إجتماعى كامل
يا حسين نفترض أنك صحفى ختمى وليس لديك قناة فضائية أو إذاعة أو صحيفة ، وإتصل بك السيد محمد عثمان الميرغنى وطلب منك تكون رئيس تحرير لصحيفة ناطقة بإسم الحزب وأنت تعيش فى نفس الوضع السياسى الراهن – ورينا فى عمودك الراتب ( كلمة الأتحاديين ) ماذا ستقول ؟ عن ماذا ستكتب ؟ هل ستكتب عن فساد مكتب الوالى بالتفصيل ؟ هل ستكتب عن أسباب فصل الجنوب ؟ هل ستكتب عن حرب دارفور والتقتيل والتنكيل والتشريد الذى لحق بأهلنا فى دارفور ؟
تعرف كلامك الخبيث دا الذى تطلقه على الهواء مباشرة لشىء فى نفسك دون أن تملك الناس مرئياتك عن ضرورة وجود صحيفة للحزب لأنك لا تعرف حتى أهمية الصحيفة للحزب – الصحافة يا حسين تعنى الجهر – والعمل الحزبى لا يحتمل الجهر إلا فى حضور لجنته المركزية – حتى العلاقة بين الرئيس وأعضاء مركزية الحزب تأخذ طابع السرية
أنت يا حسين عاوز تصنع لكل حزب صحيفة تنقل مايدور فى كواليسه للشارع – دا حزب أم نادى رياضى
والله جهلك فاق الكبار والقدرك
أنت بكلامك دا جئت لتسىء للاحزاب المعارضة فأسئت لنفسك – مفروض تخجل وتانى ماترددها – عيب عليك
فى نظام الحكم الديمقراطى السليم ( وليس الحكومات العسكرية القابضة القهرية المتمكنة ) صاحب الأغلبية البرلمانية يشكل الحكومة وصاحب الأقلية البرلمانية يشكل المعارضة وحكومة الظل
عاوزكم تسألوا أى ناخب أمريكى منح صوته لأوباما هل هذا الناخب بيقرأ صحيفة الحزب ؟ هل هذا الناخب أشغل نفسه بالحزب أو أمر السياسة الخارجية الأمريكية ؟ هل أوباما لو عاوز يضرب داعش حيرجع للناخبين يستشيرهم ؟ الناخب الأمريكى ينتخب رئيس أمريكا وينتخب أعضاء أعضاء الكونغرس ومجلس الشيوخ ويمشى يتلفت لى رزقه يصنع فى الطائرات بدون طيار وسيارات جنرال موتور وحبوب الفياجرا وكل شىء يتركه لحكومته – لا بيقرأ شىء عن الحزب لا حكومته – إمور مرتبة – بس الشعب بيدخل فى الأشياء التى تخص قوته – ضرائب تأمين صحى وهكذا
نحن طبعا الحكومة مقصرة فى كل شىء من الطاقية للسروال عشان كده تحاول تتم حق الشبع للشعب كلام وفصاحة – غندور فى النيل الأبيض – غندور فى دنقلا – غندور فى نيالا – وفصاحة وكلام فارغ – ووالى يقول مرشحنا البشير ومافيش والى واحد قال عشان كده وكده وكده مرشحنا البشير – بس فى والى من دارفور أسمه جار النبى قال أخترنا ليكم البشير القوى الأمين – والله أنا بفتش لى فى طبيب عظام عاوز أسأل عن الركب الصناعية دى ممكن نقول على من يركبها بالقوى – أما الأمين فدى يكفى ما قاله حسين خوجلى فى عدم أمانة البشير والكلام مسجل عندى وعندكم صوت وصورة – فيا جار النبى الهيته بالهيته شوف غيرها – كل الذين يرشحون البشير ويتمسكون ببقائه يقولون فى ظل وجود البشير لن نسئل عما سرقناه ولن يصادر منا ما نهبناه لأنه ( القوى الأمين ) ومبروك عليكم
يا حسين خوجلى : يُطلق مصطلح السلطة الرابعة بالإنجليزية: Fourth Estate على وسائل الإعلام عموماً وعلى الصحافة بشكل خاص . ويستخدم المصطلح اليوم في سياق إبراز الدور المؤثر لوسائل الإعلام ليس في تعميم المعرفة والتوعية والتنوير فحسب ، بل في تشكيل الرأي، وتوجيه الرأي العام ، والإفصاح عن المعلومات ، وخلق القضايا ، وتمثيل الحكومة لدى الشعب ، وتمثيل الشعب لدى الحكومة ، وتمثيل الأمم لدى بعضها البعض ومنذ أول ظهورٍ مشهورٍ له منتصف القرن التاسع عشر، استخدم المصطلح بكثافة انسجاماً مع الطفرة التي رافقت الصحافة العالمية منذ ذاك الحين، ليستقر أخيراً على معناه الذي يشير بالذات إلى الصحافة وبالعموم إلى وسائل الاتصال الجماهيري كالإذاعة والتلفاز .
ويبدو أن تعبير "السلطة الرابعة" تعرض إلى فهم خاطئ في اللغة العربية، إذ يكثر ربطه بالسلطات الدستورية الثلاث ، التشريعية والتنفيذية والقضائية ، باعتبار أن الصحافة -أو وسائل الإعلام عموما ً- هي رابع سلطة دستورية نظير ما لها من تأثير ؛ إلا أن السلطة المعنية في المصطلح ، تبعاً لمن أطلقه أول مرة ، هي القوة التي تؤثر في الشعب وتعادل ، أو تفوق ، قوة الحكومة .
وهذه الأدوار يمكن أن تتحقق وتخلق وتنفذ على أرض الواقع من خلال صحافة حره نزيهه وليس من صحافة حزب – والصحافة لو تحزبت تقزمت ويقل تأثيرها على الشعب
يا حسين ماتطلقوا عبارات كثيرة ( باطنه فيه الرحمة وظاهره من قبله العذاب ) كلم نفسك وكلم صاحبك أحمد البلال ذاكرة الشعب لا تنسي والتاريخ لايرحم والعقاب سيكون قاسي
مثلا صاحبك البلال وجه سؤال ساذج لطبيب الأسنان مصطفى عثمان فى إجتماع جمع بينهما وولاة كردفان الثلاثة بالأبيض :
دكتور مصطفى فى شخص بيسأل عن منجزاتكم شنو فى المشاريع الإستثمارية ؟
هكذا جاء السؤال وما كان البلال محتاج أن يقول فى شخص بيسأل وكان يسأل هو مباشرة
دكتور مصطفى كان قارىء السؤال ومرتب الأجابة فنزل يسمع فيها الثلاثة
طوالى أنتقل الملمع الأنقاذى الصحفى أحمد البلال بالسؤال التالى لوالى شمال كردفان مما يعنى أن البلال خلاص إقتنع برد مصطفى عثمان
تعالوا نقرأ رد مصطفى عثمان إسماعيل
فماذا قال ؟
أبشركم أننا بصدد توقيع عقد مشروع زراعى لإنتحاب حب البطيخ فى جنوب دارفور ؟ تخيلوا معى حب بطيخ بعد ربع قرن ولم يبدأ حتى الأن
المشروع التانى دخول شركة كندية للبحث والإستكشاف عن البترول – يعنى قد يكتشفوا وقد لا يكتشفوا – وقد يكتشفوا بالنهار ويدفنوه بالنهار حتى تتغير الأوضاع السياسية لأن الكثير من الشركات ومن ضمنها شفرون حين تكتشف حقول بترول فى السودان الشمالى المسلم تتكتم عليه وتسمتها وتدفنها وتاخذ إحداثياتها لمقبل الأيام ولمان تجده فى حدود دولة الجنوب تكشف عنه ودا بيفضح ليكم أسباب أن غالبية الحقول المنتجة للبترول ضمن حدود الجنوب وحتى حقل هجليج تم الكشف عنه لأنه شفرون كانت تظن أن هجليج ضمن حدود جنوب السودان
فيا مصطفى لا حب البطيخ ولا البحث عن البترول موضوع يستحق أن تبشر به شعبك ودليل على فشلك ولا أدرى لماذا يصر البشير ان يكون ملف الإستثمار فى يدك
تعالوا أحدثكم عن مشروع مصطفى الإستثمارى الثالث – قال وقعنا عقد مع شركة نادك الزراعية لمشروع فى شمال كردفان وقد باشرت فى حفر الأبار
حقيقة انا زهلت بل صدمت – فقد تم نشر الخبر التالى منذ مايزيد عن عام وكان الوالى حينها معتصم ميرغنى زاكى الدين وإليكم الخبر :
تحصلت الشركة الوطنية للتنمية الزراعية "نادك" على 60 ألف فدان من الأراضي الاستثمارية في ولاية شمال كردفان السودانية لإقامة مشروع في مجال الإنتاج الحيواني وتربية الضأن ذلك ما كشف عنه حاكم ولاية شمال كردفان السودانية معتصم ميرغني زاكي الدين، مشيرا – حسبما نقلت صحيفة "الرياض"- إلى أنه زار مؤخرا السعودية بدعوة من شركة "نادك" وحصل على وعود بمشروعات استثمارية سعودية ضخمة وقال المسؤول السوداني إنه التقى خلال زيارته عددا من المستثمرين السعوديين أكدوا له رغبتهم في الدخول في مشاريع استثمارية بالولاية
الخبر دا كان بتاريخ 07/04/2013
بتاريخ 06-29-2013 دخل على الخط أسماء ضمت كل من المهندس عبدالباسط حمزة والمهندس وائل شتات والمهندس عبدالعزيز عثمان بتاع سوداتل – وثلاثتهم من الجماعة وعملية الأستثمار فى السودان تدار بسرية تامة وحقائق الإستثمار تغيب عن المواطنين وكنت أتمنى أن يحشر البلال دكتور مصطفى فى جحر ضب ويسأله عن علاقة المهندس عبدالباسط حمزة والمهندس وائل شتات والمهندس عبدالعزيز عثمان ولماذا مشاريع كبيرة زى المشروع دا مساحته 60 ألف فدان نسقيه من المخزون الجوفى غير المتجدد وطبعا كان مفروض البلال يكون ملم وعنده فكره أن الحكومة السعودية والتى لديها حوالى 20 متكون جوفى قررت عدم شراء القمح من المزارع السعودى فى مرحلة بدات فى 2008م وتنتهى 2016م يعنى بعد 2016م أىمزارع سعودى ينتج قمح المؤسسة العامة لصوامع الغلال السعودية مش حتشتريه منه وبعد كده حيكون عرضه لأحوال سوق القمح والعرض والطلب وطبعا أى مزارع لا يجد ضمانات شراء لا يزرع والسبب كان واضح وهو أن حكومة المملكة العربية السعودية لا تشجع زراعة القمح الشعير والعلف حفاظا على مخزونها الجوفى الغير متجدد لصالح أجيال الغد وأخوتنا فى السعودية عملوا دراسه وجدوا أنهم لو زرعوا العلف فى السودان فى مناطق الرى المطرى بولايات سنار وجنوب النيل الأزرق والنيل الأبيض يمكن أن يؤمنوا لمزارع إنتاح الحيوان والألبان ( الصافى المراعى نادك وغيرها ) علف داخل المملكة بنصف تكلفة إنتاجه محليا ففشل هذا المشروع السودانى السعودى وتحول المستثمر السعودى لبلاد بعيدة كألرجنتين للأسباب التالية { ( توجه لدى السعوديين للإستثمار الجماعى بالسودان ) { أكد " للإقتصادية " مستثمرون سعوديون فى السودان عن جدوى وأهمية الأستثمار الزراعى فى السودان ، خاصة فى مجال زراعة الأعلاف التى تقل تكلفتها بنسبة 50% عن السعودية . وشدد المزارعون على ضرورة أن يكون الأستثمار جماعيآ للحد من المخاطر والخسائر التى تعترض المستثمرين ، وذلك من خلال إقامة شركة سعودية للإستثمار فى السودان يكون ضمن أهدافها بحث طبيعة الأستثمار فى ذلك البلد ومعوقاته . وتعرف الأجتماع الذى نظمته اللجنة الزراعية فى غرفة الرياض أمس ، على تجارب مستثمرين سعوديين فى السودان على أرض الواقع وطبيعة المناخ الأستثمارى ومزاياه وحجم المشاكل التى إعترضتهم ، والتى تم حصرها فى : ( عدم توافر قطع الغيار للمعدات الزراعية فى السودان ، كثرة الرسوم والضرائب على المعدات والأليات الزراعية وإرتفاعها ، وجود إشكاليات متعددة فى موضوع ملكية الأرض لإعتراض الأهالى والقرويين على قرار الحكومة منح المستثمرين الأجانب أراضى زراعية على ضفاف النيل فى ولاياتهم ، إختلاف مرجعية القرار من منطقة لأخرى ، وجود تضارب فى الصلاحيات بين الولاة والمجالس التشريعية لكل ولاية ، عدم توافر وسائل نقل حديثة من مناطق الأنتاج الى الميناء ، عدم وجود محاكم خاصة للمستثمرين الأجانب لفض النزاعات العمالية ، ضعف البنية التحتية ، عدم توافر الأسمدة والمبيدات فى السوق السودانية ، عدم توافر سيولة نقدية فى المصارف السودانية وتغيير القوانين الخاصة بالمستثمرين الأجانب عدة مرات) }
نحن فى السودان حبانا الله بأراضى شاسعة خصبة تسقى بمياه الأمطار وأى إستثمار وطنى أو أجنبى فيها سيعود على العباد والبلاد بالخير العميم – للأسباب التى ذكرها الأخوة السعوديون فى صحيفتهم الأقتصادية فشلنا أن نستقطبهم ليأتى مشروع مطاخم لمنطقة السافنا الفقيرة مع الصحراء ( شمال كردفان ) يعنى ( نادك السعودية ) ستمارس ما كانت تمارسه فى وطنها – منطقة مخزون جوفى غير متجدد تحفر أبار – تجلب مولدات كهرباء تعمل بالجازولين – زراعة عالية الكلفة – يعنى الضان الذى ستنتجه شركة نادك سيكون ضان خليجى – يا مصطفى عثمان نحن الضان الحمرى البيرعى فى العشب المطرى وصل معانا فى عيد الأضحى دا للمليونين والمليون ونص جنيه – تفتكر خروف من إنتاج نادك قشه بالجازولين ومويته بالجازولين حيصلنا فى الضحية الجاية بكم جنيه
بعدين المخزون الجوفى لمتكونات المياه فى حوض بارا وحوض النوبة
جاء على الراكوبة : (سونا) اعلن الدكتور مصطفي عثمان اسماعيل الوزير بالمجلس الاعلي للاستثمار ان السودان سيستقبل الاسبوع المقبل مستثمرا سعوديا سيعمل علي تنفيذ عدد من المشروعات المجال الزراعي والحيواني وكشف سيادته في منبر سونا الذي خصص للمؤتمر الاول لأداء الاعمال في السودان الذي سيقام يومي 18 و19 يونيو القادمين ان المستثمر سيعمل علي الاستثمار الزراعي في مساحة (5, 1 ) مليون ونصف فدان في منطقة الحوض النوبي .
عارفين لا البلال لا واحد من الحضور فى المؤتمر الأول لأداء الأعمال فى السودان قال ليهو عيب عليك يا راجل ربنا أدانا موارد مائية متجددة – الأنهر والجداول الموسمية والأمطار والسيول دا كله نسيبه ونستثمر من مياه الحوض النوبى الغير متجددة ومع أيه مع نادك وكمان إنتو مشيتوا شفتوا إنجازاتها فى حرض تركت زراعة العلف حفاظا على مياه المخزون الجوفى الغير متجدد – طبعا نحن لا عندنا ناس بتفكر لبكره خليك من الحفاظ على حقوق أجيال الغد
وكمان فرحان يا دكتور مصطفى
والله لا مشروع حب البطيخ يعتبر إنجاز
ولا مشروع الشركة الكندية للبحث والإستكشاف عن البترول
ولا تربية ضان حمرى بمياه جوفية تستخرج من جوف الأرض بإستخدام مضخات تعمل بالكهرباء المنتجة من الوقود عال الكلفة
عشان كده خروف نادك مصمم كخروف خليجى يربى فى السودان ويباع فى الخليج
ويا خبر بفلوس بكره ببلاش
جاتنى رسالة من الأهل بالسودان على الواتساب قالوا السنة دى الضحية سامسونج جلاكسي بإثنين مليون جنيه
السنة الجاية حتجينا رسالة على الواتساب تقول الضحية أيفون أس 6 نادك بخمسة مليون جنيه
وشوفوا الولد مصطفى شاطر كيف فى الأستثمار
لو ماقدرتوا تشتروا الخروف عندكم حب بطيخ سوهو فسفس

[email protected]


تعليقات 8 | إهداء 0 | زيارات 2395

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1116945 [المكشكش]
0.00/5 (0 صوت)

09-28-2014 08:56 PM
FORTH ESTATE OR FOURTH STATE , ACCORDING TO MY KNOLEDGE : ESTATE MEANS :(BUILDING OR AQAR IN ARABIC ) , WHO IS STUPID ME OR YOU )?

[المكشكش]

#1116792 [العكليت]
0.00/5 (0 صوت)

09-28-2014 04:56 PM
ياباشمهندس كفيت واوفيت والله , التلاتة الذكرتهم ديل والله انا مكجنهم لله فى لله وحسن خوجلى ده بالذات اكتر واحد جاهل ومستفذ وكذاب واحمد البلال ده افة براو, اما طبيب الاسنان ده حليف الفشل والله وماينفع فى اى حاجة اخير ليو يمشي بيتهم بس يقطع وشو ياقول الجماعة .
لا اسكت الله لكم حسا

[العكليت]

#1116252 [المشلهت]
0.00/5 (0 صوت)

09-28-2014 12:44 AM
ان شاالله يا باشمهندس الجماعة ديل يكونوا قروا ليك موضوعك دة ويقدروا ليك جهدك. بس الانتاج الفكري الزي دة ما يروح بندق في بحر.

[المشلهت]

#1116204 [ود الفاضل]
0.00/5 (0 صوت)

09-27-2014 11:03 PM
والله ياباش مهندس انت الوحيد المفروض ان يطلق عليك لقب السوداني رقم (1) وابشر بالخير ياود ملوك النيل ....... ستصفو الليالي بعد كدرتها وكل دور اذا ماتم ينقلب ...... الان البلد يديرها السنبر وطير الرهو ، ولكن سيأتي اليوم الذي يتسنم فيه القيادة الاسود الاشاوس ..... والايام دول ...

[ود الفاضل]

#1115907 [المهندس سلمان إسماعيل بخيت على]
0.00/5 (0 صوت)

09-27-2014 02:50 PM
تسلمت رسالة الأن عبر بريدى الالكترونى من شخص يتابع كتاباتى - قال كنا نتابع برنامج مع حسين خوجلى وعنده بنت سألته دا منو يا أبوى ؟ قال قلت ليها دا الكضاب
بعد كم يوم شافت ترباس يغنى فى التلفزيون جات وقالت ليهو يا ابوى تعال شوف الكضاب بيغنى
مع الإعتذار للأستاذ كمال ترباس الذى لم يسىء فى حياته ولو مرة واحدة للسودان أو شعبه
بل يملاه طربا وفرحا حين عز الفرح فى دولة الجوع والفقر والمعاناة
معليش ياترباس طفله والمشكلة عمامتك كل من هب ودب سوي زيها عشان يزيد طول وبيفتكروها رمز للرجولة حتى لو وضعت على راس من لا يحمل ذرة من رجولة ، فمن يقف ضد إرادة شعبه لا يتصف بالرجولة

[المهندس سلمان إسماعيل بخيت على]

#1115831 [whbah]
4.00/5 (1 صوت)

09-27-2014 01:02 PM
يا باشمهندس شنو حكايتك مع حسين خوجلي ,,انت ما عندك شغلة غير قولات حسين خوجلي ,,,,انت عامل ليه تلميع اكتر من جريدة الوان وقناة امدرمان,,
اجتهد وورينا قولاتك انت ,,, سيبك من حسين خوجلي.

[whbah]

ردود على whbah
United Arab Emirates [حسن جحا من كوستى] 09-28-2014 02:55 PM
حكايته حكاية , والزول مسيكين والواحد بقى يحن عليهو وعلي عمره اللي ما بقي منه شئ

Saudi Arabia [mahmoudjadeed] 09-27-2014 09:32 PM
طلاق بالتلاته ؟!! يا راجل استحي !!. أحلف بالله أو اصمت .

[المهندس سلمان إسماعيل بخيت على] 09-27-2014 07:39 PM
عارف يا [Whbah] سؤالك الساذج هذا ذكرنى بسؤال ممثل الأدعاء للشاهد الماشافش حاجة الممثل عادل إمام
ايه علاقتك بالجنس الأخر ؟ قال ليهو زى علاقتي كده بساعدتك
لمان شرح ليهو قال ليهو هو فى جنس تانى بورانا نحن مش عارفنه
أنا بسألك يا [Whbah] ايه علاقتك أنت بالجنس الأخر عشان أنا أجتهد وأجيب على سؤالك ( اجتهد وورينا قولاتك انت ) علما أنى لم أفهم شىء

[المهندس سلمان إسماعيل بخيت على] 09-27-2014 03:36 PM
على الطلاق بالتلاته يا Whbah] ما أسيبه حتى يسيب هو الخرمجة وينحاز للوطن والشعب
انا تعرضت لثلاثة مصطفى والبلال وحسين
ليه قلبك على حسين ؟ شغال معاه أم انت الحرس بتاع الهدف القاعد قدام الباب ومشيت تتوضأ وخليت الترمسة والكرسي فى الشارع
نحن عارفين شباب كثر ظروف عملهم ربطتهم بهذه الجماعة لكن أن شاء الله الفرج قريب
بعدين أنت بتكتب كلام مبهم ولا معنى له
ماذا تقصد بـ ( اجتهد وورينا قولاتك انت ,,, سيبك من حسين خوجلي. )
أنت يظهر عليك كلامى دا كله ما طلعت منه بأى فائدة
معذور تعليم الإنقاذ مابيفرق شىء عن الأمية - أولاد عم


#1115635 [الحلومر]
5.00/5 (1 صوت)

09-27-2014 07:38 AM
ردود لابو الخير
لا ما كفاية دا كلام مهم لازم تعرف الناس هذا النوع من الاستثمار ضار بالبلد وتبديد لثروات الاجيال القادمة ،الناس هسع ماكلة نيم والجيل البعدنا النيم زاتو م يلقاه

[الحلومر]

ردود على الحلومر
[المهندس سلمان إسماعيل بخيت على] 09-27-2014 02:30 PM
صح لسانك يا [الحلومر] وأنت وأبو الخير عاوزنكم تنتقلوا من خانة المعلقين لكتاب لأن ليكم موهبة الكتابة وتحملون هموم الوطن والمواطن


#1115596 [ابو الخير]
5.00/5 (1 صوت)

09-27-2014 04:24 AM
هؤلاء الثلاثة قاصرين يا باشمهندس لايعون مايقولون
ما تحرق اعصابنا واعصابك
كفاية

[ابو الخير]

ردود على ابو الخير
[المهندس سلمان إسماعيل بخيت على] 09-27-2014 02:55 PM
عارف يا أبو الخير واحد سألنى لو دارفور وكردفان ديل فصلتا عن السودان ودا أمر متوقع فى ظل سياسة حزب المؤتمر الوطنى - وحسب مخطط برنارد لويس الذى بدا تطبيقه على الأرض بفصل الجنوب ومؤاشرات الحرب على دولة الإسلام فى العراق وسوريا ( داعش ) والتى سوف تستمر للحرب على دولة الإسلام فى مصر والسودان ( دامس ) دولتي كردفان ودارفور من أين يشرب إنسانهما وقد يكون فى تلك الفترة أستنزفت زراعة علف الحيوانات 80% من المخزن الجوفى - بس يرجو المطر وكل واحد يملأ جركاناته للخريف الجايي

[المهندس سلمان إسماعيل بخيت على] 09-27-2014 02:25 PM
على الطلاق بالتلاتة يا أبو الخير وأموت على سوء الخاتمة ما أخليهم يبدوا حتى مخزوننا الجوفى الغير متجدد وأجيال الغد تجي تشرب شنو الموية الفى الحوض النوبى دى ماء ملك لإنسان دارفور وكردفان عشان تقام عليها مشاريع مياه شرب شاملة ونعنى بها يحفر حقل مثلا به 100 بئر على الحوض النوبى وتصصم لمياهه محطة تنقية ثم خطوط نقل تنقل مياه المشروع الشامل للأبيض والفاشر وبقية مدن وبلدات دارفور وكردفان
الحوض النوبى دا جزء منه فى ليبيا القذافى عمل فيهو مشروع النهر العظيم ونحن نعمل فيه مشروع الخروف السمين
أنتو عارفين زراعة علف حيوانى يعنى شنو ؟
دا معناه إستهلاك مايزيد عن 80% من المخزون فى فترة 3 الى 4 عقود
عشان كده الشعوب التى تفهم وقفت زرع القمح والعلف من المخزون المائى الغير متجدد
يا جماعة طبيب أسنان فهمه كله لم يتجاوز المسافة بين الفك الأسفل والأعلى وعلمه لم يخرج من الخشم العرفه شنو بحقوق أجيال الغد والله دكتور مصطفى دا لو رسلتوه لينا ندخله ليكم مدرسة من جديد أما السائل ( البلال ) يا جاهل وهذه مصيبة أم منافق مسترزق بيدوه أسئلة يقولوا ليهو أسألنا السؤال هذا فى برنامجك عشان نرد عليه ونحقق مكاسب مع شعبنا نحن خاشين إنتخابات وهذه يا البلال مرحلة أخطر من الجهل
ويا سيدى ابو الخير الصمت على هؤلاء يعتبر جريمة ضد المواطن وضد الوطن والساكت عنها شيطان أخرص
وأنا أفضل أن أحرق أعصابى ولا أن أكون شيطان أخرص
وأظن أنت توافقنى الرأى وأنت موهوب فلا تكتفى بالتعليق نريد أن نقرأ لك مقالات مطولة
وشكرا


المهندس سلمان إسماعيل بخيت على
 المهندس سلمان إسماعيل بخيت على

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة