المقالات
السياسة
أنا ,,تاني مازول دواس
أنا ,,تاني مازول دواس
09-28-2014 03:31 AM

قصة فصيرة


نزلونا فى غابة ود الجاك ووزعونا لحراسة البابورات وكنا ماشين كدارى بعيد من البحر عشان الخوارج مايهاجموا البابورات ومشينا النهار كلو وقريب المغرب كان قدامنا توج (مستنقع) وقالوا نقطع التوج ونبيت الليله وباكر إن شاء الله نستمر فى التحرك !!كان فى الفصيله معاي ناصر (أدروب) قصير ونحيف هدندوى عندو شنب يلمس فيهو النهار كلو وعويناتو صغار كل مايتعب عسكرى من المشي يقول ليهو شوف (أنهنا ماشين بكان سيدنا موسي خلي السمكه بتاعو مع الزول السالح(الصالح) وعاوزين نعرف نهاية البحر ده نشوف المويه البلف(المفتاح) بتاعوا وين نقفلوا ونرجع الخرتوم عشان الخوارج تانى مايجونا وتمش أهلك تانى ماتدقس تجي الديش كويس؟؟ !!! والعسكرى الإصيفر من الشماليه إسمو الطيب ملقب ولا أسمو ماعارف بقولو ليهو ( حدباي)كل دقيقه والثانيه تسمعوا يغنى فى الدوبيت قال جدو كان همباتى وحافظ كل دوباى جدو ومرات يألف من راسوا يقول ليك جدى قال كدى ويقول ليك حرٌم جدى بقلع حمرة عين الله يرحمه !! والعريف آدم يونس العساكر بنادوهو ب(وليد دارفور) حجباتوا شحنة لورى !! فى مرة أدروب عاين ليهو كده وضحك آدم قال ليهو ياأدروب مالك بتضحك قال ليهو( والله ياآدم البشوف حجباتك يقول الله مايكتلك !!!!.ومعانا إسماعيل الملقب (بالمقنو) من أولاد النوبه والله الزول ده جسمو صغير وقصير لكن لو نشن ليك بالآربجي لو ختيت فنجال قهوة فى فرع شجره يقلعوا ليك ومايلمس الفرع !!العساكر قالوا ليهو إنت خواف قال ليهم والله أرجل واحد فيكم ورونى فزيت(هربت) متين من الدواس قالوا ليهو تتذكر ضربة الجرار هجليج يوم الخوارج ضربوا الجرار فى نص البحر والجرار الحريقه قامت فوقوا ياالمقنو إنت طلعت من البحر ببندقيتك وشنطتك بتاعة الذخيرة مافقدت ولا حاجه !!!قال ليهم طيب مالناس كلها خرجت من البابور أنا أحرق براى دى رجاله ؟؟؟قالوا ليهو لا لكن إنت مابتعوم ورينا طلعت كيف ؟؟؟وضحكوا قال ليهم طلعت رجاله ولو ماراجل وقوى ماكان طلعت يمين !!!وكان معانا( كوك لول ضور ) من المورلى وكان معانا (بويا سودانى) من الددنقا سألنا بويا ده كان مابصلى معانا ولا مع المسيحيين قال لينا والله انا ماعندى دين وأبوى وجدى ماعندهم دين لأنو جدى وصي أبوى وقال ليهو المسلم كتير (يعنى مذاهب وشيع وطرق) وكلهم قالوا بعرفوا ربنا والمسيحيين كتير وكلهم قالوا بعرفوا ربنا واليهود قالوا بعرفوا ربنا وناس الكجور قالوا بعرفوا ربنا إنت تتعب ساي وبعدين تتبع واحد مايوصلك لربنا تكون تعبان ساي لمن واحد منهم يقول ليك انا بوصلك هسع لربنا أمش معاه (توالي) على طول ويقول ليك ياهو ده ربنا !!!وكمان العسكرى الدينكاوى الإسموا ,,منو كده( شان) ده عجيب قال يوم القيامه بقيف قدام ربنا وبقول ليهو زى كلام بويا سودانى وكمان قال أنا بلبس تمام وبقيف إنتباه بقول لربنا والله ياربنا المسلم والمسيح واليهود والكجور كلهم قالوا بعرفو إنت وأنا ماعارف الصاح منو من الغلط عشان كده أنا (بجي فى النس) يقصد فى النص والعساكر يضحكو والشلكاوى الإسمو( لويجي فاقان) يقول ليهم هسع إنتو المسلمين ناس ماكويسين مع ربنا يقولوا ليهو ليه؟؟ يقول ليهم أى واحد يموت تقولو ربنا كتلو ينكسر ربنا كسروا أى هاجه(حاجه) تحصل تقولو ربنا ربنا,, يعنى أنا بنشن صاح وبضرب الخارج والخار ج يموت تقولو ربنا كتلو؟؟ ربنا بجر التتك بتاع بندقية بتاعي يعني ؟؟ ولو الخارج عمل تنشين صاح وضرب أنا تقولوا شهيد ربنا يقبلوا يعنى ربنا تعبان معاكم شديد أى حاجه تعملوه تقولوا ربنا ربنا بعمل حاجات كويس الحاجات البطال ده تعملو إنتو وتقولو ده رنبا ماحرام عليكم ؟؟ آها نسيت أقول ليك رقيب أول السريه بتاعتنا كان إسمو( مجاك مجيك أجاك) العساكر بقولو عليهو مجاك مجيك كان جيتو بجيك وكان ماجيتو بجيك الزول ده لمن وصلنا الخور الماتو فيهو ناس الطوف بتاع المتحرك القبالنا داك لقينا ليك عضام الناس مشروره ومشتته يمين تقول دى سلخانة عضام بيييييييييييض كرعين وروسين وكاكي مقطع وخزن بنادق يمين خزنة البندقية تلقاها مضروبة أكتر من عشرة طلقه تقول تخته زولك مجاك وقف وعاين يمين وشمال ووشوا بقى أسود وعيونوا حمرت ورطن واتكلم عربى وقلت الزول ده داير يخش الغابه أحسن نلحقو نعرفو ناوى علي شنو قلت ليهو مجاك يامجاك مجاك المره الثالثه حتى قال لي أيوه قلت ليهو مالك ؟؟؟والله الزول عاين لي وعاين للعضام وقال لي وعيونو فى عيوني ياأهمد(أحمد) بالله يوم القيامه ده لو جا وربنا جاب عمر بشير وجون قرنق وقال ليهم (إنتو عملتو كده ليه ؟؟) تفتكر ناس دى تقول لربنا شنو؟؟؟قلت ليهو ياأخوى خليك من عمر وقرنق لو ماعملنا حسابنا أخوانك الفى الغابه هسع بحصلونا الجماعه ديل أنحنا فى الفيها لو ماعملنا حسابنا قيامتنا بتقوم هنا وعمر البشير وقرنق راقدين قفا وماعارفين الحاصل لينا شنو ؟؟بعدين يوم القيامه الله يدخلهم جهنم ولاجنة هو مخير العساكر ديل لو شافوك كده بقولوا إتجرست !!غايتو قلت الله يستر الزول ده مايزوغ بالليل ويحصل أخوانو فى الغابه لكن والله الزول كان متأثر شديد .والغربيه العسكرى الإسمو (الليجا قايين) الزانداوى (زاندى) الزول ده يوم يكون عليهو النبطشيه بتاعة كفتيرة الشاى يقوم من الدغش يعمل الشاى ويكورك للعساكر كبايتك كبايتك كبايتك قوم سلى (صلى ) وتقول ليهو لا إله إلا الله يقول ليك محمد رسول الله وبقول مسيحي إتخيل وكمان لو دخل فى غلاط مع عسكرى يقول ليهو يازول لاإله إلا الله لو العسكرى ماتماها يقول ليهو تمو تمو إلا يتمو ليهو الشهاده !!إتخيل سألناه إنت مسيحى ومالك ومال تمومة الشهاده بمحمد رسول الله قال لينا يعنى محمد ده مش سوداني ؟؟يعنى أنحنا مانقول معاكم فيها شنو يعنى ؟؟؟والطريفى ود الدندر لمن يشوف جوطتنا مع الجماعه ديل يقول ليك ياناس خلو الخلق لخالقها العود اليابس تعدلوا كيف خلوهم فى حالهم !!كدى شوفو لي واحده من قريبات الجماعة ديل أعرسها حرم أجيب ليكم مسملين لكن خوالهم ديل خلوهم الله يهديهم !!
والله المتحرك بتاعنا داك كان كلو حكاوى من الله ماخلقني مالقيت زول ماعندو أهل !! تصدق واحد من ناس الخدمه الإلزاميه إسمو مابتذكرو بس العساكر بقولو ليهو (أب جاكومه) تشوف الخلقه شنبا كارب وشعر كتير ووجه بني آدم تقول والله خريج جامعه ولا زولا جابوه زي ناس المجاهدين البتكلمو فى الدين لكين لمن تسألوا والله ماعارف (التكتح) بس يقول ليك أبوى مغترب , مغترب وين يقول ليك مغترب !! وجندوك كيف يقول ليك أنا طالع من الحاج يوسف ماشي بحرى ناس الكشه بتاعين الإلزاميه قبضونى ورفعوني معاكم !!يمين الفصل البقرا فيهو سنة كم ماعارفو عليك الله شوف !!ده بداوس شنو؟؟وتانى فى واحد إسمو (أب شعير)شعرو سبيبي ياربى من الجزيره ولا بحر أبيض ماعارف والله أب شعير ده مات لينا بالملاريا ساكت الزول نحيف تقول ماعندو دم ,,الله يجازيكم ياناس الإلزاميه والمجاهدين البقع فى قبضتكم بتودوه الطويشه !! وكمان تاني فى واحد تالت برضو العساكر بقولو ليهو( سواق القصه ) ده لمن فارقتو ماعارف إسمو بس سواق القصه أخدر(أسود) نحيف ومسكين من سنار ولا النيل الأزرق ماعارف,, العساكر قالوا كان مسك القصه مابفكها من قصه يدخل ليك فى قصه لمن تنوم وتقوم تلقاه بحكي !!! وتاني كمان فى واحد بقولو عليهو( أبو القدح )تشوفو تقول الزول ده ***** ساكت ,,فى يوم كنت رقيب نبطشي (نوبتجي مناوب) وأنا ماشي بفتش على الخنادق بالليل لقيت ليك أبوالقدح عندو مفراكه بفرك فى شئ والجماعة قاعدين معاه بقولو ليهو أسرع ياأبوالقدح(أبوانقدح) تصدق كان بلمو ليهو القرقوش وباقى الطحنيه ويكب فيهم الخميره وجماعتك يسكروساكت وواحد منهم قال ليهو والله لو لقينا لينا صفيحة طحنية نعمل حفلة كاربه !!قلت ليهم قومو يكربكم فى بيت النمل!!!
والله ياأخوانا كان عندنا كتيبة تحيرك شوف الناس الحكيت ليك بيهم ديل وكمان معانا الوكيل عريف حسن (بصلي)الزول ده وكت ماتسأل منو يقولو ليك بصلي العساكر سموه حسن بصلي .والغريبه معاه فى نفس الجماعه حسن (فلكانج) ده كمان كل ونستو من الصره وتحت وجنو نسوان قالوا لو ماشين فى الخلا وعينو شافت دلقان ملون برفعو ويشمو ويجدعو يقول ليك( الله ماحرمنا من العوين أنحنا كان ماهن كان جينا هنى؟)
آها نسيت أقول ليك قالوا نعدى من التوج ونبيت والبابورات فاتت التوج مسافة زى تلاته كيلو زى ماقال بتاع الإشارة فى إشارتو لناس ملكان (ملكال) قال ليهم إشتبكنا على مسافة تلاتة كيلو من التوج وكنت بسمع ليهو برسل فى إشارتو . ثانى يوم للدوسه . والله نص عساكرنا فى التوج والنص التانى قطعو التوج والكمين يولع نار تقول السما حرقت أربجيهات وقرنوفات ودوشكات ولعوا فينا النار وكمان بضربوا على البابورات عشان ماتساعدنا تنشغل بنفسها وبعدين يقبلوا عليها ,,يازول الشمس غابت والذخيره مدوره والمطره فوقنا ترعد والبرق يشلع ومافيش دقايق بس ومع مغيب الشمس المطره تقول السماء إنقد ولا نزل الواطاه ,, النار تهدأ شويه والخوارج يكوركو ليك أقبض بسكويت الجبهة معرسين(معرصين) وعندنا عساكر قلوبهم حارة يكوركو ليك فيهم ياعبيد الخواجات ياكلاب النصارى ياماجورين ,,مطره وذخيرة وصواقع والغريبه فى حشرة بقولو ليها الجوهره بالليل بتضوى وتطفى مافى فرق بينها والطلقه بتاعة الكلاش المضيئه تجيك الحشره دى تزوغ تقول طلقه وتجيك الطلقه ماتعرفها لمن تعدى حتى إنت تاخد ليك زوغه والله العظيم حتى القعونج(الضفادع)سكتت من كترة الردمي(الضرب) يعنى زي الساعة حداشر ونص بالليل شوية الذخيرة خفت وبعد داك تسمع فلان مضروب وفلان شهيد والعساكر ينقلو فيهم للمساعد الطبي بتاع المتحرك ماعارف يحصل منو ويخلى منو والطين والزفاره بتاعت الدم في ناس يقولو ليك ياجماعة أنا خلونى تاني مانافع حصلو التانيين وفى واحدين يتنبروا يقول ليك أنا أخو البنات والله الليلة ديك ماأنساها ليوم القيامه !!آها نسيت العساكر قالو أدروب لمن الضرب وقف قال ( والله حاجه عجيبه بلد حشراتو مضيئة وذخيرتو مضيئة ومطرة كمان وصواقع مضيئة الله تعلم تانى أدروب تشوف بورسودان !!) وصدقنى معانا ملازم قال أهلو من حلة حمد بحرى العساكر حاقرنو بقولو ليهو( باشنقو)الزول ده ماعرفناه مضروب إلا الشمس طلعت لا قال ودوني الوابورات ولا قال أنا فلان قلت ليهم صحي الرجال( دناقر ماكبر عناقر) (أى الرجل بالمنبت والمنشأ وليس جهامة) مامات لكن إيدو قطعوها والدينكاوى القال بقول ل الله أنا فى النص إستشهد ماعارف يكون قال ليهو شنو؟ والليجا قايين الزانداوى برضو إستشهد والمقنو قطعو كراعو ومجاك مجيك الرقيب أول تصدق الزول ده مسكو الجن كل مالشمس طلعت يقوم يكورك هجوم هجوم ويقول للعساكر قوموا نهجم الخوارج قريب بعاينو ليكم وإنتو( جبانات)والله سفروه الشمال جينا لقيناه لافى لابس كاكي فى الشمال برضو وعامل هجوم قلت ليهو والله أخوانك ماعملوا فيك خير الله يجازيهم .وأنا ياهو كراعي قطعوها وعندى مقذوف فى الورك مامرق لليله !!عرفت يافضل الله وين كراعي قطعوها ؟؟وناس كتار يعاين ليك ويقول ده كراعو قطعوها ياسكرى ياأنقلبت بيهو عربيه !!ماعارفين كراعي دي أنا زاتى ماعارف الجماعه دفنوها ولاخلوها أكلها المرفعين ؟؟.والله العظيم أنحنا زمان بعساكرنا القلت ليك عنهم ديل يمين الكمين يضرب علينا تسمعهم كلهم بصوت واحد يقولوا ليك ( الله أكبر هجوم ) ويهجمو مافى زول بنوم فى الواطاه يمين زمزمية المويه مليانه عرقي ويكورك الله أكبر كفار علي مسلمين تسمعهم يكوركو الله أكبر ماعارف الله أكبر بتاعتكم البرفعو ليها الأصبع دى حقت شنو ؟؟؟
وتدخل فضل الله وهو عريف معاش وصاحب الدكان الصغير الذى يجلسون أمامه مقاطعا ياأحمد ياأخوى الفات خليهو كلنا داوسنا والليله الناس محتاجه للناس العندهم خبره زيك الجنوب إنفصل , فقاطعه أحمد يافضل الله , ذكرتنى حاجة قايد سريتنا كان نقيب إسمو جمال أحدب نحيف قال ياجماعة مطرة وذخيرة وصواقع وطين وضلام وناس مجروحين يكوركو وناس ميتين مافي زول عارف مكانهم إلا الشمس تطلع ياجماعة الناس الإنحنا بنداوس فيهم ديل على حق ولا شنو؟؟والله كلام النقيب ده أنا لمن الجنوب إنفصل إتذكرتو !!! آها وناسنا الماتو ديل ياربى راحو فيها ساكت؟؟ !!!ماكان ممكن بدل الحرب تتحل المشكله بدون موت يعنى شنو بعد الموت ده كلو يجو يقولو دايرين نحلها سلمية من زمان كان السلميه دي مافيش ولا راحت السكره وجات الفكره ؟؟ زمان كنا مستجدين فى المركز جابو لينا ملازم نسيت إسمو بقولو ليهو الجعلى أنا لقيتو نزلوا المعاش ورقوه عميد ولا عقيد ماعارف فى سنة 91 بعد 25 سنة خدمة هسع سمعنا قالوا ظابط كبير برتبة عميد في القوات الإسمها التدخل السريع البقولو عليها الجنجويد خدمتو كلها 9 سنوات ده زمان كان عريف مابحصلها زى ده بشتغل معاه كيف ؟؟ده العسكريه يكون ماعارف صفا من إنتباه !! نحمد الله على حالنا ده قبال شهرين النور قال لي جا زول من الخرطوم عاوزين يعملو حاجه إسمها قدام المحاربين والله قال الزول ده فى الإجتماع بتاع المعاشيين الضباط وضباط الصف لمن كلموه كلام حار وقالو ليهو حالنا بقي بطال قال ليهم ياناس أحمدو الله والله أخوانكم فى سجن الهدى حالتهم تحنن !!!!يعنى ديل ناس شيكات ولا ديون ولا سلفيات من بنوك ماعارف !!!شوفو ياجماعه والله العظيم أنا عندى تلاته عيال وبت كلهم طلعو أميين زي أبوهم بدون قراية وأنا كنت مابين ملكان وجوبا هسع العيال خلو عيالهم وفاتو الدهب والبت عرست ليها وماعندى غير خمسة غنمايات وتيس وجدادات (دجاجات) وقاعد مع أهلى فى الحله يمين بالله لو تاني قالوا لي أرجع الجيش بكراعي المقطوعه دى ويختو لي كرسى وأصرف أوامر زي اللواء على بالطلاق أقول ليهم لا,, أنا تاني مازول دواس!!!!!
وودع الرقيب معاش أحمد رفاقه من المعاشيين وركب اللورى بعد أن قام ببيع ثلاثة من الديوك التى كان يحملها معلقة على اللورى واشترى بعضا من حاجياته وركب اللورى عائدا لقريته ويلوح بيده لزملائه قائلا( أنحنا فى الحله نايمين قفا إنتو ياناس المدينة خليكم مع الكهربا قطعت والمويه قطعت وأنبوبة الغاز قطعت الله يقطع رقبة المقاطيع ناس الدقون الجننونكم وبشتنوكم لاعرفناكم كفار ولامسلمين ياناس البندر الله بيننا وبينكم ).

إسماعيل البشارى زين العابدين حسين
[email protected]


تعليقات 2 | إهداء 0 | زيارات 1024

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1116883 [هامش الهامش]
3.88/5 (17 صوت)

09-28-2014 06:56 PM
مدهش ومبدع يا البشاري. حكاويك ممتعة رغم ألم المعاناة ، وقصتك شيقة رغم الدماء السالت وديان وضياع الجنوب. ذكرتني مذكرات عملاق الأدب الأفريقي (شينوا أشيبي) عن مآسي وآلام حرب اقليم (بيافرا). نأمل أن تواصل الحكي موثقا عن الفترة التي قضيتها في الخدمة ضابطا وبعد احالتك للمعاش فأدب الحرب هو ما نفتقده في السودان والاجترار بأثر رجعي يعطي الكتابة مفعول التخفيف عن الألم كالدواء المسكن.
أتذكر قصص وقصائد البرفسير (تعبان لو ليونغ) من جنوب السودان عن حرب (أنانيا الأولى) والتي لم يهتم بها الا القليل في السودان الموحد رغم أنه كتب عن الشمال والجنوب وكانت له ندوة يقيمها في المركز الثقافي البريطاني (الخرطوم) كل يوم أربعاء في العام 1987 تعقبها ورشة عن الكتابة الابداعية بالانجليزية وكانت مفيدة للغاية رغم عدم اهتمام مثقفي الشمال بها ولقد استفدنا منها كثيرا.
قرأت لك كل ما كتبته بالفصحي تقريبا يا البشاري خاصة في قضايا كردفان الكبرى والسودان عامة، فلغتك الفصحى رصينة فلماذا الكتابة بالدارجة هذه المرة هل لخصوصية الموضوع لذا تريد له المحلية فقط؟ هنا في الولايات المتحدة نشرت عدة كتب بالانجليزية عبارة عن مذكرات أيام الحرب كتبها بعض الاخوة من الجنوب ودارفور بمساعدة بعض الكتاب الأمريكيين وقد أعجبت جدا بكتابThey Poured Fire on Us From the Sky والذي يحكي قصة ثلاثة شبان من الدينكا هربوا من قريتهم بعد هجوم من الجيش الحكومي وكذلك كتاب what is the What وهو يحكي عن المآسي التي خلفتها قوات المراحيل في شمال بحر الغزال والعلاقة العميقة بين الدينكا وقطعان ماشيتهم، وهو كتاب شيق وسيعجبك بالتأكيد لعلاقتك الوطيدة مع تلك القوات رغم وجود بعض المعلومات الغير دقيقة وهنالك غرض بالطبع من أجله نشرت هذه الكتب بمساعدة دور نشر أمريكية لكنها لا تخلو من حقائق وتجاوزات دامغة يستحيل دحضها من طرفي النزاع شمالا وجنوبا. وفقك الله في مسعاك.

[هامش الهامش]

#1116544 [عبدالكريم الاحمر]
3.64/5 (20 صوت)

09-28-2014 11:50 AM
الشتري .. هاي

اعد نشر الموضوع لانو بقا ملاح ام بلط

عبدالكريم الاحمر

[عبدالكريم الاحمر]

إسماعيل البشارى زين العابدين حسين
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة