المقالات
السياسة
غرب كردفان وابل السقا
غرب كردفان وابل السقا
09-30-2014 10:32 AM


إبل السقا شايلة الماء وعطشانة هذه هي حال ولاية غرب كردفان.. ولاية البترول. ولكن هل راى مواطن الولاية شيئاً عن البترول؟ لقد سمعوا أن البترول يستخرج من ولايتهم ولكنهم لم يروا له خيراً في الولاية. فانطبق عليهم المثل القائل: (أبل السقا شايلة الماء وعطشانة). أبسط شئ جعلني أغضب على كل شباب المسيرية بدون استثناء خاصة من تولوا المناصب الإدارية في ولاية جنوب كردفان القديمة .. إنه خور أو وادي أبو شلنقو – لو كتبت الكلمة صحيحاً- هذا الوادي بالقرب من مدينة الفولة عبرته صيفاً في زيارتي للمنطقة وتأكد لي من خبرتي في وديان المنطقة أن هذا الوادي يصير نهراً في الخريف! فكيف يقطعه المواطنون؟

أفشل إداريين مروا على الحكم في كردفان هم أبناء قبيلة المسيرية. ليس المعني هو الفشل الأكاديمي ولكن أعني الفشل في تحقيق مطالب أهلهم لبساطتها.. وإلا بالله قولوا لي كيف يصير عيسى بشري نائباً لوالي كردفان ويصبح عمر سليمان والياً كامل الدسم للولاية ولا يقدمان خدمة ضرورية وأساسية لمواطنيهم. عندما شاهدت ذلك الوادي قنعت من خير في قيادات المسيرية الحالية ولم أفكر في أن أطلب منهم خدمة لمنطقتي الشرقية من الولاية. فالعرب قالت: (الما كسى أمه ما بكسي خالته). فالذين عجزوا أن يقدموا خدمة لأهلهم الأقربين وهي خدمة ضرورية فلا نتوقع منهم نحن البعدين فتات مائدة الخدمات.

وجود الكثير من أبناء تلك المناطق وغيرها من مناطق غرب السودان في وظائف مرموقة يمكن بواسطتها تقديم الخدمات الضرورية لمناطقهم وفشلهم في فعل شئ محسوس يؤكد أن كلمة التهميش هي كلمة باطل أُريد بها باطل. كيف يصير معتصم زاكي الدين والياً على ولاية شمال كردفان ولا يحل مشكلة مياه الابيض حتى يغادر غير مأسوف عليه؟ وقد سبقه الجلوس على نفس الكرسي كثيرون من أبناء شمال كردفان ولكنهم لم يقدموا ما كانت ترجوه منهم جماهيرهم بل أهلهم وذويهم! ضعف الشخصيات التي يتم إختيارها بعناية فائقة وبعد تمحيص هو السبب في تردي الخدمات الاساسية في كل الولايات الغربية.

لم يقف تهميش المسيرية كمنطقة بل امتدت اليد الآثمة بمعاونة أشباه الاميين في ضرب النسيج الاجتماعي في مقتل. فخلقوا فتنة ما كان لها أن تقوم لو رجع الناس للقانون. كيف يتم تسجيل ارض زراعية لمن لا يزرع والكل يعلم أن القصد هو بيع التراب الاحمر للجنوب لرصف الطرق وهو تهريب من نوع آخر. ومن هما الشخصان المغفلان النافعان اللذان قاما بتوزيع السلاح من راجمات تحمل على الأكتاف والمواتر والأربي جي ومواتر ومدافع آلية لصبية يافعين لا يفكون الخط؟ إنهما المغفلان الغيرنافعان لقبيلتهما ولكنهما يحتكمان لمصالح التنظيم وينحازان لها؛ احدهما عن دراية ومعرفة والثاني مجرور ترلة لما تحمل من مصالح.

منطقة تنتج البترول الذي ينتج الاسفلت تمتد مسافات تحسب بمئات الاميال وتشمل مدن كبيرة وصغيرة ودساكر وقرى وفرقان للعرب الرجل وبها مركز ماشية ليس كمثله شئ لم يتم رصف كيلو متر واحد. كل الذي قام هو ردميات بدون كباري في وديان تشبه البحر في شكلها في فصل الخريف.. وبعض المزلقانات في خيران متحركة وليست ثابتة. ولكن قيام طريق يربط بين ضفتي النيل من ام الطيور وحتى طريق مروي اهم لأنه بصراحة وزير المالية من أم الطيور حينذاك وعليه قس. أما الأثر البيئي على الطبيعة والانسان والحيوان فغير مهم. الطبيعة لا تهم أحد والحيوان غير مهم لأنه من الأفضل أن يفتقر المسيرية وبالتالي يتركوا ديارهم ويرحلوا إلى المدن الكبرى فهم لا بواكي لهم. ومن ولوهم أمرهم باعوهم في أقرب دلالة للذمة. الله يجازي الكان السبب. (العوج راي والعديل راي).

كباشي النور الصافي
[email protected]




تعليقات 8 | إهداء 0 | زيارات 1065

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1119219 [طلع بلابيطم]
0.00/5 (0 صوت)

10-01-2014 05:15 PM
عفيت منك يا قرفان مليتهم بالمكشوف الجبهجية والمرتزقة ناس حمتي واسمو مين هلال شغالين فيهم شمال يمين وهم شابكننا واي الشمال واي الجلابه طيب ديل شنو كان ما جلابة وفي الجلابة جلابة تشاد ؟ قول ليهم انتو خجلانين من اسم المؤتمر البطني والكيزان ما تقولوا عديل كدا وبلاش مجمجة معاكم

[طلع بلابيطم]

#1119184 [Gogomri Salim KOKO]
0.00/5 (0 صوت)

10-01-2014 04:30 PM
أخي العزيز اشكر لك غيرتك النبيلة لهذه الولاية و اهلها البسطاء ، كما نقدر و نثمن صرخاتك المتواصلة من اجل نهضة و استيقاظ ابناء الولاية نوبة مسيرية و اخرى من مكونات هذه القرية ، اخي النوبة و المسيرية و اعني هراطقة التعليم هم و جهان لعملة واحدة ، لا خير في النوبة و لا المسيرية ولا الحوازمة جلهم معاويل هدم، وهم من عدمي الوطنية ، عبارة عن ألآت لخدمة أسيادهم و وقود تحترق لإضاءة صروح اسيادهم ، يستخدمون و يسترقون من اجل حفنات لقيمات لا تسمن ولا تغني من جوع ويتم عزلهم من مجتمعاتهم باوكار وهمية في الثورات و الصالحة و امبدة ،
اخي العزيز التغير ليست للسودان بل لمن يعرفون بكوادر النوبة و المسيرية اولأً ومن ثم السودان ثانياً.

[Gogomri Salim KOKO]

#1119134 [ابوغفران]
0.00/5 (0 صوت)

10-01-2014 03:08 PM
مشكلة السودان الازلية هى انه عندما خرج الانجليز من السودان تركوا خلفهم الافندية الشماليين الذين لايرتقون لمستوى رجال دولة بل هم (انصاف رجال ) فخربوا السودان ومزقوه شر ممزق . فمنذ خروج المستعمر لم يحكم السودان غبر الشماليين , بل اكثر من 80 فى المئة من الوظائف العليا كانت ومازالت بايديهم , فانظروا كيف صار السودان فى ذيل دول العالم . هذه هى الارقام فاتحدى اى شمالى او اى سودانى ان يكذبنى . قال جمعيات تعاونية قال !!.

[ابوغفران]

#1119109 [قرفان من اي كوز]
0.00/5 (0 صوت)

10-01-2014 02:40 PM
قلت ليكم الشمال غاطي السودان كله قال الجزيرة مالكم مال الجزيرة حتى بتاعين الكنابي في الشرق من غرب افريقيا والنيجريا واذا مشينا كردفان برضو شمال كردفان والابيض كلها شمالية وجنوب كردفان ياهم النوبة ولاد عم النوبة بتاعين الشمالية انتو العاملين الغاغة ديل ولاد حمتي تشاديين الغرابة السوادنة تنجر وزرقة ديل ما عندهم عنصرية ضد الشمال لانهم منهم فيهم العنصريين هم عرب تشاد الاستوطنو بعد الثمانينات وعملو سياد بلد في زمن حكومة الكيزان ولانها ساعدتكم بتنفخو في العنصرية عشان ما تسقط الحكومة الفتحت ليكم ابواب السودان اي عنصري عامل فيها غرباوي كوز مقدود وتشادي كمان

[قرفان من اي كوز]

#1118390 [قرفان من اي كوز]
2.00/5 (2 صوت)

09-30-2014 02:02 PM
يا كباشي قريت مقال ليك اخر قلت فيه لما تتكلم عن المنطقة من الجيلي لمصر يصفوك بالجهوية ولكن في مقالك ده لمست الخلل الموجود في تركيبتكم الاجتماعية يا كباشي اي قريه من قرى الولايات الشمالية عندها جمعية لابنائها كان في الخرتوم كان في الخارج حتى في اوربا حصل سمعت بجمعية لاولاد قرية من قرى الغرب في الداخل او الخارج ؟ مشكلتكم انكم ما بتعتنو بمناطقكم واي واحد يلم قرشين منكم بنتقل للخرطوم وينسى اهلو ويمكن ينكرهم حطب بينما ابناء الشمال بسخروا كل محصولهم المادي في تنمية قراهم بالمجهود الاهلي اذا انتو منتظرين الدولة تعمل ليكم تبقو حالمين لانو دخل الدولة ما فايت حرامية الخرطوم كان م الشمال كان من الغرب كان من الشرق والباقي ما حايق مصروفات حروبها الداخلية اتركو الاعتماد على الدولة واتركو وضع اللوم على الاخرين والتفتوا لبناء مناطقكم مافي واحد من الشمال ما بسعى لتعمير قريته نوروا قراهم بالكهربا وجلبو الموتورات واوصلوا المياه للبيوت على حساب ابناءهم قبل ما تعمل الدولة خزان وتبدا مد الكهربا والى الان في قرى كثيرة مضاءة بالجنيرتات ياخي ديل بنو حتى للحكومة مراكز البوليس والمجالس بطلوا النقة وابنوا قراكم واسعدوا اهلكم افتكر في مقالك دا انت وضعت صباعك على علتكم الحقيقية

[قرفان من اي كوز]

ردود على قرفان من اي كوز
Netherlands [قرفان من اي كوز] 10-01-2014 03:18 AM
ههههههه قال سكان الولاية الشمالية كم ياها دي حجتكم الميته الطالعين بيها ابناء الولايايات الشماليه منتشرين في كل السوان حتي الجنوب ومنتشرين في كل اقطار الدنيا لحد القطب انتو الكم راجعو حساباتكم كويس اذا دي حجتكم انتو قايلننا ما عارفين الهجرات الحديثة الدخلت عليكم بعد التمانينات ؟
شارع الظلط عملنا بقروشنا وسكرنا والحمد الله ما عندنا حرامي من اولادنا بياكل حقوق اهله كشوفات الحسابات موجوده اتحداكم جيبو كشوفاتكم وورونا اذا عندكم مشروع واحد تعاوني عملو الاهالي في بلدانكم قومولفو بلا كلام فارغ معاكم قدر ما نقول يا جماعة مافي داعي نجاري كلام الغرابة العنصري ده كلام زعل ونفوت نلقى كل يوم واحد طالع فوق راسنا وشابكنا الشمالية الجيلي مش عاف ايه اهي ديك حكومة الكيزان الشغالة تكاتل فيكم وباولادكم زاتم عليكم الله دا فهم ناس

United States [الحبشي] 09-30-2014 08:43 PM
و بعدين يا قرفان أيهم أكثر في الخرطوم ناس كردفان و لا ناس الشمالية. و ما هي التركيبة الاجتماعية في الشمالية سواء أشباه العرب و لا النوبة بتاعنكم، خليط من الحبش و الحلب و الاغاريق و الأتراك، و أتحداك قل لي في شمالي نزح لكردفان و لا دار فور ولا الجزيرة و لقي مكان ملا فيه بطنه تاني رجع للشم آلية!

United States [الحبشي] 09-30-2014 08:39 PM
يا القرفان الله يقربك حتى الموت. الشمالية فيها كم من السكان، الناس الزاروها قالوا ما فيها غير الحريم و العجائز، و الباقي وين؟ الباقي في خارج السودان و نازحين في مناطق السودان الأخرى. قال ناكرين أهلهم ! يا أهبل الشايلين السلاح في دارفور و جبال النوبة و النيل الأزرق عشان يدافعوا عن اهلهم ديل مرتزقة؟؟؟ خليل الأسد الجاكم في ام درمان بالنهار، و خلى الغراب/ على عثمان يهرب الى مدني ، و نافع في المطار الى ان تامرتم عليه مع قوى خارجية و اغتيلتموه دا مرتزق جاي من برة و لا إنسان مرتبط بأهله حتى حمل السلاح لكي يدافع عنهم. مالك عقار و مني اركو و عبد الواحد ديل بي دافعوا عن أمك التي تركتها في الشمالية و لا شنو؟؟؟
انتم الجعليين ديل الذين تنكرونه أهلكتم، و الله الواحد مما وجد له مكان يملأ فيه بطنوا ثاني ما يفكر في الشمالية بتاعتك دي، و كان كذبني تعال لنا في كردفان و لا دار فور و لا النيل الأزرق او الجزيرة، لأنكم اكثر ناس في السودان جعانين. جمعيات قال بالله، كما قال لك السناري الشمالية دي فيها شنو غير بلح العرقي، دا بعمل جمعيات و برصف طرق و بعمل خزانات و كهرباء ، و لا دا حق باقي السودانيين سرقتموه و جارين وعمروا به الصحراء التي طردتكم دي؟!!

Saudi Arabia [الصوت] 09-30-2014 05:40 PM
والله عجب ....!!! قل لي كم عدد مواطني الشمالية كلهم ؟؟ وكم هو مردود هذه الجمعيات المزعومة؟ وهل هذا المردود يكفي بناء طريق طوله كيلو متر واحد ؟؟ ... انا استغرب لماذا تدافع الناس عن الباطل ؟؟ اليس هو السبب نفسه - هذا الدفاع عن الباطل - هو الذي جعل هذه العصبة نفسها لا ترضى بمقاسمة اي كان ثروة وسلطة هذه البلد ؟؟ انت تتحدث عن منطقة يبدو عليك تماماً انك لم تراها ...اما موضوع الجمعيات التي تتحدث عنها ...فالتي بالداخل هي في الاساس مكاتب توظيف لابنائكم القادمين الجدد من
(( البلد )) ...مع وجود الوزير تبعكم في كل امسية بالجمعية واما التي بالخارج فلها الدور نفسه مع تغيير طفيف للادوار وهو استضافة القادمين الجدد لحين توفر الوظيفة من قبل العاملين القدامى لدى الامراء وكبار المجتمع الخليجي تحديداً .... ولعلمك فإن بيوت اولاد دارفور كانت هي الاشهر في هذا المجال قبل الانقاذ وان ما تقوم به من خدمات كان يتعدى ابناء منطقة دارفور ليشمل كل ابناء السودان ... انا لست من دارفور ولكنني كنت من الذين انتفعوا بهذه الخدمات ...

United States [عادل السناري] 09-30-2014 04:13 PM
يا القرفان انت ما عندك أدب و عنصري جلف، لذلك منصور السناري اطلق عليكم مصطلح الجلفاويين و يقصد به سكان المنطقة بين الجيلي و خلفا. يا أخي ما تستحي على وجهك ، انت الشمالية بتاعتك دي بتنتج شنو غير البلح بتاع العرقي؟؟!! تبنوا بشنو اذا كنت انتم أكثر ناس جعانين في السودان دا، عشان كدا دا سبب كنكشتكم في الحكم من زمان الإنجليز. و بعدين تقول بينكروا اهلهم، انت ناسي الحبش النازحين منذ زمن عزانا و استوطنوا الشمالية و زوروا لهم انساب و عاملين فيها جعلية و لا شاقية. ابراهيم جعل قالوا بتصل بالعباس من ناحية الفضل، و اتضح ان الفضل دا ذاته عقيم و ما بيلد.
بطلوا الوهم و العنتزة الفارغة، و جهاز الدولة الذي استوليتم عليه بدون وجه حق و سرقتموه دا حا نطردكم منه و نحرر السودان كله من هيمنتكم، و الثورة و المقاومة مستمرة ، و لن نسمح للسودان دا يخضع لمصالح 5٪ من السودانيين.
الشمالية فيها شنو غير بلح العرقي؟؟؟؟؟؟؟؟؟!!!!!!!


#1118323 [الجيلي ود ام بادر]
1.00/5 (1 صوت)

09-30-2014 12:43 PM
لك التحية الاخ/ كباشي انا معجب بكتاباتك لانه بحس فيها المصداقية والحياد والمنطق وانا شخصيا من محافظه سودري اكثر تهميشا في شمال كردفان ولازالت so dry and derty ينطبق عيها هذا الاسم لم نري انجازا وكل الاسباب ضعف القيادات المنتفعة من ابناء المنطقه مع حكومة الإنقاذ لسبب واحد هو ان ابناء هذا الاقليم معروف انتمائهم الي الكيانات الانصارية والاتحادية ولذلك لم يكونو فى موضع قرار اوصلاحية لرقبتهم وبس سوف تسقط الانقاذ باذن الله والمنتفعين لمزبلة التاريخ وتعود كرفان الكبري كما كانت
الله اكبر وعاشت الديمقراطيةوالاقليم والمحافقة

[الجيلي ود ام بادر]

#1118283 [A BU ALI ALI]
1.00/5 (1 صوت)

09-30-2014 11:56 AM
لك الشكر اخي كباشي اكيد هي حال ابناء المسيرية الذين تلوا مناصب مع الانقاذ وكما قلت في وادي اسمه شلنقوالذي يتبع لمحلية لقاوة هو عبارة عن نيل في الخريف لانه ملتقي لعدد يفوق ال 100 نهر ورافد ومن الصعوبة عبوره في الخريف حتي ولو ليس فيه ماء وذلك من شدة الوحل حتي الحيونات تجد صعوبة في عبور وادي شلنقو

[A BU ALI ALI]

#1118205 [تعليق]
1.00/5 (1 صوت)

09-30-2014 10:47 AM
فعلا حاجة تحير يعني حتي الضغط علي الوالي او المعتمد يغلب أي منطقة في السودان ويقولو هم اعطوهم الأصوات لخدمة المنطقة وفي النهاية صفر كبير في الخدمات ..السبب الرئيس الشباب ساكتين وشايفين الوضع كل محلية لازم تضغط المحلية والمعتمد دا حق من حقوق المواطن ..ما عازين شي سوي خدمات من مياة وكهرباء ومستشفيات ومدارس وشوارع نظيفة وامن للأرواح ... تخيل عصابة في العاصمة تسوق نفرين الي تحت الكبرى ويتم نهب المواطنين والكل يعلم الكباري اغلبها محروسة بالأمن والشرطة حتي بعض منهم لديه غرف فيها ..

[تعليق]

ردود على تعليق
Zambia [الناير] 09-30-2014 01:17 PM
كلامك ياكباشي اخوى في التنك لكن التنك مقدود. البترول يستخرجوه من غرب السودان الجماعة في الخرطوم يستلموا الاموال يعملوا ليهم فلل وقصور وشوارع ظلط والغرابة يموتوا.. لا يلقوا كبرى ولا زلط ولا تنمية هو اصلاً كلمة التنمية دي راحت خلاص من قاموس الانقاذ.


كباشي النور الصافي
 كباشي النور الصافي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة