المقالات
السياسة

10-02-2014 01:38 AM

في احدي السنين،ماقبل اعوام الرمادة،،زرعنا عيش ارحمن،ارضنا ودنقنا وايما لغد فاضي ،حرتنا وزرعنا ،حشينا وسمدنا،،لم تخب دعوات جدنا الفكي ،فنزل الغيث مدرارا،،اضافة لان المشروع نفسه لم تنهش جسده العلل بعد،لم يسد الكولسترول شرايينه..
جماعتنا،اسحق وابكر وكلتم ،كانو ييضحكون بلا سبب،كانوا متيقنين من مثور ذاك العام،حتي انهم فكروا في بعث المطامير من مرقدها...
ولكن الليالي من الزمان حبالي...
دغشا بدري نادي علي فكي اسحق.
ياساتر
فاجاني فكي اسحق بان الطير و الجراد قد دقش البلدات وانه ان قيل ذلك النهار عندنا فبي موية وكملت...
والحل ؟
عايزين مية الف نجيب فكي...
تيقنت بانو دي ميتة وخراب ديار..
اديتو طلبو ،،ورجعت وبي من الهم جبال...
شويتين جا ابكر،،كان رجل عملي وبه مسحة علمانية وفكاهة...
قال لي يازول فكيكو ده حسوتو هديك فايرة والله تنتكلو علي اكان تمثرو قصب..
بعدين ؟
دايرين صفائح،،اشرطه،هوابات،واي هدوم قديمة...
ماتركنا صفيحة في الحلة...
ولا شريط لعثمان حسين او وردي الا صنعنا به ونانة تون مع الريح.
ولا عراقي او جلباب بالبيت.
واستنفرنا عيال المدارس...
وكل من به مروة...
كان ضجيجا ليس له مثيل.
ضجيجا لم يشهد مثله احد في العالمين،،،
لا طار جراد...
ولا فزع طير وولي الادبار..
تيقنا ان الواقعة وقعت...
ثم ان هي الا هنيهة،،حتي جاءت
جنود ربك..تهدر..
يقودها خواويجا مصرمين..
وماهي الا هنيهة
حتي بدت امم الجراد والطيور كعصف ماكول..
سلم العيش...
وتشيطن فكي يعقوب علي الجماعة وفاز بصيد ثمين...
وبرم من حسوة فقره حلوة...
البارحة اتصل بي ابكر...
المثور سمح...
معيشين تب ..
ولكن الجراد والطير متربص بنا..
لقد رفع فكي يعقوب الاجرة..
ولا يوجد من يلهب ظهر الصفيح..
قلت له ان ترياق فكي يعقوب لن يجدي..
فالخواويج طفشو..
والطائرات مشغولة بالموت لا الانتصار للحياة.
azeeez2002@yahoo.com


تعليقات 4 | إهداء 0 | زيارات 1050

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1119614 [الفكى ابكر حلاتو]
0.00/5 (0 صوت)

10-02-2014 09:41 AM
سام اخوى اصبحتى طيب يا
عيش دار فور داك فرق كبير بينه وبين عيش كمبالا ، حقنا داك الزول ممكن يقوم بجر براه وفى النهاية كله عافية ونشاط لكن عيش كمبالا دا زول لو شرب ليه نص قزازة بس بساهر بيه الليل كله ويخليه يطلع من طوره ويكتب كلام خارم بارم متل كلامك دا . عشان تكون جراب كارب للعيش اجتهدوا جيبوا لينا سلام وخلى بركة الله تنزل من السما وتعالونا فى دار فور حدو نشوف ياتو فينا جراب كبير

[الفكى ابكر حلاتو]

#1119581 [دقيق ساي]
0.00/5 (0 صوت)

10-02-2014 09:14 AM
اشارات جديرة بالاهتمام ولكن العنوان مفترض يكون (ارقد يا عيش،،، انا جرابك) وهي خاصة بالسكارة البغونجية عندما يتترع احدهم فهو يقول هده العبارة

[دقيق ساي]

ردود على دقيق ساي
United Arab Emirates [توتو بن حميده آل حميده] 10-02-2014 04:45 PM
ديقيق ساي انت غبي ما بتشيف؟؟؟ الراجل كاتب ارقد آعيش انا جرابك - كلام واضح - إن كان ما بتشيف عنك ما تشيف ...

Saudi Arabia [SESE] 10-02-2014 03:21 PM
والله العظيم هذه العبارة ونحن تلاميذ في الابتدائي قد تسبب في جلد واحد صاحبنا لم ننساها وهو نفسه لم ينساها حتى اليوم بعدما شيبنا. كان استاذ العربي (فقري) شديد وبعد فسحة الفطور دخلنا الحصة الثالثة عربي وكان صاحبنا شبيعان في الفطور فتترع او كرًع وبدل ما يقول الحمد الله قال (ارقد يا عيش انا جرابك) فسمعه الاستاذ وهو طبعا ما عارف معناها ولكنه بسمعها من بتاعين العيش وعينك ما تشوف إلا النور اخد كف لمن دور 360 درجة وبعدها طلعه امام الفصل وقام بشهده اربعة غلاظ شداد فأخذ 15 جلدة زي السم.....


#1119534 [Abo Obayda]
0.00/5 (0 صوت)

10-02-2014 08:16 AM
لعله المسور .. و ليس المثور.

[Abo Obayda]

#1119442 [ملتوف يزيل الكيزان]
0.00/5 (0 صوت)

10-02-2014 02:59 AM
يعنى انت جرادة صغيرة تشيف كوز كبير (اوضة و برندة) ما تشيف؟؟؟؟؟؟؟؟؟؟؟؟؟؟؟؟؟؟

[ملتوف يزيل الكيزان]

ردود على ملتوف يزيل الكيزان
United States [abdelaziz] 10-02-2014 06:50 AM
حليلك ياصاحبي،،نحن طششنا ،البركة في شوفتك ات..
الطيارات القلناهن في الاخر ديل سايقن فكي اسحق..


عبدالعزيز عثمان
مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة