فول سادة
11-13-2014 09:26 PM

بينما كنت اسير راجلاً في فرندات السوق العربي ظهيرة يوم غائظ الحر أحسست بالجوع (ناس سكري وكده) فطفقت أبحث عن مكان أتناول فيه بعض الغذاء الآمن (الفول في غيرو؟)
إلى أن وجدت في أحد الأزقة كراسي وترابيز مبعثرة في غير ترتيب يجلس عليها أقوام وامام كل منهم (صحن المونيوم مطرقع) وهم يزدردون الفول (الما بغباني) !
ذهبت إلي ذلك الرجل النحيل ذي اللحية الذي يرتدي جلباباً (بني اللون) من الواضح أنه كان أبيضاً ، كان يضع أمامه (كرتونة) عليها بعض الموارك الملونة :
- بالله لو سمحتا فول سادة !
وناولته عشرة ألاف .. أعطاني (ماركة حمراء مستديرة) أمسكت بها داخل كفي ووقفت منتظرا الباقي ... طال إنتظاري وهو يقوم بالتعامل مع زبائن آخرين ...
- الباقي يا شخنا !
- باقي شنو؟ مش أديتني عشرة ألف ؟
- أيوه
- خلاس طلب الفول السادة بعشرة ألف !!!
عندما جلست على التربيزة واضعاً صحني كنت أردد :
- فول سادة بعشرة ألف ؟ فول سادة بعشرة ألف؟ طيب .. يعني فطور وغدا وعشا بي تلاتين ألف ... يعني الشهر تسعمية الف .. يعني مليون جنيه .. معقوله بس .. معقوله بس ..
وأنا في تلك الحالة (الإستغراشية) العارمة وجدت يداً تربت على كتفي ، إلتفت لأجدها يد شيخ يرتدي أثمالاُ رثة ذي دقن مسترسلة يمسك بيده اليمني مسبحة من اللالوب :
- بتتكلم براك مالك يا استاذ !
- الحاله بقت صعبه يا شيخنا .. طلب الفول السادة بعشرة ألف .. ده كلام بالله يا شيخنا ؟
- بدلاً من ان يجيبني (شيخنا) قم بجر أحد الكراسي وجلس ، اخذ نفس عميقاً وهو يحدق نحو المجهول ثم إلتفت نحوي قائلاً :
- غلبتكم يا أولاد اللذينا !!
- ما بتغلبنا كيف لكن يا شيخ .. طلب الفول السادة بعشرة ألف ؟
- شوف يا أستاذ .. طالما إنتا (كبيت الجرسة) كده .. أنا ح أديك سر يحل ليك كل مشاكلك كمواطن .. أعمل البقولو ليك ده بي حذافيرو ..
وبدا في وصفته الغريبة :
قم بحلاقة الجزء اليمين فقط من (شنبك) واترك اليسار وأنت تردد (حوالينا ما علينا) وبعد أن تقوم بالحلاقة تذهب إلى عطار باب محله من الخشب يفتح على شارع يفتح (شمال جغرافي) أدخل إلى المحل برجلك اليمني وأطلب من البائع ربع رطل (جاوي) ، خمسة وقيات (لسان عصور) ، نص رطل (لبان ضطر) ) ، وقية (زيت خروع ) ، ضع الجميع في كيس أسود اللون وتوجه إلى منزلك دون أن تتحدث لأي مخلوق وانت في طريق عودتك.
في صباح اليوم التالي وفي ساعة (عطارد) قم بشراء كافة صحف اليوم ثم قم بإستقبال القبلة وضعهم أمامك وأنت تردد عشرين مرة (دجل ، شعوذة ، كضب) ثم اضرم فيهم النار ، ثم قم بقراءة (السلام الجمهوري) ثلاثة مرات مع ترديد (نطلب النجده باغلي ثمن ) بدلاً عن (المجد) أجلس على الأرض فوق قطعة قماش بيضاء طولها ثلاث أذرع ثم أمسح بزيت الخروع على كفيك ووجهك ، سيظهر لك ضب كبير الحجم (عيونو مربعة) بدون ذيل فلا تلق له بالاً وكأنك لم تره وأنظر إلى الجهة المقابلة له وأقرأ ( أين أنت يا غسان .. إين أنت يا غسان) خمس مرات فتجده قد اختفى وأحذر من أن يرعبك شكله إذ عندها سوف تفقد عقلك وتصبح (معتوه) وبدل (الصينية) تمشي (القصر) .
في اليوم التالي أدخل إلي مكان خال من الناس وأجلس في غرفة لها باب واحد علي ان يكون ذلك اليوم يوم سبت (مغبر) وأنت صائم عن الأكل (ما إنتا أصلك صايم جات علي دي) وأنت تجلس في خلوتك أكتب علي كفك الشمال (صندوق التكافل) ويكون البخور على النار طوال فترة الترديد (لبان ضكر وجاوى ولسان عصفور) وقم بترديد هذه الأسماء :
( الحوار الوطني ، الميرغني، لندن ، المهدي، الإنتخابات، الترابي، الكترابة)
رددها كل يوم عشرة الآف مرة في اليوم الخامس (بالليل) سيخرج لك من شق في الجدار جني قزم يلبس (نضارات شمس) سوداء داكنة وجني آخر طويل أصلع لا بس شراب (وبس) و بدون نظارات فأفهم ترشد ، سيقولون لك السلام عليكم فلا ترد عليهم ، سيحاولون مرات ومرات فأنتبه لأنك إن رددت هلكت وصرت من المعتوهين (هي ناقصة) ، حتى يقولون لك (خط هيثرو) ، هنا تبسم وقل لهم (النائب العام) فهذه هي كلمة السر فلا تخبر بها أحد ، ودعهم يجلسون بجانبك ثم قل لهم مشاكلك ، الغلاء ، الاسعار،المواصلات ، المحسوبية، الما عارف شنوو .. وأطلب منهم حلها وإذا حلوها أهو ده دقني ... ثم إختفى الشيخ دون أن يترك له أثراً ..

كسرة :
شواطين مين ؟ نحن أصبحنا نحتاج إلى معجزة إلهية .. !!
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو)


الفاتح جبرا
[email protected]


تعليقات 21 | إهداء 0 | زيارات 4613

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1149870 [هجو نصر]
0.00/5 (0 صوت)

11-15-2014 10:27 AM
كان احد اعمامنا في الزمن القديم ونحن اطفال يردد " حشرة سوداء خرجت من الارض واكلت كبكبي " كتعويذة ضد البلاء ! شوف ياخوي زمان كان حلو كيف ! الحشرات تاكل كبكبي ومجانا كمان

[هجو نصر]

#1149768 [osama dai elnaiem]
0.00/5 (0 صوت)

11-15-2014 07:44 AM
سيخرج لك من شق في الجدار جني قزم يلبس (نضارات شمس) سوداء داكنة وجني آخر طويل أصلع لا بس شراب (وبس) ---- الجني الاول سيذهب للقصر رئيسا والثاني سيذهب للسجن حبيسا وتتكرر الماساة----- اقول لك حاجة ياستاذ عشان الهلاويس تروح ردد في السر والعلن حسبي الله نعم الوكيل.

[osama dai elnaiem]

#1149619 [وراق احمد]
0.00/5 (0 صوت)

11-14-2014 08:21 PM
كلام هترشة لا يسمن ولا يغني من جوع خليكم جادين شويه ما ناقصة؟؟؟

[وراق احمد]

#1149588 [غيور]
5.00/5 (1 صوت)

11-14-2014 06:14 PM
استاذ الفاتح مقالك جميل الله يستر فى زمن الأباليس ديل كوب الماء بحصل العشرة جنيه.كسرة اخبار طلب الفتة بكم.

[غيور]

#1149572 [Awad]
0.00/5 (0 صوت)

11-14-2014 05:15 PM
هو يا دوب يا جبرة أخوى فكرت فى طريق الجن دى. أنت وينك يا جبرة ما قالوا ليك ..ما حدثوك أن ثلاث أرباع الشعب قريبين من بوابة القصر الشمالية واحدين شايلين براطيش وواحدين ماسكين سيوف عشر وواحدين لا بسين بدون والربع الباقى فى بداية الضحكة بدون سبب والسرحان فى المجهول وقريبا تلقاهم حصلوا الجماعة (هى لله..هى لله)ورقصنى ياجدع وبلش حكاية خط هيثرو وامسك لينا موضوع بناتنا وأماتنا الأغتصبوهم الجماعة وأعترف قائدهم بذلك وأنكره الناكر الرسمى.

[Awad]

#1149551 [عبد اللطيف]
0.00/5 (0 صوت)

11-14-2014 04:38 PM
بتمشى القصر الجمهورى وبتلاقى 2 والباقى تموه وبقولو مجنون والمجنون ماعندو مشكله

[عبد اللطيف]

#1149515 [ابوبدينقا]
1.00/5 (1 صوت)

11-14-2014 02:46 PM
ياجبرا الجن كمان بقا عايز اللفة الطويلةدى؟

[ابوبدينقا]

#1149422 [عمار]
4.50/5 (5 صوت)

11-14-2014 10:57 AM
مطعم الفول ده وين , انتا عارف ارخص من جمبنا , انحنا عندنا بي 12 حنيه

[عمار]

#1149387 [كورنجى]
5.00/5 (3 صوت)

11-14-2014 09:28 AM
انا قبل كده جانى واحد قال لى انا ممكن احل ليك مشاكل السودان كلها.
انا فرحت و كبرت وقلت ليهو اها اعمل شنو
قال لى اعمل رايح
و من يومها انا رايح
لقيتنى كيف

[كورنجى]

#1149372 [الحقاني]
0.00/5 (0 صوت)

11-14-2014 08:35 AM
يا جبره نسيت من وصية الشيخ ان تحلق من اعلى منتصف رأسك دايرة نصف قطرها اربعة سنتمر على الزيرو عشان لمن مخك يطرشق في الحيطة يكون ناصع البياض كملف خط هيثروا الذي لم يكتبوا فية شيء

[الحقاني]

#1149370 [ِِAbu S hihab]
0.00/5 (0 صوت)

11-14-2014 08:20 AM
والله يا الفاتح... الله يستر عليك من البوابة الشمالية يا خوي حالتك بقت متأخرة خلاس!
دحين النسعلك القصير اب نضارات انا عرفتو امانتا في ضمتك الطويل دا ما امالحسن؟
لك تحياتي واحترامي.

[ِِAbu S hihab]

#1149296 [ملتوف يزيل الكيزان]
5.00/5 (1 صوت)

11-14-2014 02:38 AM
كسرة من عندي:الجيش عمل شنو في الجنجويد الجلدو ضابط عظيم برتبت عميد و حلقو ليهو بالموس الميت و قالو رقصو رقصة العروس وفي حديث اخر رقصة الرئيس.

[ملتوف يزيل الكيزان]

#1149267 [ياسر عبد الوهاب]
3.00/5 (3 صوت)

11-14-2014 12:51 AM
سيخرج لك من شق في الجدار جني قزم يلبس (نضارات شمس) سوداء داكنة ......
أمانه عليك تقطع إضنيك ده ما أمبيكي....
قلته كضبا كاضب..طبي أمانه عليك تقطع إضنيك ده ما حسبو...
قلته شد واركب...طيب...حيرونا..

[ياسر عبد الوهاب]

#1149257 [Adam Ibrahim]
0.00/5 (0 صوت)

11-13-2014 11:49 PM
اها احسن نختصر وصايا الشيخ ابو لالوبة ونمشى القصر دوغرى بدل نلف صينية..

[Adam Ibrahim]

#1149251 [حكم]
5.00/5 (1 صوت)

11-13-2014 11:22 PM
نطلب النجدة بأغلى تمن ؟؟؟ ههههه

تقوم تجينا انقاذ تنقذنا من الإنقاذ
وتبقى اسوأ من الأولى

قلت لى جن؟؟
لو عاوز تجنن الجن بالجد .. ابدأ ليهو بخط هيثرو

[حكم]

ردود على حكم
[أبقوا شطّار و قولوا مصيرنا!!] 11-14-2014 06:28 AM
قل: "حمدتي ينقذني"، لأنه حامي الخرطوم و مستقبلك في يديه!


#1149238 [لولية الحبشية]
5.00/5 (1 صوت)

11-13-2014 10:47 PM
بس ناقصك تشيل سيف عشر و تروح تشم هواء بشارع النيل أمام حرس التشريفة ببوابة القصر

[لولية الحبشية]

#1149235 [ابوعبدالله]
0.00/5 (0 صوت)

11-13-2014 10:37 PM
عمك لحق الجماعة نحن زاتو بدت معانا كدى

[ابوعبدالله]

#1149224 [محجوب عبد المنعم حسن معني]
5.00/5 (2 صوت)

11-13-2014 10:09 PM
الله يجازيك يا خال لا عرفته اضحك لا عرفته ابكي
المدام اول ما جيت داخل البيت، قالت لي الليلة خالك قطع مصارين الشعب السوداني بالضحك
لكن سويته شينة الليلة، ما تقول الاسماء عديل
ضبعاً الاستاذ الفاتح خال بالمجاز، مع انو والله اتشرف انو يكون خالي.

مع مودتي

[محجوب عبد المنعم حسن معني]

#1149223 [صغيرون]
5.00/5 (1 صوت)

11-13-2014 10:07 PM
مرة ياجبرة طفل سأل امه امي حدثني عن استشهاد ابوي كيف وفي لحظة غضب عارمة قالت الام والله ياولدي ابوك راجل اناني وندل كان اولي ان يحارب الفساد والمفسدين ديل لكن الله في ولم تكمل كلامها حتي علت الاصوات بالتكبير هي

لله لا للسلطة ولا الجاه عربات الوالي تجوب الخرطوم والمسئولين يهتفوا

ويهتفوا ويهتفوا والمليارات تسرق والمايقوما تلد والاطفال يغتصبوا


والهتاف مازال مستمرا انه زمن النفاق والترابي قد بلغ الثمانين ولتعاسة

الشعب السوداني شديد كانه لم يمر بشيخوخة ولتعاسة السودان الوطن الكبير

انفصل جنوبه ولم يستقر قتل جون قرنق وقد حارب ثلاثة وعشرون عام واخيرا

ينفصل الجنوب البترول خرج ولكنه لم يدخل الا في جيوبه المفسدين رحم

الله ا لسودان وانسانه انها الماساة انها اللعنة انها الاسي والانتخابات

والمؤتمر الوطني يعلنها في وقتها والبشير الذي قال حتما لن يترشخ في
في 2015 سينرشح وارتال الولاة المفسدين من الشنبلي وعباس الخضر وغيرهم

[صغيرون]

#1149219 [wedhamid]
0.00/5 (0 صوت)

11-13-2014 10:00 PM
يا الفاتح الله يرحم والديك ... هو نحن ناقصين؟؟؟؟

[wedhamid]

#1149217 [Emesary]
5.00/5 (1 صوت)

11-13-2014 09:56 PM
YES WE CAN !!!

[Emesary]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة