تدشين
11-19-2014 01:46 AM

يحس الكاتب ببعض الخجل عندما يفرد مساحة عموده لأمر يخصه، فإحساسه بأنه ملك لكافة الشعب وخادم لهم يجعله يحس أحساسا غير جميل، ويتناول شأناً يخصه وهو إحساسي الآن الذي اكتب به.. هي مناسبة تخصني بل هي أيضاً تخصكم فاليوم يتم تدشين عدد من إصداراتي الجديدة والتي قمت مؤخراً بطباعتها من منطلق أن نترك للأجيال القادمة ما كتبناه خلال نحو عشرين عاما من الكتابة الراتبة تعرضنا فيها لكل ما يخص مجتمعنا في كافة المجالات الاجتماعية السياسية الفنية الرياضية.
وطباعة وتوزيع الكتب في بلادي قصة.. أذكر أنني حينما فكرت في أن أقوم بطباعة كتابي الأول (لبس جماعي) أن اتصلت بأحد الناشرين السودانيين المشهورين، وكم كانت دهشتي عندما أخبرني بأنه سوف يقوم بطباعة الكتاب ويعطيني (مائة نسخة) !!
وبالطبع قد اعتذرت له لسبب بسيط وهو أن هذه المائة نسخة لن تكفي أصدقائي ومعارفي ومن ثم سوف أضطر أن اشتري لهم عدداً من النسخ (يعني المسألة ح تكون بالخسارة) !
قلت لنفسي (ليه ما أطبعوا أنا) وبالفعل قمت بتجهيز المادة والاتصال بإحدى المطابع (ومن هنا لي هنا) وافقت إدارة المطبعة على أن تقوم بطباعة ألف نسخة بسعر النسخة سبعة آلاف جنيه (يومها) أي أن الجملة هي (سبعة ملايين بالقديم) .
- (وتجيب القروش دي من وين يا فاتح)..
هكذا سألت نفسي (ونحنا رزق اليوم باليوم)، عندما رأي أحد أصدقائي حيرتي هذه قال لي:
- بسيطة ياخ ده مشروع ثقافي وأكيد البنوك ح تدعمو أمشي أي بنك وشيل ليكا مرابحة !!
وبالفعل لم يكن أمام العبدلله إلا أن يذهب لأحد البنوك (المعروفة) ويشيل ليهو مرابحة بعد إجراءات وتلتلة لا يعلم بيها إلا الله.. شي ضامن.. وشي شيك ضمان فاضي.. وشي بانك إستيتمينت.. وشي مقدم.. وشي مش عارف أيه.. وفي نهاية المطاف تم تسليمي شيكاً بالمبلغ باسم المطبعة التي قامت بعد حين بتسليمي ألف نسخة من الكتاب !!
كم كانت فرحتي لا توصف وأنا أمسك بالمولود الأول أقلب صفحاته بين يدي.. ثم وأنا أقوم بوضع توقيعي عليه إهداءً للمعارف والأصدقاء (وما أكثرهم) ولكن بعد حين انقلبت تلك الفرحة إلى (هلع) حينما اقترب موعد القسط الأول من المرابحة فقلت لنفسي (أنتا نسيت إنو عندك كتب وزعتها للأكشاك بتاعت الجرائد وللا شنوو؟).. وبالفعل (ركبتا العربية):
(كشك 1)
- السلام عليكم
- عليكم السلام.. أهلا يا أستاذ
- شايف الكتب ما معروضة إن شاء الله تكون إتباعت؟
- والله يا أستاذ من ناحية إتباعت إتباعت لكن..
- لكن شنووو؟
- لكن والله يا أستاذ القروش دخلت علينا.. وإنتا عارف الظروووف!!

(كشك 2):
- السلام عليكم
- عليكم السلام.. أهلا يا أستاذ
- شايف الكتب ما معروضة إن شاء الله تكون إتباعت؟
- والله يا أستاذ من ناحية إتباعت إتباعت لكن..
- لكن شنووو؟
- لكن الناس الشالوهو ديل كووولهم زبائن.. وقالوا لمن يصرفو ح يجيبوا القروش.. ما إنت يا أستاذ عارف الظروووف.
(كشك 3):
- السلام عليكم
- عليكم السلام.. أهلا يا أستاذ
- شايف الكتب ما معروضة إن شاء الله تكون إتباعت؟
- والله يا أستاذ من ناحية إتباعت إتباعت لكن..
- لكن شنووو؟
- لكن والله يا أستاذ حصلت لينا وفاة ما لقينا غير قروش كتبك دي نفرش بيها.. وإنتا عارف الظروووف!!

بعض أصحاب (الأكشاك) كانوا أكثر حرصاً فقاموا بتسليمي (ثلث) ما قاموا ببيعه على أمل تقسيط (الثلثين) المتبقيين (لي قدام) وقد قبلت على مضض من باب (المال تلتو ولا كتلتو)!!
بمعاناة شديدة قمت بتسديد عدد من الأقساط (وإنتو عارفين الظروف) إلى أن جاء ذلك اليوم:
- معاك بنك (النهضة) يا أستاذ
- أهلاً بيكم
- والله يا أستاذ مواعيد المرابحة دي إنتهت وعليك 3 ملايين لازم تسددها!!
قلت لنفسي (أسددا الناس دي غبيانة أسددا من وين؟).. لم يكن هنالك بد من السعي لمقابلة (المدير) وشرح الأمر وبأنو العبدلله زول ملتزم (لولا ناس دخلت علينا) وإنو القصة في النهاية كتب (لا سيخ لا أسمنت) وإنها توثيق لحياة المجتمع السوداني وإثراء للمكتبة السودانية وووو ... وكان رد السيد المدير:
- والله يا أستاذ إنتا عارف إنو لوائح بنك السودان بتقول..
- (مقاطعاً): هو بنك السودان ده لوايحو دي ما يفعلا إلا في تلاته مليوني دي؟.. ما يفعلا في (الجوكية) والمليارات المنهوبة دي !!!
ويبدو أن حديثي قد إستفز السيد المدير الذي أمر بمنحي مهلة للسداد تحول بعدها أوراقي إلى (المفتي) أقصد (النيابة) !!
وحتى لا تحول (أوراقي) فقد قمت (بصرف) جزء من (دهب المرا) ومن هنا.. ومن هناك.. مع شويت سلفيات.. وتنفست الصعداء!!

كسرة:
كان جابونا في الجرايد !!
دعوة:
أنتم جميعاً مدعوون لحفل التدشين اليوم الثلاثاء – الساعة السابعة والنصف مساء – بالمركز الثقافي بمحلية أم درمان تتبناه مؤسسة أروقة للثقافة والعلوم ويرعاه السيد/ اليسع صديق التاج معتمد محلية أم درمان !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +(وووو)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+(وووو).


التيار


تعليقات 24 | إهداء 0 | زيارات 5898

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1153740 [مكاوي]
0.00/5 (0 صوت)

11-20-2014 10:17 AM
انت رائع يا استاذ

[مكاوي]

#1153474 [لبني]
0.00/5 (0 صوت)

11-20-2014 03:30 AM
في طريقه اشتري الكتاب من الأنترنت

[لبني]

#1153359 [Almisahir fi izallail]
0.00/5 (0 صوت)

11-19-2014 08:37 PM
هوّا يا اخ يا فاتح الجبرا وحساب المثلثات و"اللوغاريتمات " كمان( الكلمه الاخيره كتبها احدهم :اللغه اريتا ماتت) .. بس عاوزين نسأل سيادتكم : انت ستقيم حفل تدشين ولا تأبين.. الكلمتين اصبح معناهم واحد وممكن يتبادلن "سحر ألأمكنه" والاستخدام اللغوى والاندغام المعنوى .. والسترداف المكانى.. وممكن برضو يكون لكل واحده منّهن "ليله" خاصة بها اذا كان "الرادف" من اصحاب "المثنى" والثلاث و"الرباع" (البتّاتى بقيدا) عشان "يقدل شيخك كويس"
أها ان سألت عن الصلة بين التدشين واالتابين. الآ تكون عارف!! جاء فى الخبر قبل قرابة 30 سنه و"كدا" ان رجلا شيبه اسلام وله غرّة صلاة لا تخطئها العين وكان له حضور واسع المرتكزات فى بعض الاحداث السياسيه (قبل الانقاذ) وقد اشتهر بحب ذوات الثدى فى براءة اللقيا والتحدث بنعم الله وجدوه فى معية احداهن فى فلاة بس فى ليلا بدرى. . المهم الشافوهم قالو كانت هى فى حالة "تسبيح وهو بيقرالو فى اوراد".. جاء منها الرد عند السؤال وقد طار قلبها بعد ما فكت السبحه وطارت منها الكلمات .. لكن فى ألآخر قالت" يللآّ.. والله كنا ماشين نحضر "تدشين" المرحوم !!!.منو كان لو تذكرون؟
داحين نسألك .. كم كتاب فضلنلك؟ مارق مداعى للناس يجو يحضروا معاك التدشين!!!

[Almisahir fi izallail]

#1153270 [mohamed]
0.00/5 (0 صوت)

11-19-2014 06:18 PM
تسويق للكتاب

[mohamed]

#1152948 [DRILLER]
5.00/5 (5 صوت)

11-19-2014 12:06 PM
ياجبره احكى ليك نكته بمناسبه دهب المرا
واحد مرتو ماعندها شغله غير الواتساب مابتعمل اى شى وهو مامقصر معاها بجيب ليها السمك والشيه طوالى يوم سالتهو انت بتجيب الحاجات دى من وين واليومين دى انت ماشغال قال ليها كدى شوفى دهبك اخر ظهور ليه كان متين.....

[DRILLER]

#1152897 [تاج الدين بحب الدين]
0.00/5 (0 صوت)

11-19-2014 11:22 AM
مبروك لاستاذنا الفاتح جبرا التدشين وعقبار ما تلم باقي الاقساط
بس اوعى بكرا نلقاك في جريدة الانتباهة او المجهر او التيار (افهمونا)

تاج الدين حمدان

[تاج الدين بحب الدين]

#1152881 [abdo abdo]
0.00/5 (0 صوت)

11-19-2014 11:04 AM
ظاهر عليك بقيت مؤتمر وطني بعد شوية الواوات حتختفي

[abdo abdo]

#1152840 [الحلومر]
0.00/5 (0 صوت)

11-19-2014 10:24 AM
رود علي [abu shawarib
اللة يجازيك ضحكتني يعني انت من شلة سكران لط لكن والله بجد ليك العذر البلد مشاكل كترت واحسن حاجة الواحد يكون مخدر علي طول بالله شوف لأخوك معاك واحدة منسية تحت العنقريب الجماعة ديل ما خلو فيها زول نفيض والا لوثوه معاهم واحسن حاجة ننضم لشلة سكران لط مع انو ما حصل يوم طاش شبكة من الاسئلة البيطرح من خلال تعليقاته

[الحلومر]

#1152816 [abu shawarib]
5.00/5 (1 صوت)

11-19-2014 09:57 AM
اقنباس من مقال أخونا زمان ( الفاتح يوسف جبرا )

آآآآآآآ : اقنباس من مقال أخونا زمان ( الفاتح يوسف جبرا )

كده يالفاتح .! ؟ تجر واطى ؟! انت موش عندك قلب وسكرى و( دغت ) أها الجارى ليها واطى شنو ؟!

كان تصبر ساى وتبقى بطل قومى بعد ما الجماعة ديل يفوتوا ( صحى هم ديل بفوتوا ومتين )

قلت لى :
ويرعاه السيد/ اليسع صديق التاج معتمد محلية أم درمان !!

والله حكاية يا ود جبرا

يا ولد جيب القزازة التحت العنقريب ديك

[abu shawarib]

#1152808 [salah]
5.00/5 (1 صوت)

11-19-2014 09:52 AM
تسويق للكتاب من النوع اب كديس فقري وبتنوم بدري يا فتوحه يا تفتيحه

[salah]

#1152774 [مفوت]
0.00/5 (0 صوت)

11-19-2014 09:16 AM
طبعن شفت الحافلة ملانه ... وقلت تخلصا براك ...عشان الكمساري ما بيديك منها حاجة ... البداية ؟؟؟؟؟

[مفوت]

#1152767 [عادا أحمد]
1.00/5 (1 صوت)

11-19-2014 09:11 AM
مسكين يالفاتح جبرا سبعة مليونك دي ناس خط هيثرو وامثالهم جماعة اللقف واللهف وذلك الفضل من الله ببشتروا بيها زبادي للسلطة .( مسكين والله تحنن ) . خليك مع الزمن . تهليل تكبير ارمي قدام هي لله لا للسلطة ولا للجاه . وعجبي

[عادا أحمد]

#1152762 [hanankokoabas]
5.00/5 (1 صوت)

11-19-2014 09:07 AM
مش كان اخير ليك الاسافير المفتوحة دى نحن متعاطفين بس نحلك كيف ؟

[hanankokoabas]

#1152722 [زول]
0.00/5 (0 صوت)

11-19-2014 08:34 AM
مبرول ي استاذ المولود الجديد وشكرا على كل ما قدمت ولكن نخشي عليك من تصاب اصدارتك الجديدة بالاعاقة افهموها بقا

[زول]

#1152720 [سامي الملك]
0.00/5 (0 صوت)

11-19-2014 08:33 AM
أستاذنا الكبير .. كان حفلاً رائعاً تمتعنا فيه بسخريتك المعهوده وتعرفنا فيه اكثر على شخصك الكريم .. متعك الله بالصحة والعافية وانت تقف في وجه هذا النظام الفاسد .. وهذه الكتب سوف تظل تأريخاً للأجيال القادمة .. دمت ذخراً للبلاد

[سامي الملك]

#1152718 [حسكنيت]
0.00/5 (0 صوت)

11-19-2014 08:31 AM
دعوتك دى كا تزيلها ب ( والعاقبة عندكم فى المسرات) عشان خاطر النسخة التانية

[حسكنيت]

#1152695 [ويكيلكس الكيزان المرعب]
0.00/5 (0 صوت)

11-19-2014 08:03 AM
لا ادري هل اضحك ام ابكي لكثير ممن يدعون الاعلام والثقافة من المعارضين لتنظيم الكيزان الاخواني الشيطاني فرع السودان ، وذلك لأن كثير منهم مازال يسميه الحزب الحاكم او المؤتمر الوطني ولا اعلم اهي قلة معرفة او ضآلة ثقيف للذين يسمون هذا النظام بتلك المسميات المذكورة .
فهذا السرطان الحاكم ما هو الا تنظيم الاخوان الشياطين فرع السودان ، والذي يتخذ الدين سرجا للنهب والقتل والسطو والاغتصاب منذ مجيئه بإنقلابه المشؤوم في الثلاثين من يونيو1989م ، بعد ان فشل فشلا ذريعا في الانتخابات الديمقراطية النزيهة في 1986م ولفظه الشعب وكان سقوطا مدويا لهذا التنظيم السرطاني ، ولكن وكديدين الاخوان الشياطين منذ نشأتهم لا يعرفون الطريق الصحيح للسياسة والحكم لذا قاموا بسرقة هذا الوطن في ليلة سوداء من تاريخ السودان .
وبما ان شعار الاخوان هو (( إن الإخوان المسلمين : دعوة سلفية ، وطريقة سنية ، وحقيقة صوفيةٌ ، وهيئة سياسية ، وجماعة رياضيةٌ ، ورابطةٌ علميةٌ ثقافيةٌ وشركةٌ اقتصاديةٌ وفكرةٌ اجتماعيةٌ .)) بما يعني انهم يمثلون دولة لا حزبا سياسيا فقط .
وحيث ان اهم مبدأ للتنظيم هو مبدأ التقية (والتقية هي اظهار خلاف ماتبطن يعني النفاق بالواضح المافاضح) فكان الواجب ان تتم محاربته من اول ايام ظهوره في الساحة السياسية ولكن معظم من يدعون الثقافة والاعلام في وطني هم مجرد (حكواتية او حيران طرق ، او كاتبي مذكرات ، ...الخ ) الا من رحم ربي وهم قلة خائفة من قول الحق .
المثل بقول (قل لي من صديقك اقل لك من انت ) لو طبق مثقفينا او اعلاميونا هذا المثل على هذا التنظيم كان عرفوا من بدري حقيقته ولكن قدر الله وماشاء فعل ، واود هنا ان اعرف البعض من الكتاب او الثوار او حتى ابنائي الشباب بأصدقاء التنظيم (حلفاء البشير الدوليين) وهم 1- ايران الصفوية 2- روسيا 3- الصين الشيوعية 4- سوريا البعثية النصيرية (بمعنى انه تحالف مع الد اعداء الاسلام الذي يدعيه من شيعة وشيوعية )علما بأن حلفه مع الصين يعتبر تجاري اكثر من كونه استراتيجي.
فهذا التنظيم الماسوني الشيطاني اخذ جميع مساؤي حلفاؤه المذكورين ، فأخذ من ايران الصفوية كثير من امور دينها كالتقية ، والحقد والشوفونية ، والشمولية ، واخذ من روسيا والصين الشيوعية التصفية والاغتيالات .
ولنضرب مثلا بسوريا ، فالنظام النصيري البعثي الاسدي الجاثم في الحكم لأكثر من اربعون عاما ونرى مدى التطابق مع نظام الكيزان في السودان :
تبلغ عدد الاجهزة الامنية في سوريا حوالي تسعة اجهزة امنية ، كل جهاز يعتبر دولة قائمة بذاتها وذلك كله اضهادا للشعب السوري العربي المسلم من قبل اقلية نصيرية اتخذت البعث دثارا لتخفي هويتها الدينية والتي لم تظهر للعالم الا بعد قيام الثورة السورية ، فقد كان نظام الاسد منذ الاب وحتى الابن يعتمد في بقائه على الدولة البوليسية وبسياسة التعذيب والقتل ، وبشعار ان حزب البعث هو الضامن وهو الاوحد للشعب .
اليس هذا مايفعله الكيزان بإسم المؤتمر الوطني ؟ الم ينشئ النظام كل هذا العدد من الاجهزة الامنية للبطش بالمواطن ؟ هل دافع نظام الاسد مدعي المقاومة والممانعة عن ارضه المحتله في الجولان ؟ وهل دافع تنظيم الكيزان عن ارضه المحتله في حلايب وشلاتين والفشقة والعوينات؟ الم يفرق نظام الاسد بين مكونات الشعب وجعل الجميع تحت رحمة البعث ؟ كذلك الم يفرق تنظيم الكيزان بين جميع مكونات الشعب؟ الم يقتل نظام بشار مابين 40—60 الف سوري في مجزرة حماة في ايام معدودات بداعي محاربة الاخوان؟ كذلك الم يقتل تنظيم الكيزان اكثر من مليون مواطن جنوبي بإسم الاسلام؟ الم يقتل مئات الالاف من ابناء دارفور؟ الم يقتل الالاف من جبال النوبة والنيل الازرق ؟
عند قيام الثورة السورية (ومن قولة تيت) الم يقتل بشار الاسد خيرة شباب سوريا بإسم المخربين والمجموعات المسلحة؟ وفي هبة سبتمبر 2013م الم يقتل تنظيم الكيزان اكثر من مئتين شاب بنفس المسمى ايضا ؟ الم يغتصب نظام بشار قبل الثورة وبعدها في حرائر الشام وبالذات بعد قيام الثورة وبالجملة ؟ الم يغتصب الكيزان حرائرنا السودانيات قبل وبعد سبتمبر ؟ واخرهم حرار تابت؟ اليس القتل والاغتصاب من ابجديات النظام السوري ؟ وكذلك تنظيم الكيزان ؟ الم يقتل بشار الاسد ويتغصب في بابا عمرو وبقوات جيشه؟ الم يقصفهم بالطيران ؟ الم يرسل البشير شاهد الزور الدابي وفضيحته الكبرى في حمص ؟ الم يغتصب جنود البشير حرائرنا في تابت وايضا بقوات جيشه ؟
وواهم كل كاتب او مثقف او معارض بأن تنظيم الاخوان الشيطان فرع السودان سوف يسقط بالمظاهرات فقط فهم قالوها من زمان ومازالوا يكررونها مثل (الزارعنا غير الله اليجي يقعلنا ، ولحس الكوع ، ولانفاوض الا حملة السلاح ، وحنقعد في الحكم مية سنة...الخ ) ومع ذلك هناك الكثيرين ممن يعتقدون ويظنون ان هناك دولة رسمية وحزب قابل للسقوط بمظاهرات فقط ، لا ياسادتي للاسف ليست لدينا دولة فكل مؤسسات الدولة (شرطة ، جيش ، قضاء ، خدمة مدنية وعسكرية ، ونقابات ، ...كلها تابعة للمستعمر الجديد لبلادي وهو التنظيم الاخواني الشيطاني ولنبدأ خطوتنا جميعا بتحرير السودان من هذا التنظيم الشيطاني الماسوني سلميا وعسكريا حتى نستعيد وطن اسمه السودان .
(ملاحظة : لا بد من التحية للسيد ملتوف يزيل الكيزان الذي علم تماما بكيفية مناضهة الكيزان ولنعمل بجميع مقترحاته كأقل تقدير كخطوة اولى في بداية المقاومة للمحتل الشيطاني البشكير والترابي وتنظيمهم ). ولنا عودة لشرح مساؤي حلفاء النظام الباقيين (ايران روسيا والصين ) بإذن الله .

[ويكيلكس الكيزان المرعب]

#1152694 [الإفريقي]
5.00/5 (1 صوت)

11-19-2014 08:03 AM
الله يا استاذ جبرا ودي ادفع للبنك باقي المرابحة لكن إنتا عارف الظروووف!!
علي العموم اهنئك تهنئة حارة بمناسبة تدشين اصداركم الجديد ويا حبذا إذا ذكرت لنا اسماء المكتبات التي يمكن ان يطلب قراء الراكوبة نسخهم منها. لفت انتباهي غدم وجود اسم اي مكتبة لتوزيع الكتاب في مقالك بل كلها اكشاك جرايد. هل انقرضت المكتبات ايضا بالسودان؟

[الإفريقي]

#1152692 [حبوبه زمنا راح]
0.00/5 (0 صوت)

11-19-2014 08:00 AM
كنا جايين لكن خليناك لناس الرعايه ديل
انشاءالله ماتبقى عليك رعايه وخراب ديار
ناس المحليه يشيلو كتبك رسوم تثقيف وكدا

[حبوبه زمنا راح]

#1152655 [د. هشام]
0.00/5 (0 صوت)

11-19-2014 07:26 AM
ويرعاه السيد/ اليسع صديق التاج معتمد محلية أم درمان !!

[د. هشام]

ردود على د. هشام
Sudan [د. صالح] 11-19-2014 08:19 AM
خلي اليرعوه يرعاهم البلا ... ما قروش الشعب المسكين ده ... اخير تمشي لي ناس جبرا تدشينات بدل ما ياكلوها


#1152616 [بت البلد]
5.00/5 (1 صوت)

11-19-2014 06:05 AM
كلو ولا دهب المرا هي تلقطو وانت تسقطو !!!! غايتو كان هي عفتو أنا ما عافياهو ليك مش الجنس للجنس رحمة ؟!!!

[بت البلد]

ردود على بت البلد
[ود الشريف] 11-19-2014 02:09 PM
مسكينة يا بت البلد لا فيها دهب مرة ولا يحزنون نوع جبرا ده بيكون التلاته مليوناتو دي ذاتا يكون استلفا عشان يشتري دهب للمرة .

United Arab Emirates [ود الباشا] 11-19-2014 08:18 AM
والله يا بت البلد كلامك عجبنى بالحيل لكن مرات الحريم يصرفن فى ديهباتن فى امر لا يخصها هى وهى لست فى حوجة لذالك وتلقى الراجل ممغوص وساكت اها رايك شنو وكل مودتى


#1152613 [julgam]
0.00/5 (0 صوت)

11-19-2014 05:54 AM
حلوه طريقة الدعايه دى وتستاهل ود جبرا،أنا من هسع حاجز لى مية كتاب كده لأصحابى ومعارفى عيلا أكيد بيدخلوا علينا ناس الكهربا وسيد الدكان ،ويعوضك الله فى شنووووووو..المهم عرفنا من وين جات واواتك الكتيره دى..
نرجع للجد ،تستاهل يا أستاذ ويستاهل قلمك الرائع ،أن تنفذ الطبعه الأولى حتى قبل التدشين...

[julgam]

#1152598 [Hyder]
0.00/5 (0 صوت)

11-19-2014 03:31 AM
هذا الموضوع من نوع اللهم ارحم الوالده وبنصلح ساعات بموقف بحري
الجماعه كلووون ناس ضياء الدين وعثمان ميرغني والهندي عزالدين وهلم (جبرا) جرا بداو كده مرابحة من النك وتدشين مع المعتمد الفلاني وغداء مع الوزيرالعلاني وسفره مع الريس وحاجات تانيه حامياني ومن ديك وعيك (طبعن ) ياولد ناولني الكبايه دي
كسره اخبار الناشر الجديد شنوووووو

[Hyder]

ردود على Hyder
[جمال] 11-19-2014 08:37 AM
غواصة ...


#1152579 [ود الحاجة]
0.00/5 (0 صوت)

11-19-2014 02:01 AM
سلام أستاذنا الفاضل ... نثمن لك عالياً إصرارك لتوثيق ما حدث ويحدث في هذه الحقبه من عمر البلاد حتى تطلع عليها الأجيال القادمة لتتعرف على كيفية غدارة البلاد في هذا العهد المظلم .. وكيف أن خط هيثرو قد ضاع دون محاسبة أحد رغم واواتك الكتيرة ... وكيف أن الغساسنة قد هربو بمال المسلمين كما جاء في مقالك (الغساسنة) وكيف أن المدينة الرياضية قد أصبحت ميدان (كرة سلة) وكل كل الفساد الذي ورد في مقالاتك التي صار الشعب يحفظها عن ظهر قلب ... ألف شكر لك أيها الرجل الشجاع في زمن سكتت فيه الأغلبية عن قولة الحق ... وفقكم الله

[ود الحاجة]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة