المقالات
مكتبة كتاب المقالات والأعمدة
شوقي بدري
حزب الامة ... الملوص والتلات ورقات
حزب الامة ... الملوص والتلات ورقات
12-06-2014 09:15 AM



في سنة 1982 كان اجتماع بادينقتون الشهير . وكان علي المنصة كبار السياسيين منهم الدكتور عز الدين علي عامر والدكتور خالد الكد والاستاذ محجوب عثمان . وكان الحال يبشر بانتهاء ديكتاتورية النميري الذي كان يشتم الشعب السوداني مثل البشير اليوم . وقال لمن انتقده علي بذخ زوجته ,, انتو قايلنها مرة نجار دي مرة رئيس الجمهورية .. وقال للشعب اذا قمتوا بكرة وفتحتوا الماسورة عملت خخخخخ . وما لقيتوا مويه برضوا انا قاعد وقال للفاتح بشارة عندما عينه واليا علي كردفان وتردد الفاح لانه احس بأن الناس ما عايزاة .. وانا الناس عاوزاني ما اهو قاعد ,,, وقال لكبار الظباط انتو فاكرين حتقلبوها ؟ والله انتو الطربيزة دي ما تقلبوها ,,
وبلغ به الغرور ان اوقف الكرة السودانية . واتي بكاس من الذهب الخالص وكان يتوقع فوز فريقه المريخ . وخسر المريخ . فاعاد الكرة بكاس ذهب جديد والناس تموت بالعطش في كثيرمن ارجاء السودان . وفاز الهلال للمرة الثانية بهدفي قاقارين والدحيش . وبكل غباء وصلف منع الكرة والدوري . وتشرد اللاعبون والمدربون والحكام والاشبال . بل لقد تدخل في كل كبيرة وصغيرة حتي اختيار عميد نقابة الفنانين . واجاز الاغاني التي رفضتها لجنة النصوص . واجاز اغنية البعبدا لترباس . وقال مادام عجبتي انا . كفاية . والبشير يتدخل الان في كل شئ حتي منح الجنسية للاعبي الكرة . انها المحن السودانية .
قام رسول الانتهازية الدكتور الباقر احمد عبدالله بالبكاء بالصوت والدمع ونعي الشريف الهندي وهاجم اعداء الشريف وحلفائه الذين باعوه وخزلوه . واشاد بالشيوعيين ونضالهم . ورددت عليه بان النميري سيذهب . وانها مسألة وقت . ولكن يجب ان نتذكر هذه الروح الجميلة والاشادة بالشيوعيين . ولكن بعد ذهاب نميري ستتغير الاسطوانة . وستشتمون الشيوعيين . وسيكون هنالك اقتتال وضرب تحت الحزام والمؤامرات . ووجم الجميع ، الي ان رد علي الدكتور عز الدين علي عامر قائلا ,, ماهو العمل السياسي بالطريقة دي . وانت ما ممكن تطلب من الناس تديك صك . ,, فقلت له اننا لا نطلب صكا ولكن اريد ان اورد هذه الحقيقة ولكي يفكر فيها الآخرون فيما بعد ,,, . وبعد نميري كره الناس الاحزاب واللت والعجن . وكان هنالك سف وقرش وفساد وسرقة . وتهديد بمليشيات حزب الامة .
السؤال ، هل حنرجع تاني لنفس امور التلات ورقات والملوص بعد ذهاب البشير ؟ واليوم ظهرت امور الملوص والتلات ورقات . وبينما الصادق يوقع علي ميثاق باريس وبسببه صار مطرودا من بلاده ووضعت ابنته في السجن، الا ان صوت سيده فضل الله برمة يقول . وحتي بعد نداء السودان الذييعتبر تاريخيا ضم كل المعرضة ولاول مرة الصادق يجي في القاطر. والمشقبية تخدم.
اقتباس
وعد اللواء فضل الله برمة ناصر نائب رئيس الحزب لـ(إس. إم. سي) أمس طرح الحركات المسلحة بمناقشة كل قضايا السودان دون إشراك الجميع لا يقود إلى حل أزمات البلاد، مشدداً على أهمية الانصياع إلى رغبات المواطن السوداني في التوصل إلى سلام دائم ينهي الحرب في المناطق الملتهبة، لافتاً إلى أن ما يجري الآن لا يقدم حلولاً للمشكلة السودانية، وأوضح ناصر أن وثيقة الدوحة تعتبر مرجعية لسلام دارفور ويمكن استصحاب بعض الآراء والمستجدات التي تحدث في الساحة السياسية فيها، مؤكداً أن مناقشة القضايا الوطنية مكانها الحوار الوطني الجامع
نهاية اقتباس
الصادق يقول القماير وبرمة يقول بانت . قالوا الابن مجبنه مبخلة . الانسات يضعف ويستسلم اذا صار الامر يخص الابن . والصادق عنده ولدين في القوات المقاتلة . طيب ديل الصادق بيقبل قتلهم او القذف بهم في السجون والمحاكمات ؟؟؟ احسن نعرف من دلوكت . وبعدين برمة ده شوفوا ليه كنتوس اكفوه فوقو . الناس قالت دواس وهو لسة في المحلسة . والسلاح الذي دخل جنوب كردفان وتسبب في اسالة الدماء ، ما جابو برمة . ولقد قال في التلفزيون بانه سلح القبائل لانهم هددوه بانه اذا لم يسلحهم فان عندهم الامكانيات لشراء طيارات . وزير دفاع يخضع لتهديد مدنيين . يعني الحرامية يمشوا الظبطية ويقولوا لو ماخليتونا نسرق الدكاكين . حننهب البيوت ونحرقها . والبوليس يخضع لهم . ولقد تحصل عصام ابن الترابي في الديمقراطية الاخيرة علي الف كلاشنكوف ووزعها علي المسيرية لمحاربة قرنق . والحاصل ده نتيجة تلك السياسة بتاعة الملوص والتلات ورقات . وعصاية نايمة وعصاية قايمة . ولقد استرخص البشير دماء المسيرية لانه سفكها بيده في عرس في المجلد عندما كان يجاري المدنيين ويطلق النار . وقتل فتاة وجرح آخرين . وحماه الصادق وبرمة لانه كان في المكان الثالث بعد محمدين لقيادة انقلاب الكيزان الذي اقترحه الترابي واحمد سليمان علي الصادق . وقالوا السكات علامة الرضا . ولم يعتقل اخمد سليمان .وكشف عنه عبد الرحمن فرح قبل فترة قصيرة . كله ملوص وتلاته ورقات .
خلونا من الاكلشيهات ,, والكلام ده ما وقته واي انتقاد بيصب في صالح الانقاذ ... ده الوقت المناسب . ونحن اطفال شاهدنا فلم عنترة بن شداد . وحفظنا الحوار وكنا نردده ونحن في السابعة خاصة كلام استفان روستي الذي كان يمثل القيصر وكلام سراج منير الذي كان يمثل عنترة وكان مفرج بن همام ينافس عنترة . وعندما عنترة بعيد تقوم الحرب ويقول مفرج بن همام . ولكن علي شرط قبل ما نشرع رمح او نجرد سيف ، تضملولي عبلة ,,, دلوكت الاماكن المهمشة والمحاربون تضمنولهم حقوقهم . وحزب الامة لن يكن حزب الاسره . ومافي يا يمة ارحميني لقد اتي سيدنا عثمان ابن عفان باخيه في الرضاعة عبد الله بن السرح . وكان النبي قد اباح دمه ولو تعلق باستار الكعبة . ولم يرد النبي صلي الله عليه وسلم الي ان انصرف الاثنان .وسال صلي الله عليه وسلم الم يكن فيكم رجل يضرب عنقه . فقالوا ان ايديهم كانت علي مقابض سيوفهم ولو اومأ النبي صلي الله عليه وسلم لقطعوا راسه . وافهمهم بان الانبياء لا يعطون تلك الاشارة . هل يوافق الصادق اليوم ان يقدم الترابي وكل من معه الي المحاكمات ؟؟ وهل سيسلم البشير والبقية الي المحكمة الدولية . ولا البشير لسة جلدنا وما بنجر فيه الشوك . قبل ما نشرع رمح او نجرد سيف ، عاوزين نعرف .
يقولون ان اقوي سلسلة هي بقوة الحلقة الاضعف . بمعني اننا اذا صنعنا اقوي سلسلة من الصلب والتيتينيوم والالمنيوم والحبال الغليظة وحلقة واحدة من الدبارة فتلك السلسلة هي بقوة الدبارة . وهذه الجبهة الجديدة هي بقوة الصادق لانه الحلقة الضعيفة . ان له ارتباطات تاريخية مع الكيزان . وابنائه في القصر . وهم جزء من النظام الذي قرر والدهم محاربته بالسلاح . واذا حمي وطيس المعركة قد يضعهم النظام في واجهة المعارك . كيف الدبارة ؟ انا علي اقتناع كامل بان الصادق ماحيواصل لنهاية المشوار . الموضوع حردة . وانا في وانتو في وحتشوفوا .
ناس الملوص كانوا جنوب السكة حديد في الخرطوم منطقة مدارس الكمبوني . عندهم قيطان لمبة حوالي شبرين مطوي بيلفوهوبيطلبوا من اللاعب ان يضع المرواد في الوسط " ويسحبون القيطان ويخسرالمساكين واغلبهم من اهل الهامش من اتي بهم القطار الي العاصمة . وتطلع ملوص . والتلاته ورقات هي ثلاثة اوراق كتشينه احداها باللون الاحمر والاثنتان باللون الاسود وينادون احمر يكسب . ويكون هنالك شريك للمحتال يلعب ويكسب كل الوقت . ويتشجع احد اهل الهامش . ويبدا باللعب ويختفي الكرت الاحمر . ويخسر المسكين كل فلوسه . وهذا هو حال الهامش . طالعين ملوص . وكل الشعب السوداني كان طالع ملوص , دلوكت عاوزين نعرف من البداية . الديمقراطيات كلها طلعت اوفسايد لعبة قون .



[email protected]


تعليقات 21 | إهداء 0 | زيارات 3445

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1165139 [تكس راجع]
0.00/5 (0 صوت)

12-08-2014 01:22 AM
الصادق عامل ذى الشربوت لاخاتنو مع العصير لالامى فى العرقى

[تكس راجع]

#1164602 [shift]
0.00/5 (0 صوت)

12-07-2014 01:03 PM
صوت سيده فضل الله برمة

His master voice....That is what Elsadiq really blieves.

[shift]

#1164538 [عمك تنقو]
5.00/5 (1 صوت)

12-07-2014 06:57 AM
علم .. الجنيات الوراثيه: المهدي الجد دجال يدعي المهدوي وبهوس ديني يزبح الالاف من البشر . الحفيد علي قدم جده يدعي ويدعي .

أين الشعب ؟ أين الأمة ؟

صدقه الصادق الامين حين قال : كما تكون يولي عليكم .

[عمك تنقو]

#1164467 [ابن السودان البار*****]
5.00/5 (2 صوت)

12-07-2014 02:52 AM
الصادق حريف بيرمي شبكته في كل حتة يتوقع يكون فيها سمك وفير ؟ يعني لو البشير ما انزاح عنده ولدين معاه ؟ ومشرك في الجبهة الثورية بولدين ؟ ولو حزب الترابي فاز فهو نسيبه وخال أولاده ؟ ولو طلع تنظيم جديد يمكن ان يستولي علي السلطة حا يشرك فيه واحدة من بناته او أولاده ؟ ولو المصريين عملوا انقلاب لصالح حلفاءهم المراغنة حا يتحالف مع المراغنة ويهتف ويقول علي مضض شي لله يا علي وكل ذلك حفاظا علي مركز الاسرة التي يسميها الكثيرين بحزب الأمة ؟؟؟ وهي في الحقيقة طائفة.دينية كونها المستعمر لخدمته هي وطائفة الختمية ًأدوا دورهم بكل كفاءة وإخلاص وكافءهم المستعمر وملكهم ما ملكهم ليصبحوا اغني أسرتين بالسودان يخدمهم جيوش من العبيد ؟؟؟ وطاءفة الأنصار المملوكة لآل المهدي ضعفت بانسحاب أبناء غرب السودان وانضمامهم للثوار ؟؟؟ اما المراغنة ملاك طاءفة الختمية المقيمين بمصر.حليفتهم في طريقهم الي الفناء بعد وعي الأجيال الجديدة ًوكشفهم لاكذوبتهم الكبيرة بأنهم إشراف ومن سلالة النبي صلعم ؟ واحلف لك بالله يا عزيزي شوقي ان هذين التنظيمين ليسوا بأحزاب وإنما طوائف دينية منقرضة وكما تعلم الحزب له برنامج ولا تملكه أسرة حصريا ولك التحية والاحترام

[ابن السودان البار*****]

#1164463 [على]
5.00/5 (1 صوت)

12-07-2014 02:42 AM
انا ما بعرف الناس كيف بيصدقوا الصادق مش ولدوا فى السلطة ومساعد رئيس الجمهورية مش ولدو دا كان بتاع تهتدون وهى فى الحقيقة بتاعت تستسلمنو مش الصادق عارض نميرى وبعدين صالحه ومشى فى جنازته بالرغم من انه لم يعزى فى اللذين وقفوا معه عندما اختلفو مع هذا الدكتاتور مش برضو عارض بشة وبعدين اتصالح معه مش هو صاحب المقولة التى تنادى بعدم اسقاط النظام بالقوة طيب ناس الحكومة قفلوا عليه الماسورة ووجد ممولين جدد حتى تدفع له الحكومة اكتر وبعدين يرجع تانى ماهو دا الصادق ما عندو مواقف ثابتة مع البيدفع اكتر

[على]

#1164436 [ابو عرب]
0.00/5 (0 صوت)

12-07-2014 01:55 AM
الرجل المناسبىسيظهر في الوقت المناسب اهموشئ الضغط وبس السيسي كان وين ما ظهر ومسك مصر اهم شئ الضغط بحكمة وهدوء بالتوفيق

[ابو عرب]

#1164409 [حسن النعجة]
0.00/5 (0 صوت)

12-07-2014 12:25 AM
(انا علي اقتناع كامل بان الصادق ماحيواصل لنهاية المشوار . الموضوع حردة . وانا في وانتو في وحتشوفوا .)

من دون مجاملة, كلامك صاح ياشوقى .. وتاريخة يشهد عليه .. ماجبت كلام من عندك .. على كل حال انا مطمئن سفينة النضال بمن فيها تشق طريقها وهى الان فى اعالى البحار .. والصادق سيظل يجلبق فى المياه الضحلة .. خلوه خللوه وانسوه .

[حسن النعجة]

#1164384 [ترير]
0.00/5 (0 صوت)

12-06-2014 11:09 PM
بلد انجبت عبدالله الطيب والطيب صالح ومحمد وردى ومحجوب شريف وعلى عبداللطيف وعبدالفضيل الماظ.وبابكر بدرى وبقيه الافذاذ..يجى فى الاخر يحكما عمر البشير..!..شفتو المحن..

[ترير]

#1164376 [اسامة على]
0.00/5 (0 صوت)

12-06-2014 10:56 PM
العم الكريم والاستاذ الجليل شوقى بدرى
تحية وسلاما
المعروف ان الحكومة السودانية الحالية تتكون من اطياف شتى ووفقا لثقل حزبى او جهوى ولاعلاقة لتكوينها بالمستقلين او التكنوقراط - فاما كوادر الحزب الحاكم او من تحالف معهم . فمثلا الرئيس ونائبية من المؤتمر الوطنى ود. الدقير اتحادى ديمقراطى- ثم السيد موسى محمد احمد جبهة الشرق وكذا الحال للوزراء كل يمثل حزبا او تيارا او جهة ما- سؤالى الذى لااجد له اجابة:- من يمثل السيد عبد الرحمن الصادق؟ فقد تبرأ من حزب الامة. وقال السيد الصادق المهدى ان عبد الرحمن يمثل نفسه! فهل نفسه تنظيم ام حزب ام جبهة؟ علما بانه ليس رمزا وطنيا او تاريخيا او كفاءة مهنية يشار لها بالبنان-
فافدنى ايها العم الكريم عن سؤالى الحائر وان لم تجد لى اجابة فدلنى على من قد اجد عنده الاجابة الشافية فقد سقمت من تقلب وجهى فى السماء بحثا عنها وااهل ان اجدها فاصرخ كما صرخ الاخ اياه(( وجدنها وجدتها)) -مع وافر تقديرى وعظيم احترامى

[اسامة على]

ردود على اسامة على
Sweden [shawgi badri] 12-07-2014 04:29 AM
العزيز اسامة لك التحية . عندما رخع الوعيم وليم دينقالي السودان في 1965 . وبعد مؤتمر الاثناعشر قالوليم دينق للصادق انهم كجنوبيين لن يقبلوا دستورا يجعل من الرئيس مسلما وثلاثة من نوابه مسلمين . ولا يريدون ان يكونوا مواطنينمن الدرجة الثانية في بلدهم . وطمن ممثل حزب الامة كمال الدين عباس وليم دينق بانه كممثل لحزب الامة لايوافق علي كلام هذا الكلام مسجل في فيديو نشره كمال الدين عباس قبل سنوات ,,,,,الترابي الذي كان موجودا . فقال وليم دينق انا اسف مسر كمال الدين انت ممثل حزب الامة ولكن ممثل الصادق المهدي هو مستر حسن الترابي , وبعدها باسابيع قتل وليم دينق في كوبري التونج ومعه ستة من حرسه. وكان الصادق قد اقنعه بان يؤمن علي حياته . واستلمت ارملة وليم 20 الف جنيه 60 الف دولار وساعد خالهم الاخ الدكتور توبي مادوت في تربيتهم .
يا اسامة عبد الرحمن يمثل والده والصادق عضو في تنظيم الاخوان العالمي .


#1164350 [sudaniiy]
0.00/5 (0 صوت)

12-06-2014 10:02 PM
الصادق يعرف نهايته فى نهاية اتقلابات الجيش السودانى
لذا هو ما انفك وما فتر يخطط لانقلاب ولكن بقيادة ابنه وابنه الاخر
فى جهاز الامن
على الجبهة الثورية حل الجيش السودانى كما حدث فى اديس ابابا عند سقوط منقستو ولكن بشروط
1- ان تخرج القوات من المدن
2- لا سياسة فى القوات المسلحة
3- اي اقليم له 50% من موارده و40% للخدمات بحساب الفرد
هناك عائلة الميرغنى و هؤلاء ممكن يجيبو مصر كما اتو بالانكليز فى تاريخهم القديم
فالطائفية هي واسطة دخول الضباط للكلية الحربية وهي حريصة على العسكر
ومناطق النزاع اليوم تقع فى دوائر الطائفية والعالم فهم

[sudaniiy]

#1164309 [ربش]
5.00/5 (1 صوت)

12-06-2014 08:02 PM
الصادق المهدي مخذل و أفذر ولا يعول عليه في إنجاح أي تحرك يزيل الكيزان ود حرده ساااي ذي ما قلت أستاذي شوقي .. ونداء السودان صريخ ورجع صدي و بس .

[ربش]

#1164145 [ود عز]
4.00/5 (2 صوت)

12-06-2014 04:04 PM
نعم الصادق هو الحلقة الاضعف و كما تم ازاحة الترابى الغواصة من المعارضة يجب التخلص من الصادق لانه غير صادق و الوضع لا يحتما ضبابية فى المواقف

[ود عز]

#1164133 [nk]
4.50/5 (2 صوت)

12-06-2014 03:46 PM
يا استاذ شوقى براك قلتها اى انتقاد للمعارضة يصب فى خانة هى مصلحةللكيزان المعفنين المعفنين اصلا والمعفنيين فى حكم البلد نحن فرحانين بالصادق ما تطير لينا السكرة وصراحة الراجل مهما قلت ادى دفعة كبيرة للمعارضة حتى المرغنى رغم خي ابته لو انضم للمعارضة علنا سوف يعطى دفعة كبيرة هذا هو السودان وخادم الفكى مجبور على الصلاة

[nk]

#1164101 [ابو محمد]
3.00/5 (1 صوت)

12-06-2014 03:05 PM
بكل اسف هذه هى الحقيقه

[ابو محمد]

#1164082 [عماد]
0.00/5 (0 صوت)

12-06-2014 02:32 PM
انا متاكد انو ناس البشير ديل غير صالحين أي الصلاح بتاع المصطلح فقراءحسب اعتقاد اهلنا البسطاء.
لكن تصرفات ناس قريعتي راحت ديل ناس عم شوقي بدري يخلوا ناس البشير اقعدوا 601 واحد سنة بتاعت النكتة .
الناس هسي ماشين في الطريق الصاح في داعي لتفركش الصفوف ولو الامة بما تراه انت فيه من عيب مابقدر الاهمية لما تحالف معه هولاء الرجال .
فانت من وين راكب ياعم شوقي ولا الحكاية شنو .

[عماد]

#1164080 [كباس]
0.00/5 (0 صوت)

12-06-2014 02:29 PM
سلمت وسلمت يداك دائما رائع والله
اكتب لتعرية هؤلاء السلفة والمنافقين
شكرا استاذنا شوقي واكثر الله من امثالك

[كباس]

#1164073 [نور سلطان نزار]
0.00/5 (0 صوت)

12-06-2014 02:16 PM
فعلا عمنا شوقي كل واحد عيز يلعبنا ملوص.

[نور سلطان نزار]

#1164066 [مواطن]
0.00/5 (0 صوت)

12-06-2014 02:00 PM
ما جبت سيرة المصريين المرة دي ليه ؟؟؟؟؟؟؟؟؟؟؟؟

[مواطن]

#1164046 [ادروب الهداب]
0.00/5 (0 صوت)

12-06-2014 01:13 PM
لك التحية والود استاذ شوقي
انا ماعارف الصادق ده من يوم ما انا في المدرسة اﻻوليه هو رئيس وانا اﻻن عمري 71 سنه الصادق عاوز شنو بعد
العمرده .. ولا مافي رجال يقدروا يديروا البلد الهامله دي!!!

[ادروب الهداب]

#1164004 [عادل الامين]
0.00/5 (0 صوت)

12-06-2014 10:43 AM
تعريف اينشتاين للغباء " هو فعل نفس الشئ مرتين بنفس الأسلوب ونفس الخطوات مع انتظار نتائج مختلفة...وهذا ما تفعله النخبة السودانية وإدمان الفشل بالسودان الآن و عبر العصور ...
العبث بالدستور وتصفير العداد مستمر مع نفس الناس الاجضهواتفاقية ادس ابابا 1972 عايزين يجضهو اتفاقية نيفاشا ودستور 2005
ناس المؤتمر الوطني والبشير في اخر مراحل الطغيان يفصلو ليه ترزية المؤتمر الوطني في دستور على مقاسو مستورد خصيصا من بوركينا فاسو-رئيس الى الابد-
ومعارضة الثلاثة ورقات والملوص وبسبب الحسد والشوفينية وحقي سميح وحق الناس ليه شتيح وعقدة د.جون قرنق والملايين الطلعت عشان نيفاشا في الساحة الخضراء ..عايزين يقولو المشكلة في نيفاشا وفي دستور 2005 وليس في المؤتمر الوطني وعضويته المختلة الوعي والشعور من الراس الى الساس...وعايزين يبدو في دخلت نملة واخذت حبة وخرجت ...
واكاد اجزم من قرا نيفاشا ودستور 2005 من كل السودان والجنوبيين بس 2 فقط علي عثمان محمد طه بحكم توقيعه على الاتفاقية ودمنصور خالد بس وسفره القيم الشارح لها -السودان تناقص الاوتاد وتكاثر الزعازع 2010
الباقين ديل العاملين فيها بمثلوا الشعب السوداني طالفضل"وهم بمثلو عليه من نصر قرن بس تنطبق عليهم اغنية عوض دكام
كان جينا لي البوبار
نلى ناسو كتار
الحمام كان طار
سوو ليه شمار
فشخرة واوهام
كلااااااام يا عوض دكام
***
والله نيفاشا ودستورا ابعد 1000 سنة ضوئية عن نداء السودان الفطير والغوغائي وفعلا لا خير في البنا "حزب المؤتمر الوطني " ولا البعجن في الطين"معارطة نداء السودان"

[عادل الامين]

ردود على عادل الامين
Switzerland [عبد الباقي شحتو] 12-06-2014 08:38 PM
شكرا استاذ عادل متعك الله بالصحة و العافية .....

ياناس ..انا و الله مافاهم اي حاجة .مفاوضات معارضات مسار اول مسار تاني .....اين القائد عبد الواحد نور من هذا ...لان بدونه لايوجد سلام و يوجد بيع للنازحين و المهجرين و المهمشين ...و لايمكن تحريب المجرب مافي و احد يقول نحن مع الكيزان و نعمل لمصلحتهم .زانا بقولها عديل المسافة بيني و بين الجلابة و خدهم من جلابة الهامش ملاين السنون الضوئية ..و الرهيفة التنقده يعني البحصل شنو بعد ما قتلوا اهلي المباشرين ....و ما يجي زول يونس نفسوا في السر يقول انا حاسد فلانة !!!!! بس للعلم انا ذي و ذي اي زول مواطن ساكت بتابع اعلان باريس .اقوم انطط و افرح , العهد الجديد اقول اجمع كتبي في كراتين و اقول يا بلد انا خلاص جاي طب , مثاق الثورية اقوم احرس الناس في محكمة العدل الدولية ...انا طبعا زول و اثق من القادة و انهم بجبوا لينا الحرية اي و الله اسع دي بجيبوها ..و الاعلان شنوا ماعارف و اتفاق سوق ام دفسوا , و انا بعني دي بشوف ناس الامن المدسوسين و العلنيين بتهامزون و يتلامزون و هم في غبطة في امرهم بان البيعة تمت ....لكن البقنع الشعب و الناس الذي ديل شنو...؟؟؟ اه استاذ حيدر احمد خير الله ينصر دينك و الله ياك انت الزول البعرفوا ...رحم الله استاذ محمود محمد طه.... اليوم عمنا شوقي بدري قال الناس دي ح تطلعنا ملوص.
انا معجب بمواقف عبد الواحد و شعبه الواحد ...ز ما ح نسلم رقبتنا لاي زول بيبعنا تاني ...اه ياولد ابوك الكلام ده ككيف..,,....؟؟؟؟؟؟؟

اقراء يا صديق و ياصديقة كتابات حيدر و شوقي بي كجة عين بدون تخونهم ..تجدونهم يقولون ما قاله القائد عبدالواحد نور .....و انا و الله بحبه عديل لانه في محله مابزح ذي سلاطين الفور الاحرار..... و انا شحتو ما بعرف تلج و لا بكسر


#1163991 [كاره الكيزان]
4.00/5 (3 صوت)

12-06-2014 10:20 AM
راهنا على الرجل عشرات المرات وكل مرة نخسر .. المره دي توبه لي حبوبه .. اراهن على الشيطان ما اراهن على الزول ده

[كاره الكيزان]

شوقي بدري
شوقي بدري

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة