كراع البقر .
12-07-2014 02:46 PM


كراع البقر ..
***
محمد عبد الله برقاوي..
***
لو كان جد هو الإنتخبك ..
ما بتهين وتذل شعبك ..
لكنك جيت سارق دبابه ..
رفعوك .. كيزان قالو صحابه ..
ختوك علي كرسي سحابه..
باكر في الريح الهبابه..
بتسيح الغيمة الكضابه..
تتشنقل من فوق يا يابا..
وحصادك يطلع بتابه ..
كراع البقر الجيابه..
تجيبك زي العكلابه ..
وفي الموية يروح ليك دربك ..
يا الماك خات الرحمن في قلبك..
***
اللِمة الصابرة علي ظلمك ..
وقابضة الجمرة مع همك..
وشبعت من قرفك ومن سمك..
في يوم حاتشرب من دمك..
في الساحة مع الخونة تلمك..
تعاقبك في الدنيا علي ذنبك..
قبال ما تروح لحساب ربك ..
***
لسانك منك متبري..
تعوعي كما الديك منشري ..
الدنيا البتفهِم وتوري..
والدهر اللي الجهلة بقري ..
ما داووك من جهلك ولعبك ..
وسادر في غيك تتلبك ..
***
القايد بكبر بالحكمة ..
مابيصغر ويصبح نقمة..
المخ للحاكم نعمة..
والراس مش بس لفة عمة ..
وما يغرك أبداً طوق أمنك..
يا مطنش عن سرقة صحبك ..
***
النافخنك وكانو بغشوك..
ديل يوم الحارة بفوتوك ..
وبي أرخص قيمة يبيعوك..
لعدالة ( فاتو ) يسوقوك..
أو..في شرك الشارع تتشربك ..
ومصيرهم أيضاً في ركبك..
***
زعامة القايد في الهيبة..
وحُسن التفكير والسيرة الطيبة..
ما هيجة ورقصة خيبة..
أو زلة كلمة و تصبح عيبة ..
يا الجارفك وهم الترطيبة..
تشتم في الساكتين علي نهبك..
وقايل الناس ميتين في حبك..
***
***

[email protected]


تعليقات 6 | إهداء 0 | زيارات 1448

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1164980 [كشك]
5.00/5 (2 صوت)

12-07-2014 09:01 PM
الفهم قسم .. ده لو كان بيفهم كان اتعظ زمان من ( الله يستهزئ بهم و يمدهم في طغيانهم يعمهون )

[كشك]

#1164854 [habbani]
5.00/5 (1 صوت)

12-07-2014 06:26 PM
يا برقاوى دا ايات الله البينات التى ترتجف لها أوصال المؤمنين وأولهم أمير المؤمنين عمر بن الخطاب ما إستجاب ليها عايز إستجيب لى كلماتك الرصينة دى ؟
أعوذ بالله .. دا سيدنا على حين قرأ ( يوم تذهل كل مرضعت عما أرضعت وترى الناس سكارى وماهم بسكارى ولكن عذاب الله شديد ) وقع مغشيا عليه فى حين عمر هذا يمر عليها وكأنه يمر
على مقابر مسيحيين وإن كان لمقابر المسيحين لها منا الأدب والعظة والتذكر .

[habbani]

#1164836 [سيف الدين خواجة]
0.00/5 (0 صوت)

12-07-2014 06:12 PM
شكرا برقاوي وتسلم انا ابواب الرحيل البلد في ذمتكم واجالنا القادمة في امانتكم ولا يهمك من يتهمك او يتكلم الوطن الراجيكم اكبر والله اكبر علي من يضيع وطنو ويضيع شعبو ديل خلاص ما شبعو ما بحسو بالموت والجوع هم فاضين لينا غير لحس الكوع ياما بكرة يعرفو منو البيلحس كوعو ...احذرو غضبة الحليم .........سلامات

[سيف الدين خواجة]

#1164792 [مشروع الجزيرة]
0.00/5 (0 صوت)

12-07-2014 05:32 PM
يسلم يراعك يا استاذ على الكلام الجميل الذي يطعن في الفيل ما في ضلو.

[مشروع الجزيرة]

#1164729 [ابو كوج]
0.00/5 (0 صوت)

12-07-2014 04:11 PM
لا والف لا يا استاذ برقاوي قلمك انظف من ان يهجو او حتى يمدح واحد ما يستاهل يغفر ذنبو في الدنيا قبل الاخرة خليهو يرقص هو جمعتو والمثللك ان هجتو اديتو قيمة وحتى لا يفتكر ها الابله بانه رقم اتبرا مما كتبتو عشان البيذكروه بالخير او الشر ناس ارقام وانت قصدت توري حجمه للناس واديتو قيمة للما عندو قيمة وشكرا

[ابو كوج]

ردود على ابو كوج
United Arab Emirates [شاعر تاني ..] 12-07-2014 05:51 PM
لا غضاضة يا سيد أبو كوج في هجاء المجرم إذا كان فيه من المواعظ والحكمة والعبر وتعرية السلوك المشين..ولا مانع ايضا من مدح الشجاع أو الكريم طالما في ذلك من إيضاح وإعلاء لشأن المكارم والخلق النبيل ..فالشعراء هم وزارة إعلام الزمن الماضي وقد خلدت الكثير من أبياتهم التي أصبحت أمثلة تضرب حسب المناسبة التي تنطبق عليها ..ودونك بيت المتنبي وهو يتظلم لسيف الدولة ..بقوله ..يا أعدل الناس إلا في معاملتي ..فيك الخصامُ وأنت الخصمُ والحكمُ ..أو قصيدته في هجاء كافور الأخشيدي .. وبعد كل ذلك الا يستحق (كافوري السودان ) كلمات قدح في ظلمه و جهله و تفرعنه على هذا الشعب الطيب الذي خلقه الله لا يعرف الإغتيالات ولا التهجم بالعصي على من يسيء اليه من الحكام .. فو الله لو كان البشير بزفارة لسانه هذه رئيساً لمصر القريبة منا ما كان له أن يتضرع في المقابر و يرقص في الملمات وإلا طالته يد المظلومين بالسوء ..أوليس إكتفاء شعرائنا بهجائه أقل مما يستحقه من رد على بذاءاته التي تجاوز فيها حدود اللياقة ولن نقول الدبلوماسية لآنها غير موجودة في عهد الإنقاذ حتى في أروقة وزارة الخارجية ..


#1164696 [البعير]
0.00/5 (0 صوت)

12-07-2014 03:34 PM
مبروك كلام لارائع من استاذ كبير ورائع ، وربنا ينصر الشعب السوداني ونداء السودان

[البعير]

محمد عبد الله برقاوي
محمد عبد الله برقاوي

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة