عاجل
02-24-2011 08:49 AM

رنة الناس

عاجل

استيلا قايتانو

اعلم بان الكثيرين من القراء عندما قرأوا العنوان قد اصابهم هاجس او فرحة ما ربما احمل نبأ التنحي عن عرش \"رنة الناس \" ، اريد ان اطمن الشعب القارئ باني قاعدة مكنكشة ولن يفيد اعتصامكم في ميادين تحرير الصحف اليومية لزحزحتي ، ولو تظاهرتم ورشقتوني بدراب من الاسئلة من نوع انتي وين؟ وما قاعدة تكتبي مالك؟ وغيري سياستك بتاعت اللبدة والخفصة دي جهجهتينا ياخ ؟ سوف اطنش كل تلك المطالب واضربها باقرب حيطة جنبي، انتو قايلين حكاية الكتابة دي ساهلة ؟ ما تحمدو الله ، اطلب منكم التعقل والعودة الى قواعدكم سالمين قبال ما تتطلعوا العفاريت بتعتي وبعدين تندمو ولو ابيتو حينها لن اتوانى ، سوف امطركم بنكات مسيلة للدموع واطلق عليكم رصاص كلمات حية عديل كدا تحت عيون كل اعلام الدنيا كان ما عجبكم ،

اساسا مافي اي زول حينقذكم مني مش وحكاية ينندو ويشجبو تعاملي العنيف معاكم من خلف الكاميرات دي لن تجدي نفعا، لانو مافي زول داير مني حاجة ولا ذانقني في حاجة ولا ماسك لي زلة عشان كدا ما بنضغط اكان كل الشوارع سالت فيها دموع الفرح ومخاخيط السرور ومصارنكم اتقطعت من الضحك، انها سلطة حب الناس والذي اشعروني به من اول بيان لي عند صدور اجراس الحرية ، فلي كمين وعشرين قول تلاتين قول اربعين شهرا عادين لي مالكم وانا هنا ، اكتب ما اشعر به حتى بدون ان افكر كثيراً ، ان شاء الله دايرني انخلع كدا ساكت باخوي واخوك مثل ضرس فاسد، دي تشموها كشنة وكان ضغطو علي بنجلط وكان انجلط بتنخلعوا انتو، عشان كدا انسوا ثورة المشاعر دي ما نحن عارفين البينا اكبر من الحاصل وتعاهدنا على الريدة والمحبة من اي مكان وجغرافيا دايرني كمان على اخر سودانيتي تطلعوني بتاعت نقد عهود ومواثيق ؟ الما ديراني بس ما يقرا لي دي دايرة ليها شغلة دي والداير يقرا لي اليكون صبور عشان كدا ما في داعي للفوضى والما عاجبو كلامي دا يطالعني في الفيس بوك قايلني بخاف يعني دي تلقوها عند الغافل و خلونا نرجع لموضوعنا .

عاجل كلمة صغيرة ولكنها كانت مثل طعم سحري تجعلك متسمرا امام التلفاز متشنجا في انتظار عاجل واحد فقط وسط كل تلك العواجل، عاجل الذي يحمل الخبر اياه تنحي الرئيس الفلاني في بلد السعد الفرتكانية وانتهاء اجل حكمه الذي و ان قاس بالسنين فسيكون نديد من قلبو موازين النظم الدكتاتورية او يكبرهم بكثير من السنوات فاغلبهم هم ابناء تلك الانظمة لانهم ولدو في عصرها وزمانها وهم محاطون بمؤسساتها التربوية والاعلامية من كل ناحية وصوب يسمعون ما يراد لهم سماعه ويحشون ادمغتهم بالافكار التي يريدون ان يحملوها ، يمهدون الطرق التي يجب الا يحيدو عنها ، ليصبح النظام الحاكم شركة تنتج انسان مقهور يجد المبررات لقاهره ويحس بالرضا ويبوس ايدو ورا وقدام يحمد الله . بما اننا في عصر السرعة والعولمة ويمكن بكِلك بالماوس وضغطة صغيرة بالريموتكنترول ويتخارج احدنا الى عوالم اخرى وبسرعة البرق ليجد الفرق الساشع بينه والناس التانين ، بين وطنه الذي يعامله كشئ من الاشياء واطان تحترم اناسها وتعمل لهم الف حساب ، لتجد الدكتاتوريات نفسها بانها اصبحت من عصر اخر ، عصر من عصور الظلام والظلم ، عصر لا يتسق مع اليوم ، اليوم الذي اصبح فيه ال 24 ساعة تمضي كلحظة امام عيون كل الناس ، عصر تدعم فيها الشعوب بعضها البعض بقوة الكلمة والتعليق او بمجرد وضع صورة معبرة ، لشهيد او لعلم البلد الثائر اهلها ، او وضع صورة تجمد لحظة قمع او عنف بايدي النظام الذي لا يريد ان ينخلع باخوي واخوك ، او تجميد لحظة ارتجاف الموت نفسه امام شجاعة ثائر يحرق نفسه او يقف امام سيارة تقذف المتظاهرين بالماء ، فهذه المناظر ارجفت الانظمة عندما اختارت الشعوب الموت الكريم على حياة لئيمة وبائسة ومذلة.
كانت هناك طاقة جبارة تربط بيننا والشعوب الثائرة في تونس حتى جاءت العاجل الذي انتظراهو وفرحنا معهم ، وشدتنا الثورة المصرية ثلاث اسابيع بلياليها في انتظار تلك العاجل الذي تأخر كثيراً ولكنه جاء اخيرا وسجدنا بقلوبنا معهم في ميدان التحرير، ثم شدتنا الشرارة الاولى هنا في السودان ولكن كف نف انتطفأت وتعرفون الباقي . السؤال هنا لماذا تصدر تلك الدول الفاهمة للديمقراطية ادوات القمع لدول العالم الثالث مع العلم انها تتطور كل فترة فبمبان الثمانينيات ليس بمبان الافيات ؟ ولماذا تتهافت الدول النايمة على تلك التجارة القامعة للشعوب وتشترى منها اكثر من ما يشترون القمح، مع العلم انها لا تستخدمها لانسانها الفاهم ؟ لا ندري هل لاننا شعوب بربرية وغير مروضة ولا نعبر عن انفسنا سوى بالعنف والعنف المضاد اذا كان هذا رأيها اي لا نجيد التعامل مع المسيرات السلمية ؟ ام انها تحمي انظمة بطريقة غير مباشرة ترعى وتدافع عن مصالحها هي ولو كان على طريق مفروش بجثث شعوبها ؟ ويقعوك عمدا في ورطة الاستنتاج ، هل تعجبهم ديموقراطياتنا المدغمسة ام يخافون علينا من حرية قد نسئ استخدامها ؟ ام انهم افهم مننا ام نحن افهم من حكوماتنا ام اصلا يوجد سوء فهم ؟؟؟؟؟؟؟؟ افتونا .


تعليقات 27 | إهداء 1 | زيارات 7035

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#102129 [صلاح/الدمازين]
4.14/5 (12 صوت)

02-25-2011 10:15 PM
يارايعة بروعة هذا الوطن الجميل بعد القلتيهو فى مقدمة مقالك برضو بنقولك

اظهرى ...... اظهرى........ اظهرى
وللطغاةوالبغاة حنقوليهم
ارحل ........ ارحل ........ ارحل؟؟؟؟؟؟؟؟؟


#102085 [قرفان سواح شليل وين راح]
4.11/5 (7 صوت)

02-25-2011 08:35 PM
أستيللا أنت فلذة فؤاد رائعة :D ;) لك كل الحب و الود و الإعزاز و التقدير يا رمز السودان شمالا و جنوباً) الأصيل ، نرى فيك أنفسنا فشكراً أيها المرآة الجميلة الشفافة!!؟؟ خليك حريصة ...على التواصل ’’’


#102074 [ود الابيضا]
4.15/5 (13 صوت)

02-25-2011 07:57 PM
اجمل حاجه قلتيها انو البينا اكبر من كده بعد شويه يكون البينا وبين دارفور اكبر من كده بعدين البينا وبين الشرق اكبر من كده والمشوره الشعبيه دى ياربى برضو بكون البينا اكبر من كده؟؟ غايتو لو بقى كده انا البينى وبينكم كلكم حيكون اكبر من كده .......... اقول ليكم حاجه رايكم شنو نتطالع كلنا فى الفيس بوك وبعد شهر فى ميدان التحرير وما نرجع كلو كلو ونقول الشعب يريد اسقاط النظام





عشان مافى زول يقول البينا اكبر من كده


#101787 [أبو المجد]
4.09/5 (9 صوت)

02-25-2011 09:20 AM

من بعد التحية يا إخوتى , رغم إنى لست من فرسان هذا الميدان أقصد الكتابه إلا إنى من أشد المعجبين بهذه الصحيفة ومن قرائها والحق يقال إن أول شئ أبدأ به يومى هو صحيفة الراكوبة وقبل كل شئ أشوف وين مقال إبنتنا جوهرة الوطنين وأبو رماز كان موفقاً جداً فى هذه التسمية . ويا بنتى أكتبى ومتعينا بكتابتك ونحن وراك وراك والله لو رحتى جوبا ولا الصين فالعالم أصبح قرية صغيرة . فأكتبى أى شئ وقوولى كل شئ فكتا تخفف عنا الكثير من ما نعانيه خارج الوطن ومن ما يعانيه أهلنا فى الوطن .


#101731 [شمالي]
4.15/5 (9 صوت)

02-25-2011 04:18 AM
غايتو يا استيلا
أنا ما عارف لو بتفتحي الراكوبة وتقرأي تعليقات الناس أم لا ؟
عشان تعرفي نحنا بنحبببببببببببببك كيف

أما عن سؤالك يا أبنوسية يا دكتاتورية بتحكرك في قلوبنا
فالدول المتطورة ما كتلة واحدة أو بالأحرى بها مراكز قوى مختلفة
هذا لا ينفي أنها فاهمة للديمقراطية أكتر مننا
كما أن البراغماتية موجودة لديهم كما هي موجودة لدينا
لكن براغماتيتهم تختلف عن براغماتيتنا
يعني براغماتيتنا تُحسب بمصلحة فئة السلطة ومطبلاتيتها بس
أما براغماتيتهم فتُحسب بمصالحهم العليا
شوفتي كيف!

غايتو كلامي دا ما بقدر أعيدو ليك

ببقى زي حكاية:
قميص نفيسة نشف
قميص نفيسة نشف
قميص نفيسة نشف


#101715 [ود لفاشر]
4.13/5 (7 صوت)

02-25-2011 02:12 AM
( )
استيلا يا رائعة
مع خالص ودي لكي


#101684 [خرباش]
4.10/5 (8 صوت)

02-25-2011 12:38 AM
إنتي لو راجلة أدينا إسمك في الفيس بوك عشان نطالعك ونتوالاك براجمات الرسائل وتعليق أعجبني ... لك الود يا رائعة.


#101627 [محمد نور الدائم]
4.14/5 (10 صوت)

02-24-2011 10:32 PM
العزيزه استيلا
السلام عليكم
مل لقيت كلام أقولوو ليك غير شكرآ شكرآ


#101478 [سودانية]
4.13/5 (10 صوت)

02-24-2011 06:27 PM
استيلا يا بت مهيرة وعزة يا سودانية يا اصيلة نحن نحبك حتي النخاع ولو كرهناك فاننا قطعا نكره انفسنا وذاتنا لانك ذاتنا وزادنا ولك الحب اختي


#101474 [hadi]
4.13/5 (7 صوت)

02-24-2011 06:20 PM
استيلا . يابت وطنى ياابنوسية ..
لك تقديرى


#101396 [mohamed]
4.11/5 (7 صوت)

02-24-2011 04:00 PM
الليلة مقالك ما عجبنى..... انتى كويسة؟؟؟؟؟


#101355 [ابو ايه]
4.13/5 (9 صوت)

02-24-2011 02:59 PM
ما داير اقول اي شي بس الناس تعرف انو انا بقرا لي استيلا


#101335 [أبورماز]
4.18/5 (7 صوت)

02-24-2011 02:39 PM
لم أجد ما أكتبه لجوهرة الوطنين غير كلمات شاعرنا محمد على أبوقطاطى وتغنى بها فنان أفريقيا الاول محمد وردى ..

سوات العاصفه بيساق الشتيل النى .. وزى السيل وكت يتحدر يكسح ما يفضل شى ...

وهكذا هى جوهرة الوطنين .. وقد أتتنا هذه المره كالعاصفه التى من خلفها السيل وسوت فينا البلاوى .. وكسحتنا وكسحت كل الوراها والقدامه .. ونتمنى أن تدوم عواصفها وسيولها .. حتى يقع كل الما بتريدو وينكسح وينكشح كل الما بريده .. وهو فى حد ما بريده ..وكتابات إستيلا كما العاصفه تماما .. العاصفه تبدأ بنسام واستيلا كذلك ثم تكون العاصفه هبوبا وأيضا إستيلا .. ثم تكون العاصفه عصفا لكل من هو أمامها واستيلا كذلك ودوننا مقال اليوم .. مقالات أستيلا كما السيل أيضا ضحل فى البدايه ثم يعمق ويعمق حتى يبتلع كل من يصل لجته .. الإخوه الذين طلبوا منها أن تبدأ بالعصف والعمق جانبهم الصواب فهى فى عودتها هذه المره تكتب بيدها الشمال بعد أن تبين لها الشمال والجنوب .. وهى بهذا تهدينا قيمة أخرى وهى قيمة إحترام النفس والآخرين .. بوركتى يا جوهرتى وجوهرة الشمال والجنوب ...


#101324 [mohd.mustfa]
4.13/5 (8 صوت)

02-24-2011 02:24 PM
بت النوبة تغنى طروبة ----

بعود الحربة تدق النوبة

يلا يابت ورينا شطارتك

ومرت الأشجار

التحية ل حمدالحسن ومحجوب ود شريف


#101274 [محمد عبدالمجيد]
4.15/5 (9 صوت)

02-24-2011 01:12 PM
أيوووووووةاااااا .. بالضبط كدة :
هم بيفهمو أحسن مننا .. والدليل إنهم يحمون الحكومات التي تنصاع لرغباتهم ومصالحهم... علشان كدة يقولوا يمنعوا السلاح عن الدولة الفلانية ولكن لا مانع من بيعها ما يقهر شعبها.. شفتي الفهم دهـ كيف؟!!؟
...
كسرة: أنا ضد توجهاتك السياسية .. ولكن:
هل هذا يمنع إعجابي بطريقة عرضك لأفكارك واهتمامك بالموضوعات الوطنية؟!


#101197 [ابو مريم]
4.15/5 (12 صوت)

02-24-2011 11:42 AM
العزيزة استلا اوفق الاخ (مونتي رغلو) على ماجاء في تعليقة فاليوم نعيش حالة تستحق الكتابة عنها .... نرجو ان تكتبي مواضيع مسخنة شوية طالما لك قراء بهذا العدد ..... اما اذا اردت ان تمتدحي فحسب اذا حسبك من مواضيع الساعة المولعة نار وباري الضللة والقرقراب اقصد المواضيع الساخرة. مثلا فصل الجنوب ماهو الا جمرة نخن نمشي عليها الخ الخ الخ


#101173 [ابواواب]
4.11/5 (8 صوت)

02-24-2011 11:20 AM
الرائعه دوما استيلا اذا خرج الناس عليك لبرشقوك بالورود لا لمطالبتك بالتنحى اسلوبك البسيط فى توصيل الفكره يحشد حولك كثير من عشاق يتحلقون حول مقالاتك ....نرفض فكرة التنحى ....ولا اقول تربعى على كرسى السلطه الرابعه حتى لا تصابى بالغرور..خاصه ان الكراسى هذه الايام اصبحت تثير الفزع فى نفوس المتشبسين بها .


#101151 [أبو علوة]
4.18/5 (9 صوت)

02-24-2011 11:02 AM
لا يا حلوه .. بسيطة ... ديل صنعوا الأحذية عشان نلبسها قمنا شلناها تحت أباطنا ورميناها في وشهم جماعتنا زعلوا صنعوا ليهم البمبان عشان يرموهوا في وشنا ودي عايزه ليها فتوى .


#101146 [مدادي]
4.16/5 (6 صوت)

02-24-2011 10:58 AM
الديمقراطية يا أختي تربية ... ولأننا في بلداننا لم نتربى عليها ولانمارسها حتى في بيوتنا فالبيت محكوم برأي واحد وكذلك بقية الأشياء ..آراؤنا مقموعة ومدسوسة إذن من أين تأتي الديمقراطية وقد نشأنا على هذا الرأي الواحد فمديرنا يأتي بالتعيين ولا يد لنا في محاسبته ورئيسا يأتي بالدبابة ويا ويلينا لو عارضنا أو قلنا رأينا فيه أو في فكره (ده لو عندو فكر) . فهو من يفكر ويعمل بدلا عنا جزاه الله خيرا .
يبقى شيء واحد أن لاتحرمينا من كتاباتك رغم علمنا أنك أكبر من أي حدود ومن أي فواصل .


#101117 [خالد فارس]
4.14/5 (9 صوت)

02-24-2011 10:36 AM
الاخت استيلا زي ماقال الشاعر (غيب او تعال تلقانا نحن يانحنا) لكي المحبة والتقدير ونقدر لك ظروف غيابك لكن بدل رنة الناس اقول ليك رنة رسائل جوال او رسالة فيس بوك تغير حكم 23عام او 40عام والتغيير لازم يحصل في كل شئ وكل شئ بيبداء بالدغمسة وبعدك يتغيير الحال من الاسواء الي الاحسن مجرد دغمسة


#101067 [boiler]
4.13/5 (9 صوت)

02-24-2011 09:46 AM
استيلا الابنوسة والباباية
انتى حقك تعملى فينا اى حاجة انتى عايزها,, تكتبى .. ما تكتبى ...تزلنى خواطرك ..ما تنزليها.. تفرحى .. تزعلى ..تمشى جوبا .. تقعدى فى الخرطوم ... نحن راضين ومبسوطين.. ولاتزعلى روحك ... يكفى انك يا ابنوسة تعملى فينا الدايره .. نحن مقالاتك دى بنقعد بيها سنوات من غير اى كلام تانى يوجع راسنا ..وما داير اقول ليه .. يكفى انها بتلسع اى واحد قاعد على نفسنا او قاعد مكنكش فى كرسى ما قدرو ولا قادر اوفى بحقو ... مقالتك دى عندنا غالية زى الجامعى البوعزيزى الرضى انو اشتغل على درداقة خضار وبعد ما ريحو وشالو درداقته واديهو كف على وشو وشلوت على.......؟؟؟ ما عارف شنوى.,وقالوا ليه امشى يابن ...؟؟؟, بس هو وراهم حاجة, مقالتك دى عزيزة عندنا زى البوعزيزى , مقالتك دى بنحبها وخلى اى واحد جى اطالعنا فى الشارع ولا فى الفيس بوك ذاتو , اتخيلى يارائعة انو الشغلة جابت ليها مطالعات ؟؟ والدايرنا الاقينا هناك فى الضلمة ,خلاص فقدنا المنطق ...بمناسبة طالعنى فى الفيس , بالله اكتبى ايميلك ... تحياتى


#101055 [مونتي رغلو]
4.16/5 (6 صوت)

02-24-2011 09:32 AM
اول مره ما اعجبني مقال ليك مالك بقيت تكتبي في حاجات ما ليها معني
مع انو الساحه مولعه بكميه من المواضيع


#101046 [أبو عبودي]
4.12/5 (9 صوت)

02-24-2011 09:20 AM
عاااااااجل : كلامك زي العسل يا ستيلا متعتينا مع الصباح بمقالك الرائع ده وضحكنا لمن مخاخيتنا سالت سرور والضحك شرطنا كمان ، حنبطل إعتصامات بس ما تطولي الغيبة عننا لأن الشعب يرد إبداعات إستيلا


#101041 [ود الجزيرة]
4.16/5 (7 صوت)

02-24-2011 09:15 AM
كتاباتك دوحة نستظل بها من هجير المعاناة ورفع الاسعار وتشظي الوطن الجريح واغتصاب الحرائر لمجرد التعبير عن الرائ.!!!!!!!!!!


استيلا قايتانو
استيلا قايتانو

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة