المقالات
منوعات
بالدارجي الفصيح .. عن عركي وهاشم والاغنيات
بالدارجي الفصيح .. عن عركي وهاشم والاغنيات
12-18-2014 11:19 AM

image

ولمن عركي وهاشم يتلاقو كان الغُني بكون طاعم بكون ناعم ووبكون واعي وبكون هادف
وبجيب العالم قريب مننا شان يكون اجمل ويكون اروع ويكون انضر
ولم سيرة عركي تجي دايما بتجي وراه سيرة هاشم صديق لانو البينهم ما كان ما بين شاعر وفنان
فالبينهم كان مشروع وعي متكامل وتاريخ من نضال الكلمه
والمشاريع الناضجه بتكون اكبر واقوي من انها تنحصر في الاطار الشخصي وتتقري في السياق الممكن يسوقها للانهزام
لمجرد اختلاف اشخاص او عداوه عابره او قطيعه بتعدي وتفوت .
وبما اني كنت ومازلت متابع لي اغلب ما دار طوال فترة الانقطاع التمت بين عركي وهاشم قادر تماما استوعب اصرار عركي علي انو ما يردد اغاني هاشم وقادر استوعب الشئ الممكن يوصل عركي لي انو يسقط اغنيات زي( اضحكي والاذان) من حساباتو
لكن الماقادر افهمو وما حقدر افهمو هو ليه هم الاتنين شخصنو القضايا ؟
فـــ هاشم مثلا كان ممكن يطرح رايو في مسالة الحقوق بدون ما يشخصن القضيه وبي شكل عقلاني وودي ودون محاكم وتوقيف
واكيد كان عركي حيتقبل الفكره ويستوعبها بدون ما يحصل الحصل.
وبالمقابل عركي بعد ما اسقط هاشم كشاعر لاغنياتو كان ممكن يفتش عن شعر او عن شاعر غيرو لكن ذات الشخصنه هي الخلت عركي ياخد موقف شبه عقابي ضد شعراء كتار وخلي عركي يطرح نفسو كشاعر بديل فيكتب ويلحن ويغني .
فـــ كونو عركي يكتب اغاني فــ دا شئ ما جديد اصلا لكن انو يحصر عركي المغني في عركي الشاعر دا فيهو ظلم كبير للاول وتجربتو ومسيرتو .
فــ الساحه الفنيه ملانه شعراء ما بقلو عن هاشم وعي وتاريخ وشاعريه ولسه الساحه بخيرها ولسع الاغنيات بتطلع من رحم الوجع الحاصل لسه واصله ولسع بتتكتب
فـــ ليه عركي بطل يبحث عن الخبز عند خبازيو؟
وانا ما ضد فكرة انو عركي يكتب . بس كمان ما مع انو يحصر نفسو في نفسو ويحرم نفسو من كم الشعر الجميل الاتكتب والبتكتب.
فياريت لو عركي قدر يتجاوز الحصل ويتعامل مع الشعراء زي ما كان بيتعامل معاهم ويفتش عن الكلمه البتشبهو ويغنيها وكت ما يلقاها دون .ما يلتفت للحصل ودون ما يهجس نفسو بي انو ممكن يجيهو اخطار جديد من المحكمه ويطلع ليهو هاشم جديد ويفقد تاني اغنيات ويخاصما.
واما هاشم فــ الشايفو انو من ما حصل الحصل بينهم فبقي يستهك نفسو بشكل مُضر جدا ويكتب عشان يكتب ويقول (انا هاشم) قبل عركي ومعاه وبعدو انا لسه موجود ولسه بكتب ولسه ياني هاشم صديق . وحالة انو داير يثبت لي نفسو وللاخرين انو لسه هاشم هي الخلتو يستهلك نفسو ويكرر نفسو بشكل مُضر جدا لي تجربتو.

فــ هاشم ليهو فتره بقي يعيد كتابة نصوصو الاتكتبت ويكرر شخوصو ويعيد انتاج الانتجو والاتكتب وفي نصوص اقل جوده من الاصل ودا خلي من شعر هاشم الاتكتب في الفتره الاخيره شعر عادي وما مدهش ومتفرد زي ما كان وزي ما اعتدنا عليهو
تماما زي اغنيات عركي البقت ما مدهشه زي ما كانت والحته دي بكونوا اتوقفو عندها ناس كتار غيري بس احتمال ما قدرو يطرحوها عليهم ويناقشوهم فيها لي حساسية الموقف او لاي سبب كان
لكن البهنا في الامر هو انو لمن عركي يفكر ينزل عمل زي ( بدور ارحل) ومافي زول ينبهو لي انو مستوي النص الكان بغنيهو عركي كان ارفع واجود بكتير من ( بدور ارحل ) ومن اغنيات تانيه اتكتبت في الفتره الفاتت ولمن نحن الناس القراب من عركي والبتهمنا حاجاتو ما نقول الكلام بي شكل واضح ودون غطغطه تبقي المشكله فينا نحن ما في عركي
فـــ يا عركي اكتب الجواك بس ما تحرمنا وتحرم نفسك من الاغنيات الممكن تلقاها عند غيرك فـــ البلد لسه فيها قصائد حميد ولسه فيها شعر محجوب وازهري والقدال وناس كتار حيضيفو لي تجربتك بعد اخر فـــ يــا عركي فتش عن الكلمه وحتلقاها . .
.

[email protected]


تعليقات 2 | إهداء 0 | زيارات 805

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1172412 [جنابو]
5.00/5 (1 صوت)

12-19-2014 07:52 AM
ابو عركي قامة وفنان شعب ومثل هذا النقد المفبرك لا يقدم ولا يأخر بل سيزيده إصرار على أن لا يتنازل كما تنازل الكثيرون ودايما يقيف قدامنا ويقول لينا عن حبيبتي بقولكم

[جنابو]

#1172196 [نو]
5.00/5 (1 صوت)

12-18-2014 10:59 PM
عركي فنان موهوب ورجل امه متعه الله بالصحة والعافيه صاحب مبدء وعزيمة لا تعرف المستحيل

[نو]

عاطف عبدون
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة