المقالات
مكتبة كتاب المقالات والأعمدة
شوقي بدري
البشير حديقة الحيوان والملاهي
البشير حديقة الحيوان والملاهي
01-08-2015 12:06 AM


قبل قليل رميت اضاني سمعت ابني منوا بيج يحكي بعض النكات الانجليزية لشقيقة الاكبر فقوق نقور . منوا من النوع بتاع بكش فلسفة . ولم التفت اليه . ولكن سمعت فقوق الجاد يحكي نكتة انجليزية ، تقول .في واحد سايق بص مليان قرود . البوليس وقفوا وقال ليه ما ممكن تلف في البلد وشايل ليك قرود حايم بيها . القرود دي توديها حديقة الحيوانات .
تاني يوم العسكري يلاقي نفس البص والسواق والقرود . العسكري قال للسواق ,, انا ما قلت ليك تودي القرود دي حديقة الحيوانات ؟؟ السواق قال ليه ,, انا سمعت كلامك .امبارح وديتهم حديقة الحيوانات . والليلة موديهم الملاهي .
البشير لملم المعارضة المدغمسة والمؤلفة جيوبهم والمتلئة كروشهم ، في الوثبة . ودلوكت حيوديهم ملاهي الانتخابات .
محن الانقاذ ما بتنتهي ابدا . اليوم نقرا . البشير يعتمد تعديلات الدستور . معقول ده يكون خبر . الناس الدرسوا اعلام فهمونا انحنا العتالة الما عارفين. انه لمن كلب يعضي زول ده ما خبر . لكن اذا زول عضي كلب ده هو الخبر . يعني كان في احتمال انه البشير ما يعتمد التعديلات الفصلها وطقاها وكسرها دبل عمود وعمل ليها كرشليق وقيطان ؟؟
ونافع يجخ ويقول للمعارضة انه الانقاذ مؤكد حتفوز في الانتخابات . والانقاذ اذا ما ضمنت كان عملت انتخابات ؟ طيب التعب في شنو؟ واحد غلبان قالوا ليه الانتخابات حتكلف قريب بليون دولار . قال يقسموها علينا واصلو هم قاعدين .
المعارضة المشتركة حالتها ذي الراجل الطالب الرباطابي قروش .لم فية وسط ناس . وشهد الناس وطالب بي فلوسه . الرباطابي كان بياكل ليه في تمرقنديلة . مسك المصاصة وقال للراجل شايف المصاصة دي انا بكرة بزرعها . وبعدين حاشتلها في طرف الجدول. واول ما تلد ابيع التمر وانت اول زول حاديك حقك . الراجل ضحك . الرباطابي قال ليه كيفن ما بتضحك ؟ ما خلاص ضمنتا . المعارضة المدجنة ضمنت .
المعارضة المستنبطة او ,, المستأنسة ,, بتضحك علي منو ؟؟ دخول الانتخابات بتكون عادة لان هنالك فرصة للفوز . او لتحضير كوادرها للفوز في انتخابات قادمة . ولبناء اتصال مع جماهيرها وكنوع من الدعاية. الانقاذ دي ما عندها استراتيجيات وتخطيط مستقبلي . ذي حروب الاثيوبيين والمهدية . يا نصرة يا كسرة . مافي انسحاب تكتيكي وتراجع وتعبئة وتغيير خطط . الانقاذ مشكلتها تبقي او تغور . واذا غارت الاحزاب والافراد المشاركين اليوم، ما حيعرفوا يودوا وشهم وين . اذا الترابي وكيل ابليس في الارض وصاحب برائة الاختراع ، عمل خط رجعة . ذي المفلس في الانداية لمن يجي دفع العدل . ولمن النظام ده حيقع ومش بعيد . حيقول ,, انا يا امباشا البنقو ده لا حقي ولا شفتو .
سمعنا البشير اجتمع مع ابن الميرغني لمناقشة الاشتراك في الحكومة . يعني الميرغن جونير كل الوكت ده والوزراء والنواب والتصريحات والصور والبيانات ، وهو ما مشترك . طيب لمن يشترك حيعمل شنو ؟ كل ما الوزيرة زغروتة تزغرد ، يملص الجلابيو ام لياقة ويحلف الا يدوه سوط سوطين في البطان . ما هو مشارك وان كان قاعد في لندن
وبجي الخرطوم سياحة . اظني دولاب في الخرطوم ما عندو .
المحن انه الجيش يصرح والدفاع الشعبي يصرح ويحتفل بمرور ربع قرن علي تكوينه . والجيش يصرح وعطا يصرح وحميدتي يصرح . وحتي مصطفي شحادين يصرح . وعبد الرحيم يقول يقزقزوا بي ناس شرق الجبل بعد ما قال قشو امسحو قرقشو فتفتو ادرشو واطحنو . ويتكلم عن بشر هم مواطنون . اين هذا من الاسلام الذي يتشدقون به . هل القزقزة بالمسلمين نوع من شعاير الاسلام . العم ود الاغا صاحب المقهي المشهور في قلب امدرمان ، شاهد احد الوافدين يطلق بصقة تريانة في القهوة . وعند الاعتراض قال الوافد . مالو ؟؟ فكان الرد انت تبصق كدة واخوك ده يبصق كده ويجي واحد تاني يبصق كده ، انحنا نعوم ؟ كل واحد يصرع ويبشر بالموت والهلاك . ماليها حق الناس تتبرأ من الجنسية السوداني . وكل يوم بين 5 الي 8 الف بشر بيتخارجوا من السودان .
ونسمع نفس اسطوانه عدم التفريط في شبر من الوطن . حلايب والفشقة ديل كانوا جزء من هندوراس . وشمال دارفور تحتفل بتخريج 5 الف مجاهد . اذا الدفعة 5 الف مجاهد في شمال دارفور بس، معناها عندهم اقل شئ 50 او 60 الف مجاهد ده غير حميدتي والجيش الاصلي وكتيبة نسيبة . والطيران والبحرية وجامعي الزكاة وجهاز المغتربين . مش كان احسن يشتروا جرارات ويدوا الناس ديل كل واحد كدنكة وملودة وسلوكة . ومشكلة السودان كان اتحلت . وبدل ضباط بروس ، نخرج فنيين وميكانيكيين وبنايين ونجارين وعمال صيانة ومساعدين طبيين ودايات . مافي غير دشمان ودواس ؟
ده كله من البطل بقي يرسل لي قصاصات وصحف سودانية بالبريد الالكتروني . ناس العباسية بيقولوا اسوأ حاجة البطل يضربوه بي سلاحه .


[email protected]


تعليقات 8 | إهداء 0 | زيارات 3307

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1184337 [بنت الناظر]
0.00/5 (0 صوت)

01-09-2015 07:07 AM
سمعنا البشير اجتمع مع ابن الميرغني لمناقشة الاشتراك في الحكومة . يعني الميرغن جونير كل الوكت ده والوزراء والنواب والتصريحات والصور والبيانات ، وهو ما مشترك . طيب لمن يشترك حيعمل شنو ؟

ماهو كان فعلا فى الحكومة لكن كان خاتنه فى الرف يعنى منظر بس ..يمكن فى الحكومة الجديدة دى الآبالسة ناوين ىدوهوا وزارة المواصلات عشان يسافر سريع لى لندن وبالعكس ..

أما الكدنكة والملودة والسلوكة والله ياعم شوقى نحن مجهزنها لكل فرد من التتار الجدد وكمان معاها منكريسة ومكنسة عشان ينظفوا الخرطوم اللوثوها وبعد يخلصوا من النظافة يقبلوا على الزراعة وماننسى معاهن سوط عنج للبقول بقم ..لازم يضوقوا المر زى ما ضوقوهوا للشعب السودانى ..

[بنت الناظر]

#1184224 [الدرب الطويل]
0.00/5 (0 صوت)

01-08-2015 09:41 PM
والله يا عم شوقي صدقت حين قلت فى آخر مقالك:
(مش كان احسن يشتروا جرارات ويدوا الناس ديل كل واحد كدنكة وملودة وسلوكة . ومشكلة السودان كان اتحلت . وبدل ضباط بروس ، نخرج فنيين وميكانيكيين وبنايين ونجارين وعمال صيانة ومساعدين طبيين ودايات . مافي غير دشمان ودواس ؟)

[الدرب الطويل]

#1184203 [مواطن]
0.00/5 (0 صوت)

01-08-2015 08:35 PM
اخ شوقي ٠٠ اللواء محمد نجيب كان متواطئا مع الاخوان ولذا تم عزله من الحكم ٠

[مواطن]

ردود على مواطن
[مواطن] 01-09-2015 12:05 PM
محمد نجيب كان اخوانيا وهو شخصية ضعيفة ولاتصلح للقيادة وهو لم يكن من المخططين للانقلاب على الملك فاروق ٠٠

European Union [shawgi badri] 01-09-2015 01:24 AM
اي شرف تتكلم عنه ؟؟لقد كتب في كتب التاريخ انه اول رئيس لجمهورية مصر . وانه هو مفجر الثورة . وهو لم يشترك في الثورة لانه لم يكن له جنود وكان متمركزا في العريش . عندما قال شخص في الهرم ان جمال عبد الناصر هو اول رئيس , اعترضص ابن محمد نجيب بان والده هو اول رئيس, فقال له رجل امن ان والده كان طرطورا . وانتهي الامر بابن نجيب في السجن وعذب ومات في الاعتقال . ابنه الثاني كان في المانيا وصلته المخابرات المصرية لانه بدا يدعوا ضد اعتقال والده وقاموا بتصفيته . هذه هي مذكرات نجيب بعد ان افرج عنه بعد موت ناصر .


#1183857 [غايتو]
5.00/5 (1 صوت)

01-08-2015 10:18 AM
و الله إنت رائع ...

[غايتو]

#1183848 [Jamalon]
5.00/5 (1 صوت)

01-08-2015 10:02 AM
Thank you Shawgi

[Jamalon]

#1183808 [عباسية موردة]
5.00/5 (1 صوت)

01-08-2015 09:20 AM
يا عم شوقى انا بختلف معاك فى توصيف الترابى انت قلت وكيل ابليس فى الارض ولكن الحقيقة المؤكدة والثابتة انه خليفة ابليس فى الارض فالوكيل بيكون مقيد بتفويض قانونى ومحدد الصلاحيات اما الخليفة فهو صاحب سلطات مطلقة زى السلف ونؤكد لك ان ابليس فى اخر مقابلةمع مالك خازن جهنم احتج بشدة بان يكون هو والترابى فى درجة واحدة فى لظى ذاكرا ان عمايله تتضاءل اما موبقات الترابى فى اهل السودان .

[عباسية موردة]

#1183706 [صبري فخري]
0.00/5 (0 صوت)

01-08-2015 07:29 AM
قبل شهر تم التحقيق معي من قبل جهاز اﻷمن ... حيث قال لي الضابط انهم استطاعوا انهاء المعارضة السلمية والمسلحة ... ولكن ما لا يعلمة الضابط ماذا قدمت الانقاذ طيلة ال 25 عاما غير الخراب والدمار واللصوص 0123652351

[صبري فخري]

ردود على صبري فخري
European Union [عنقالي من الجنوب] 01-08-2015 11:03 AM
يا ود يا مناضل انت

ناس تقشر بانها معارضه للنظام منتظرين منهم شنو


#1183685 [شاهد اثبات]
5.00/5 (2 صوت)

01-08-2015 06:38 AM
عشان كده قلنا نرفع الحوار الى مستوى الاقاليم الستة الزمان(دارفور-كردفان -الشمالي الشرقي الاوسط=الجنوب(الحريات الاربعة) ونلغي الولايات الكثيرة المسيخة دي ونعمل انتخابات حرة نزيهة في كل اقليم لحاكم اقليم بدرجة نائب اول للرئيس وبرلمان اقليم (البطاقات النيفاشية 9و10و11و12 وبصلاحيات دستورية موجودة في دستور 2005 وكده بتكون اتحلت مشكلة المركز×الهامش(الهوامش الستة) المزمنة


2- تبقى مشكلة الثقافة دي خاصة بالمثقفين كل اقليم يطلق فضائية وراديو ومجلةوجريدة وموقع انترنت يعرف بي هويته الثقافية واللغوية ذى ما هي وعبر تراكم الالف السنين ويخلو ناس المركز ديل في الشيء الشفينو عن نفسهم والدنيا بقت قرية صغيرة والسودان اصلا في حاجة لان يعرف اولا حضاريا وفكريا وثقافيا قبل ان يعرف سياسيا فقط..وهذا عمل المبدعين في مناخات ديموقراطية حرة وتتوقف هجرة الناس الى المركز سواء كانت لاسباب اقتصادية او نزوح حروب وكوارث طبيعية او ابداعية

يااخ الراحل عبدالعزيز داؤود من بربر وكان محولجي سكة حديد الصدف والحظ خلتو ركب القطر جا لخرطوم لتظهر مواهبه الفذة ويصبح الفنان العظيم عبدالعزيز داؤد وبينما فردتو في الحقيبة"ود لمر" الاجمل صوتا ظل خفير مدرسة بربر العليا بنات حتى توفى الله يرحمه..ودي ازمت ابداع الهامش لانعدام الوسائط في الاقاليم زمان..البسكن جنب الاذاعة والتلفزيون في ام درمان يشتهر والبقعد في الاقاليم كان بقى انشتاين ما بتقوم ليه قائمة...
بعدين يا عمنا شوقي لي ما بتحتلفو بالذكرى السنوية للمخضرم للهادي الضلالي اول من اخترع رؤية السودان الجديد...لمن لقى ثلاثة من عربان الجزيرة مقلبنها شكلة لي رب السما مع ولد من اولاد ام درمان...قعد يحجز ساعتين ولمن انتهت الشكلة قال ليهم انتو من وين ؟؟ قالو ليه نحن من "الحشروا عباس" قال ليهم "انتو البجيبكم هنا شنو؟؟ نحن قاعدين نجيكم هناك؟؟".. وذهبت مثلا وطبعا ده كان زمن نميري واديس ابابا والعصر الذهبي والحكم الاقليمي اللامركزي المركز ينبح والاقليم ماشا..ونميري كان بيضرب الزول البحاول يزحوامن الكرسي من التنظيمات الشمولية الثلاث والجبهة الوطنية..وخالي ناس في حالهم والدنيا كانت توتو كورة شباب ورياضة والجنوب مع ابيل الير ولاقوا رخا وتخا...ديل رسلو الموت الرخيس وطائرات الانتوف للاقاليم واستهدفوا اذلال اي سوداني في المركز ..ياخ اقول ليك قول الراحل عوض دكام وده بتاعنا من بحري "بالمناسبة انا من خدم بحري "...ديل ما خلو خادم الحرمين الشريفين ؟؟..وبالله عليك الله اعتذر لي القرود لقد اسئت لها اسالة بالغة بتشبيهها بعلاجيم الانقاذ..القرود من الثديات العليا اكثر ذكاءا وديل برمائيات"ضفادع شكلا ووعيا ..وشاهد ايام لها ايقاع..

[شاهد اثبات]

ردود على شاهد اثبات
European Union [شاهد اثبات] 01-09-2015 05:13 AM
البندقية عبارة عن خشبة وماسورة في واحد فيكم عنده سؤال؟؟يا حليل التعلمجية زمان
ارتقو شوية وخلونا من فلان وعلان ومهندس وبروف نجوم الغد وايام لها ايقاع ..فهمتوالكلام المكتوب ده ولى لا...؟؟؟
وكل ما كانت التعليقات بهذا المستوى كل ما استمرت ازمة السودان والتحرر من شنو وليس منو؟؟

United States [ميرغني] 01-08-2015 11:13 PM
أي باشمهندس تعني يا (أبا محمد) ؟
اذا كنت تقصـد الباشمهندس (اسماعيل سلمان بخيت) فأنت مخطئ..

European Union [ابومحمد] 01-08-2015 11:19 AM
كيفك ياباشمهندس مالك بقيت ما بتكتب اسمك!!!!


شوقي بدري
شوقي بدري

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة