طيب ما تقول
01-08-2015 11:56 AM


في بلادي كل شئ ممكن .. حتى وإن كان غير متوقعاً البتة … في عصر يوم غائم جميل قرر العبد لله زيارة صديقه (ص) الذي عاد إلى الوطن بعد أن قام بإجراء بعض الفحوصات والتحاليل بالخارج ، في شارع الإنقاذ الفسيح ببحري قمت بركن العربة في أقصي اليمين (ركنة معلمين) ودلفت داخلاً إلى المنزل حيث وجدته في معية نفر من الأصدقاء يتسامرون ، ولم تمض دقائق قليلة حتي دخل إلى صالون المنزل حيث كنا (طفل) صغير يصيح
– العربية الحمراء صدموها .. العربية الحمراء صدموها

على الرغم من أن عربتي حمراء فاقع لونها إلا أنني قد إستبعدت الأمر فما من سبب واحد يجعل عربتي (تصدم) فقد تركتها في أقصى يمين الشارع تجلس في أمان الله ، لكن بيني وبينكم (قلبي اكلني) فقمت مسرعاً لإستطلاع الأمر لأجد أن العربة هي (عربيتي ذاااتا) وأن أحدهم وهو شاب يافع يقف أمامها وهو (يرجف) بينما (البوكس) الذي كان يقوده قد عانق عربتي عناقاً حاراً و (كشاها) مسافة لا تقل عن عشرين متراً .
– حصل خير يا إبني الصدمة ما مهمة بس أنا عايز أسالك ؟
– إتفضل يا استاذ
– بالله وريني دي عملتها كيف ؟
أخبرني (الشاب) وهو لا يزال في حالة ذهول بأنه فقد (التوازن) وهو يرد على رسالة في (الواتساب) ، يبدو أن (ولدنا) كان يسير بسرعه شديده إذ ان شكل العربة يوحي بأنها قد تعرضت لاحد أسلحة الدمار الشامل حيث أختفي الجزء الخلفي منها بقدرة قادر !
أمسكت بهاتفي وإتصلت على (أخواننا) في (999) لأطلب منهم حضور شرطة (المرور) وجاءني الرد في رسالة مسجلة :
– للإتصال بشرطة النجده إتصل على الرقم 999 !!
فقلت في داخلي بالله .. يعني ما 999 الضربناها دي ؟ .. كررت الإتصال باخواننا في 999 وكان الرد المسجل يأتي دائماً بان أتصل على 999 ، كان من الواضح أن هنالك خللا ما في كبانية شرطة النجده فطلبت من أحد الشباب الحاضرين (يشوفو لينا بوليس) وقد كان حيث جاء رجل مرور وذهبنا جميعاً إلي قسم المرور لتسجيل الحادث .
– لو ممكن يا أستاذ (التأمين) و(الترخيص) و (الرخصة)؟
– ده التأمين وده الترخيص
– والرخصة وين؟
– ما معاي .. عاوزين بيها شنووو؟
– كييف يا استاذ ده حادث مروري؟
– حادث مروري لمن عربيتين ماشات يتصادمو لكن عربيتي دي واااقفه وما فيها زول !
أصر الشرطي وألح على ضرورة إحضار (رخصة القيادة) على الرغم من أنني قد بذلت جهداً مقدراً لإقناعه بوجهة نظري التي تبدو منطقية ولما أعياني أيصال الفكرة (وحرق روحي) له قلت ليهو :
– ممكن أسألك سؤال وتجاوبني عليهو؟
– جداً
– أفرض ياخ في زول (أعمى) وعايز يشتري ليهو عربية يتنقل بيها ويجيب ليهو سواق ، قام مشي الوكالة إشتري العربية وقال لي ناس الوكالة وصلوها ليا البيت لحدت ما أشوف ليا سواق .. قاموا ناس الوكالة وصلوها ليهو البيت وختوها ليهو في (حتت) عربيتي دي وجا (ولدنا) ده صدمها أها … يجيبو ليكم رخصة منووو؟؟؟
– هنا نظر الشرطي إلى بيانات البلاغ ثم نظر لي مبتسماً وهو يقول :
هو بالله إنتا (الفاتح جبرا) بتاع الجرايد .. طيب ما تقول !!
كسرة :
باقي ليكم كان بيقصد بي كلامو ده إني زول (لايوووق) ؟؟

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و) !


تعليقات 11 | إهداء 0 | زيارات 4753

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1184366 [ابن السودان البار]
5.00/5 (1 صوت)

01-09-2015 08:36 AM
يا استاذ جبرة كدي سيبنا من عربيتك دي طفل الميرغني المبروك جوجو مستشار الريس فين الايام دي ( حلاتو ) لا صرح من قصره في لندن ولا من قصره في القاهرة ولا زار السودان ؟؟؟ يكون بشبش مزعله والا الايام دي الجو ما مناسب بالسودان ؟؟؟ كسرة جوجو فين ؟؟؟

[ابن السودان البار]

#1184262 [عبدالله ود جبارة]
0.00/5 (0 صوت)

01-09-2015 12:09 AM
في أول أيام الإنقاذ كنت اجلس امام منزلنا اتناول شاي المغربية، جاء احد الجنود وقال لي ممنوع التجول قلت له يا أخي أن لست متجولا، أنا جالس أمام منزلي. هذا تماما ما حدث لجبرا. سيارة واقفة وقام أحدهم بصدمها ما دخل الرخصة في ذلك؟ نفترض أن صاحبة السيارة امرأة مسنة لكنها ثرية ولا تقود سيارة فما دخل الشرطة في الأمر؟

[عبدالله ود جبارة]

#1184220 [الدرب الطويل]
5.00/5 (2 صوت)

01-08-2015 09:27 PM
يا استاذ جبرا كان لازم تشيل معاك رخصتك.. القانون قانون وللا ما كده؟
انا اؤيد توقيع مخالفة بحقك..
لو كنت فى اسكندنافيا كان نقول معليش لانو عندهم السجل الشخصي موجود فى الشرطة والخدمة المدنية وما عليهم غير يدخلوا الرقم الوطني حتى تظهر عندهم كل البيانات عن الرخصة وتسجيل السيارة وسكنك وممتلكاتك وعملك.. انت فى امازونيا اصحى اصحى يا جبرا..

[الدرب الطويل]

#1184199 [COUR]
0.00/5 (0 صوت)

01-08-2015 08:26 PM
واللة يا جبرة الظاهر عليك لافيها بكرتين

[COUR]

#1184121 [ابو عادل]
0.00/5 (0 صوت)

01-08-2015 04:47 PM
سلا م استاذ جبره
ما وريتنا الحصل شنو في البلاغ بتاع النفايات
حتي لا تفقد مصداقيتك
وانتهي علي شنو بالله

[ابو عادل]

#1184072 [قدرو قدرو]
0.00/5 (0 صوت)

01-08-2015 03:18 PM
يا جبرة انت عارف تماما الحاصل كلو فى موضوع خط هيثرو عليك الله اقلب الصفحة واسال من ظلط سهى العملوا الزول الباع خط هيثرو ولو محتاج لمساعدة اتصل بدكتور البونى ممكن يسلمك كل التفاصيل وعلى الاقل كان الناس عرفت زول هيثرو ده عقليتو تافهة زى اخلاقو كيف قال شريف قال قوم بلا دجل بلا قرف معاك .

[قدرو قدرو]

#1184042 [ابو الهادي]
0.00/5 (0 صوت)

01-08-2015 02:29 PM
هههههههههه متلقى حجج إنت هنا بكتبوا في التقرير سيد العربية اعمى لكن انت مفروض ما تسوق بدون ما تكون معاك رخصة السواقة دي براها مخالفة جاي من جبرة لحدي بحري بدون رخصة والله بلد هاملة بس وادوك فرصة يسمعوك عشان تقنعهم والله لايوووق

[ابو الهادي]

#1184007 [قول يا لطيف]
4.88/5 (5 صوت)

01-08-2015 01:33 PM
مع إحترامي وتقديري لشخصك و إعجابي الشديد بما تكتب، ولكن حسب القانون المعمول به في كل الدول فإنه يجب على سائق السيارة الإحتفاظ برخصة القيادة معه وإبرازها متى ما طلب منه ذلك. الذي فهمته من موضوعك هو قيادتك للسيارة إلى منزل صديقك بدون وجود رخصة القيادة معك، وهذه مخالفة لقوانين المرور. لقد اخطأ الشرطي حينما نظر اليك مبتسماً إذ كان عليه أن يحرر لك مخالفة لقيادتك السيارة بدون وجود الرخصة. عذراً أستاذي الفاتح ولكن بفعلتك هذه تشجع الآخرين على القيادة بدون الرخصة وأنت الصحفي الناقد عليك أن تكون قدوة للآخرين. أرجو الا أكون قد أثقلت عليك ولك مني العتبى

[قول يا لطيف]

ردود على قول يا لطيف
United States [أبو ياسر] 01-09-2015 01:43 PM
شرطي المرور ليس من حقه سؤالك عن رخصة القيادة طالما أنه لم يجدك فعلياً في وضع قيادة السيارة وليس من حقه أن يستنتج أنك قد سبق أن قدت السيارة ولو كان استنتاجه منطقياً.


#1183995 [ودالزين]
0.00/5 (0 صوت)

01-08-2015 01:07 PM
اجايت السؤال تحدد بعد ما نعرف الحصل مع الشرطى

[ودالزين]

#1183990 [omer]
4.88/5 (5 صوت)

01-08-2015 01:01 PM
استاذ جبرة : كفارة والجاتك في مالك سامحتك - بس عندي ملاحظة بسيطة : انت دائمآ تدعو لسيادة حكم القانون والاشياء التي طلبها منك شرطي المرور هي من اساسيات قوانين المخالفات المرورية ( حتي ولو كانت غلط ) فطالما هي موجودة وكذلك معروفة لمعظم سائقي المركبات , فما كان في داعي للفلسفة واللولوة وتعمل افتراضات مافي محلها.
الحوادث المرورية غالبآ مايكون احداطرافها مخطئ وآخر موقفه سليم وكلاهما مطالب بإبراز الاوراق المطلوبة - فكون ان موقفك سليم ( راكن سيارتك ركنة معلمين ) لايعفيك من ابراز الاوراق المطلوبة .
ثم ان قيادتك لسيارتك بدون ان تحمل معك رخصة قيادتك يعتبر مخالفة في حد ذاتها
في الدول المحترمة( السعودية , الامارات مثلآ ) لايحق لك امتلاك سيارة الا اذا كنت تمتلك رخصة قيادة , وبالعدم تحضر رخصة قيادة للسائق او الشخص المخول بقيادة هذه السيارة .

[omer]

ردود على omer
[Omer] 01-08-2015 11:15 PM
ابو عبدالله كلامي مافيهو حاجة بتحرق الدم.
انا ماعسكري بس قلت حقائق .
انا قلت :الاشياء التي طلبها منك شرطي المرور هي من اساسيات قوانين المخالفات المرورية ( حتي ولو كانت غلط ).
شكلك ماشفت بين الاقواس .

European Union [ابوعبدالله] 01-08-2015 05:29 PM
والله انا زاتي دمي اتحرق منك ياخي الراجل صدمو سيارته وهي واقفة اعتبرها واقفة جنب بيتو وجاء واحد صدمها دخل الرخصة شنو في الحادث الله يهديك انت عسكري ولاشنو


#1183953 [koko]
3.75/5 (4 صوت)

01-08-2015 12:13 PM
الجاتك فى عربيتك سامحتك......ماشاء الله تاريك مرتاااااااااح عندك عربيه وكمان حمراء

[koko]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة