المقالات
السياسة
يا (شيخنا) عديل من غير تأويل
يا (شيخنا) عديل من غير تأويل
01-09-2015 03:47 PM


يا "شيخنا" عديل
من غير تأويل
طلال دفع الله
…… …… ……

ممكن نسأل ..
يا شيخنا "العالِم" ..
و تاج راسنا سؤال،
عن ظاهْر الحال
نستفسر ..
و برضك أيضاً
عن باطْن الحال؟:

علي حَسْب التأهيل
حَسْب المجهود
و الفايده البتعود
بالثمر المردود
علي شعباً مكدود
بس ممكن نسأل:
ماهيتك كم
و قصاد أيه؟!
و كيفن بتكفِّي
كمان بتزيد؟!
و من وين يا شيخ
البيت الكيف
لمعان الوش
و برادو و تبريد؟؟!!

و بى جاي يا شيخ
كم عامل كادح
بى حيل مهدود
بى عرقو يجود
من دغشو البدري
و لى رجعة نومو،
و هو أصلاً
- أصل الأشياء -
سيد الإنتاج
و العايد من كَدّو
قِرِش قِرشين
ما يكفَّن يومو!!
و
كم زارع بزرع
و حصادو يزيد
هَمّين فوق هَمو
يزيدَن كومو.

و
نفس الأحوال
الحق ينقال
في معلم
في مهندس و طبيب
محامي و صحفي
و حتى التجار
ناهيك يا شيخ
عن واحد حدَّاد
ميكانيكي .. و نجار
عن راجي مَعاش
عن سِت الشاي
في رصيف فَرَّاش
عامِل سِرِّيح
واحِد فَرَّاش
شافِع درداقه
شديد مدعوك
و الحال بطَّال
ما فيهم واحد
لاقيهو التَّكْتَح
و هَلُمَّ و جَرْ
في حين يا شيخ
كِدا -ماشاالله-
لاقي البتريد؟؟!!

هَمْسِ و كوراك
بى حسب الحال
في أمور الدين
عارفين فاهمين
من خلوه و روضه
و مدرسه جامعه،
من أُم و أبو
حبوبه و جد
من أخت و أخو
الأهل الجيران
سيد الدكان
عارفين فاهمين
في شان الدين
حكاية عرْسَه
طلاق أو نَفَقه
و كيفِن بيكونوا
الصَّلاْه و الصوم
لى حايض النسوان
و بْيَبْطِلوا كيف،
نصيب الوَرِثه
الصلا و الصوم
الزَّكا و الحج
سُنَناً و اركان،
و أيه حُكم السَّرْقَه
من حلفة سيِّدنا
يقيم الحد
علي فاطم بِتو
و لى حَد الآن،
و الظُّلْمِ الظُلمات
ًعليهو الخالق
قد حرَّمو قطعاً؛
و حرَّمو أكتر
ما بين الناس
ما الناس يا شيخ
من مصدر واحد،
كِدا زي ما يكون
من مصدر واحد..
طيف الألوان
و الحكمه كمان
الوطن العالم
و الجِنس إنسان
و الحُكمِ علي الناس
حُكْم الرحمان
و إلخ .. و إلخ

يعني الدايرين
يا شيخنا عديل
من غير تأويل
أو لَخ في لَخ
تدِّينا الرَّد
بصحيح السنه
و بصريح القرآن
لاقيت بس وين:

قتل الأرواح
شَنَع التعذيب ..
في بيت أشباح،
مجزرة التشريد
قطع الأرزاق
شان التمكين
يا شيخنا مُباح؟!

و يا شيخنا متين
الرِّبا إتحلَّل؟!
و الطالِع من سرقه
بى كم مليار
بى حُكم إندان
يدفع قِرشين
و يكون إتحلَّل!
و ما ننسى كمان
الناس السارقين
ساكت لابدين
فاضحاهم صاح
ريحة الفاسدين
عمارات
قنوات
شركات
جامعات
زوجات
فارهات
و أرصده كاربات
كان جوَّه و كان برَّه
للعين ظاهرات
و بى جاي الناس
الشعب الساس
و الشعب الراس
وجبات إتنين
كايسين لكين
وين ما لاقين
فيا شيخنا دَحِين
معقول الدِّين
كِدا عندك صاح؟!

و الزِّنا يا شيخ
هو حلال و بَلال
للزول المُحصَن
و كمان يا شيخنا
نهار رمضان
للفضحو الفضَّاح؟!

مش برضو حسابك
زي حقو و أكتر
بى إيد الدَّيان
يوم بعث الأرواح؟

ورِّينا الشايف
قِدَّامك مترامي
الحال الواضح
و زايد متنامي
و يا "عالِم" كيف
العدلِ يقوم
بدل التخريف
بالشي العارفين
أهو دا الدَّايرين
منك راجين،
مُش بالطِّنطين
في الغلط الشين
تحمي السلطان
من غير ماتشوف
الحكم نضيف
و الشرع الظاهر
صابو التحريف.

معقول يا شيخ
دا الحاصل و متواصل
مايعرفن عينيك
رمشة أجفان؟!
مُش برضو الساكت
عن قول الحق
أو لاجمو لسان،
للباطل حامي
مش كِدا يا "عالِم"
بحديث و صحيح
أخرس شيطان
فما بالك في أخرس
شان قابض متعامي؟؟!!
مُش صاح الزَّي دا
في يوم التحشير
راجيهو سعير
و شرابو الحامي؟!
و هل ممكن نِتلام
لو قلنا "العالِم"
بالواضح و فاضح
يا شيخنا حرامي؟؟؟!!!

[email protected]


تعليقات 0 | إهداء 0 | زيارات 942

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




طلال دفع الله
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة