جوابات من خارج الحدود
01-09-2015 08:33 PM

(1)
الى شيخ الطريقة إياها ، المزازى فى الدياسبورا مع جنس الناس العاطلين عن الغرض والهم . الصائم ديمة عن الكلام ، والضحاك ديمة بلا سبب ، والشاطر فى اللف والدوران ، سلام يجيك يولول فى مدينة الضباب ، و يلقاك فى أحسن الأحوال ، معاك الوليد المستشار الذى لا يشير ، و لا يشار اليه ، وقد تعافيت من كل الأمراض المدغمسة ، والحال كله تمام ، الضباب انقشع فى مدينة الضباب والثلوج ذابت ، والبلد البعيد راق ، والفتة بردت ، ودخانها راح مع ادراج الرياح. وشباب سبتمبر مات واندفن . وثكيل النائحات طواه الزمن مثلما طواهم الكفن . علّ الناس ما مرتاحة ، لأن سيدها الشيخ ما مصدق ، و فضل يزازى بعيد ويرازى ، يضمن السلامة من غدر الجابودى ابو كلابيش . الناس كلها شايلة حداد ، تنادى على ابوها الشيخ : عليك الله تعال . فراقك طال . وانت عارف انه الدقيقة وانت مافى مرة ما بنقدر نطيقها . عليك الله تعال . عشان دميعات السرة تعال . وكمان بالمرة تحضر القسمة الجديدة ، قالوا المرة دى مدنكلة : شى برلمانات ، و شى رئاسات : وشى ولايات يرشوها رش . عليك الله تعال، عشان تشيل لينا معاك شلية ، تكبر بيها كومك , لمن تدفسنا وسط كيمانك . ما اصلنا كوم من كيمانك . عليك الله تعال : منو غيرك بعرف العاب الملوص دى . تخلينا لمنو فى غابة الملهوفين دى ، كل من بداخلها يتلمظ ، عاوزلو قضمة . يأكل نصيبو ونصيب جاره ,. حصلنا يابونا الشيخ ، ما اصلنا بنندهكم فى الحارة من زمان ، ، ما تفهمنا غلط ، نحن ما قلنا الفتة الحارة . عارفنك دى ما بتقدر عليها . الله ذاتو قال لا يكلف نفسا الا وسعها . ونحن ما عاوزين نكلفك فوق طاقتك ، علّ حرجانين من سؤال الناس : مالو الشيخ زائغ . يكون ما أخذ خبر بالفتة اللى بردت وبقت ثلج ، ونحن ما عندنا اجابة ، تب ما عندنا اجابة علّ بننده عليكم : ياربى بهم ، وبآلهم عجل بالفرج.



على حمد ابراهيم
[email protected]


تعليقات 4 | إهداء 1 | زيارات 912

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1184840 [ali hamad hbrahim]
0.00/5 (0 صوت)

01-10-2015 09:02 AM
أقول للأخ العمدة السفير ما عندو سيد . تب ما عندو سيد . حرم ما عندو سيد . معليش يمكن ما عندك زمن وما قريت ماذا يكتب السفير من تفلتات جابت خبره مع اهله الانصار كأبن آبق ودى تكون عوجة كبيرة وخسارة . وارجوك كان عارف لى سيد توصل ليه كلام منى وقول ليه يسد نيتو !ّ ناس تجدع بالحجارة زى المحانين .

[ali hamad hbrahim]

#1184794 [osama dai elnaiem]
0.00/5 (0 صوت)

01-10-2015 07:54 AM
جوابي ليك في الاول ياسعادة السفير تحيات وسلام حار واسمعني اقول ليك الجواب خلي بلا عنوان وطاقية ارميها فوق كما قال يحي الفضلي وبعدين يلبسها الفي مقاسه والظاهر جوبك طاقية مقاس لكل رأس والظاهر ناس مصر كمان وصلهم الجليد والصقيع مع جوابك الحريف وكمان جوابك ياوليد هبش التربالة الزيي وزي ادروب وقال ليهم لمتين انتو ماشين للفتات ليلة الخميس وليلة الاثنين ما تسو ليكم تقابه في الفضايه وتنادوا ادروب وهمت واساغة وكمان تكوركوا لجون وشول من فوق الحوش وتقولوا ليهم كمان انحنا سوينا فته ومولد عشان نجمع الحبان تاني ونعيد السودان من جديد ونقلعه قلع من اعمامنا الاكلوا حق اليتامي ولمن يجي الدواس يقوموا صوف وغشونا بالفتت الحاره ولقيمات ( التجنيد).

[osama dai elnaiem]

#1184710 [عمدة]
0.00/5 (0 صوت)

01-10-2015 01:38 AM
لقد سمع شيخ الفتة نداك واعلن تأييده ودعمه لرئاسة القشير أب كرشا زى الزير. وبكرة سيدك الصادق بشركوا ليه بي جرادة (تعويضات) بيختف عبايتو ويقوم جارى الخرتوم وساعتها لا سعادة السفير أريتك تكتبلو جواب زى ده.

[عمدة]

#1184693 [Almisahir fi izallail]
0.00/5 (0 صوت)

01-10-2015 12:17 AM
يا سعاة السفير.. اعمل حسابك .. بسختك!!! انت و كمان معاك شوقى بدرى!

[Almisahir fi izallail]

ردود على Almisahir fi izallail
European Union [ali hamad hbrahim] 01-10-2015 09:14 AM
حلوة مداخلة الاخ المساهر فى عز الليل _ يحذرنى الشيخ يسختنى وكمان يسحت معاى صديق العمر شوقى بدرى . واقول للاخ المساهر ما فارقة معانا نحن الاثنين . اصلنا مسخوتين من زمان . هسع فى سختة اكبر من سختة صديقى شوقى دى . شايل عكازه ويفلق فى خلق الله المقدسين يمين شمال الى أن سختوه وخلوه يزازى فى الغربة وسط الثلوج زى طير السمبر . وكمان لحقونى ليهو ولأمات طه . ما شايفنى داقش فى الاصقاع ! علّ نصيحتك مقبولة : ضرر اخفّ من ضرر .


على حمد ابراهيم
على حمد ابراهيم

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة