المقالات
السياسة
علي السيد (الهناي هنا الهناي)
علي السيد (الهناي هنا الهناي)
02-05-2015 10:54 PM


الاستاذ علي السيد المحامي دايما ما يعارض قرارات سيدي الختم وهو الوحيد البيقول (البغله في الابريق)...لكن كأنو بيأذن في (مالطا) زول شغال بيهو ماف ...لكنه لم يكل ولم يمل من المعارضه طيلة هذه الفتره ...سيدي شارك في الحكومه علي السيد (اعترض)...سيدي شارك في انتخابات 2010 علي السيد (اعترض)...سيدي شارك ب(جعفوري) عشان يساعد الرئيس علي السيد (اعترض)...سيدي خزل الشباب في سبتمبر علي السيد(اعترض)..سيدي دعم البشير في انتخابات الرئاسه ومشارك كمان في 2015م علي السيد(اعترض)...علي السيد دا عمل لسيدي دا وجع (راس) لمن سيدي زعل (وسيدي زعلو صعب )......اها يا علي سيدي فصلك عديل كدي تاني اعترض ...انت ذاتك تستاهل اكتر من كدي انت المقعدك لي يوم الليلي معاهم شنو ؟؟؟!!!
كنت عايز ادافع عنك ولا ادخل واسطه ونشوف القلبو محدثو دا منو يفصلك... لكن من قالو لي فصلك ( السيد) زاااتو ...(بيني بينك كدي كرعي (بردن) و(خدرن) وقلت ما دام سيدي زاتو فصلك عاد نسوي شنو ...نشكي لي منو ؟؟؟!!( الشكيي لي اب ايدن قويي )....
غايتو يا ابو علوه قصتك دي زكرتني بي قصه( حاجه) كبيره كدي كان في البلد... وما عندها (ضهر )...ولا عندها (ارض )....ومعاها بنتها ...تاني لا قريب ولا حبيب في البلد ما عندها ... هي زوله مافيها كلام (انثى ولا دسته رجال)...اصلو ما بترضى الحقاره ...بعدين يا ابو علوه ...بنية الحاجه دي بتمشي (تلقط الواقود) من الجناين في البلد... (طبعا هي ماعندها جنينه لكن بتلقط من جناين الناس ...في ناس ما بيسألوها وفي ناس بطردوها وبدقوها ...وكل مره تجي لي امها تبكي ...يابت ؟؟ (الدقاك منو ؟؟؟(البت تبكي دقاني( سيداحمد)...الحاجه تلبس توبها وتلحق (سيداحمد) ...وتفرج فيهو البلد ....وكل مره بهذه الطريقه....ومره من المرات جات البت تبكي وملابسها ملطخه بالدم ....يا بت الدقاك منو؟؟؟ والحاجه (متحربسه )و (مستعده وعايزه تلبس توبها عشان تلحق (سيداحمد) ...لكن كانت المفاجأه على الحاجه ثقيله ...عندما اخبرتها بنتها بأن من ضربها هذه المره لم يكن هو (سيداحمد) ولكنه كان (العمده) بي شحمو ولحمو ...(دقاها بغصن شوك) !!!!...
وقفت الحاجه في حيرة من امرها بعد ان كانت (متحربسه ) ومستعده لأخذ حق بنتها من (سيداحمد)...................... لكن الامر هذه المره شكل لها صدمه و(دوخه وخدار في الكرعين )....وقالت لبنتها بعد ان استجمعت قواها لكن اصابتها (تمتمه ):-( يا بتي عاد نسوي شنوو ما دام الهناي زاتو هناكي).....
يا علي السيد اسع نسوي ليك شنو مادام (الهناي زاتو هناك)...


[email protected]


تعليقات 2 | إهداء 0 | زيارات 713

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1202771 [julgam]
1.00/5 (1 صوت)

02-06-2015 08:34 AM
قاصد تقول البتاع بتاع البتاع،عافى منو أبو هاشم

[julgam]

#1202757 [ابو هاشم]
1.00/5 (1 صوت)

02-06-2015 08:01 AM
ههههههههه دي قويه شديد ‎

[ابو هاشم]

حذيفه ابوعوف
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة