كنايات عامية
02-11-2015 03:02 AM


)الكناية) في اللّغة هي التكلّم بما يريد به خلاف الظاهر و(كَنَيْت) أو )كنَوْت) بكذا عن كذا، إذا تركت التصريح به وفي الاصطلاح هي لفظ أريد به غير معناه الموضوع له، مع إمكان إرادة المعنى الحقيقي، تمتلئ لغتنا (العامية) بكنايات كثيرة أردت في مقال اليوم أن استعرض بعضاً منها:
- أخلاقو في مناخيرو: تقال للشخص كناية عن (بالو الضيق) كون أنه مستعد للشجار و(الشكل) لأتفه الأسباب، وهذه الخصلة تكاد تكون ملازمة للموظف أو العامل (الما مقتنع) بي شغلانيتو.
- أيدو لاحقة: تقال للشيخ يظن به فعل الكرامات وعلاج الأمراض حتى إذا ما أصابك (مرض) شددت إليه الرحال فلم تجده لأنو (بي بساطه) مشى الأردن يتعالج.
- أيدو خفيفة: تقال للشخص الذي تمتد يده لأخذ مقتنيات الآخرين ووضعها في )جيبه) أو حيازته (يعني نشال)، أما إذا كانت تلك المقتنيات (مال عام) فلا يشترط أن تكون (أيدو خفيفة) وممكن (يقزقز) على راااحتو!
- أضانو تقيله: تقال للشخص الذي لا يسمع جيداً و(تقل الأضان) يمكن أن يكون )مصطنعاً) كذلك الذي يمارسه المسؤولون تجاه (نباح) المواطنين حول مشكلة ما ! أو الأزواج عندما يطلب منهم العودة في المساء (مبكراً)!
- خشمو مسيخ: تقال للذي لا يستطعم الطعام (في الغالب يكون عندو ملاريا).
- من إيدك دي لي إيدك دي: عبارة يقولها المرشح للناخب عند الانتخابات وتصبح غير ذات قيمة بعد فوزه لأن (الناخب) عندها مش ح يكون عندو (إيدين) خالص!
- إيدو طرشة: كناية على أن هذا الشخص (أبو إيد طرشة) لو ضرب ليهو بيها زول لو رشوهو بالموية ما بيقوم تاني.
- روحو محرقاهو: تقال للشخص (الأخلاقو في نخرتو) !
-لسانو حلو: الشخص صاحب اللسان الحلو هو ذلك الذي يحادث الناس بمعسول الكلام (ما بعرف يتماسخ).
- مبسوط أربعة وعشرين قيراط: تقال للشخص المبسوط للآخر.. (ما ينبسط ليه؟ عامل ليهو عمارتين من مرتبو)!!.
- خشمو فاكي: تقال للشخص الذي لا (يمسك السر) والغريب في الأمر أن هذا الشخص في العادة يبدأ حديثه بعبارة: أقول ليكا (سر)!!
- كراعو حارة: تقال للشخص الذي تأتي الكوارث متزامنة مع قدومه وتكثر هذه المقولة عند (إنقطاع التيار الكهربائي) لأنو لازم يكون في زول (في نفس الوكت) دخل ليهو حته!
- عينو حارة: تقال للشخص إذا قام بالتعليق على شئ ما وأصاب ذلك الشئ مكروه، كذلك الشخص الذي رأى (سخل) يقف على (تربيزة) فقال: الشئ مكنة خياطة !
- راسو ناشفة: هو ذلك الشخص المعتد (بي رايو) حتى لو كان غلط، كذلك المسئول الذي أتى بالبكور و(أخرجنا) من ملة (التوقيت العالمي).
- زيتو طالع: كما هو معلوم فإن الزيت النباتي يستخرج بعد (عصر) الحبوب .. يعني عشان يجي زيت لازم يكون في (عصر) والزول عشان (زيتو يطلع) لازم (يتعصر) والمعنى واضح!
- فاتو القطر: تقال للذي فاته قطار الزواج وتقال للأنثى أيضاً إذا ما تعدت الثلاثين ولم يتقدم لها الزول الفاتو القطر ده ذااتو .
- نفسو فاتحه: تقال للشخص الذي على الرغم من أن كل ما يحيط به يبعث على (الطمام) و(سد النفس) إلا أنك تراه مقبل على الحياة (ليه مش تعرف)!
- لا بهش لا بنش: يقولون إن فلان لا بيهش ولا بنش يعني (لا بيحل لا بيربط) دلالة على سلبيته مما يؤكد تماماً إنو (عضو برلمان)
- جلدو تخين: تقال للشخص متبلد الشعور وما (بحس) وهذه صفة تتناسب طردياً مع حجم المسئولية التي كلما كبرت كلما إزدادت طبقات الجلد مما أدى إلى (تخانتو)
- لسانو خفيف: (أنظر خشمو فاكي)..
- سلوكو ضاربة: تقال للشخص إذا فقد جزءاً من قواه العقلية كما يمكن أن يقال له : مكشكش ومدروش ومهترش وفاطي سطر هذا قبل أن يقوم بإعتلاء (الصينية) أما بعد الإعتلاء فيقال له : فاكه منو - ضارب فيوز - فاكي صامولة - مسحلب - ومجنتر!
- عينو طايرة: كل ما يعينو ليهو سكرتيرة يقوم (يعرسا) !
- قلبو ميت: أنظر (نفسو فاتحة).
- دمو تقيل: تقال للشخص الذي بطبعه ينعدم عنده الإحساس بالآخرين ولا يجيد قراءة وجوه من يخالطهم مثقلاً على الحاضرين كذلك الشخص الذي يزورك عند التاسعة مساء دون سابق إنذار وأنت منهمك في عمل ما فتجلس صامتاً ... ثم تدخل وتمرق ثم تغمض عينيك وتتثاءب .. وبعد أكتر من ساعة يقول ليك : كدى أفتح لينا (الجزيرة) نشوف الحاصل شنو؟
- دمو خفيف: المقال ده مش كده ؟ .... شكراً!!!

كسرة:
- باضت ليهو في القفص: تقال للشخص (المحظوظ) فالجدادة ما باضت ليهو (تحت العنقريب) أو (في التكل) وسط الصحون والحلل و(العدة) عشان يقعد يفتش.. لا.. دي باضت ليهو جوه القفص (ذاااتو) يعني بس يفتح ويشيل وعلى (البنك) طوااالي!

كسرة ثابتة (قديمة)
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و).


تعليقات 9 | إهداء 0 | زيارات 6335

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1206453 [zolo]
0.00/5 (0 صوت)

02-11-2015 09:32 PM
(عينو طايرة) زي البرلماني البيكره محاربة الختان ومتخصص في قهر النساء

[zolo]

#1206380 [أبو محمد]
0.00/5 (0 صوت)

02-11-2015 07:14 PM
الله يديك العافية يا عمنا جبرا ، والله أجمل كناية هي ( لا بهش ولا بنش ) للبرلماني السوداني !!!!

[أبو محمد]

#1206245 [مشتهي الموليتا بالدكوة]
0.00/5 (0 صوت)

02-11-2015 03:35 PM
دمك عسل ...

بس حكومتنا طلع دمها قراد ... يحلنا منهم الله .

[مشتهي الموليتا بالدكوة]

#1206178 [baker]
0.00/5 (0 صوت)

02-11-2015 02:16 PM
فلان ده براي
او برلمان تقال للشخص كثير الكلام

[baker]

#1206141 [نوم العافية]
0.00/5 (0 صوت)

02-11-2015 01:30 PM
وين ناس (بيكسرو ثلج)) الحاجات الجديده

[نوم العافية]

#1206060 [وحيات الشعب السودانى]
5.00/5 (1 صوت)

02-11-2015 11:53 AM
كمان
" فلان سمو فاير" - "عكرت دمنا ياخ" - "فلان كاتل حيلو" - "نحن شعب مرطب"

[وحيات الشعب السودانى]

#1205975 [ال]
5.00/5 (1 صوت)

02-11-2015 10:25 AM
متعك الله بالصحة والعافية يا جبرا وما يخلى دمك تقيل

[ال]

#1205840 [الدرب الطويل]
5.00/5 (2 صوت)

02-11-2015 08:22 AM
دمك خفيف وشربات عدييل كده..
يديك العافية..

[الدرب الطويل]

#1205798 [ابو محمد]
5.00/5 (8 صوت)

02-11-2015 07:16 AM
مبسوط 24قيراط ونفسو فاتحة ودجاجتو تبيض في القفص وعينو طايرة وايدوا خفيفة ان توفرت فيك تلك الكرامات فابشر فانت من اهل التمكين والمشروع الحضاري العظيم .

[ابو محمد]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة