المقالات
السياسة
الاتحادى الاصل يستدعى ام يستعدى --؟!!
الاتحادى الاصل يستدعى ام يستعدى --؟!!
02-11-2015 10:50 AM


ظل الحزب الاتحادى الديمقراطى العتيق العتيد يتعرض للابتلاءات والامتحانات وللاسف لم يتعلم قادته وقواعده من تلك الابتلاءات سوى (قوة الرأس ) .
تشرفت بالانتماء لهذا الحزب الوسطى الكبير ومازلت مدافعا ومؤمنا بالثوابت والقيم والاتحاديه الاصيله مهما اختلفت القيادات وذلك لسبب بسيط وهو اننى مع حداثة عهدى بالحزب والتى بدأت على مشارف العام 1983م من القرن الماضى الا اننى اتمسك بتلك الثوابت لانها كانت الدافع الحقيقى وراء انتمائى للحزب والعمل من خلال اماناته وفروعه ولاننى لم انساق لاستقطاب او عزومه من احد بل كانت قناعات وتقدير للنشاط والعمل الجاد المؤسس الذى وجدته باولئك النفر من القاده الزعماء بفرعيات الخليج وكيف كانت قناعاتهم التى اقنعت الكثيرين للانتماء والعمل من خلال الحزب واكبر المحفزات كان وجود ثلاثة اجيال بتلك الفرعيات ابتداء من جيل الاباء الى جيل الابناء والوسط ممثلين لكل مناطق ومدن السودان بلا استثناء لكل ما ذكر فان امر الحزب يهمنا بقدر ما وجدنا فيه من ثوابت قابله للتطبيق بكل الازمان والامكنه وعندما يتعرض الحزب لمثل هذه الهزات العنيفه نحس بها ونحزن كثيرا لها ونتصدى بكل جد واجتهاد لكل المعيقات المفتعله دائما وما كان امر التخلى عن الثوابت من اعلى قمة الحزب ببعيد .
لقد كررنا مرارا بان هذا الحزب الكبير وبابوابه الكبيره الكثيره سوف تسهل الدخول والخروج من الكل دونما مراعاة لاسس او لوائح فخرج من خرج وعاد بعضهم استوزارا بعد ان جاهروا بمعارضتهم لمسيرة الحزب وقيادته وذهبوا بعيدا انتماءا لاحزاب اخرى او التكوينات المتشظيه وخرج بعض القاده الفاعلين واثروا الصمت والفرجه فقط واخرون يجاهدون من اجل الحزب ومؤسساته ومكانته بطريقة اضعف الايمان وحتى الاستاذ المناضل على محمود حسنين نائب الرئيس الشرعى يؤثر البعد لكى لا يكون سببا فى تشتيت وتفكيك ما تبقى من الحزب وهكذا ترك الامر بلا بواكيى على الوأد المتعمد .
اما آخر بدع القياده الاتحاديه البيان او القرار الذى اتخذ بليل من اجل استعداء ما تبقى من فواعيل الحزب – اليكم البيان
كشف الحزب الإتحادي الديمقراطي الأصل عن إستدعاء أعضاء وقيادات الحزب المتفلتين والمعارضين لدخول الحزب في الإنتخابات في كل من ولايات سنار والقضارف والجزيرة.
وقال عضو لجنة المحاسبة والقيادي بالحزب اسامة حسون، أن لجنة المحاسبة إستدعت من وصفهم بالمتفلتين بالحزب والمعارضين للدخول في الإنتخابات المزمعة، مشيراً الى ان الحزب سيتعامل معهم وفق إجراءات صارمة خاصة في ظل الوضع السياسي الراهن، وجدد حسون تحذيراته لبعض قيادات الحزب من التحدث بإسم الحزب بمعلومات غير صحيحة.
ثم ماذا بعد هذا , اما كان الاجدر ان يكون القرار استدعاء كل الاتحاديين الحادبين على مصلحة الوطن والحزب للخروج من مأزق الانتخابات وعدم كفاية العدد لتغطية النسبه المتبرع بها من الحزب الحاكم وهل يستقيم ان يكون لحزب اسس بالامس قريبا متشظيا من حزب كبير ان يغطى اكثر من ثمانمائة دائره ويعجز حزب السودان الاول ان يجد ما يسد به رمق الدوائر المتنازل عنها من النظام الانقلابى .
فيا شيوخ وزعماء الحزب الاتحادى اعملوا ما يشبه الحزب وما يشبه قاماتكم ومقاماتكم وما يشبه تاريخكم وما يشبه الامانه التى تركت فى اعناقكم من الزعماء الوطنيين الاوائل ولا تفرطوا فى شباب الحزب الوثاب المتطلع لبلوغ الغايات الساميه بالعمل من خلال حزب السودان الاول . فقط بالرجوع للثوابت والدستور واللوائح سوف يلتئم الشمل ولن تفقدوا الحزب ولن تفقدوا حتى مواقعكم .
اسقاط النظام والحوار معه خطان متوازيان .
من لا يحمل هم الوطن – فهو هم على الوطن .
اللهم يا حنان ويامنان الطف بشعب السودان --- آميــــــــــــــــــــــــن


[email protected]


تعليقات 4 | إهداء 0 | زيارات 644

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1206510 [محمد المبارك ابوشريف]
5.00/5 (1 صوت)

02-11-2015 11:56 PM
عوووووووووووك انت بتتكلم مع منو يا شقيق ربنا يطراك بالخير الحزب ده خليناهو زمااااان من يوم ما دخلوا بيهو مشاركه مع الارعن عمر البشير . وبعد ما ضاق معظم الشباب الجلد والتعذيب والمطارده والتشريد وحرب الارزاق ونوم البلاط في زنازين الشرقيات وغيرا وغيرا وعشان ما نسمح لاي كائن من كان يقول لينا في يوم من الايام انتو كنتوا مشاركين نظام تعسفي فاسد ضليل . بربك يا شقيق خليهم عايشين في الوهم اللي هم فيهو وخليهم فاكرين انهم ورثوا حزب الحركة الوطنية بالحياة خليهم عايشين علي الوهم الجميييييل انت مصحيهم عشان شنو وخلي البشير ورهطه عايشين علي نفس الحلم الجميل وحتي ناس الامن خليهم رافعين راية الحزب الاتحادي هو نحن خسرانين حاجة ....انت عارف يا ابوحميد انو نميري كان بيحارب قيادات الاحزاب والنقابيين ويزج بيهم في السجون وفاكر نفسو ملك الدنيا وما فيها لانه كان عايش علي وهم (ابوكم مين نميري ) والمقصودين هنا هم الشباب والطلاب والطلائع والرواد وكان برضو عايش علي وهم انو بيفرخ في جيل الثورة البحمي الثورة . وبقدر ما ازعجته الانقلابات العسكرية الا انها لم تزعجه بنفس قدرهتاف جماهير الهلال يوم قالوا ليهو (ابوكم مين قاقرين )ولم يكن المقصود في ذاته انذاك نادي المريخ العظيم بقدر ما كانت هي رسالة قصيرة ومختصرة ومزعجة جدا لراس النظام الامر الناهي الذي لم يتعظ من الرسالة وانت عارف الحصل من نميري بعد داك كان شنو ...ههههه راحوا فيها ناس الهلال والمريخ وبفية الاندية وظل الجمهور كماهو , ودارت دورة الايام وكانت نفس المرحلة السنية هي الاطاحت بنظام مايو وهي التي تولت الرد المباشر علي ابو القاسم وابو ساق وابوقرون . في يوم الخميس 4 ابريل 1985 ابو القاسم محمد ابراهيم كان معزوم في مناسبة زواج احد اقاربه ولمن سالوه عن رايه في المظاهرات التي اجتاحت البلاد قال ليهم مايو خلاص انتهت . الكلام ده كان قبل يومين من بيان سوار الدهب السبت 6 ابريل لان ابو القاسم شاهد في الشوارع مد بشري مهول لاعمار سنية لايمكن التحكم فيها خرجوا من تحت الارض ملاوا كل الشوارع والطرقات . الان دع هذا النظام يسير علي ماهو عليه هو يشكل الحكومة ويشكل المعارضة ويختار لها ماذا تاكل وماذا تشرب وماذا تلبس وماذا تقول . الان توجد اعمار يافعة وبحجم مهول اكبر مما كان في 86 وقطع شك راجين اللحظة وقولة كن . ومهما استطالت الايام مصير النظام الي زوال ومافي حكم بيدوم ليهو لي زول وزي ما منعوا الناس حتي من حق التعبير قطع شك يوم داك بيتمسحوا من خارطة السودان وخلي يشوفوا ليهم بلدا تلمهم هم والمشاركين معاهم بكل اموال السحت والشاطر فيهم اخير ليهو يتخارج من دلوقتي والعاوز يعمل فيها بطل ببقى عليهو المثل البقول شقي الحال البقع في القيد. نحن يا ابوحميد ما حانبكي متل النائحات علي الاموال المسروقة لان ربنا سبحانة وتعالي بيمحق المال الحرام وما حا نقعد نبكي علي مشروع الجزيرة والنقل النهري والخطوط الجوية والبحرية لان اهل السودان قادرين علي اعمار ارضهم ولكن لو في شئ يبكى عليه فهو الرجولة والمرؤة وقول لي كيف ناس تشارك حكومة تجلد في الحريم وطالبات المدارس والجامعات والطبيبات والصحافيات وتطارد ستات الشاي ... تتصور ستات الشاي . نسوان مرقن يبعن في الشارع عشان يعيشوا بشرف هن واطفالن تطاردهم الكشات والاشاعات واشانة السمعة بعد ان اوصلهم النظام العقيم حد العوز، نظام يطارد ستات العرقي والمريسة ويصادر مواعين الخمر ويفرض عليهن حد الجلد والغرامة وتجي ست العرقي يوم الجمعة بي شحمها ولحمها تشتري نفس المواعين من دلالة القضاء السوداني ويقولوا ليك شنو يمكن ماشية تسويهن زهريات في البيت ويرتع القضاء السوداني في المال الحرام وهو نفس القضاء الذي خرج رجاله بالشورت والعراقي الدمورية يهرولون امام تعلمجية الكيزان بالدفاع الشعبي دفاعنا الشعبي ياهو دي والجكة دي لله والنطة دي لله وهو تاني بعد كده بقت في هيبة قضاء .
النظام الان مبسوط ومرتاح انو قضي تماما علي الاحزاب وانو حزب الامة ده نحن مخوفين زعيمو المهدي وهو حايم بي بره نحمر ليهو في عيونا وما بقدر يسوي حاجة زيو وزي علي محمود وغيرو وانو الاتحاديين فرتقناهم وجبنا خبرهم وقدر البفرفروا ياهم ناس علي السيد وابوسبيب ونحن شايفنهم. الان يا ابواحميد النظام اخر اطمئنان علشان كده بكتل في الاطفال والنساء في جبال النوبة ودارفور والنيل الازرق بدم بارد وهم اخر انبساطة لكن تعال شوف من الزاوية التانية في ثورة سبتمبر المجيدة الذعر والهلع وردة الفعل العنيفة كانت قدر شنو عارف ليه ؟ لان الثوار كانوا شباب وصبيان ويافعين عزل وعلي بعد خطوات من مخدة البشير ومن الاعلام العالمي .
انت فاكر انو غازي صلاح الدين والطيب مصطفى وشوية ( السواح ) المرقوا معارضين هم في الاصل معارضين للنظام ياخي ديل كلهم كانوا سكرانين بخمر السلطة ولمن فطموهم فتحوا وشافوا الخطر المحيط بباقي مخمورين السلطة وقدامك الترابي الان يغرد مع سرب النظام اما غازي فيسمي حزبه (الاصلاح الان ) والاخر كان يحرر (الانتباهة ) والان يحرر صحيفة (الصيحة ) وهم كانوا جزء من النظام والان هم لم يخرجوا عليه ولكنهم يبكون عليه وعلي اجله المتسارع وانظر حتي الي مسمياتهم وتمعن فيها ،يعني ديل مش خريجين مدرسة وستمستر وما من تلاميذ جان جاك روسو وما قراوا للمفكر خالد محمد خالد ولا اعتنقوا افكار مصطفي محمود الافي محاربة الشيوعية والتشفي منها فحال هؤلاء اشبه بحال الشاعر نصر بن سيار الكناني والي خراسان في اواخر عهد بني امية وهو يصيح وينبه بني امية من خطر ابو مسلم الخراساني في خراسان :
أبلغ يزيداً وخير القول أصدقه..... وقد تيقنت ألا خير في الكــذب
بأن أرض خراسانٍ رأيت بـــها ...... بيضا إذاأفرخت حدثت بالعجب
فراخ عامين إلا أنها كبرت ........ لمّا يطـرن وقد سربلن بالزغب
فإن يطرن ولم يُحتل لهن بها ........ يلهبن نيران حرب أيّما لهب
وكانت الثورة العباسية تنسج خيوطها بدقة واحكام ويبشر بها الثوار علي هيئة تجار يجوبون البلاد والاسواق فلم يرهم حكام بنو ولم يحسوا بهم فكتب اليهم نصر بن بسار مرة اخرى محذرا :
أرى تحت الرماد وميض جمرويوشـك أن يكـون لــه ضــــــرام
فـإنّ الـنـار بالـعـود بــن تـذكـىوإن الــشـــرّ مــبـــدؤُهُ كـــــلام
فـإن لـم يطفئوهـا تـجـن حـربـامشـمّـرة يشـيـب لـهــا الـغــــــــلام
وقلت من التعجب ليت شعـري أأيـــقـــاظٌ أمـــيّــــة أم نـــيــــــام
فـإن يقظـت فــذاك بـقـاء مـلـك وإن رقـــــــدت فـــأنـــى لا ألام
فإن يك اصبحـوا وثـووا نيامـافـقـل قـومـوا فـقـد حــان القـــــيـام
فغـرّى عـن رحالـك ثــم قـولـي على الإسـلام والعـرب السـلام
شفت كيف يا ابو حميد بتعود دورة الايام وكيف يتساقط الطغاة وكيف يصور لك التاريخ حال المشفقين علي النظام من ناحية وحال كسارين التلج والمهرولين من ناحية اخري .
واخر قولي مثل ما قلت اولا فلا تبك علي حزب توالى او تولى فكل ما تراه الان هي لافتات غير حقيقية يرفعها النظام او المشفقون علي النظام ولنا عبرة بقول الشقيق المهاجر صلاح سطيح :
سوف نبقى مثل نجم السعد نحيا بالدواخل رثما تصفو السماء
وعائـــــدون باذن من نهوى هلال في ســــــــــــــــماء

[محمد المبارك ابوشريف]

ردود على محمد المبارك ابوشريف
[محمد حجازى عبد اللطيف] 02-12-2015 08:40 AM
ود المبارك الشريف --حبابك عشره يا غالى
شكرا كبيرا على المرور والتعليق --بصراحه تعليقك اقوى من مقالى ويصلح وثيقه للتاريخ وموضوعى جدا --
نحن فى النهايه همنا الوطن السودان او ما تبقى منه --- والتاريخ لن يرحم والمرحله القادمه لشباب الوطن الخلص وبعد ان يثبتوا عدم تورطهم فى مشاركة او مبايعة او معاونة النظام وسوف يطبق قانون العزل السياسى بقوه --دمتم

[محمد احمد] 02-12-2015 03:58 AM
شوية طمنتنى يا محمد مبارك . اعدت لى شوية من الثقة الفقدناها بسبب الانتهازيين والنفعيين من ﻻ ضمائر لهم وﻻ قلوب الذين يملئون اركان وجنبات اﻻحزاب التى يعج بها ميدان السياسة السودانية طمعا فى محلية او معتمدية او وزارة ﻻ لرفعة او تطور بلدنا ، وانما من منافع شخصية بحتة وانانية وجشع ﻻ يكترثون للقتلى من الابرياء من مختلف الاعمار وﻻ المقهورات بسبب اﻻغتصاب او السعى من اجل لقمة عيش مثلما ذكرت . والله العظيم اعدت لى امل ظننت انه ذهب بﻻ رجعة . شعرت بمصداقية حقيقية فى حديثك ﻻ اعرف لماذا رغم كثرة المعلقين ورغم كثرة الرافضين


#1206496 [محمد احمد]
5.00/5 (1 صوت)

02-11-2015 10:58 PM
هسة يا محمد حجازى انت مقتنع بالكﻻم القلتو لى دا ؟ حزب لو ما الميرغنى اشر مافى زول بيقول بغم وكمان هسة جو اوﻻدو . انا ما بلومك ﻻنو دى اﻻنتهازية العلموكم وربوكم عليها ناس اﻻزهرى . ما شفتو ديمقراطية وما عايزين حتى تقروا عنها واﻻسوا من ذلك ما عايزين تسمعو . ما تزعل من كﻻمى دا لكن فعﻻ انا اندهشت لما قلت لى مافى مالك ومافى وصى وفى كلمة انت نسيت تضيفها للملوكية و للوصاية وهى الرعاية . بضيفها ليك انا . ومافى رعاية . اها قصرت معاك ؟ زول قاعد الف سنة رئيس تقول لى ﻻ احد يملك ؟ زول ممكن يطردكم كلكم بكرة برة الحزب دا وبالجزمة تقول لى مافى وصاية ؟ اكرر ﻻ تزعل . اصلو قالو الجمل ما بشوف عوجة رقبتو .

[محمد احمد]

#1206482 [محمد احمد]
5.00/5 (2 صوت)

02-11-2015 10:26 PM
يا محمد حجازى ، الحزب اﻻتحادى لم يكن يوما ملكا ﻻحد او تحت وصاية احد ؟!!!!! شئ عجيب ومعلومة فعﻻ ﻻول مرة اسمعها . صاحبكم قاعد محكر على رئاسة الحزب خمسمية سنة وتجى تقول لى الحزب ما ملك ﻻحد وﻻ تحت وصاية زول ؟ مافى زول فيكم بيقدر يدخل على الزول دا كان ما قلع حذاءه ودا كان انتا قدرت تخش عليهو . وبعد ما تخش ﻻزم تبوس يدو . وبرضو تقول لى مافى ملوكية وما فى وصاية ؟!!!. فعﻻ كلو ما يزنقوكم بتهربو من المسئولية وتقولو نحنا ما ختمية نحنا اتحاديين . ونفس القصة فى حزب الصادق بالناحية التانية . ما تزعل منى لكن انتو ناس انتهازيين . ساهمتوا ايضا فى تدمير البلد وتاخيرها زى صنمكم اﻻخر اﻻزهرى . برضو قال نحنا ما ختمية نحنا اتحاديين . لكنه ولﻻسف نفذ كل اجندة الميرغنى الكبير وبحذافيرها . كان عندو فرصة هو واحمد خير يعملو لينا حزب جديد عصبو متعلمين ومثقفين لكن اصلو المثل قال فاقد الشئ ﻻ يعطيه . اما موضوع اسم جعفر الصادق مع بعض كدا حتة واحدة خليهو لى مرة تانية

[محمد احمد]

ردود على محمد احمد
[محمد حجازى عبد اللطيف] 02-12-2015 08:46 AM
استاذنا الحبيب الغالى محمد احمد --لك الود والتقدير دوما .
طبعا ما فى زعل حتى الان لاننا نتناقش فى شأن عام يخص الجميع ما داموا سودانيين لم تتلطخ ايديهم بدماء الاحرار ولم يفسدوا او يشاركوا هذا النظام باية طريقه حتى ولو تعاطفا --ولكن ما يزعج هو وصفك للزعيم الازهرى نظيف اليد واللسان وملهم الامه السودانيه وصاحب المواقف المشرفه --بانه صنم --اقتداؤنا او سيرنا واعترافنا بتاريخ الرجل لن يجعل منه صنما بل زعيما وطنيا يشهد له التاريخ القديم والحديث وهنا انتهى الحديث ---دمتم


#1206095 [محمد احمد]
5.00/5 (2 صوت)

02-11-2015 12:34 PM
انتميت لحزب شيعى للاسف . الميرغنى تشيع منذ وقت طويل . ولكنه اخفى هذه المعلومة عنكم حتى يحقق اطماعه ومآربه . ﻻ يوجد سنى مسلم سمى احد اوﻻده جعفر الصادق . كما تمعن ايضا اسماء بقية اوﻻده .

[محمد احمد]

ردود على محمد احمد
European Union [محمد حجازى عبد اللطيف] 02-11-2015 02:30 PM
استاذنا محمد احمد --لك الود والتقدير
شكرا كبيرا للمرور والاضافه المفيده جدا .
انتمائى للحزب الاتحادى الديمقراطى ليس بشروط الختميه --لم يكن الحزب الاتحادى الديمقراطى يوما ملكا لاحد او تحت وصاية احد -- اما موضوع السيد محمد عثمان الميرغنى فهذا شأنه ولا دخل للحزب بالامر --اما سر التسميه فان هنالك الكثيرين من ابناء السودان السنيين يحملون اسم على والصادق وجعفر والمهدى والحكيم فهل اصبحوا شيعه -- الامام جعفر الصادق ليس ملكا للششيعه وان كان شيعيا --دمتم


محمد حجازى عبد اللطيف
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة