المقالات
السياسة
(جقور ) المركز ...و(جقور ) الهامش
(جقور ) المركز ...و(جقور ) الهامش
02-11-2015 07:49 PM


كل الصحف ومواقع التواصل الاجتماعي هذه الايام تتحدث عن (جقور الكبري) التي (نخرت) عضم الكبري كما قالت الحكومه .
قام البعض بمهاجمه الحكومه ورمي اللوم عليها لانهم افتكروا انو الحكومه بتستهر بعقولهم (جقور شنو كمان البتأكل ليها كبري؟؟؟!!! نحن مابنعرف الجقور ؟؟؟!!من زمان الجقور دي ما ساكنه معانا ليه ماعملت العمله دي....؟؟!!! دا اصلو كبري ولا شوال بصل ؟؟؟!!)..
انا غايتو مابستبعد انو (الجقور) تأكل الكبري (الكبري الهين دا ؟؟!! دي ممكن تأكل ظلط بحالو ...تاكل بلد بي شعبو )
الحكومه كلامها صاح (الجقور تعملها حسب معرفتي بالجقور )...لانو البلد زاتها عدمت (الكديسه )...والبلد الما فيها (كديس) يتجدع فيها( الجقر )....وماعادت (الكدايس كدايس) ولا (الجقور جقور)... ليه (الجقور) ما تأكل الكبري ...تاكل ابوهو زاتو ....
الزمن ما (انطور)...يعني الجقور الما بتنطور؟؟!!
الجقور يا اخوانا زاتها حصل ليها تغيير وتطور في عدة نواحي ...ونجي نمسكها (واحدي واحدي)....
اول حاجه الجقور زاتها بقت نوعين (ماف تالت )...النوع الاول دا (مفتح ومقرم ...وود سنترها ...ومطور ادواتو بتاعت الاكل )....انتو لسع من زمن (الاكل الظاهر داك ) يعني عايزين الجقور دي تمسك تاكل في الكبري دا (كرج كرج....كدي)...بالطريقه القديمه دي حايطلع ليهم كديس يخرب مزاجهم ويقطع عيشهم .....انتو لسع من زمن (الجقور البيقبضوها بالشرك (شرك الجقور) ؟؟!!)...ياخ ديك ماطلعت (جقور ) طلعت (فأرااات ساكت)...
عشان جنس الكلام دا (الجقور) دي طورت مسألة الاكل دي واخترعت ليها طريقه جديده اسمها (النخر في العضم)...عضم اي حاجه ..بس تشتغل (نخر ) في عضمها لمن تلحقها (امات طه)....
واكتسبت الخبرات دي واستفادت من علاقتها الخارجيه واصدقاءها في (حلف النخر)..(السوس والارضه )...
هذا النوع حصل ليه تغيير كامل ومسخ من حالته التي كان عليها (من البصل للسيخ ...في مسخ اكتر من كدي؟؟؟!!)...على العموم هذه الطبقه من الجقور بعد ان كانت تأكل الجبنه من دكان (عمك سعيد)...اصبحت تستورد جبنه من الدنمارك...(جبنه دبل كريمه ...جبنه رومي ..جبنه بوك..و(جبنه لافاشكري للفارات الصغيره وكدي)....بعد ان كانت تأكل البصل من ذريبة البصل وساكنه سكنه عديل كدي تركته بحجة (البرستيج وكدي)...بعد ان كان ساكنا في حفره في (الخلاء اوجحر في اي حيطة ) الى (كبري على النيل في المنشيه يعني في قلب قلب المركز ) ...مش المركز في الكلاكله ولا دار السلام ....
على العموم هنالك سيناريو متوقع في الايام القادمه بعد ان انكشف امر (جقور المركز) ان تظهر لنا (جقور الهامش )...مطالبه بحقها (في الكباري والكرنيش والسلطه والجبنه الدنماركيه ).....ولا استبعد كذلك ان تلجأ الى السلاح اذا لم تنفذ مطالبها ....


[email protected]


تعليقات 4 | إهداء 0 | زيارات 1123

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1208144 [روان حسين]
0.00/5 (0 صوت)

02-14-2015 02:50 PM
فعلا البلد اللي مافيها كدايس يتجدعو فيها الجقو ... الله يخلينا كدايس عشان نقرض الجقور دي ونقطع رقبتا

[روان حسين]

#1207269 [Musab manofali]
0.00/5 (0 صوت)

02-12-2015 10:55 PM
مابعيد التطور والطفره الجينيه الحصلت للجقور دي تكون بواسطة الامبرياليه واعداء المشروع الاسلامي

[Musab manofali]

#1207033 [ابو مروان]
0.00/5 (0 صوت)

02-12-2015 03:24 PM
الجقور اكلت كل شيء وما لقت حاجة تأكلها قبلت على الكباري والجسور!!! بعد ما تخلص منها تشوف ليها طريقة تشرب موية النيلين عشان تجففو وبعد كدا النشوف الكباري يعملوها علي شنو ؟؟؟ قولوا لي مصر "سد النهضة ما مشكلة ارجو الجاياكم من الجقور!!!!

[ابو مروان]

#1206478 [hassan]
0.00/5 (0 صوت)

02-11-2015 10:15 PM
موضوع هادف وظريف

[hassan]

حذيفه ابوعوف
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة