المقالات
السياسة
ارشيف مقالات سياسية
البت صفية... والحزب الآخر \" تفتيحة\" !ا
البت صفية... والحزب الآخر \" تفتيحة\" !ا
03-03-2011 08:54 AM

بسم الله الرحمن الرحيم

البت صفية... والحزب الآخر \" تفتيحة\"
( نص مسرحي للقراءة فقط )

الستار مغلق . يسمع صوت من الخارج
الصوت : لن نفتح الستار الآن ، إلا بعد نتأكد من أنت: قبيلتك ، لونك السياسي. ( صمت) هذه إجراءات \" أمنية \" ضرورية... إنه اجتماع مغلق .... سيادة الرئيس...ووزراءه ومستشاريه يجتمعون لأمر جلل .
لا تخف ... ولا تحلم ، ولا يذهب عقلك بعيدا (صمت) إنه اجتماع \" حزبي \" ليس له علاقة بالوطن..... ولن يكون له علاقة بالوطن!!.
هنا ... في هذا القصر المنيف وتلك القاعة الفخمة ... كل الاجتماعات \" حزبية \" ... إن كان لديك شكوي... لن يسمعك أحد. إن كنت تبحث عن وطنك .... لن تجده هنا للأسف . ابحث عنه في \" الكوشة\"... قلب دفتر \" جدو\"... نقب سحارة \" حبوبة\"... فتش في يوميات أكتوبر.... تصفح أحداث أبريل.
آهه... ماذا وجدت ؟ تذكر ؟.... أو حتى لا تتذكر. فالقهر يمحي الأذهان.
( يغير من لهجته)
أنا أذكرك .... سرقوها \" الحرامية\" .... غشوك يا صحبي .. باسم الوطنية.
شيبتك ضيعتها ساكت..... تستاهل.... إنت القاعد تتساهل.
( صمت) أنقذوك ؟ .... لا .... غرقوك؟....يا لله!!...( بدهشة) أنا قايلك سباح ماهر.... ( بحسرة) طلعت بتغرق في شبر موية. (صمت) جدك كان فارس وطويل ..... وأنت يادوبك... بالحيل.... معلول وهزيل.
(بتشجيع) قاوم ... عافر...كان روحك باقية في حلقومك.... إثبت .... وإثبت ...دي ما حقت زول...دي حقت خالقها وباريها . إسألها :....إنت حقت منو؟ ( صمت)
عرفت خلاص ؟ إذكرت...؟ ممكن أتابع شغلي ؟
( يصمت).
الفايدة شنو .... كان فتحت الستار أو ما فتحته ؟... أنت مش معايش الواقع والأحداث .... والا بالع حبوب \" هلوسة\" ؟ .... ركز معانا
أنا بوصف ليك :.... الهوا من ورا الستارة دي ....بــــااااارد. عارف ليه؟
المجتمعين كلهم بيكسرو \" تلج\" لبعض . ما فاضيين يسمعوك ..أو حتي يمرقو من القاعة المرطبة دي . كل واحد فيهم حلف اسم الله علي الدستور والقانون .... إنو يحمي البلد ويحفظ ترابا.... بعد ما انتهو من الفاتحة قالو كلهم : هــيه..... غشيناهم.... قرينا الفاتحة مع إبليس.
( يسمع صوت من وراء الستار )....
تنظيم...... سلام :
نحنا التجار والسماسرة...... ناس الثلاث ورقات....
نحنا الكذابين والحرامية ....ناس الكشة والكشات.
نحنا أسياد العنصرية ....ناس الأزمة والأزمات
قيمة ومركز ووظيفة \" ميري\"...وفوقهم دستة عمارات
( يعود الصوت الخارجي)
زولا مربي مع \" الحمير\" أخلاقو حاتكون شنو يعني ؟
ما نحنا ربونا مع الحمير برضو وبنعرف القش من \" الكفيار\"؟ .
( يعود الصوت من وراء الستار )
حمير شايلة أسفار دولة ..... اعذرونا .... نحنا بجد ما كنا عارفين أنو سرقنا أموال الدولة!!...نحنا سرقنا أموال الحزب !.
ما تسألونا.....إسألو...فلان وفلانة .... ترزي وترزية...
فصلو دساتير...وقوانين ثورية
وحصانة للمرتزقة والحرامية
حكومة قبلية...وعنصرية
بلدا بقميص نص \" كم \"
والكرعين قصصناها وسويناها \" ريدة\" .
يالخال : الثورات زاحفة عربية.....
لما الدور يجينا.... نمرق ؟ والا \" تخرخر\" وتقلب \" هوبا\"؟.
( صوت خارجي يهتف)
الشعب ... يحب ...ينوم ... في سلام.
الشعب ... يحب ...ينوم ... في سلام.
مالكم ما هتفتم ؟
( بغضب)
الليلة حالف ما أفتح ليكم الستارة ... خلوها إذاعة بس....
(يصمت قليلا ثم يتابع)
واحد \" ظريف \" خلاص قال : ولعو شمع وأمرقو!.
سايح في \" سوار دي باري\" وما جايب خبر..!!
ونحنا لاقين نولع \" كوانينا \" لمن نولع شمع؟!!.
قالو الريس بكي لما الشباب \"حشو البصل\"
يا حرام... تراك قلبك \" رهيف \"
وأنا اللي كت قايلك بطل ؟!!.
كت وين لما أولادنا راحو فطيس ؟
والا وين لما الفار أكل الكديس ؟
شرفا ضاع ... عرض إتهتك
مره مكلومة تصرخ : \" شكيتك لـ الله\"
شيخا هرم ... طب ساكت ...
حق الدوا ما عندو..
يا الله يا شافي
يا الله يا كافي
مداااااااااااااااااااااااااد
الحمد لله... أهل المروة جابو الكفن والحنوط
والحكومة...... ضربت لخمة... قعدت \"تجوط\"!!.
تنكل في الرجال ... تهتك في عرض الحريم
إن شا الله الشعب كلو يموت
صرخت صفية : ووب عليا ... ووب
إجدعو لي طرحة...
إجدعو لي توب
وافضيحتاه....
( يوجه حديثه للقراء)
القانون ... أسير
والعدالة ...في السجن
والجيش في إجازة مفتوحة
والمعارضة نايمة ....خم الرماد.... أخير تنوم
والبرطمان سيدو \" ترزي\" عراريق خمس نجوم.
ونحنا فاتحين \" خشمنا\" ساكت و: لوك.لوك...لوك...
الحل شنو ياجماعة ؟.
البت \" صفية\" دي لازم تدسوها في التراب.... وتدسو شرفكم معاها ... لأنو الكلام بقي ما نافع.
ياللا .... كل واحد يفرتك ويلزم بيتو.... يمسك خشمو... يكسر قلمو..
ويقبل وشو عـ \"الحيط\".
الريس داير ينوم علي \" الخيرة\".... : قاعد والا... ما قاعد
ما قلنا ليكم... إنو وحزبو آخر \" تفتيحة\"؟
الحاشية برضو وراها شغل..... هي القروش في البلد دي بتجي بالساهل؟
(ينهر) ياللا...أمشو أهلكم.... بلا مسرح بلا كلام فاضي.
إنتهــــــــي والستار لا زال مغلقا.

الدمازين في : 2011/03/03
محمد عبد المجيد أمين(عمر براق)
[email protected]


تعليقات 3 | إهداء 0 | زيارات 2208

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#105413 [حامدابوعبدالمجيد]
0.00/5 (0 صوت)

03-03-2011 11:42 AM
سلامات
رائع اخي صفية قوية رممت بكارتنا السياسيه قوية قوة لو وزعت على اهل العالم لكفتهم
تصبحوا على وطن


#105324 [محمد صالح العميد]
0.00/5 (0 صوت)

03-03-2011 09:44 AM
الدمازين دييييييييييييييييييييييييييييييييك والله السودان بخير الخلاص قرررررررررب تب وناس الخرطوم كيف . أكيد مولعة تب دايرة يفكوا منها اللجام وبس . وغدا لناظرة قريب بإذن الله.


عمر براق
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة