المقالات
السياسة
عازة نوارة الحارة
عازة نوارة الحارة
02-27-2015 09:51 PM

النوارة بت الحارة

1
يا وهج آمالن اتلاشت
يا نسمتنا العدَّت وفاتت
يا اللميتي سبيط نخلتنا
يا الضويتي زى قمرتنا
في ذات يوم من ها الأيام
نورا انشرا لكن غابت
اتسربتي مع خيبتنا
وضوك راح لى ناسن تاني
ودا الخلاني وراكي أعاني
أقول يا ناس وين عازة الراحت
وينو خليل البيها اتباخت
وغني ليها فصيح ورطاني
لبست توبا العازة ومرقت
وخلت جرحي يتاور تاني
2
ما جات عازة وما حيتنا
ولا بالبسمة يا ناس أروتنا
ولا فد يوم بالليل حجتنا
عازة تزور الناس التاني
ونحن وراها نهم ونعاني
ونتلفح تيبان خيبتنا
نوارتنا اليوم الشالت
ويوم بى فرحة غنت ومالت
طوَّح ريح أمشير بى تاجا
وخلَّت لبس غويشا وعاجا
راحت من بينات ايدينا
يوم كوركتَ يا عازة أرجينا
ما في وكت مرت بى سرعة
وغابت في احزان وأنينا
شقَّتني العبرة وخليتا
على درب الله البيني وبينا
طوِّح ريح أمشير بى تاجا
وضلالتنا بقت عياني
وينو شليل يا عازة الليلة
قالت راح في يوم الشيلة
وأنا غاتس في الماضي الراح
اتذكر في عاشة وسعدة
وناس العازة وبت عشماني
وينو شليل يايمة الليلة
ما خطبوها الناس التاني
ونحن نعاكس
ونحن ندافس
ونحن نشاكس
والناس وصلوا البر التاني
3
يوم بالصدفة مرقت أكابس
وكان اليوم في صبحن ناعس
سمعت أصوات أطفال يتهجوا
وواحدين كان في الصف الخامس
كان بنوتو هناكا بيقروا
من بيناتن وقفت عازة
وقالت لى بى صوتن هامس
كنت الأولى على صفي
كمان أول على كل مدارس
لكن دايرة كراريس تاني
ودايرة رسومي ودايرة كياني
ودايرة علاج يا ناس مجاني
دايرة أشرِّف أبويا خليل
الليهو سنين فد يوم ما جاني
دايرة أرجع لمة حلتنا
دايرة أشعر يا ناس لو مرة
أني في يوم فعلا فرحاني
بس يا ريتو خليل لو جا
أبوى المرة تعب ربَّاني
بس يار يتو وقف ورجاني
أو لو يومن شال عنواني
عايزة ألعب وأنطط يوم
واتفسح مع نور وأماني
أمشي المولد وأمشي حديقة
وأصل البحر الأدرماني
ومع اني حزينة وباكية
لكن شاطرة وكلي أماني
4
مرة وقفت نضمت براى
سألت أحبابي وكل خلاني
وينو البلد البستناه؟
وينو البلد البستناني؟
وينو ابويا خليل الراح؟
وينو أبوى الفات ما جاني؟
5
بكرة نشوف خصلاتك رايعة
بكرة نشوف سماعتك ناجعة
بكرة نشوف سودانك جنة
ونحنا الفيها بقينا مطاوعة
وبكرة نغني معاكي أغاني
أنا قررت أشاركك حزني
وانتي كمان بتشيلي أحزاني.

[email protected]


تعليقات 0 | إهداء 0 | زيارات 566

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




د عبدالرحيم عبدالحليم محمد
مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة