الطفل المعجزة
03-13-2015 11:48 PM


أصيب العبدلله بحالة من (الإستغراش) المفضي إلى إنفجار المرارة وتهتك القولون العصبي وهو يطالع عنواناً رئيساً في أحدى الصحف يقول :مرشح مستقل للرئاسة يطلق على نفسه (الطفل المعجزة) !
للحظة لم أشك مطلقاً بان المرشح قد اطلق هذا التصريح بعد أن أغرته صورته وهو يرتدي (روب التخرج) من روضة (دار الحنان) غير انني عندما دلفت لقراءة بقية الخبر وجدت أن (رئيسنا القادم) قد قام بإطلاق هذا اللقب على نفسه إستناداً على أنه أصغر المرشحين سنا إذ أنه من مواليد 1972 (يعني عمرو هسه 43 سنة) !
أن يطلق مرشحاً لرئاسة (بلد) على نفسه لقب (الأسد النتر) ، تمساح الدميرة أو حتي (الشافو خلو) فهذا من الممكن ولا غبار عليه أما أن يلصق بإسمه لقب (الطفل المعجزة) فهذا ما لم ولن يسبقه عليه أحد ويدل دلالة واضحة بأنه يمكنة ان يترشح لرئاسة مجلس امناء (معهد النور) !
تخيلو معي سادتي الأفاضل أخبار هذا البلد المنكوب بعد (فوز) هذا المرشح المستقل بنسبة 100% كما قال في تصريحه :
- الطفل المعجزة يؤدي اليوم القسم رئيساً لجمهورية السودان
- الرئيس الطفل المعجزة يفتتح عددا من المنشآات
- الطفل المعجزة يستقبل السفير الأمازوني
- بعد إصابتة بوعك صحيه يغادر الرئيس السوداني الطفل المعجزة إلى المانيا
- يسافر اليوم لحضور القمة العربية ... الطفل المعجزة (ههههه)
ولتتأكدوا سادتي من أن هذا المرشح يستحق هذا اللقب الذي أطلقع على نفسه إستحقاقاً لا ينازعه عليه احد تعالو معي لنقرأ معاً فقرات من برنامجه الإنتحابي (بالحاء عشان شئ يبكي) والذي وصفه بأنه يملك حلولاً لكل أزمات البلاد الإقتصادية والسياسية :
- يقول الطفل المعجزة (جايبا من عندي؟) : بان ايرادات الدولة السنوية ستصل بنهاية حكمه الى 134 مليار دولار، وأضاف "بعد عامين من بداية الحكم ستبلغ 41 مليار دولار ... (الله يرحم عمنا خضر الحاوي) !
- كما أعلن المرشح الرئاسي ( ده ) اعتزامه توفير فرص عمل في القطاع العام تصل الي 4.500.000 عامل مقابل 17,962,000 عامل للقطاع الخاص والحر ... يعني بعملية جمع بسيطة 22.462.000 إتنين وعشرين مليون وأربعمية إتنين وستين ألف (فرصة عمل) ... وهنا نسألة (وريالة) الأطفال تسيل من افواهنا (ورينا ديل ح تشغلهم كيف ووين يا فالح؟) !!
- أما عن مشكلة (السكن) بالنسبة للمواطنين فقد وجد الطفل المعجزة (الحل) إذ وعد بتوطين كل سكان السودان بالخرطوم والخرطوم بحري وامدرمان وإلغاء كل الولايات واستبدالها بمربعات سكنية وجعلها عاصمة بمواصفات عالمية (يعني نظام يستبدل السندوتش بتاعو مع زميلو في الفصل وكده)
- أما في مجال التعليم فقد قال (الرئيس القادم) بانه ينوي الغاء كل جامعات التعليم العالي عدا ثلاثة منها حددها في جامعة الخرطوم، السودان، امدرمان الإسلامية وتخصيص جامعة الخرطوم للكليات الطبية والسودان لكليات الهندسة وامدرمان الاسلامية لجميع الكليات النظرية متعهدا بتطبيق مجانية التعليم ليتمكن الطلاب من الحصول على تعليم حديث ومطور (والخرتمية جامعه ديل نموصهم يعني وللا الفهم شنو ؟ والجامعات التلاته ديل نزيد مساحة كل واحده فيهم (كم هكتار يعني؟) !!
وأخيراً ليس هنالك ما يمكن أن يدلل بان هذا المرشح الرئاسي قد وصف نفسه بذلك اللقب بعد أن قام بفحص إمكانياته الذهنية فحصاً دقيقاً سوى أقتراحه لضمان نزاهة العملية الإنتخابية والقاضي بأن يتم استبدال (الحبر) الذي يوضع على أصابع المصوتين بان يمتنع كل من يرغب في التصويت عن قص أظافر يده اليسرى (شفتو كيف) حتى إذا جاء الشخص (المصوت) للصندوق يتولى المراقب بالمركز قص أظافره وبذلك يمكن ضمان عدم تكرار صوته.
(يعني نرسل الصين نجيب لينا ستين مليون ضفارة) .. وتجي ماشي قدام مركز التصويت تسمع واحد من (المصوتين) :
- يا زول ضفر براحه شلتا لحمتي !!
والعجب (النسوان ) :
- وووب عليا فيها كمان (شيل ضفور) .. ضفور شنو العايز تشيلا .. ديل أنا بربي فيهم ليا سنتين !!

كسرة :
يعني ده لو فاز (مثلا يعني) ... يومين ويلحقنا أمات طه !!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+و+(و)+(و)+و
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووو) +(و)+(و)+و

[email protected]



تعليقات 19 | إهداء 0 | زيارات 6977

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1234860 [bluenile]
0.00/5 (0 صوت)

03-26-2015 08:26 AM
يا جبرا نسيت فى ما يرد فى الاخبار السيد الرئيس الطفل المعجزة يغادر مستشفى الاطفال بعد ان تماثل للشفاء

[bluenile]

#1227534 [ابو محمد]
0.00/5 (0 صوت)

03-15-2015 01:29 PM
لكل من افتقد الابتسامة والضحكة ال من القلب ولكل من فشلت فرقة الهيلاهوب والاصدقاء وكل فرق الكوميديا في السودان في اضحاكه نقول له : عليك بمتابعة تلفزيون السودان الساعة الحادية عشر مساء .وما تنسى تستغفر الله بعد ذلك لان كثرة الضحك تميت القلب - أو كما قيل - .

[ابو محمد]

#1227370 [جنو منو]
0.00/5 (0 صوت)

03-15-2015 10:16 AM
العالم دى جنت ولاشنو ؟؟

[جنو منو]

#1227317 [شهنور]
0.00/5 (0 صوت)

03-15-2015 09:13 AM
هذا هو السودان حتى لمن نحلم نشطح . اكيد كوز نازل مستقل .

[شهنور]

#1227101 [على]
0.00/5 (0 صوت)

03-14-2015 09:45 PM
كلام المجانين اوراق الكشف الطبى بتاعته كيف ان شاء الله تمام

[على]

#1227060 [ابوعبدالله]
0.00/5 (0 صوت)

03-14-2015 08:33 PM
ياخوانا خلو بالنية يمكن ينجح

[ابوعبدالله]

#1227040 [بي كرت]
0.00/5 (0 صوت)

03-14-2015 05:23 PM
لمرشح ده ان شاءالله الملايين القبضها دي تدخل عليهو بالساحق والماحق ، ده جابوه من وين الكومبارس ده .. اللعبه مفهومه .. عشان الاسد النتر يظهر بمظهر من المعقوليه امام من يريد التصويت يجيبو الهبل ديل يقولوا هرطقاتهم دي والموضوع يمر بسلام بس اللعبه مكشوفه وتدخل عليك بالبلا المتلاحق يالطفل المعجزه .

[بي كرت]

#1226924 [عيساوى]
0.00/5 (0 صوت)

03-14-2015 12:05 PM
دا موهوم مااصلا دا زمن الوهم

[عيساوى]

#1226922 [حكم]
5.00/5 (1 صوت)

03-14-2015 12:04 PM
الطفل المعجزة ما قال حيزرع المكرونة والشعيرية عشان الشعب يرتاح من هيمنة امريكا على حلاوة مولد؟؟

[حكم]

#1226917 [ABOUSH]
5.00/5 (2 صوت)

03-14-2015 11:58 AM
كده كده نحن لاحقين أمات طه

[ABOUSH]

#1226844 [ربوع السودان]
0.00/5 (0 صوت)

03-14-2015 10:08 AM
نحن في زمن المحن
والمحن تلد المحن
والجوع والجهل والمرض لعضامنا سحن
وفي ايدنا شالين الكفن

[ربوع السودان]

#1226831 [ابو الرشا]
0.00/5 (0 صوت)

03-14-2015 09:48 AM
والله ي استاذ جبره لك التحيه والله دائما ماضحك حتى الدموع عندما اقراء مقالتك الزي دي من انوع ابوكديس

[ابو الرشا]

#1226822 [الشاكوش]
0.00/5 (0 صوت)

03-14-2015 09:38 AM
استاذ جبرا .. متعك الله بالصحة والعافية .ز
ذكرتني مسرحية الواد سيد الشغال .. خاصة عندما علم سيد بأن عاصم بيه السلحدار استلم شيك ب12 مليون دولار .. وكلما حاول الرجل إقناعه بان هذا هو عاصم بيه السلحدار كان يقول ..ده؟!!! ويسأل عاصم بيه الحمــــــــــــــــــــــار مين ؟؟ فيا استاذي العزيز عاصم بيه الحمــــــــــــــــــــــار مين ؟
وهم وطننا يبكي ويضحك في نفس اللحظة.. ألا يكفي طفل معجزة واحد لنُبتلي بآخر...

[الشاكوش]

#1226820 [عثمان]
0.00/5 (0 صوت)

03-14-2015 09:35 AM
والله الراجل ماقايل انه حاينتبه ليهو زول تقوم انت ياجيرة بجلالة قدرك تفسح ليه مساحة قدر دي بالله العمود دا بكلف صحيفتك كم ,خليك موضوعي يااستاذنا والجماعة ديل ما في حد قاعد يعلي شانهم غيركم انتو يا الصحفيين ,وكان عرفت ليك كوز عنده راس ولافكرة قول لينا لكن نحنا عارفين الفيهم بلادة حامياها دبابة.

[عثمان]

#1226798 [ashshafo khallo]
0.00/5 (0 صوت)

03-14-2015 09:03 AM
ينصر دينك يا ود جبره

لكن بس انت نسيت انو دا مدفوعلوا يعمل اللت والعجن عشان يلعب دور المحلل للبشير

[ashshafo khallo]

#1226793 [fatmon]
5.00/5 (1 صوت)

03-14-2015 08:53 AM
ده هو إسم الطفل المعجزه بتناسب لأنه نسخة من فهم الفتوه بتاع الأيام دي الطالع في الكفر

إنت عارف الحقارة الجاتنا من المرشح ده سببها شنو؟؟؟؟؟

والحاجة التانية هو شاف البشيييييير حكم اكتر من ربع قرن على كده أي جداده حايمه ممكن تحكمنا ومافي زول يقدر يقول كر فأنت ليه مستغرب؟؟؟؟؟؟؟؟

[fatmon]

#1226702 [امير]
0.00/5 (0 صوت)

03-14-2015 06:14 AM
كده كده نحن لاحقين أمات طه

[امير]

#1226672 [h]
0.00/5 (0 صوت)

03-14-2015 01:30 AM
شيل ضفوووووووووووووووو!!!!؟؟؟؟

[h]

#1226662 [كاسـترو عبدالحـمـيـد]
5.00/5 (2 صوت)

03-14-2015 01:01 AM
أول مخالفة ارتكبها هذا المرشح هو استعمال اسم " خاص " بشخص آخر وهو د/ مصطفى عثمان اسماعيل وزير الأستثمار الذى كل العالم بتعرف انه " الطفل المعجزة " وبالرغم من ان هذا المرشح برنامجه عاجبنى قوى وسوف يجعل السودان احسن من اميركا.فلن اعطيه صوتى لأنه بدأ بالكذب وذلك بانتحال صفة شخص آخر . يعنى منو اللى يضمن لينا د/ مصطفى بكره بعد ما يفوز هذا المرشح يجى يقول انا رئيس الجمهورية والناس كلها عارفه انه دا اسمى .

[كاسـترو عبدالحـمـيـد]

ردود على كاسـترو عبدالحـمـيـد
[جرتلى] 03-14-2015 09:50 AM
و دكتور مصطفى كان خلا الشغل البيسويه اليومين ديل انا شيايف يكون اقل المرشحين ضررا
و الرئيس التعرفو احسن من الما تعرفوش على قول الود عادل امام

European Union [ashshafo khallo] 03-14-2015 09:06 AM
سمعت قالوا مصطفي اسماعيل اصدر بيان استنكار للتغول علي لقبو والبيان موقع:

مصطفي اسماعيل
الطفل المعجزه ((الاصل))


الفاتح جبرا
 الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة