المقالات
مكتبة كتاب المقالات والأعمدة
محمد عبدالله برقاوي
باص الجنة ..
باص الجنة ..
03-19-2015 10:56 PM


image


قصرتو الرقاب.. مزقتو باقي الكِسوه ..
نحن الصيتنا.. كان .. هيبة زئير أب رسوه..
كشفتو المقانع.. للبسوى .. والما بسوى..
إنهتك..العفاف.. إنزله نون النسوه ..
****
فتحتو البلاد للموبغات .. والسيه..
وجرحتو العباد .. وخلفتو ليها الكيه ..
يوم زي الجراد .. جيتونا غِرتو عشيه..
في ليلة السواد العستو.. فيها النّيه..
وسوسيو الجداد .. مابأمنوهو .. حِديه ..
شريعة الإله ماها النفاق وتقيه..
ناس يحميها جاه وناس بالمهانة سبيه ..
الإسلام سماح.. ما بيضتو ليهو النِيه..
الداير السلام ... ما بقاوي ليهو بنّيه..
والكايس اللطام .. لا بد تنالو أذيه..
عفن الفساد شيدتو لهو بنيه..
وحرمّتو الرقاد علي الكان حياته هنيه ..
التعليم سقط في المرحلة الدونية ..
والصحة البقت .. طبقية للجوكيه ..
الزرع الخضير .. المن جدودنا وصيه ..
جماعة البشير كل زول لهفلو شليه ..
إنكسر .. الملود ..وإنسرقت الطوريه..
****
قطعتو الصلات وعزلتو أهل الدار..
الجوه البكابدو .. وقبضو جمر النار..
والفاتو التراب .. إتكاملو الأمصار..
****
هادنتو الغريب.. من قوته البعتها ..
وعاديتو القريب كيفن بلادنا بتعتى ..
الحاب الكليب ما بيأمن غريزة الشعته..
والطاب الدبيب .. لابد تقرصو الدعته..
****
ريسنا الهُمام .. عامل أسد في الحِله ..
ويركض كالنعام لو بره ماشي محله ..
بي طوب الكلام .. جاب لينا كفوة .. وذله ..
خلى البيت حطام ..ويعاني مغسة وقله ..
أعوانه اللئام .. باعونا بالكِرتله ..
قاموس السِباب كم ..سوو . . مِنو مجله..
ضاع أمل الشباب.. وعاب الإمام الصلى ..
سودان الكرام .. يحِلو عاد حلال بله ..
وأسوأ مافي النظام .. حاكِمنا بي إسم الله ..
من محكمة الجنايات أصلك ولا بتنحلا ..
زي شمس الهجير الحامية للرأس عِله ..
شاد فينا اللجام وساوي الرئاسة مظله ..
شربكت الرسن.. وحلفت حاشى وكلا..
ترهن كل الوطن.. وأبيت عديل تتدلى ..
في شخصك لمن .. كوم الخراب إتجلى ..
الجيش والنفير والجنجويد والشُله ..
وكل واحداً أجير الرشحوك .. بالجُله ..
عشان تحكم دوام .. مع إنو .. كفرك جلى ..
ديل ما بنفعوك .. ساعة الخلوق تنسلا ..
في يوم النشور وعدل الكريم يتعلّى ..

****
باص الجنة .. ما بسوقوهو.. بالمنفله والبنزين ..
وعجلات الكضب .. ما بتوّصِل .. الراكبين ..
ما تغشوا .. الغلابة المؤمنين بالدين ..
مشروعكم فشل ..وفسد السماد والطين ..
****
غلمان النظام .. قايلين فقدنا العِزه ..
كل واحد يطاعن .. وفي الملافظ شَذه..
فاكرين الحُكم ..دايم نعيم .. وملّذه ..
يات من قام نضم ..باقيلنا منقار وزه..
****
رب العالمين .. يمهل .. أكيد ما بيهمل ..
ضيعت السنين .. دوم للحروب بتشهُل..
الشعب الحزين .. ربك عليهو .. بسهِّل ..
غضب الثائرين .. بكر بقوم .. ويعدِّل ..
عوجك باليمين .. والدنيا شاهدة تسّجِل..
والبلد الرهين .. بعدك .. يعود مِتمهِّل ..
سموك الأمين .. وظلمك وحل مترهل ..
بطانتك يمين .. لي عقولنا ما بتجهِل..
يا الناسي اليقين .. الدنيا ضل مترحِل ..
****
19/3/2015

[email protected]


تعليقات 0 | إهداء 0 | زيارات 1484

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




محمد عبد الله برقاوي
محمد عبد الله برقاوي

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة